main

قانون الجذب

النوم سلطان

October 4, 2011 — by فيصل عبد الواحد26

النوم سلطان

النوم فعلاً سلطان..لكن ليه؟

الأول قبل ما أكلمك عن المقالة دي وغرضها وشرحها المفصل، الي وعدت بيه لما اتكلمت قبل كده وقولت

"لو عندك مشكلة..نام"

هكلمك عن حاجة كتير من الناجحين جداً، ان ماكانش أنجح الناس، بيعملوها

وهي

Giving your mind a candy

اتكلمت عنها قبل كده في مقالة "الوعد" الي كان لازم توعده لنفسك

لكن هفكرك بيها

يعني ايه الجملة الي فاتت دي ؟

انت مجال شغلك ايه، لو بتشتغل يعني

الدعاية والاعلان مثلاً..؟

جميل، عايزك بكره أول ما تخلص شغل،

تجيب مجلة عن الموضة لشتاء 2011

وتتسلى فيها !

معلش..استحملني

انتي مجال شغلك ايه ؟

مهندسة ؟

عايزك أول ما تخلصي شغلك بكرة ان شاء الله

تقعدي عالنت، وتكتبي في جوجل :

سقراط

وتقرأي مقالاته الفلسفية

لأ.. مش عشان الثقافة

عشان مخك محتاج ياخد راحة من المجال الي انت بتستخدمه فيه كل أوقات شغلك

محتاج يشتغل في حاجة مختلفة

بص..لو فضلت في شغلك بس، هتنجز فيه، واحتمال تنجح

لكن استحالة

تكون مبدع، لو ما ريحتش عقلك، بإنك تقرأ أو تجرب أي حاجة مالهاش أي علاقة باللي انت بتعمله

بيل جيتس بيقرأ أشهر مجلة نسائية عن الموضة، كل أسبوع تقريباً

المهم..ده علاقته ايه بالنوم ؟

وعلاقته ايه بأنك يكون عندك مشكلة !

ما تقلقش، أنا مش مخليك تقرأ أكثر من 30 سطر الوقتي عشان أكلمك على المبدأ الي فات بس

انا بس بحاول أوصلك لفكرة قريبة

ان طول ما أنت وسط المشكلة، وبتفكر في حل، عمرك ما هتوصل لحل

خليني اسألك سؤال

أو عايزك تعمل حاجة بسيطة كدة الوقتي

عايزك تقوم تقف

وتبص تحت رجليك، انت واقف على كام "سيراميكه" أو كام "بلاطه"..على حسب المكان الي انت فيه

واحدة؟

آخرك اتنين..

صح ؟

تمام

لو تخيلت، ان كل بلاطة أو سيراميكه بتقف عليها، بتنور لما انت بتقف

هيبقى السيراميكة أو الاتنين دول الوقتي..منورين

مش كدة ؟

جميل جداً..

طب لو قلتلك ان بالظبط، وبدون أي مبالغة، محاولتك لتفكيرك لحل للمشكلة، وانت في وسط المشكلة، هي بالظبط، كإنك واقف على البلاطتين دول، وبتبص عليهم

وبتدور على الحل فيهم

صحيح هما الوقتي منورين من وسط كل بلاط الأوضة الي انت فيها، عشان انت مركز عليهم

لكن استحالة، هتلاقي الحل، الا لو حد، جه رماه تحت رجليك..

لكن..لو قلتلك

ان قاعدة بيانات معرفتك، تمثل كل البلاط اوالسيراميك الي في الدور الي انت واقف فيه كله

وتقدر تركز عليهم كلهم..

لكن بامكانياتك دي الوقتي..

وانت "واعي" استحالة تغطي كل المساحة دي

المفهوم قرب منك شوية..

ومتشوق لباقي المقالة..

مش هقولك الجزء التاني المقالة الجاية، لا تقلق

عايزك الوقتي، لو لا قدر الله كنت في مشكلة

تقفل كل حاجة قدامك

اقفل أمير نفسك، بعد ما تخلص المقالة، واقفل النور

واعمل الي هقولك عليه

روح نام

"استلقي" على سريرك

نام في الوضع الي انت بتحب تنام فيه دايماً

وانسى كل حاجة

وهتلاقي "سيل" من المعلومات والحلول، بيتدافع في عقلك

وهتفتكر ناس يحلولك مشاكلك كنت ناسيهم خالص

وهييجي في بالك طرق وأساليب عمرك ما فكرت فيها

وهتقول لنفسك لما تقوم، انا ازاي مافكرتش في كدة..

الوقتي..يا بختك لو عندك مشكلة

عشان بإذن الله وبفضله، عقلك الباطن، هيقدملك حلول ليها لما تطبق الي قلتلك عليه

ماجتش في بال أي حد قبل كده

بالعكس..ممكن المشكلة دي، تخليك "تبتكر" طريقة جديدة في التفكير

وطريقة جديدة لتطبيق حاجة انت بتحبها جداً، وتستخدمها كل مرة تحتاجها بفضل الله

وتروح تسجلها في وزارة الثقافة المصرية

زي العبد لله 🙂

مستني ردك على المقالة دي بالذات، وما تنساش

النوم..سلطان

26 comments

  • Noha

    October 4, 2011 at 12:25 am

    بدون مبالغه المقال فوق الممتازه..واكتر من رائعه وكل الكلام دا….وردى عليها انا كنت بستغرب جداااااااااااا انا ليه لما ببقى ف مشكله مش بحب اتكلم فيها مع اى حد خالص حتى لو مين…وبحب افضل لوحدى نايمه على سريرى بدون نوم….وساعات فعلا كنت بفتكر ناس….وبصراحه كنت متعقده مالموضوع دا لردجة انى كنت عاوة استشير دكتور نفسى 😀

    الحمد لله…طلعت عاقله 😀 😀

    بجد…تسلم افكارك…ومقالاتك

  • Amany Rashed

    January 21, 2012 at 3:13 pm

    very good

  • صحراء 55

    February 22, 2012 at 11:52 pm

    السلام عليكم هذا المقاله رائعه جدااااااااااااااااااااااااااا وانا عملت به الحمدلله مشكلت انحلت والحمدلله

    مشكور على المقاله

    ^-^

  • فيصل عبد ال

    March 5, 2012 at 5:06 pm

    الحمد لله، ربنا يزيدنا جميعاً من فضله ويوفقنا في حياتنا، شكراً لمرورك الجميل يا شذى

  • nagat

    March 23, 2012 at 3:34 pm

    اكتر من رائعه مقاله بجد انا ساعات بعمل كدا اقول عايزه اريح دماغى من تفكير اعمل اقرا كتاب ملوش علاقه بتخصوصى او انام واقول انو الحل موجود وبيجنى الحل

  • فيصل عبد ال

    March 23, 2012 at 10:06 pm

    الدخول في النوم بيصفي المخ من كل الأفكار المتداخلة الخاصة باليوم كله، وبالتالي العقل بينقل تركيزه للحل بدل من المشكلة
    بالتوفيق ان شاء الله

  • scarlett

    April 16, 2012 at 1:38 pm

    واااااااااااااااااو مقال رااااااااااائع فعلا الله يخليلنا ياك دكتورنا المعجزة من لمّا اتعرفت على موقعك الرااااااااااائع و كل يوم عن يوم عم اتفائل اكتر واكتر وكل يوم افكاري ومعتقداتي عم تصير احسن واحلى من قبل صرت مبسوووووووطة كتيييييييييير ودائما متفائلة وعم اضحك وصرت حس باني بئدر حقق كل احلامي بكل سهولة باذن الله شو بدي قلك ما بعرف الف مليون ترليون شكر الك ……فعلا النوم سلطان انا لما بيكون بدي اي شي معلومة مثلا او طريقة معينة لشي شغلة قبل ما نام بقول لعقلي الباطن بدي كذا وكذا وانت ستجد لي الطريقة الحلوة والسهلة باذن الله وفعلا تاني يوم او بعد كم يوم بشوف اللي بدي ياه صار قدام عيوني (طبعا هالتقنية بتزبط معي كتير بس بالامور اللي ما فيها مقاومة داخلية مني او شك )على فكرة الله هداني على هالموقع الرائع بسبب هالتقنية كنت دائما قول لعقلي الباطن كل يوم قبل النوم بدي كذا وكذا وانت ستجد لي الطريقة السهلة والحلوة باذن الله وما كنت بعرف اي طريقة تساعدني على تحقيق حلمي وفجأة الله هداني ودلني بفضله على هالموقع الفخم وعليك انت دكتور فيصل ….ومن اول ما دخلت عالموقع حسيت شعور غريب حسيت انو فعلا حلمي اللي عجزني رح يتحقق هون اخيرا باذن الله…. والله يكملها معي ياااااارب عن جد شي راااااائع ……..جربوا

  • فيصل عبد ال

    April 16, 2012 at 4:17 pm

    جزاك الله خيراً يا لمى، شكراً على كلامك الجميل
    اتمنى ان شاء الله أقدر أفيدك وأفيد كل القراء
    بالتوفيق ان شاء الله

  • اسيل

    May 20, 2012 at 6:05 am

    *اتفق معاك في ان وقت المشكله لن ترى الحل حتي لو كان قريب-لكن اذهب للنوم وانا في عز المشكله صعب حتي لو كنت لا افكر بالمشكله ،من الداخل شئ يدفعني للقلق وعدم النوم

  • فيصل عبد ال

    May 20, 2012 at 8:47 am

    بالظبط، الانسان لما بيروح ينام وبدأ ينسى همومه الحل بيبدأ يبقى واضح قدامه نوعاً ما
    شكراً على ردك الجميل وبالتوفيق ان شاء الله

  • Anonymous

    June 10, 2012 at 9:19 pm

    يااااااااااااه داياما كنت بقول لنفسي اني حد محصلش ولا هيحصل وهيجي يوم يخرج ابداعه للنور والعالم كلة يستفاد من تجاربي واكتشافاتي بجد مش هزار سبحان الله لو قعدت اوصف انا اد ايه فرحانة من الي انا فيه نص عمري مش هقدر اوفي زي لو قعدت اشكر الاستاذ فيصل يمكن كلامي مش مفهوم بس يمكن ده راجع لشخصيتي بحب اوصف قوي قبل ما افهم الي قدامي انا عوزة اقول ايه عشان لما اجي اقول يفهم بمنتهى البساطة والوضوح طيب انا بقى ليه فرحانة لثلاثة اسسباب الاول طبعا لاني لقيت الموقع ده وبطريقة والله محد هيسدق كنت بتصفح في موقع نسائي عزيز على قلبي بلاقي فيه كل ما يجعلني أنثى بحق المهم اني قريت حاجة عن الجذب بين الجنسين وبسرعة وبدون اي مقدمات عيني راحت نحية الشمال وقعدت افتكر اروع مقالة لحمود العبري عن الجذب قريتة من فترة كبيرة وبسرعة تاني ضحكت لاني حتى من قبل ما اقرا مقالة حمود كنت بعمل جذب لكل حاجة عوزاها وقبل حتى ما اعرف انو فيه حاجة اسمها قانون الجذب بس كنت ماشيا بكلمة النبي عليه الصلاة والسلام والي ذكرها حمود العبري ف مقالة استدلالامنه بها على ان قانون الجب حقيقي وليس خيال وهي تفائلو بالخير تجدوه وان معظم الي قريتة هنا ف امير نفسك انا كنت حساه وفهماه وبعملو واندهشت ومقدرتش اكتم ضحكة الانتصارة انو انا فعلا بعمل حاجت هي اصلا قوانين ودراسات علمية انا بجد فرحانة .ثانيا ياخبر كل الي فات ده ف اولا بس كتر خير الي هيقرأ معلش بس الي بيتفرج تركي اكيد هيحس اني كلامي كلو على بعض كلمتين اما الي بيتفرج مكسيكي هيحس بقى اني مقلتش حاجة اصلا ايه السكوت ده *_^ماعلينا نرجع لثانيا فرحانة لاني فعلا بنام اول ما بيكون عندي مشكلة وللأسف ماما كانت بتمنعني ولاني شايفة انو مش لازم نسمع كل الكلام الي بيقولهلنا ف البيت وان لازم اسمع صوت نفسي والي غالبا ما بيكون صح كنت بعتذر من ماما رغم قتالها المستميت لاقناعي بصدق نظريتها انو الواحد مينفعش ينام وهو مضايق من حاجة عشان ميأثرش بالسلب عليه وانا بقى ولا هنا يعني عيزاني اسهر يعني مده برضو بيأثر بالسلب الله ماعلينا وفعلا بلاقي حل ,حل ده ايه حلووووول بطريقة الحمد لله ع كل حاجة ادهاني وعلمهاني وبعتلي الي يعلمهاني بجد بشكر ربنا جدا وبشكر استاذنا الفاضل ثالثا كنت قريت مقالة حرق المعتقدات وقبل ما افتحها قلت معقول تكون الحاجة الي بتهزأمن ماما تملي لما بعملها لالالالا معقول في حد زيي بيتهزأ اقصد بيعنلها وبيتزعقلو ف البت على الدخنة والحراويق هههههه بجد مسدقتش روحي انو للمرة الكام _معدتش_بلاقي علم بيقول حاجة انا بتهزأمن ماما عليها يااااااااه مقلكش اد ايه برتاح بعد مابعمل حرق الورق ده والي اوقات بكتب اسامي النا الي دايقوني واحرقهم عشان معدوش يمثلولي اي قيمة بس الوجع لما بقابلهم ودي مشكلة بتقابلني هبقى ابعتهالك ع الميل مع بعض المشاكل التانية بخصوص موضوع عوزاك تساعدني ف الكورس .بعتذر اني مسلمتش اول الكلام بس قلت مبدهاش بقى لازم اكتب رد عمااااالة اقرا مقالات من امبارح ومردش لحد الوقتي بجد انت انسان جميييييل والاجمل بقى انك ترد ع السؤالين دول لو مفهاش تعب يا استاذ فيصل 1_ازاي اقدر اقابل حضرتك ف القاهرة يعني عنوان مكتبك ولا مينفعش غير ف الكورسات وبس2_هو حضرتك بعد ثانوية عامة درست المجال ده ولا درست طب نفسي الاول وبعدين سافرت امريكا وطلب اخير ممكن تحطلنا جداول مواعيد كورساتك ف القاهرة والاسعار وطلب اخر منين اقدر اجيب كتاب التعامل مع الجنس الاخر بتاع حضرتك شكرا وبعتذر ع الاطالة اااااااااه حاجة اخييرة صغنونة خالص والله ممكن رقم تلفونك لومكنش عند حضرتك مانع ممكن ولا مينفعش اوعدك مش هدايقك بس عندي اسالة كتير مقدرش اسالها هنا وان شاء الله تكون مكالمة واحده بالكتير اتنين وبشكرك من كل قلبي تحياتي صانعة الاحلام

  • فيصل عبد ال

    June 11, 2012 at 12:08 pm

    اهلاً يا صانعة الأحلام
    ان شاء الله تكوني بخير، شكراً على كلامك الجميل وبالعكس، ما زهقتش من قراءته ولا حاجة
    ان شاء الله أقدر أفيدك وأفيد كل الناس دايماً بإذن الله
    حابب بس انوه لحاجة مهمة، فعلاً ما ينفعش تنامي وانتي متضايقة، لكن في حاجة مهمة جداً، وهو في فرق بين انك تنامي وانتي متضايقة او زعلانة
    وبين انك تصفي نفسك من كل حاجة وتبدأي تنامي، الوقت اللي انتي فيه داخله في النوم بتبدأ الحلول تظهر
    وهو ده مقصود المقالة
    بالنسبة لحرق المعتقدات فهي طريقة فعالة جداً، استمري عليها بإذن الله، بالنسبة للكورسات والتدريبات، الكورس الأساسي بتاعي هنا على أمير نفسك
    هتلاقيه في صفحة كورس تدريب قانون الجذب المكثف من هنا
    كورس تدريب قانون الجذب المكثف
    المفروض اني اعمله 4 مرات في الشهر لكن نظراً لانشغالي ان شاء الله الفترة الجاية هيبقى مرة أو مرتين على أقصى تقدير في الشهر
    وهيرجع لقيمته الحقيقية مش المخفضة خلال شهر ستة بإذن الله
    وان شاء الله هيبقى في كورس قريب في المركز الكندي وفي شركة سنابل في القاهرة، وفي شركة كي في في المنصورة عن جذب المال
    ان شاء الله هكتب التفاصيل عنهم قريب، وممكن تقابلني في أي واحد فيهم بإذن الله
    كتاب التعامل مع الجنس الآخر ما عدش بيتطبع خلاص، وتقدري تبعتي اي استفسار على
    personal@amirnafsak.com
    انا درست كل حاجة مع مدربين بشكل شخصي، سواء ستيف جونز او جو فيتالي او غيرهم، ومعظم دراساتي كانت في الجامعة الأمريكية للبرمجة اللغوية العصبية زي ما مكتوب
    وكانت E-learning
    لأن هو ده كان المتاح منهم الوقت ده، لكن تقريباً الوقتي بقى عندهم اي ليرننج ودراسة كامبس عادية
    مرة تانية بشكرك على كلامك الجميل، وبالتوفيق دائماً ان شاء الله

  • Anonymous

    June 12, 2012 at 7:44 am

    اهلا بحضرتك يا فندم 

    بجد بجد كلمة شكرا قليلة ع حضرتك

    ولان مفيش اقيم من جزاك الله خيرا فانا بقلك من كل قلبي جزاك الله خيرا استاذنا الفاضل

    سؤال صغير _هو لية اسمي لونه مش دهبي زي الباقيين وازاي اشترك بطريقة رسمية ف الموقع عشان ابقى زيكم ؟

    اه ع فكرة انا ضفت ميل الموقع بس مظهرش فمش قادرة ابعت حاجة, صدق ع الاضافة وانا ابعت لحضرتك اسألتي اتفقنا

    وبجد كلام حضرتك هو الاجمل من كلامي بكتير وبشكرك ع المجاملة الرقيقة

    وختاما تحياتي صانعة الاحلام

  • Anonymous

    June 12, 2012 at 8:12 am

    لسه مخلصة قرائة الكورس المكثف حالا 

    سؤالين من فضلك بخصوص موضوع الكورس المكثف

    1_خمس ايم الكورس بتقى فين ف القاهرة ولا المنصورة ولا اون لاين هنا ف الموقع؟

    2_حضرتك بتقول انو سعر الكورس 297 وف شهر سته الي هو احنا فية هيرجع لقيمته الاصلية طيب يعني انا لو حبيت اشترك ف الكورس الجاي هدفع ضعف السعر 297 ياخبر بجد الكلام ده؟

    وبعتذر من كتر أسألتي 

    وبشكرك ع رحابة صدرك واجابتك ع كل أسألتي 

    تحياتي صانعة الاحلام

  • Anonymous

    June 12, 2012 at 8:47 pm

    بعتذر أني دوشت حضرتك بأسألتي بس ده اهم سؤال نسيت أسأله الضهرية مع الاسالة ال فاتت لية كتاب حضرتك الجذب بين الجنسين معدش بنطبع لية وازاي اقدر الاقية وبكام 

    شكرا 

    تحياتي صانعة الاحلام

  • فيصل عبد ال

    June 12, 2012 at 9:06 pm

    اهلاً يا صانعة الاحلام
    انتي اسمك ازرق عشان بتكتبي رابط الموقع جمب كلمة
    Link
    سيبيها فاضية واسمك هيبقى برتقاني عادي زي باقي الأعضاء بإذن الله
    بالنسبة للميل والاضافة، الميل ده مش ميل ياهو، دي ميل انبوكس بس
    اي حاجة عايزه تبعتيها ابعتيها في رسالة عليه
    شكراً لكلامك الجميل واتمنى اني اكون قادر افيدك وافيد القراء دايماً بإذن الله
    بالتوفيق ليكي دائماً ان شاء الله

  • فيصل عبد ال

    June 12, 2012 at 9:09 pm

    الكورس بيكون اونلاين ان شاء الله
    واه بالفعل بعد شهر ستة هيبقى الكورس بقيمته الحقيقية، 497 دولار
    انا اصلاً الكورس ده بدرسه للأجانب بنفس القيمة
    وتجربتي اني ادربه للعرب لسه في الشهر ده بس وعشان كده بسعر مخفض حوالي 50% وبعد كده هيبقى بنفس قيمته الحقيقية ان شاء الله
    ومش هقدر اديه اكتر من مرة أو مرتين في الشهر الواحد على اقصى تقدير نظراً لانشغالي

    بالتوفيق ان شاء الله

  • فيصل عبد ال

    June 12, 2012 at 10:46 pm

    مشغول بحاجات كتير بصراحة عن اني اعيد طبعة، كمان السكريبت بتاعه تايه وسط حاجات كتير حتى لو فكرت اعيد طبعه تاني
    ان شاء الله الفترة الجاية هطبع كتب تانية بإذن الله
    بالتوفيق بإذن الله

  • شروق إيماني

    December 25, 2012 at 9:14 pm

    ممكن يا دكتور تقول لي إيه حصل لحضرتك و سجلت إيه في وزارة الثقافة ؟
    ربنا يزيدك علما يارب
    اللهم آميــــــــــن

  • amirnafsak

    December 26, 2012 at 10:38 am

    حدث في ماذا تحديداً ؟
    وبالنسبة لوزارة الثقافة فما تم تسجيله هو معادلة سحر قانون الجذب
    تحياتي لك، وبالتوفيق بإذن الله

  • شروق إيماني

    December 30, 2012 at 9:42 am

    بعد إذن حضرتك يا دكتور : هل من حقي أعرف هذه المعادلة؟

  • amirnafsak

    December 31, 2012 at 10:41 am

    اهلاً يا شروق
    اذا كنتي تقصدي معادلة سحر قانون الجذب، فهي خاص بكورس طاقة الجذب
    تحياتي لك، وبالتوفيق بإذن الله

  • منة الله

    March 13, 2013 at 11:19 pm

    انا لما يكون عندي مشكله او زعلانه بنام .. بس سمعت تحذيرات من الدكاترة من الناحية الطبيه غلط النوم مع الزعل ومن الناحيه النفسيه مانفعش انام وانا زعلانه هكتم الطاقه السلبيه جوايا .. انهي صح ؟

  • فيصل عبد الواحد

    March 20, 2013 at 8:08 pm

    بالظبط، انا لا أقول أن ننام ونحن نشعر بذلك الحزن
    ولكن عند النوم، إذا كنتي لا تجدي حلاً لمشكلة ما
    فيمكنك ان تجدي لها الحل لأن في ذلك الوقت يكون الذهن صافي تماماً بإذن الله

  • BARO

    April 4, 2013 at 11:46 pm

    حزااك الله خير

  • فيصل عبد الواحد

    April 5, 2013 at 4:46 pm

    اشكرك على دعاءك الجميل
    بالتوفيق بإذن الله

Leave a Reply

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close