فيصل عبد الواحد - قانون الجذب و الطاقة

لا تصلي..

أعتذر ان كان العنوان غريب بعض الشيء لكن ما قصدت..ألا تصلي، الا بعد أن تقرأ هذه المقالة اليوم لن نتكلم عن الطاقة و الجذب كما نتكلم دائماً اليوم سأتكلم عن شيء يهمني شخصياً ولا أعلم ان كان يهمك أم لا […]

الخروج من الجسد "الاسقاط النجمي" - فيصل عبد الواحد

خروج..من الجسد ؟

بمناسبة أمسية الخروج من الجسد الخاصة رأيت أن أكتب لك هذه المقالة كتمهيد، وكشرح لبعض الأشياء التي ربما لن تستوعبها الأمسية لمحدودية الوقت حينها بإذن الله ما أردت أن أبدأه معك أولاً هل فعلاً الخروج من الجسد خطر هل يمكن […]

قانون الجذب - فيصل عبد الواحد

انسى الصلاة

بداية، أعتذر إن كان العنوان سبب لك أي اساءة في الفهم فلا أقصد أن تنسى الصلاة أو تنقطع عنها أو تبتعد عن العبادة أو أي شيء كهذا لا سمح الله و أيضاً، هذا الموضوع ليس له علاقة بالطاقة و قانون […]

الشفاء العضوي بالطاقة - فيصل عبد الواحد

الشفاء العضوي بالتحرر

قبل أن أتكلم عما يخصني  دعني أتكلم معك أولاً عن الموضوع نفسه “الشفاء العضوي بالطاقة” لنأخذ مثالاً بسيطا أخوتنا الذين يعرفون قليلاً عن الكمبيوتر و الالكترونيات سيفهموا ما أقول كنت في محاضرة أحد المرات، Comments comments

محتاس مع قانون الجذب ؟

كثيراً قرأت عن قانون الجذب ربما لي، ربما لغيري تشعر بتضخم المعلومات ولا تعرف من أين تبدأ خصوصاً و أن واقعك يهاجمك وهو سبب “عذابك” كل يوم وتريد تغييره، وهذا ما دخلت بسببه لتبحث عن قانون الجذب أصلاً إذا كنت […]

 

يوميات مدرب لغة جسد

وأنت ماشي في الشارع..

شايف بنت بتبص لولد..

انت ضحكت..

وبعدها، شوفت “شحات” في الطريق..

ما ادتلوش حاجة وسيبته ومشيت..

وبعدها بشوية لقيت “شحات” تاني..

ابتسمت..ووقفت طلعت من جيبك خمسة جنيه ادتهاله..

بعدها بشوية شوفت بنت واقفة مع صاحبتها بتسألها :

“هو مين الي كان واقف معاكي ده”

فقالتلها “ده محمد خطيبي”..

ضحكت وكملت مشي..

وقعدت تفكر في كل الي انت شوفته..

قولت تقعد في كافيه تستريح شوية من المشي..

دخلت قعدت، لقيت قاعد في الترابيزة الي جمبك شخص ما..

بصتله وفكرت..

ونسيته، وبعدها جاله تليفون..

فضحكت..

ولمحت بطرف عينك بنت وولد قاعدين بعيد عنك..

في آخر الكافية..

وبرده ضحكت..

قولت تتفرج على التليفزيون شوية..

طلبت من الجرسون بتاع الكافيه يغير المحطة..

عشان كان شغال عليها فيلم جديد..وانت ما بتحبش الأفلام..

لقيت برنامج سياسي..

عليه شخص سياسي..

معروف..

رمز من رموز بلدك..

أو هكذا يطلق عليه..

بصيت..وابتسمت ابتسامة، باحساس بالمرارة..

الجرسون جابلك البرتقان..

سألته البرتقان ده فريش..

قالك آه يا فندم..

بصتله وضحكت..

وسيبت البرتقان ما شربتوش..

ومع ذلك قومت حاسبت..

وكملت مشي في طريقك..

دخلت الجامعة، دخل جمبك بنتين، بصتلهم..

وابتسمت ابتسامة خفيفة جواك..

ولما مشيت كام خطوة..سمعتهم بيتكلموا ويضحكوا..

فضحكت.

يمكن القصة غامضة..

وتفاصيلها ناقصة كتير..

لكن حاول تقرأها تاني بعد ما تدمجها باللي هقولهولك الوقتي..

أول بنت شوفتها بتبص لولد، ضحكت عشان عارف انها اعجبت بيه من بصتها ليه، وتحديداً بستايل لبسه الكاجوال..عشان عينيها راحت على اسم ماركة التي شيرت المشهورة المطبوعة على اليمين بخط صغير..

وكانت عايزه تروح تكلمه..وضحكت أكتر لما رمت سلسلة مفاتيحها عالأرض لما عدى جمبها..

أول شحات، انت عرفت انه كذاب، عشان ببساطة بيغير وشه كل ما يشوف حد يعدي قدامه..

فمادتلوش فلوس..

تاني شحات، حسيت فعلا انه محتاج الفلوس..

حركات جسدة مش مفتعلة..

تعاطفت معاه، وكمدرب لغة جسد..لمسك اوي من جواك..

عشان حسيت انه فعلاً، صادق في اللي بيقوله..

البنتين الي كانوا واقفين مع بعض..

لما سألتها مين الي كان واقف معاكي ده..

عرفت ان صاحبتها كذبت لما قالت “ده محمد خطيبي”، عشان أول ما قالت محمد خطيبي قطعت الـ Eye contact  اللي كان قائم بين عينيها وبين عينين صاحبتها..يعني بالبلدي..راحت بعينيها في حتة تانية..

لما تعبت من المشي..وقررت تقعد في كافيه عشان تشرب عصير البرتقان اللي بتحبه..

كان قاعد جنبك شخص..

من حكمك على لبسه والشنطة الي معاه..

الي طالع من سوستها من الجمب ورقة حافظة مستندات..

وموبايله القديم الي حاطه قدامه عالترابيزة..

قولت انه محامي..

ولما جاله تليفون..وسمعته بيقول انه التوكيل لازم يتعمل بدري عشان يلحق ياخد اجراءاته في المحكمة بسرعة..ولما قال خليه يعمله باسمي أنا، “……” المحامي..اتأكدت أكتر ان حكمك صح..

لما شوفت الاتنين الي قاعدين بعيد..

عرفت ان الولد بيمثل على البنت انه بيحبها..

لأنه بيحاول يمثل انه بيغير..

وعرفت كدة من غير ما تسمع كلامهم..

من حركات ايده السريعة، ونظراته السريعة للأرض، وحركات وشه المتقلبة في كل مكان في الكافيه ماعدا وش البنت دي..

ومن محاولاتها اليائسة لمقاطعته، عرفت انها بتحاول تهديه وتشرحله موقف ما..

فضحكت..

وانها – للأسف – بتحبه بجد..

قولت تتفرج على التليفزيون، لقيت عليه فيلم، فطلبت من الجرسون يغير المحطة عشان الأفلام ما بتستمعش بيها..

خصوصاً الأفلام الجديدة..

عشان كل الممثلين اللي فيها، فاشلين في استخدام لغة الجسد..

وبيمثلوا، انهم بيمثلوا..

الجرسون – مشكوراً – غيرلك المحطة..

لقيت رمز سياسي..

بيتكلم عن حبه للوطن

وللشباب..

ولثورة الشباب..

وانت حاسس من جواك انه منافق..

واتأكدت اكتر، من كلامه المرتب الهادي جداً..

اللي حافظه مش فاهمه..

واتأكدت من كده بإن حركات ايديه بتنفعل مع الجمل الهادية..

وتهدى مع الجمل الانفعالية..

غير انه – اللي زاد الطين بله – انه له “لازمة” بيعملها كل ما يكذب…

هي انه يحرك كتفه الشمال حركة بسيطة..ما يلاحظهاش الا الي يركز فيها.

ضحكت ضحكة بمرارة على مستقبل البلد..

اللي في ايد ناس زي دي..

جالك البرتقان، عرفت انه مش فريش، عشان الجرسون بص بعنيه على يمينه قبل ما يجاوبك..

وجاوب بعد حوالي ثانية من سؤالك..

ودي في لغة الجسد والبرمجة اللغوية العصبية، معناها انه بيكون الحدث اللي هيتكلم عنه..

ما بيتذكروش..

سيبت البرتقان ما شربتوش..

قومت حاسبت..

خرجت ومشيت لحد الجامعة..

وانت داخل من البوابة،

وعسكري الأمن بيطلب الكارنيهات، بعد ما انت دخلت لاحظت بنت، بتبص في الكارنيه اوي والعسكري بيبص فيه، وبيدهولها بعدها..فعرفت انها مش طالبة في الجامعة..

ومشيت كام خطوة، وجاتلها صاحبتها..

وضحكوا..

ان العسكري ما خدش باله..

ان الصورة اللي في الكارنيه دي..

مش صورتها..!

 

ده..

يوم طبيعي، من أيامك كمدرب للغة الجسد..

 

ها..

عايز تبقى كدة..؟

بس خلي بالك..الكلام ده هيبقى على كل حاجة..

حتى على أقرب الناس ليك..

فكر..

قبل ما تقول..

أنا عايز اتعلم لغة الجسد..


 

Comments

comments

المختصر المفيد – الجزء الثالث

قانون الجذب

المختصر المفيد – قانون الجذب

قانون الجذب

قانون الجذب

الجزء الثالث من سلسلة المختصر المفيد.

كلمتك الجزء اللي فات عن المختصر المفيد في جذب المال بإذن الله..

واتكلمنا ازاي جذب المال من أسهل ما يكون، في الحديث عن قانون الجذب، ان لم يمكن الأسهل على الاطلاق..

لإن باختصار جداً، كل الي عليك انك – تسمح – للفلوس انها تجيلك..

يعني انك ما تفكرش فيها، وما تفكرش ايه الشغل الي ممكن يجيبلك فلوس..

اعمل اكتر الحاجات الي انت بتحبها، والفلوس – على ضمانتي بإذن الله – هتجيلك لواحدها..

لكن محتاج أكلمك أكثر عن حاجة اسمها الـ Inspired Action..

عشان ناس كتير جداً فاكرة ان قانون الجذب ده، يعني انك تقعد في البيت، وهتلاقي تاني يوم شنطة فلوس، أو عقد عمل، او عربية قدام باب البيت..

رغم ان الكلام ده مهم – في جزء المعايشة – انك تتخيل وتعيش وتحس وتفرح بكل ده كإنه موجود فعلاً..

لكن خليني اسألك سؤال..

لو انت ماشي، لقيت 100 جنيه واقعة في الشارع..

محتاج تعمل ايه عشان تاخدها..؟

بالظبط، تنزل تجيبها..

لأ.. مش هي دي الـ Inspired Action .. دي الAction العادية..اللي أي حد تاني سواء عارف قانون الجذب أو مش عارفه ممكن يعملها..

لكن الـ Inspired Action  هنا.. هي انك قررت فجأة انك تمشي في الشارع ده..

أو اختارت فجأة انك تمشي تبص في الأرض..

أو لمحت مطعم أو كافيه في آخر الشارع، حاجة جواك قالتلك..

ما تيجي نجرب المطعم ده..

هي دي الـ Inspired Action ..

وهي دي، اللي استخدام قانون الجذب، بواسطة عقلك الباطن..

بيخليك تعملها..

دي فكرة الـ Inspired Action

قانون الجذب مش معناه انك توقف في حياتك..وتقعد في بيتك تنقطع عن كل الناس..

بالعكس..

لكن لما تستخدم قانون الجذب زي ما اتكلمنا عنه قبل كده..

وعيشت حياتك عادي..

هتلاقي الفرص كلها بتقربلك

هتلاقي صوت جواك بيقولك تعمل حاجات غريبة عليك..

هتلاقي نفسك عايز تعمل حاجات جديدة..

لما تعملها..

هي دي الـ Inspired Action ..

يعني لحد ما تاخد الInspired Action  دي.. هيبقى كل دور قانون الجذب، انه يجذبلك كل الفرص وكل الأهداف الي انت عايزها..

ويخليها قريبة منك جداً..

في انتظارك، انك تمد ايدك تاخدها..

مش عايز خلاص..

وعلى فكرة مش معنى انك مش عايز ان ده غلط..

انا شخصياً كتير – في أول معرفتي بقانون الجذب – بفضل الله جذبت أهداف ليا، ولما قربت وكنت على بعد مكالمة تليفون واحدة..جاتلي حاجات أحسن..فمعملتش الـ Inspired Action  دي..

ودي نفسها مشكلة..تغيير الطلبات والأمنيات كتير، دي مشكلة – أو تحدي زي ما اتفقنا – ..

تخيل نفسك قاعد في كافيه..

طلبت عصير برتقان..

وبعد دقيقتين..

ندهت للجرسون قلتله لأ..معلش..

أنا عايز ليمون..

وبعد دقيقتين..

لأ معلش أنا آسف، بس هاتلي برتقان..

وبعد دقيقتين..معلش طب بص، هاتلي مانجة..أنا عايز مانجة خلاص..

وبعد خمس دقايق، قومت زعقت قولت يوووووه..

هو الي انا بطلبه ما بيجيش ليه !!!

وسيبت الكافيه كله وخرجت..، وقولت مش هدخل المكان ده تاني..

بالظبط..نفس المبدأ بالنسبة لكثرة تغيير الأهداف في قانون الجذب..

وفي الآخر بتقول يووووه..قانون الجذب ده وهم..

انا خلاص هنسى كل الكلام ده..

الكلام ده على كل حاجة..

على الشفاء..

على المال..

وعلى انقاص الوزن..

الي هكلمك عنه ان شاء الله، الجزء ده..

المختصر المفيد في انقاص الوزن..ثالث التحديات الي الناس عايزة تستخدم فيها قانون الجذب، انك أولاً:

1-    تشيل من جواك أي معتقد سلبي زي الي اتكلمت عنهم قبل كده في مقالة السر الجزء الأول، بس هنا لازم تاخد بالك من حاجة مهمة..

مش كل المعتقدات السلبية مرتبطة بإعاقة انقاص الوزن..

يعني ممكن يكون جواك معتقد انك “فاشل” في اتباع الريجيم أو انك ماعندكش ارادة..مفهوم الإرادة اتكلمنا عنه قبل كده انه ساعات كتير بنتخدع فيه..لكن خليني ما أكترش عليك، خصوصاً وانك عايز المختصر المفيد..

اعمل الطريقة الي كانت في الجزء الأول من مقالة السر..

وفكر..ايه كل الحاجات جواك الوحشة، السلبية، الي ممكن تكون تخليك بتاكل كتير..

بتاكل لما تتخنق..

بتاكلي لما تحسي بالوحدة..

بتاكل لما تتفرج على ماتشات الكورة..

بتاكلي لما تتفرجي على حلقات مسلسل بتحبيه أوي..عشان تستمعي أكتر وانتي بتتفرجي ؟

خليني اسألك سؤال..

انت بتاكل ليه ؟!

آه انت بتاكل ليه..؟

هتقولي عشان ببقى جعان..

عشان تعيش مثلاً..مش كدة؟

طيب خليني معاك بمنطقك ده واحدة واحدة..

انت كشخص عايز تقل في الوزن..

طبيعي انك عندك وزن زائد..تمام ؟

تمام..الوزن الزائد ده الكبد بيحوله لدهون..ويخزنها في جسمك، ده الي بيعمل الكرش والحاجات دي..

عشان لو احتاجتها..

هو يحرقها ويحولها لطاقة..

عشان كده كتير أوي بتكون جعان، وهتموت من الجوع، لكن بعد حوالي ساعة او ساعتين..تبدأ تحس بالشبع..

المهم..

ان معنى كده، انك مش محتاج تاكل..!

معنى كده..

انك المفروض..

ما تجوعش..!

بالظبط..

ودي حقيقة على فكرة..في دراسة قراتها في كتاب عن انقاص الوزن والتنويم بالإيحاء، كان في احصائية ان حوالي 95% من الشعور بالجوع، هو شعور وهمي..!

العقل الباطن هو المسئول الأول عنه عشان يحميك من خطر الموت، الناجم عن عدم الأكل..

عشان هو فاهم كدة..

عقلك الباطن فاهم انك لو ما كلتش..هتموت..!

يعني الطبيعي انك فعلاً ما تجوعش..

ده شعور وهمي..ناتج كمان عن حاجة تانية خطيرة..

عن عدم انضباط مواعيد أكلك..

ممكن تفطر الساعة 8 صباحا

وممكن تفطر 12 الظهر..

وممكن تفطر 10

وممكن تفطر 4 العصر..!

طبيعي، طبيعي.. ان عقلك الباطن، بعد كذا مرة من تكرار الكلام ده..

هييجي الساعة 8، و12،و10،و4.. يحسسك بالجوع..!

فعايزك تفهم وتقتنع وتحس..

انك فعلا، طالما عندك وزن زائد..

مش محتاج تاكل..

لو كلت..هيبقى روتين..

ولو عوزت..

تقدر تقاوم الاحساس بالجوع ده..

بكل سهولة..

لأنك أصلاً.. مش محتاج الأكل..

كمان عايزك تراقب مواعيد اكلك..

وتقلل الوجبات البينية على أد ما تقدر..عشان دي اكتر وجبات عقلك الباطن بيكدب عليك فيها، لما يحسسك بالجوع..

غير كده..عايزك تنسى حكاية انك تاكل وانت بتتفرج على أي حاجة..

وقت الأكل يبقى للأكل وبس..

كمان في حيلة حلوة اوي انا بستخدمها شخصياً..

للناس الكتير الي شافتني باكل – انا بحب الأكل جداً – وفي نفس الوقت محافظ على جسمي بفضل الله..وسألتني ازاي..

هي دي الحيلة الي بستخدمها..

الأول بقيت ألاحظ مثلاً..لو هاكل سندوتش معين

بخلصه في أد ايه..

لو 3 دقايق..

بعد كده اخلصه في 6..

“القطمة” الي بتاكلها..صغرها شوية بحيث انك تخلص السندوتش – أو الوجبة – في ضعف الوقت الي بتخلصه فيها في الظروف العادية..

وكل مرة حاول تزود الوقت ده..

الحيلة دي حيلة سحرية، عايزك تجربها..

2-    برده انتزع من جواك أي كلمة وحشة اتقالتلك عن وزنك الزيادة..وإنك لازم تخس عشان تكون سعيد..على فكرة في ناس كتير مبسوطة بوزنها كدة..وانا فعلا بحب جدا الناس دي وبحترمها.. عشان عايزة تمشي على مزاجها مش على مزاج الناس..

والعكس صحيح..في ناس – في بعض البيئات – معتقدة إن الأكل الكتير، دلالة على الرفاهية في العيش..

فمحتاج – لو عايز تخس – انك تقضي على المعتقدات دي كلها..

بانك تفكر ليه..ليه انت ماشي ورا المعتقد ده..

وياريت كل تفكيرك ده تكتبه في ورقة..

وبرده تقطعها وتحرقها لما تخلص..زي الجزء الأول من مقالة السر..

كمان لازم تبعد عن كلمة Weight loss  أو فقدان الوزن..

عقلك الباطن “مبرمج” على انه يدور على أي حاجة “يفقدها” ويستعيدها بشتى الطرق..

ما تقولش أنا عايز افقد وزن..

ما تقولش أنا عايز وزني يقل..

قول انا عايز أخس..

3-    أهم خطوة..انك وانت بتتخيل نفسك في أي حاجة..سواء بتعمل معايشة أو لأ..سواء بتفتكر حتى مشهد قديم من ذكرى قديمة..

انك تشوف نفسك في المشهد ده..في جسمك المثالي..

في الجسم المثالي الي انت عايزه..

وتفرح بشكلك ده..وتفرح بوزنك المثالي ده، وتفرح بجسمك المثالي ده..

وتخيل نفسك في كل المشاهد الي عايز تتخيلها..

بجسمك المثالي ده..

وبعد كده..

لما تظهر حواليك علامات أو اشارات خاصة بهدفك ده..انك تخس..، ياريت..

ياريت..

تاخد الـ Inspired Action..

 

أتمنى ما أكونش طولت عليك..واتمنى تكون المقالة عجبتك.

قانون الجذب

Comments

comments

المختصر المفيد – الجزء الثاني

قانون الجذب

المختصر المفيد – قانون الجذب

قانون الجذب

قانون الجذب

ملحوظة : يجب قراءة الجزء السابق من المقالة من هنــــــــــــا أولاً


الجزء الأول، الجزء اللي فات من السلسلة دي – المختصر المفيد – كلمتك عن ان أكتر 3 مواضيع الناس عايزة تستخدم قانون الجذب فيها هيا الصحة، والمال، وانقاص الوزن.

وكلمتك عن الصحة..

وقولنا فيها، المختصر المفيد..

النهاردة، هكلمك عن الموضوع التاني..

التحدي التاني..

المال..

المال ده تحديداً، يمكن من أسهل – ان ماكنش أسهل – شيء ممكن تستخدم قانون الجذب فيه..

لأن المال..أو الفلوس، بتاخد دورتها بين الناس وترجع تاني..يعني ممكن ال10 جنيه الي في جيبك الوقتي، يكون أخوك صرفها من 15 سنة..

وجاتلك بطريقة انت ما تعرفهاش..

في علم الاقتصاد، اسمها

Money circulation

خلينا ما ندخلش في تفاصيل اقتصادية..انت جاي هنا عشان المختصر المفيد..

بس خليني أقولك قصة جميلة أوي قرأتها..

سائح راح فندق صغير، لوكاندة يعني..حجز أوضة، وساب 100 دولار على الكاونتر بتاع الكاشير..السور الصغير الي قدام المسئون عن الحجز، وخد مفاتيح الأوضة وطلع..

خدها صاحب الفندق..راح دفعها لتاجر الخضار والفاكهة الي في الحي بتاعه عشان كان عليه ليه 100 دولار..

خدها التاجر، دفعها للمكتبة عشان كان عليه 100 دولار خاصين بكتاب كان شاريه لإبنه..

خدها صاحب المكتبة..وراح دفعها لبنت عشان كان عليه 100 دولار ليها..

خدتها البنت ودفعتها لصاحب الفندق عشان كان عليها 100 دولار متأخرة من ايجار أوضة..

حطها صاحب الفندق على الكاونتر..

نزل السائح بعد ما لقى ان مستوى الغرفة سيء للغاية..

وخد ال100 دولار بتاعته، ومشي..

كده 100 دولار واحدة..قضت خدمات 6 أشخاص..

وماحدش خسر في الآخر..!

كان لازم اقولك القصة الظريفة دي عشان أقربلك الحكاية شوية..

الفلوس سهل جدا جذبها ليك..ومش عشان كده بس..

عشان أسباب تانية كتير، بس مش هقدر أقلهملك هنا بالتفصيل عشان انت جاي تقرأ المختصر المفيد..

المختصر المفيد في جذب المال كالآتي :

1-    انك تشيل من جواك أي معتقد سلبي، ممكن يكون هو الي بيمنع جذب المال ليك..زي معتقد ازاي واني لازم اتعب وحاجات تانية كتير، اتكلمت عنهم أكتر في الجزء الأول من مقالة السر، ياريت تراجعها من هنا.

2-    أنك تشيل من جواك أي طاقة سلبية، زي مثلاً انك تكون شايل من أي حد، حتى لو هو الي غلط فيك..أو انك مش مسامحه، أو انك عايز تنتقم من حد، زي ما قلتلك في المقالة الي قبل الي فاتت..

قانون الجذب سلاح ذو حدين، ان عقلك الباطن ما بيشوفش الشخص التاني..انت بتشوفه بعقلك الواعي، الي عقلك الباطن بيشوفه، انك انت متضايق من نفسك ومش مسامح نفسك وعايز تنتقم من نفسك..! فبالتالي بيأخر عنك أي حاجة ممكن تخليك تكون فرحان !

3-    ثالث حاجة..ودي مهمة جداً، انك تعمل أكثر حاجة انت بتحبها – مش أكتر حاجة بتجيب فلوس – وتسيب الفلوس تجيلك لواحدها، من غير ما تفكر فيها هتجيلك من انك تعمل الي انت بتحبه ازاي..

ولو قدرت تسأل نفسك السؤالين دول:

أنا بحب أعمل ايه..؟

أنا بعرف أعمل ايه..؟

وتطلع منهم بنقطة مشتركة..يبقى هايل جداً جداً..

اهم حاجة انك تشوف ايه اكتر حاجة بتحب تعملها، بتبقى فرحان وانت بتعملها، حتى لو كنت هتعملها ومش هتاخد عليها مقابل..

مش مطلوب منك الا انك تعملها بس..

بعد كده..هيجيلك ناس كتير أوي بإذن الله، عايزينك تعمل نفس الحاجة دي..الي انت بتحبها..

وهيدوك مقابلها فلوس..

لكن، لو قعدت تسأل نفسك..ايه اسرع حاجة ممكن تخليني غني..

ايه أسرع حاجة ممكن تخليني أعمل فلوس..

ايه الشغلانة اللي لو اشتغلتها هعمل فلوس كتير..

الأسئلة دي أسئلة مشروعة..لكن انت جيت عشان المختصر المفيد، مش كدة..؟

الأسألة دي ممكن توصلك لشغلانة كده، وهتقعد تتعلم فيها كتير عشان توصل للنقطة الي يبقى في ناس تانية، عملاء حقيقين، عايزينك تشتغلها بمقابل مادي..

لكن لو كنت بتعمل حاجة بتحبها اوي، وشيلت تركيزك من على انك – ماعندكش فلوس – وأنك – محتاج فلوس -..وحتى لو عملتها من غير مقابل..

صدقني هتشوف الفلوس..حواليك، وانت مش عارف بتجيلك منين..

حتى كمان، ممكن تلاقي الفلوس بتجيلك من مصدر غير متعلق اطلاقا بالحاجة الي انت بتحبها دي..

وهو ده السر..

هو ده السر المطلق الخاص بجذب المال..

هو ده مركز ولب، المختصر المفيد في جذب المال، انك تشوف ايه اكتر الحاجات الي بتحبها..

وتعملها..

وتستمتع وتفرح وانت بتعملها..

وتسيب الفلوس تجيلك لواحدها..،

 

ده..المختصر المفيد في جذب المال..

انسف أي معتقد سلبي..

سامح وانسى وحب واعف واغفر لكل الناس، حتى لو كانوا ظلموك..

شوف ايه اكتر حاجة بتحبها..واعملها، وما تفكرش في الفلوس..

 

يلا..أشوفك الجزء القادم ان شاء الله، والمختصر المفيد في انقاص الوزن.

قانون الجذب

Comments

comments

المختصر المفيد – الجزء الأول

قانون الجذبَ

المختصر المفيد – قانون الجذب

قانون الجذب

قانون الجذب

إزيك..

ايه أخبارك بعد المقالة الي فاتت..

اخبار دنيتك ايه وأخبار الجذب معاك ايه..

شايف الدنيا حواليك سحر وفرحة وسعادة..

ولا لسه في مشاكل ؟

أو بلاش كلمة مشاكل، ما بحبهاش..

لسه في تحديات ؟

شيل كلمة “مشكلة” وكلمة “هحاول” وكلمة “مستحيل” من حياتك..

وحط بدالهم “تحدي” و “هعمل” و “أكيد”..

وجرب طريقة كلامك بالمصطلحات دي..وشوف هتجذب ليك الي انت عايزه بس ولا لأ..

لأن قانون الجذب مش بس معايشة واحساس، رغم ان ده جزء كبير جداً منه..

لكن برده، وده شيء خطير جداً، قانون الجذب ألفاظ وكلمات..

جرب تراقب نفسك..أو تمشي بورقة وقلم، وكل ما تلاحظ انك في أي محادثة مع حد قولت أي كلمة من الي قلتلك عليهم..او أي كلمة محبطة او مثبطة لهمتك أو لهمة غيرة بوجه عام..

اكتبها..

وبعد كده اقعد مع نفسك دور على مرادف ايجابي ليها..

لو لسه حاسس ببعض التحديات، او حاسس ان لسه شيء ناقص، جرب تعمل الجزء الخاص بالتخلص من المعتقدات السلبية، الي في الجزء الأول من مقالة “السر – كيف تجذب المال”.

اعمله مرة واتنين وتلاتة..، وطلع كل الي جواك في الورق وقطعه واحرقه، وشوفه بعينيك قدامك وهو بيتحرق..

شيل الجدران الي غصب عنك السنين بنيتها جواك..

لأ..اتطمن،

المقالة دي مش على كدة بس..

المقالة دي بعنوان – زي ما انت قرأت من دقيقتين – المختصر المفيد..

هقدملك حلول سريعة وفعالة جداً.. لأكثر 3 تحديات بتواجه الناس..

وده تبع احصائية امريكية عن اكثر طلبات الناس المتعلقة باستخدام قانون الجذب، وهما على الترتيب :

1-    الشفاء.

2-    المال.

3-    انقاص الوزن.

المواضيع دي أكثر 3 مواضيع الناس مهتمة وعايزة جداً، انها تستخدم قانون الجذب فيها..

وهنتكلم عليهم واحدة واحدة..

وبحلول بسيطة وسريعة وفعالة جداً..

وانت هتجرب بنفسك ان شاء الله..

أول تحدي، أو أول موضوع ، الشفاء..

كلمتك قبل كده عن موريس جودمان، الراجل الي وقع من طياره وجسمه اتكسر، ونظره راح وكل حتة فيه اتحطت في الجبس..وبفضل الله استخدم قانون الجذب من غير ما يعرفه..

عشان يرجع يمشي تاني..

لكن في موضوع الشفاء، الغالب ان الي بيتكلم، او الي بيطلب قانون الجذب، مش الشخص الي عنده المرض أو المشكلة الصحية – التحدي الصحي – خلاص زي ما اتفقنا..

وحتى المريض نفسه لو استخدم قانون الجذب بيبقى في صورة  “أنا مش عايز المرض ده”..

“أنا مش عايز اقعد في المستشفى”

“انا مش عايز..”

“..مش..”

خدت بالك أكيد..مش كدة ؟

بالظبط، قانون الجذب لا يعرف أدوات النفي..زي مانتا قرأت في مقالة “أخطاء تطبيق قانون الجذب”

العقل الباطن هيشيل اداة النفي ويسمع ويخزن ويتصرف ويجذب ليك كل حاجة شبه الجمل دي:

“أنا عايز المرض ده”

“أنا عايز اقعد في المستشفى”

“أنا عايز..”

فمحتاج انك تقول كدة للشخص المريض..

كمان المريض ممكن يكون يائس أو حالته النفسية مش كويسة، فكده بيعمل قوة جذب سلبية، أو عكسية لنفسه، بيجذب ليه اللي هو مش عايزه..الي هو زيادة المرض وسوء حالته أكتر وأكتر..

فهنا انت في تحدي كبير جداً..عشان لازم توازن القوة السلبية دي بقوة جذب ايجابية منه..

لكن التحدي الأكبر فين..

أن التحدي الصحي ده يبقى عند حد تاني غيرك، وانت عايز تستخدم قانون الجذب ليه..

وأنه يكون بيتسبب في قوة جذب سلبية..ويجذب ليه تدهور حالته الصحية..

وكمان لو كلمته عن قانون الجذب مش هيقتنع..

لأ ما تقلقش الموضوع أبسط مما تتخيل..

هنا ، لازم تعمل حاجتين ، وده الجزء الأول من المختصر المفيد، اللي هو متعلق بالشفاء بإذن الله :

أول حاجة، انك تعمل المعايشة، ليه هو..وهو معافى تماماً وسليم تماما بفضل الله..بس تعملها أكثر من مرة في اليوم..عشان على أد ما تقدر توازن القوة السلبية الي هو بيعملها دي..وقريب ان شاء الله هكلمك بالتفصيل عن قوة الجذب او طاقة الجذب، بمعادلات رياضية تفصيلية ان شاء الله.

تاني حاجة، إنك تقوله على قانون الجذب..

حتى لو ما اقتنعش بيه..

بس الوقتي انت الي عرفته عليه، و طبقاً لمبدأ تضاعف وتتابع قانون الجذب..

هتعرف ان مهما كانت قوته السلبية في الجذب، فأنت هتستخدمها لصالحه..

لأن ببساطة كل ما انت تعرف حد بقانون الجذب، قوتك انت بتتضاعف، وكل ما هو يقول لحد عن قانون الجذب، قوتك برده بتتضاعف، وكل ما هو يجذب حاجة ليه، سواء عايزها او مش عايزها..

بالظبط، قوتك برده بتتضاعف..

ده تفسير سريع لـمبدئين في قانون الجذب وهما:

What you put out there gets back at you multiplied

و

You have to give to recieve

الأولى يعني الشيء او الفكرة او الحاجة او الاحساس..أو أو أو..أي حاجة بتديها لغيرك، بتخرجها بره منك، هتتردلك مضاعفة.

والثانية معناها انك لازم تدي وتشارك الي عندك، عشان تستقبل وتسمح لقانون الجذب بإنه يشتغل لصالحك..قريبين شوية من مبدأ في شريعتنا،

“لا يؤمن أحدكم حتى يحب لأخيه ما يحب لنفسه”.

“الحسنة بعشر أمثالها”.

صح..؟

صدق رسول الله صلى الله عليه وسلم..

أسيبك مع الجزء الأول من سلسلة المختصر المفيد..

وأشوفك الجزء الجاي ان شاء الله ، مع تحدي المال..

رمضان كريم.

 

 

 

Comments

comments

قانون الجذب سلاح ذو حدين

قانون الجذب سلاح ذو حدين..

الوقتي..لو انت كنت متابع كل المقالات الي فاتت، وبتقرأ وبتدور في قانون الجذب..

وعملت كل الي قرأته..

المفروض، تكون متمرس في قانون الجذب..

وبدأت تشوف بعينك، حاجات بتحصل قدامك..غيرك، ممكن يقول عليها سحر..

سواء أهدافك وهي بتتحقق بطريق ما كنتش تتخيله، أو حتى لو كانت علامات في الظروف والواقع اللي حواليك..تقولك ان الي انت عايزه بفضل الله قرب..

عشان كدة..

كان لازم أحذرك..

في حوالي أوائل الستينات..

وزارة الدفاع الامريكية، خصصت ميزانية ضخمة، لمشروع كان يُعد الأضخم في التاريخ وقتها..

وهو صناعة صواريخ يتم توجيهها ببرامج كمبيوتر..

أول ما الكمبيوتر بدأ يتم ظهوره بشكل فعال في العالم ومختلف الصناعات..

وتم فعلا الاستثمار في المشروع ده..

وتصميم “البرامج” المسئولة عن توجيه الصواريخ دي..

وكانت بلغة برمجة بدائية جداً..وهي الـ

Basic

تعتبر من اول لغات البرمجة في تاريخ الكمبيوتر..

ومع ذلك، ومع الانفاقات والاستثمارات الضخمة في المشروع ده..

نجح تصميم برنامج ، بلغة الـ Basic  ويكون قادر على توجيه الصواريخ الأمريكية لأهداف محددة..

لكن فجأة..

تم تدمير المشروع..!

تم تدميره تماماً..ومحو أي بواقي برمجية خاصة بيه..

وعن طريق وزارة الدفاع الأمريكية نفسها..!!

ليه كل ده..

عشان اكتشفوا ان ممكن زيادة قوس واحد، او فاصلة واحدة في لغة البرمجة..

يخلي بدل ما الصاروخ ينطلق نحو الهدف..

انه ينطلق..وينزل يدمر مكان الانطلاق..!

يعني يفجر نفسه ويفجر كل حاجة محيطة بيه..!!

ورغم تأكديات المهندسين وقتها على ان مفيش أي خطأ في البرمجة وان الحكاية أمان..لكن ماكانش عند وزارة الدفاع الأمريكية أي استعداد للمغامرة..خصوصاً، مع رغبتهم في وضع رؤوس نووية على الصوارايخ دي..، عشان يبقى عندها أكثر الأسلحة تطوراً في العالم..

تقدر تدمر دولة، بضغطة Enter ..

المقدمة الطويلة دي كلها ليه..

عشان أحاول أقربلك الفكرة..

انت الوقتي..زي الصاروخ ده..

رجل متمرس جدا بفضل الله في قانون الجذب، وانت فرحان على طول..فبفضل الله برده، بتجذب ليك مواقف ايجابية وسعيدة ومفرحة..

لكن..

لو حصل ومرة اتضايقت..وفضلت في حالتك “السلبية” دي..

صدقني..

هتشوف بعينك كوارث..

وده عن تجارب شخصية..

اسمعني..مفيش أي حاجة في العالم مالهاش أخطار..

وزي ما قانون الجذب بإذن الله تقدر تستغله لصالحك..

ممكن وانت راجل متمكن وقوي جداً فيه..

يشتغل لعكس الي انت عايزه تماماً..

انا شخصياً..آخر مرة اتضايقت..وفضلت في الحالة دي لدقيقة..

شوفت بعيني كوارث..

الموقع بتاعي وقع..

الموقع الي انت بتقرأ المقالة دي عليه حالياً..

وحصلت مشاكل شخصية ليا لا حصر ولا عدد ليها..

وفضلت الأخبار الوحشة تيجي خبر ورا التاني لغاية ما امتلكت زمام نفسي..

وقولت لنفسي..

لا..انا مش عايز كدة..

I choose to be happy

I want to be happy

وخدت نفس وهديت خالص..وفجأة بدأت الأمور تتبدل بفضل الله..

مش كده وبس..

الامور السلبية مش هتحصلك لواحدك..هتحصل كمان لناس بتحبهم..

ومش شرط بتحبهم..هتحصل لأي حد حواليك..

وكل ما هتدخل في مكان لازم هيحصل فيه حاجة وحشة..

كوباية تتكسر..

نور يتقطع..

طفل صغير يصرخ..

كلنا بنطلع طاقة ما بنشوفهاش..وكلنا برده عقلنا الباطن بيستقبلها ويقرأها ويتصرف عليها..

وده مبدأ التخاطر الذهني او الـTelepathy..

كمان عايزك تسامح أي حد أساء ليك..

تسامحه عشانك انت..

لما حد بيعمل موقف يضايقك..

أو يزعلك..

وبتشيل جواك..وقلبك يبقى أسود..

عقلك الباطن ما بيشوفش الشخص التاني ده..

ما بيشوفش غيرك..

مش بيشوف غير انك خزنت جواك طاقة سلبية..

طاقة سوداء..

وده يمكن نوعا ما، مرتبط بفكرة حديث سيدنا محمد إن العبد إذا أخطأ خطيئة نكتت في قلبه نكتة سوداء..” إلى آخر الحديث..

وصدقني، كون انك تشيل من حد أو تحط جواك فكرة الانتقام أو الحزن الشديد والرغبة في القطيعة..

دي في رأيي الشخصي، من أكبر الخطايا..

كان سيدنا الحبيب، سيدنا محمد عليه افضل الصلوات والتسليم..

جالس مع أصحابه..

فقال لهم، يطلع عليكم اليوم رجل من أهل الجنة..

فأتى رجل..

ونفس الموقف في ثاني يوم، وثالث يوم..

حتى تعجب عبد الله بن عمرو بن العاص..

وقال له يا رجل، لقد أخرجني أبي من البيت فأريد أن أبيت معك ثلاث ليال..

فأقام معه في الليلة الاولى، فلم ير منه صيام ولا قيام شديد..

وكذلك في الثانية..

وفي الثالثة..

حتى قال له يا رجل، بت معاك ثلاث ليال ولم أر منك صيام ولا قيام، وقال عنك رسول الله أنك رجل من أهل الجنة..فبالله عليك، ما الذي تفعله لذلك؟

فقال له : “أبيت وليس في قلبي حقد على مسلم فقال عبد الله هذه التي بلغت بك وهي التي لا نطيق”

فهمت قصدي ايه ؟

الحديث ده لما قراته من فتره، وقارنت بينه وبين الي بقوله على السماح وقوة التسامح والنسيان وأثرها على تضاعف قوة قانون الجذب بشكل وهمي..

ذهلت من عظمة ديننا..

وذهلت من حكمة سيدنا محمد عليه الصلاة والسلام..

وعرفت ان مفيش امر ديني..سواء فهمناه أو ما فهمناهوش..وسواء تعارض مع العلم أم لم يتعارض..

الا وكان له، بجانب الغرض الديني..جانب علمي سببي، لأن كل شيء في الكون يسير بقدر..

“كل في فلك يسبحون” ، “إنا كل شيء خلقناه بقدر”..

الطبيعي انك تسمع الكلام والاوامر وتبتعد عن النواهي..لكن لو فكرت وقارنت بين العلوم الدنيوية، وعلاقتها بالأوامر والنواهي الدينية..

هتزيد حباً وقرباً في حبيبك محمد عليه الصلاة والسلام، وفي حبيبك الله، ربي وربك ورب هذا الكون، وتفتخر بعبوديتك ليه، في وقت فيه ناس كتير جداً..ضالة، بلا إله..ومع ذلك..، ربنا بيكرمهم..ويديهم على اد ما بيشتغلوا..سواء بقانون الجذب، أو بغيره حتى لو كانوا مش عارفينه..

لما انت بتسامح حد..انت بتسامح نفسك انت..

داخل عقلك الباطن..

اتصورله انك زعلان من نفسك..مش زعلان من حد..

فبيتصورله برده انك بتسامح نفسك مش بتسامح حد تاني..

سامح بجد..

سامح من قلبك..

وحب واعف واغفر للناس..

كلنا بشر..وكلنا بنخطأ، واذا ابتدأت بانتقاد الناس..اعرف انك عندك وقت فاضي..تقدر تستغله في تطوير نفسك أحسن..

حب وعيش بالحب والعفو والسماح، واحنا داخلين على شهر كريم..

ربنا يتقبل مني ومنك ومن المسلمين جميعاً، ويحفظنا ويحفظ بلدنا وسائر بلاد المسلمين..

قول آمين.

 

Comments

comments

مقدمة للبرمجة اللغوية العصبية

البرمجة اللغوية العصبية..

كلمة سمعناها كتير جدا، من أكتر من 10 سنين، من بداية التنمية البشرية في مصر..

البرمجة اللغوية العصبية، هي ترجمة لـ Neuru-Linguistic Programming .. واللي بتتلخص في تقنيات وطرق تعامل وجلسات خاصة، بيمارسها المصرح ليهم بممارستها، لعلاج والتعامل مع حالات خاصة.

أسسها العظيمين، ريتشارد باندلر و جون جريندر، من أكتر من 35 سنة.. يعني العلم يعتبر لسه جديد مقارنة بالعلوم الأخرى.. ولسه حتى لحظة كتابة هذه المقالة، بيتطور وبتتطور تقنياته، لكن يعني ايه البرمجة اللغوية العصبية، وليه اسمها برمجة ؟

تعرف ان ممكن أكلمك عن البرمجة العصبية أكتر من 5 أيام..ويبقى ما كلمتكش الا عن أول مستوى فيها، اللي هو الممارس، أو الـ Practitioner ..!

بس باختصار..

البرمجة اللغوية العصبية، هي انك تخللي الناس تعمل الي انت عايزه، وهما مفكرين، ان ده الي هما عايزينه..

آه بالظبط..ودي فكرة البرمجة اللغوية العصبية..حتى عشان كده، 95% من علم التنويم الكلامي او الـ Conversational Hypnosis  ما هو الا تقنيات برمجة لغوية عصبية.

كمان انك تعالج بعض الحالات مثلاً زي التدخين أو الأكل بإفراط..بإن التغيير ييجي من داخل الشخص، لإنه لو كان بيسمع الكلام كان بطل تدخين وماكانش احتاجلك..أو كان التزم بالتمارين او بتقليل الأكل الغير صحي وماكانش احتاج انه يروح لممارس برمجة لغوية عصبية..

يعني التغيير ورغبة التغيير، بتيجي من جواه..

في حاجة احنا دايماً كنا بنعتمد عليها، في المسائل دي..الوزن الزائد كمثال مثلاً.. الي هيا “الإرادة”..ونقول لنفسنا خلاص، بجد دي آخر مرة هاكل فيها كتير..

بجد انا كده خلاص، وخدت قرار مع نفسي ومش هاكل كتير تاني..وهبعد عن الدهون والحاجات الي بتخلي وزني يزيد..

ومع أول شعور بالجوع..تبدأ تقاوم..

وتقاوم..

وفي الآخر “عقلك الباطن” الي بينتصر، وبتروح جري على المطبخ..!

ليه؟

انا ماعنديش ارادة ؟

لأ عندك..

بس هقولك حاجة، انت زي الجبل الجليدي، 10% منك الي باينين قدامك..و90% انت ما تعرفش عنهم حاجة..

قوة الإرادة بتأثر على الـ10% دول بس..وده وقت ما بتبقى انت مش جعان..بتحس انك خلاص مش محتاج ريجيم ولا محتاج تمرين ولا محتاج نصيحة حد..

وقت ما بتجوع..العقل الباطن يحس بالخطر..

تبدأ ال90% في تولي مسئولية ادارة جسمك، وتتغلب بكل سهولة، على ال10% الخاصة بالعقل الواعي..

ما تستغربش، مش مرتبطة بالإرادة..

مرتبطة بإنك ربطت فكرة انك وزنك ينزل بفكرة ذهنية..فكرة منطقية، ما ربطتهاش بعقلك الباطن، وهنعرف ازاي تدخل لعقلك الباطن وتزرع جواه أي فكرة انت عايزها، لدرجة ممكن تخليك تكره الأكل خالص لو حبيت..

هنا، سبب تسميتها برمجة لغوية عصبية،برمجة لأنك بيها، بتبرمج عقلك الباطن على معتقدات جديدة، او مقترحات جديدة..أو حتى أحاسيس جديدة..

وتسيبه هو يتصرف من خلالها،

يعني تخيل انت كانت مشكلتك الشوكلاتة..

تقدر تزرع داخل عقلك الباطن ان الشوكلاتة دي، بتخليك “تتقيء” لما تاكلها..

وفعلا مجرد ما تشم ريحتها قريبة منك..ال90% الخاصة بالعقل الباطن، الي هي جزء منك، تبدأ تاخد المسئولية..

وتؤمر جسمك..

انه يتقيء..

عشان كده غير قانوني بره ان واحد يمارس البرمجة اللغوية العصبية غير برخصة من جهة مرخصة بإصدار مثل تلك الرخص..لخطورة النتائج الخاصة بيها، ولإمكانية استخدامها في حاجات..منافية للآداب العامة..أو زي ما بيقولوا Unethical.

وسبب تسميتها لغوية، عشان بتعتمد فيها على لغة معينة، سواء من التقنيات، أو المستويات المنطقية، أو حتى الأنماط اللغوية الي في الأساس هي برمجة لغوية العصبية، وعصبية عشان بتقترن بالأعصاب ومشاهدة رد فعل التقنيات المختلفة، زي الـ Anchoring  أو الرابط الذهني، وفكرة الـ Peak state  الي بتعتمد على ملاحظة أعصاب وأوردة العميل عشان تعرف التأثير كان إد ايه بالظبط..

هنتكلم كتير عن البرمجة اللغوية العصبية، وهنتكلم أكتر عن استخدامتها العامة في حياتنا..

في مقالات أكتر ان شاء الله..

بالتوفيق، وأتمنى المقال يكون عجبك.

Comments

comments

قانون الجذب والأشخاص والبيئة

متوسط دخلك هو متوسط دخل أقرب 5 أشخاص اليك..!

دي معلومة، وحقيقة، واحصائية..

لكن ليه؟ ايه وجه العلاقة، الـ

Cause and effect

زي مالقائمين على الدراسة بيقولوا..غير واضح..

غير واضح السبب، ليه متوسط دخل الشخص يساوي متوسط دخل أقرب 5 أشخاص ليه..

تفتكر ليه ؟

بما أنك راجل قاري وفاهم قانون جذب..

تفتكر ليه ؟

بالظبط..

قانون الجذب..

ناخد مثال، لو واحد دخله قليل..

واحد من صحابك، بيتكلم دايماً كالآتي:

اللي جاي على أد الي رايح..

يادوب عايشين بالعافية..

انا مصروفي على أدي (لو كان طالب)..

المرتب يادوب بيكفي (لو ماكانش طالب)..

من النحية التانية..مديرك المباشر في الشغل:

الشغل كتير..

مفيش موظفين كفاية..مفيش ميزانية نشغل موظفين..

انت شغلك مش عاجبني..

لازم كلنا نشتغل أكتر عشان نواجه ضغط الشغل..

من النحية التالتة، خطيبتك أو حبيبتك:

بص احنا ما نجيبش عفش غالي عشان بص، يعني نعيش على أدنا برده..

ولو عملت العكس..ممكن تحسسك بالعجز، انها تقولك العفش لازم يكون بأد كده..والشبكة بابا وماما مش هيرضوا بأقل من كده..وانت ظروفك كدة..لازم تشوفلك حل..

من النحية الرابعة..أنتيمك يقولك :

انا اضطريت اشتغل أي شغلانة كده عشان أقضي مصاريفي، يلا أهو أي حاجة والسلام احسن من مفيش..

ووالدك أو والدتك من النحية الأخيرة :

البلد حالها واقف..

مفيش شغل..

البلد بتخرب..

انا يادوب بصرف على اخواتك..

تتوقع كده، يكون دخلك انت وظروف معيشتك ايه ؟ حتى لو كنت مستقل بنفسك، وبتشتغل في شركة او مكان عمل مالوش أي علاقة بيهم..

كل الناس دي من غير ما يعرفوا، بيعملوا رد، او قوة جذب سلبية، أو قانون جذب عكسي، كل المصطلحات دي مساوية لبعضها وده الي هنعرفه بعد كده ان شاء الله في مقالة تفصيلية عن القوانين الفرعية لقوانين الجذب..

كل واحد فيهم، لا شعورياً، ساهم في الوضع الي انت فيه الوقتي..

وانت كان ليك الدور الاكبر، انك سمحت لنفسك انك تستوعب وتمتص كل المعلومات الي بتتقالك، وكل الكلام الي بتسمعه، سمحت لنفسك انك تتخيله..

في ميزه ، وعيب في نفس الوقت للعقل الباطن، انك دايماً اما تشوف أي مشهد، تتخيل نفسك مكان البطل..عشان كده دايماً في أفلام السينما، انت بتنفعل جدا مع الأحداث وتطور الخط الدرامي..عشان لاشعوريا، بتبقى شايف نفسك انك انت البطل.. انت ممكن كمان بعد كده تتخيل نفسك في دور البطل ده بعد كده..

نفس الحكاية بتحصل – لا شعوريا – لما تسمع كل الكلام السلبي ده، ولما تتحكالك كل الظروف والمشاهد الكئيبة دي..

ما تسمحش لحد انه يحددلك ظروفك..

ما تسمحش لحد انه يقولك كلام سلبي..

المرة الجاية لما حد يقولك أي كلمة سلبية..

وقفه..

قوله لو سمحت..

ما تحكيليش عن ظروفك، حتى لو لنفسك..الكلام عن المشكلة بيكبر المشكلة..لكن الكلام عن الحل بيخليك تعرف الحل فين..

ما تحكيليش عن ظروفك..

ولو ضروري هيحكيلك..الكلام الي يتقالك، خده واضحك جواك وهو بيتقالك..

ودايماً اسأل نفسك السؤال الي كلمتك عنه المقالة الي فاتت..

ازاي احول الحكاية دي لشيء ايجابي..

تعامل مع المشكلة وهي بتتحكالك، كإنها بتتحكالك عشان تحلها.. مش عشان تعيش فيها..

الشخص ده بيحكيلك مشكلته عشان تحلها..مش عشان تشاركه في انك تعيشها معاه..

المرة الجاية..حاول تبعد بقدر الإمكان عن الناس الي كل شغلها الشاغل انها تحكي المشاكل وتعيشها..

ولو ضروري..

حد يحكيلك مشكلة..

عشانك..قبل ما يكون عشانه..

ركز على الحل، ما تركزش على المشكلة..

إزاي بقى تغير الحقيقة الي قلتلك عليها في اول المقالة..

انك تبدأ تجذب ليك بإذن الله..ناس فرحانة..ناس أغنياء..ناس ظروفهم أحسن من الناس الي حواليك..

مابقولش ليك ما تكلمش الناس الي حواليك تاني..

بس زي ما هما جذبوا ليك الوضع الي انت فيه – لو كانت ظروفك مش عاجباك – انت تقدر تجذب ليهم وليك، الوضع والظروف الي انت عايزهم..

بإنك تعيش دايماً فرحان..بإنك تشوف نفسك حواليك ناس كتير فرحانة، وناس كتير أغنياء..وناس كتير عايشة الحياة الي بيحلموا بيها..

وشوف الناس الي حواليك دول..في ظروف أحسن..

في حال أحسن..

يعني الوقتي الي عليك..3 حاجات..

انك تجذب ليك ناس جديدة..معارف جديدة..أغنياء وظروفهم أكتر راحة من الناس الي حواليك..

انك تجذب للناس الي حواليك، ظروف احسن وحال احسن..وتشوفهم وتعملهم المعايشة ان ظروفهم أحسن..

انك تبعد بقدر الإمكان عن الكلام عن المشاكل، ولو ضروري، اسمعها بغرض حلها، اسمعها كإنك بتتحكالك المشكلة عشان تحلها، مش عشان تشاركهم في حمل الهم..

ودايماً خليك مصدر الفرحة لكل الي حواليك..

ومصدر السعادة، ومصدر كل الإيجابية..

شوف نفسك بتشع فرحة وسعادة وحب وايجابية لكل الناس..

شوف الناس بتجيلك عشان تفرح..

وصدقني..هتجذب ليك ولحواليك..

كل الفرحة..

وكل الحب..

أتمنى المقالة تكون عجبتك، وأشوفك المقالة الجاية ان شاء الله.

Comments

comments

خد بالك

خد بالك من نفسك..

فاكر لما قلتلك reflect from inner to outer ؟

في مقالة القطعة المفقودة..

مبدأ شبيه شوية..وهتشوف أثره ان شاء الله، رغم انه سهل جداً..

هل تتوقع ان الناس تحبك..لو كنت انت ما بتحبش نفسك..

إزاي هتتوقع ان ناس كتير هتحبك، وانت بتقول لنفسك، وأهم حاجة انك بتقول لنفسك..انك دماغك ناشفة..انك عنيد، انك قلبك اسود..أنك أنك انك..

وإزاي تتوقع فلوس كتير..وانت شايف نفسك، انك فقير؟

عايز تجذب فلوس..اجذبها على انك عندك فلوس، بس عايز اكتر..

وفي نفس الوقت، ما تستخسرش حاجة في نفسك، ما تستخرش اكله غالية أوي، شايف انها هتبوظ ميزانيتك لو كلتها، انت مش هتاكلها كل يوم..جربها مرة حتى في السنة..

عايز تجذب حب الناس؟ حب نفسك..

افرح بنفسك..

امشي فرحان انك انت الشخص ده..احمد ربنا على انك انت الشخص ده..

افرح بكل الصفات الي فيك، حب نفسك بنفسك..

كل حاجة بتشوفها في حياتك هي انعكاس لكل الي بيحصل جواك، وهتكلم معاك اكثر ان شاء الله عن الجملة دي في سلسلة مقالات تانية، بالاثبات والتجربة..

لكن المقدمة الي فاتت دي كلها عشان أقربلك المبدأ الي عايز اكلمك عنه..

هو انك تاخد بالك من نفسك..

ما تسيبيش نفسك شعرك مش متسرح وتقولي أصلي كده كده محجبة..

ما تسيبش نفسك دقنك طويلة – على غير عادتك – وتقول أصلي مش فاضي..

ما تلبسش أي لون على أي لون وتقول ياعم انا ما بهتمش بالمظاهر..

ما تناميش في اليوم 4 ساعات بس وتقولي أصلي ورايا حاجات كتير..

ما تقعدش في البيت وتقول اصلي مش فاضي أخرج..مجرد خروجك وانك تبص في عيون ناس غريبة..ده في حد ذاته احسن 100 مرة من قعدتك في البيت..

حب نفسك..البس كويس..اعرف ستايلات اللبس المختلفة وشوف انت بتحب ايه فيهم..

كدب الي قالك المظهر مش مهم..

لو شجرة أساسها قوي..جذورها ثابتة..

لكن شكلها من بره وحش..

مفيش ورد..

مفيش ثمار..

مفيش حاجة !

ماحدش هيقربلها، ماحدش هيبصلها، ولو حصل وحد بصلها هيتقرف منها..

الجوهر اكيد مهم..لكن برده المظهر مهم..

وأي حاجة تحصلك، لو شايفها وحشة، وممكن تكون واقعيا وحشة..حاول تحولها لشيء جميل..شيء يخليك تبتسم..

حتى لو مش لاقي الحاجة الجميلة الي في الحاجة السلبية دي الوقتي..ثق من جواك انه ربنا ما وضعكش في الموقف ده الا لصالحك ولخيرك..حتى لو ماكنتش انت شايفه الوقتي..واستنى الخير ان شاء الله وثق في الي خلقك، انه بيحبك، ومش عايز الا الخير والحب ليك..

لما بقرأ لعمالقة قانون الجذب، الي ناس منهم اصدقاء شخصيين ليا، بيكلموني عن حاجات، بكون نفسي أقولهم نفس المبادئ دي في شريعتنا..

لكن سبحان الله رغم ان عقلهم متفتح جدا عشان يتكلموا في قانون الجذب، لكن بييجوا عند الدين، وتُسكر آذانهم..!

Joe Vitale .. أستاذي، عنده حاجة جميلة أوي..

بيسميها

TIISG

اختصار لـ Turn it into something good

يعني أي حاجة تحصلك، استنى، ما تزعلش، حولها لحاجة تفرحك..

زوجته ناريسا، اللي برده متخصصة في برامج التنمية الذاتية، بعد ما صرفت آلاف الدولارات على السايت بتاعها، طلع في غلط خطير في السايت بعد الانتهاء منه، وماكانش في وقت انه يتصلح..

الراجل ده بكل بساطة، بعت رسالة لكل المشتركين على السايت..

قالهم في غلط في موقع ناريسا، الي هيلاقيه له هدية خاصة..!

الدخول على السايت بعد الرسالة دي تضاعف..والمبيعات الخاصة بكورساتها تضاعفت..!

والأمثلة كتير..شوف أي حاجة تحصلك، شايفها وحشة..واول حاجة تعملها

اهدى خالص..ابتسم، قول:

ممم..ايه الشيء الإيجابي اللي هنا..؟

صدقني، مهما كان، حتى لو كان مفرق الملذات – الموت – لازم هتلاقي حاجة..

حتى لو هتلاقي انك ان شاء الله، هتشوفه في الجنة..

حتى لو هتلاقي انه بطريقة او بأخرى..الحادثة دي وضعت في حياتك عشان تتحمل المسئولية..

عميل، يعتبر صديق شخصي ليا، تعرض لحادثة من أسوأ ما يمكن أن يتعرض له رجل من حوادث..

فضل مكتئب بعدها بفترة..بس حس بعدها انه بقى واحد تاني..

حس انه كان في أوضة صغيرة، والوقتي طلع فوق، وبقى قادر يبص على البيت كله..

عرف ان في ناس أذكياء زيه..وجايز أذكى، وعرف ان في ناس مش زي ماحنا فاكرينهم..

بيحكيلي ويقولي، بعد مالحكاية دي حصلتلي انا كرهت نفسي وكرهت كل الي حواليا..لكن الوقتي

والله العظيم..بحمد ربنا ألف مرة، انها حصلتلي..

وإلا كنت فضلت زي مانا، وضيعت من ايدي حاجات كتير، معايا الوقتي.

ما تنساش..

خد بالك من نفسك..

حب نفسك..

اهتم بنفسك..

ودايماً دور على الجانب الإيجابي..

وأشوفك في المقالة الجاية ان شاء الله.

Comments

comments

الوعد

لأ..

مش الفيلم..

Steve G Jones  رئيس ومؤسس الجامعة الأمريكية للبرمجة اللغوية العصبية، ومؤسس الاتحاد الأمريكي للمعالجين بالتنويم الإيحائي..

بيقول حاجة جميلة أوي في كورساته التدريبية..

From time to time, give your mind a candy bar..

يعني ايه ؟

حرفياً ترجمته مش هنفهم منها حاجة..لكن معناها، ريح مخك من فترة للتانية، بإنك تقرأ او تطلع أو تشوف حاجة مالهاش أي علاقة بشغلك، أو بمجال اهتماماتك..

زي “قطعة الحلوة” الي الطفل بياكلها من وقت للتاني..الشوكلاته..الي بتغير طعم اخر حاجة كلها، وبعدها يرجع تاني يقول لباباه بابا عايز جنيه اجيب شيبسي..!

بيل جيتس، رئيس شركة مايكروسوفت، في لقاء في مجلة أمريكية، كان بيحكي عن ازاي بقى مليونير، اتكلم عن فكرة الكاندي بار دي..قال انه دايما، ساعة في اليوم، بيقرأ أي مجلة تكون بعيده جدا عن التكنولوجيا والمال والتجارة..زي مجلات Vogue  للموضة النسائية، او كتب وصفات الطبيخ..

المقالة دي نفس الفكرة..

حبيت أريحك شوية من كم المقالات “الثقيلة” المتتالية..الي كان فيها معلومات كتير، والي اعتقد انك محتاج بعدها حاجة دمها خفيف..وتفيدك في نفس الوقت..

عايزك هنا، والوقتي حالاً..توعد نفسك..

 انك تكون قوي، مفيش حاجة تقدر تعكر صفوك الداخلي..

انك تتكلم بكل حاجة فيها صحة، كل حاجة فيها فرحة، كل حاجة فيها أمل، كل حاجة فيها رخاء، لكل الي تشوفهم.

انك تخلي كل صحابك وأصدقاءك، يحسوا بالشيء النادر المميز الي فيهم..

انك تبص للجانب المفرح في كل حاجة، وتبتسم حتى لو شايف ان من وجهة نظرك – حالياً – مش قادر تلاقي الجانب ده..

انك تفكر في الأفضل..تشتغل عشان تحقق الأفضل..وتستناه يحصل بإذن الله.

أنك تكون فرحان لنجاح غيرك بالظبط..بالظبط نفس فرحتك لنجاحك..

انك تنسى أخطاءك في الماضي..وتتحرك لنجاحاتك في المستقبل بإذن الله..

انك تكون صاحب وجه بشوش..مبهج..،وتضحك لأي مخلوق تشوفه في حياتك..

انك تدي كل وقتك لتطوير نفسك، بحيث انك ما يفضلش عندك أي وقت لانتقاد الآخرين..وكل ما تلاقي نفسك بتنقد حد..اعرف ان عندك وقت فاضي كان ممكن تستغله لصالحك..

أنك تبقى أكبر من القلق، أنبل من الغضب، أقوى من الخوف، وأنك فرحان جداً..لدرجة ما تسمحش بوجود أي مشاكل..

انك تحب نفسك، تعرف قيمة نفسك، تقدر نفسك..وتعلن ده للعالم كله، مش بالكلام العالي والكتير..

بإنجازاتك..بمعجزاتك..بفضل الله.

انك تعيش وتؤمن وتصدق، ان كل العالم في صفك، كل الكون عايزك تحقق الي انت عايزه، الي انت بتحبه..، على أد ما انت عايز كل العالم يبقى سعيد، وكل الناس تحقق ذاتها، وعلى أد اعترافك وتصديقك..إنك تستحق كل الخير ده..

اوعد نفسك بكل ده..خد على نفسك اقرار ذاتي،

وافرح..

واضحك..

وحب..

وعيش..

وساعد..

و توقع المعجزات..

يلا..أشوفك في مقالة تانية ان شاء الله..

Comments

comments

القطعة المفقودة

حلو الاسم..

مش كده؟

قعدت ادور على اسم مناسب للمقالة، تماشياً مع الي هيتكتب فيها – بإذن الله – ما لقيتش أنسب من ده..

عشان أولا هتكلم عن كذا حاجة، بعيد عن بعض نوعا ما..

وفي نفس الوقت كلهم يعتبروا القطعة المفقودة..الي لو طبقتها، تميزك عن أي حد تاني غيرك ممكن يكون بيستخدم قانون الجذب..

يعني بتديك أفضلية على أي حد..حتى لو كانت قوة جذبه أعلى منك..الا لو كان هو كمان عارف الي هقولهولك ده، وده احتماله قليل شوية، لأن الي هقوله ان شاء الله نتيجة أبحاث وتجميعات شخصية.. نسبة ان حد غيري يكون عملها بنفس الشكل وفي نفس الوقت، أعتقد ضعيفة.

بدون تطويل..هكلمك عن حاجات تعملها وانت بتطبق قانون الجذب في حياتك..تقدر تقول عليها الـ Key points  لقانون الجذب..أولها:

1-    Describe describe describe .

للي كانوا بيتكلموا عن الوقت..وبيقولوا الي بنجذبه بيتأخر ليه..

دي اجابتك..عشان تقصر الوقت على أد ما تقدر، ده مفتاح اللغز، اوصف على اد ما تقدر الي انت عايزه..

من كام يوم، كنت قاعد مع اتنين بكلمهم عن قانون الجذب، ولد وبنت..

وقلتلهم على خطوات يعملوها واحنا قاعدين مع بعض، كان من ضمنها ان كل واحد يطلع ورقة ويكتب فيها مشهد من حياته بعد ما كل أهدافه تكون اتحققت..ويوصف بأدق التفاصيل..

الولد، الي هو صاحبي اوي بالمناسبة..كان دايماً يخلص الأول، البنت، الي كانت أول مرة اشوفها برده بالمناسبة، فضلت تكتب وتكتب وتكتب..وانا من جوايا كنت فرحان جدا انها عاشت الكلام الي بتكتبه أوي كده..ودخلت جوا الكلام وبدأت تضحك هي بتكتب..تفرح وهي بتكتب..وتعيش كل تفصيله مهما كانت صغيرة، في أهدافها وهي بتكتبها، بدون تردد قولت لصاحبي، على فكرة “…” بإذن الله هتحقق الي هي عايزاه قبل منك..

خلصنا كلام..وفي آخر القعدة، كان حاجتين من الي البنتين اتمنتهم، اتحققوا واحنا قاعدين بفضل الله!

هي نفسها ماكانتش مصدقه، وبفضل الله كان يوم جميل وكلنا كنا مبسوطين..

فحاول على أد ما تقدر، توصف..إزاي؟

هات ورقة، واقعد مع نفسك خالص، واكتب مشهد من حياتك بعد ما تكون كل اهدافك بفضل الله اتحققت، واوصف يوم عادي من حياتك – في ظل تحقق كل أمنياتك دي – بكل تفصيله ممكن تكون شايفها هايفه او صغيرة..بس أنصحك، ما تعملش الخطوة دي..الا أما تعمل الخطوة الجاية.

2-    Cleansing ritual

او طقس التطهير..

انا بحب أسميه كده..

لإن ما ينفعش تكون قعدت طول عمرك تبني قدامك سور عالي أوي، وضخم أوي، والوقتي عايز فجأه انك تعديه، كل ما تحاول لازم هتتخبط فيه..

يبقى لازم تشيله..

إزاي؟

هات ورقة فاضية، طريقة الكتابة دي جميلة جدا جدا ومفيدة جدا جدا، عشان عينيك بتشوف الي انت بتكتبه، وعقلك الباطن بيوصله كل كلمة عينيك بتشوفها وهي بتتكتب قدامها..المهم هات الورقة الفاضية، واكتب فيها كل حاجة بتضايقك..!

آه كل حاجة بتضايقك، أنا آسف..بس معلش، استحملني..

اكتب كل حاجة بتضايقك في حياتك، في شغلك، في أصحابك، في حبيبك، في كل حاجة..

ومش بس اكتب، عايزك تعيش كل حاجة بتكتبها، عايزك تتضايق..تكتئب..تزعل..

انا عايزك تتخنق !

صدقني..كل ما هتحس اكتر بالكلام الي بتكتبه..كل ما هتبقى قادر أكتر انك تشيل المعتقد السلبي والكره المرتبط بالكلام ده جواك..

الطبيب لازم ينضف الجرح كويس من الداخل..قبل ما يخيطه..

ممكن تكون عملية التنضيف مؤلمة..

لكن ضرورية، ومفيدة..وإلا هتجيب نتايج عكسية بعد كدة..

المهم..بعد ما تعمل كل ده، وبرده بكل تفصيله تقدر تكتبها انت..هات الورقة دي، وقطعها، واحرقها قدام عينيك..

وبعد كده، اعمل الخطوة الاولى، الخاصة بالورقة الي تكتب فيها مشهد من حياتك يفرحك، يكون فيه كل امنياتك اتحققت..

3-    Refelct from inner to outer .

كلنا دايماً بنبص على الي حوالينا..ما بنبصش جوانا..

الطريقة دي جميلة جدا في استخدام قانون الجذب..

Joe Rubinho  و Robert Anthony   و Joe vitale   الثلاثة..

قالوا الكلام ده..، وانا مصدقهم فيه جداً.. عن تجربة شخصية..

عشان تعيش الثراء الخارجي..لازم تعيش الثراء الداخلي..

يعني ايه..؟

يعني لازم تكون من جواك غني، عشان تجذب الغنى حواليك..

أيوة إزاي برده..

مش هقولك يعني لازم تكون راضي عن نفسك وفرحان داخليا وكده..عشان الكلام ده قلتهولك قبل كده، رغم ان الكلام ده مهم جداً..

لكن المرة دي هقولك حاجة جديدة..وغريبة..

جرب تتخيل، وتحس، وتشوف جواك كنز..

اقنع نفسك وعيش انك جواك كنز فعلاً..جواك ثروة..

وغمض عينيك وتخيل ان كل حاجة حواليك، مرتبطة بيك داخلياً..

Jacob jones  أو مش متذكر الاسم أوي..

بيقول لو عايز تتخيل ان في خيط نور بيربط كل حاجة حواليك بيك..تخيل..

تخيل ان الكنز الي جواك، وكل حاجة حواليك، فجأة بتتعكس

وتطلع بره..

والكنز الي جواك بقى حواليك..

الثراء الداخلي، والفرحة الداخلية..

انت طلعتها من جواك..نشرتها حواليك..

تقنية جميلة انا مجربها شخصياً..ويمكن من أسرع التقنيات الخاصة بقانون الجذب من نحية الوقت..

لكن للأسف هنا في بلادنا قليل الي اقتنعوا بيها عشان شايفين انه عيب او من الجنون، ان واحد يقعد لواحده، ويقول لنفسه – في خياله – انا جوايا كنز..!

أتمنى تكون المقالة عجبتك، وأتمنى ما أكونش طولت عليك..وبعتذر عن تأخيري الفترة الي فاتت..

وتابعونا لكل جديد ان شاء الله.

Comments

comments