main

لغة الجسد

يوميات مدرب لغة جسد

August 1, 2011 — by فيصل عبد الواحد38

وأنت ماشي في الشارع..

شايف بنت بتبص لولد..

انت ضحكت..

وبعدها، شوفت "شحات" في الطريق..

ما ادتلوش حاجة وسيبته ومشيت..

وبعدها بشوية لقيت "شحات" تاني..

ابتسمت..ووقفت طلعت من جيبك خمسة جنيه ادتهاله..

بعدها بشوية شوفت بنت واقفة مع صاحبتها بتسألها :

"هو مين الي كان واقف معاكي ده"

فقالتلها "ده محمد خطيبي"..

ضحكت وكملت مشي..

وقعدت تفكر في كل الي انت شوفته..

قولت تقعد في كافيه تستريح شوية من المشي..

دخلت قعدت، لقيت قاعد في الترابيزة الي جمبك شخص ما..

بصتله وفكرت..

ونسيته، وبعدها جاله تليفون..

فضحكت..

ولمحت بطرف عينك بنت وولد قاعدين بعيد عنك..

في آخر الكافية..

وبرده ضحكت..

قولت تتفرج على التليفزيون شوية..

طلبت من الجرسون بتاع الكافيه يغير المحطة..

عشان كان شغال عليها فيلم جديد..وانت ما بتحبش الأفلام..

لقيت برنامج سياسي..

عليه شخص سياسي..

معروف..

رمز من رموز بلدك..

أو هكذا يطلق عليه..

بصيت..وابتسمت ابتسامة، باحساس بالمرارة..

الجرسون جابلك البرتقان..

سألته البرتقان ده فريش..

قالك آه يا فندم..

بصتله وضحكت..

وسيبت البرتقان ما شربتوش..

ومع ذلك قومت حاسبت..

وكملت مشي في طريقك..

دخلت الجامعة، دخل جمبك بنتين، بصتلهم..

وابتسمت ابتسامة خفيفة جواك..

ولما مشيت كام خطوة..سمعتهم بيتكلموا ويضحكوا..

فضحكت.

يمكن القصة غامضة..

وتفاصيلها ناقصة كتير..

لكن حاول تقرأها تاني بعد ما تدمجها باللي هقولهولك الوقتي..

أول بنت شوفتها بتبص لولد، ضحكت عشان عارف انها اعجبت بيه من بصتها ليه، وتحديداً بستايل لبسه الكاجوال..عشان عينيها راحت على اسم ماركة التي شيرت المشهورة المطبوعة على اليمين بخط صغير..

وكانت عايزه تروح تكلمه..وضحكت أكتر لما رمت سلسلة مفاتيحها عالأرض لما عدى جمبها..

أول شحات، انت عرفت انه كذاب، عشان ببساطة بيغير وشه كل ما يشوف حد يعدي قدامه..

فمادتلوش فلوس..

تاني شحات، حسيت فعلا انه محتاج الفلوس..

حركات جسدة مش مفتعلة..

تعاطفت معاه، وكمدرب لغة جسد..لمسك اوي من جواك..

عشان حسيت انه فعلاً، صادق في اللي بيقوله..

البنتين الي كانوا واقفين مع بعض..

لما سألتها مين الي كان واقف معاكي ده..

عرفت ان صاحبتها كذبت لما قالت "ده محمد خطيبي"، عشان أول ما قالت محمد خطيبي قطعت الـ Eye contact  اللي كان قائم بين عينيها وبين عينين صاحبتها..يعني بالبلدي..راحت بعينيها في حتة تانية..

لما تعبت من المشي..وقررت تقعد في كافيه عشان تشرب عصير البرتقان اللي بتحبه..

كان قاعد جنبك شخص..

من حكمك على لبسه والشنطة الي معاه..

الي طالع من سوستها من الجمب ورقة حافظة مستندات..

وموبايله القديم الي حاطه قدامه عالترابيزة..

قولت انه محامي..

ولما جاله تليفون..وسمعته بيقول انه التوكيل لازم يتعمل بدري عشان يلحق ياخد اجراءاته في المحكمة بسرعة..ولما قال خليه يعمله باسمي أنا، "......" المحامي..اتأكدت أكتر ان حكمك صح..

لما شوفت الاتنين الي قاعدين بعيد..

عرفت ان الولد بيمثل على البنت انه بيحبها..

لأنه بيحاول يمثل انه بيغير..

وعرفت كدة من غير ما تسمع كلامهم..

من حركات ايده السريعة، ونظراته السريعة للأرض، وحركات وشه المتقلبة في كل مكان في الكافيه ماعدا وش البنت دي..

ومن محاولاتها اليائسة لمقاطعته، عرفت انها بتحاول تهديه وتشرحله موقف ما..

فضحكت..

وانها – للأسف – بتحبه بجد..

قولت تتفرج على التليفزيون، لقيت عليه فيلم، فطلبت من الجرسون يغير المحطة عشان الأفلام ما بتستمعش بيها..

خصوصاً الأفلام الجديدة..

عشان كل الممثلين اللي فيها، فاشلين في استخدام لغة الجسد..

وبيمثلوا، انهم بيمثلوا..

الجرسون – مشكوراً – غيرلك المحطة..

لقيت رمز سياسي..

بيتكلم عن حبه للوطن

وللشباب..

ولثورة الشباب..

وانت حاسس من جواك انه منافق..

واتأكدت اكتر، من كلامه المرتب الهادي جداً..

اللي حافظه مش فاهمه..

واتأكدت من كده بإن حركات ايديه بتنفعل مع الجمل الهادية..

وتهدى مع الجمل الانفعالية..

غير انه – اللي زاد الطين بله – انه له "لازمة" بيعملها كل ما يكذب...

هي انه يحرك كتفه الشمال حركة بسيطة..ما يلاحظهاش الا الي يركز فيها.

ضحكت ضحكة بمرارة على مستقبل البلد..

اللي في ايد ناس زي دي..

جالك البرتقان، عرفت انه مش فريش، عشان الجرسون بص بعنيه على يمينه قبل ما يجاوبك..

وجاوب بعد حوالي ثانية من سؤالك..

ودي في لغة الجسد والبرمجة اللغوية العصبية، معناها انه بيكون الحدث اللي هيتكلم عنه..

ما بيتذكروش..

سيبت البرتقان ما شربتوش..

قومت حاسبت..

خرجت ومشيت لحد الجامعة..

وانت داخل من البوابة،

وعسكري الأمن بيطلب الكارنيهات، بعد ما انت دخلت لاحظت بنت، بتبص في الكارنيه اوي والعسكري بيبص فيه، وبيدهولها بعدها..فعرفت انها مش طالبة في الجامعة..

ومشيت كام خطوة، وجاتلها صاحبتها..

وضحكوا..

ان العسكري ما خدش باله..

ان الصورة اللي في الكارنيه دي..

مش صورتها..!

 

ده..

يوم طبيعي، من أيامك كمدرب للغة الجسد..

 

ها..

عايز تبقى كدة..؟

بس خلي بالك..الكلام ده هيبقى على كل حاجة..

حتى على أقرب الناس ليك..

فكر..

قبل ما تقول..

أنا عايز اتعلم لغة الجسد..


 

38 comments

  • khaled

    August 2, 2011 at 5:24 am

    روعه يومك يا مدربنا 😀

    بس انا عندى مشكله , بلاقى ناااااااااس كتير قووى بتكذب , وبتحور على بعضا

    واوقات بتصدم فيهم , لما فهمت منك حاجات عن لغة الجسد

  • Mohamed

    August 4, 2011 at 11:19 am

    مقال جميل جدأ….و أتمنى أن يوجد قسم بالموقع عن لغة الجسد

  • Noha

    August 5, 2011 at 1:39 pm

    ana bamoot f keda…ll2sf…7ta mn 2bl ma 2qr2 2y 7aga 3n lo3't elgasad!!! 😀

  • amir nafsy

    August 5, 2011 at 7:34 pm

    مهو عشان كده، قبل ما تتعلم لغة الجسد، لازم تعرف ان عينيك هتتفتح على حاجات كتير جداً..

    ممكن ييجي يوم وتقول لنفسك ياريتني فضلت زي ما كنت

    المهم بس في حياتك عامة، تتعامل مع كل الناس عادي، ما تخليش أي فعل أو اي صدمة من أي حد تخليك تغير سلوكك..

    ما تغيرش سلوكك أو تصرفاتك او حياتك، عشان حد، انت اصلاً مش عايزه في حياتك !

    بالتوفيق ان شاء الله في حياتك كلها يا خالد،

    فيصل عبد الواحد

  • amir nafsy

    August 5, 2011 at 7:35 pm

    بالفعل في قسم عن لغة الجسد، لكن اعتذر عن تأخري عن المتابعة الكام يوم اللي فاتوا

    مبسوط ان المقالة عجبتك، وأتمنى تتابع جديد المقالات ان شاء الله

    بالتوفيق،

    فيصل عبد الواحد

  • amir nafsy

    August 5, 2011 at 7:37 pm

    في قراءة الناس وتعبيراتهم يعني؟

    اه بالفعل لغة الجسد شيء جميل..خصوصاً لو احتفظتي بنتيجته لنفسك، يعني لو ما عرفتيش الطرف التاني انك عارفه انه بيكذب..

    ان شاء الله تابعي مقالات تانية عن لغة الجسد قريب، وأتمنى تعجبك وتعجب القراء جميعاً بإذن الله

    بالتوفيق،

    فيصل عبد الواحد

  • mido

    August 12, 2011 at 3:10 am

    جزيت خيرا" كثيرا وربنا يجعله فى ميزان حسناتك

    أحسن حاجة ان طريقتك بسيطة أوى وسهلة الفهم

  • amir nafsy

    August 12, 2011 at 8:00 pm

    مبسوط ان المقال عجبك، يارب كل المقالات تعجبك وتفيدك بإذن الله

  • asmaa

    August 21, 2011 at 5:31 pm

    السلام عليكم ورحمة الله وبركاتة

    انا فعلا بموت فى العلم دة بحب اوى لغة الجسد وبحب اقرا فيها كتير

    بس عندى مشكلة انى لما احب اطبق الموضوع دة ………….وطبعا معنديش خبرة ولا دراسة بس الموضوع عندى قراة كتب وحضور كورسات فقط

    فى مرحلة التطبيق على الناس المحيطين بيا

    بحس انة تخمين انا بخمن ان دة بيكدب وفلان صادق وهكذا

    وبفكر فى شئ اكثر حساسية الا وهى هل اللى انا بعملة دا سوء ظن بالناس ولا لاء

    ؟؟؟؟؟؟؟؟؟؟؟؟؟؟؟

    انا بجد بشكرك جدا واسلوبك رائع

    يوميات سعيدة ان شاء الله

  • amir nafsy

    August 24, 2011 at 12:57 pm

    ان شاء الله استني مواضيع هنا تغنيكي عن كل الكتب والدروس، لأن للأسف كل الكتب والدروس الخاصة بلغة الجسد بتهتم بـ"تحفيظ" لغة الجسد، بإنها تجيب صور لحركات كتير جداً ومواضيع كتير جداً للجسم، وتكتب تحت كل شكل تفسيره، ومطلوب منك انك تحفظي أكثر من 5000 شكل

    لغة الجسد مش كدة خالص، لغة الجسد طاقة في الأول والآخر، بتحسيها من الشخص، الحركة الواحدة نفسها ليها أكتر من تفسير، المهم في الأول، انتي "حاسة" ايه، وبعد كده تقارنيه بالحركات والأوضاع الي عارفاها..

    وما تحاوليش تخمني، ما تقوليش لنفسك يا ترى ده بيكدب ولا بيتكلم بجد..لما تدخلي اكتر في لغة الجسد هتنمي عندك حاسة، تقدري بيها تحسي الي قدامك، أو حتى الي قاعد على ترابيزة جمبك في مطعم، بيكدب ولا بيقول الصدق، حتى من غير ما تكوني شايفاه

    بالنسبة لحكاية سوء الظن، لأ مش سوء ظن ولا حاجة، انتي لسه في الأول فاتعودي على انك تجربي وتغلطي وتجربي وتغلطي، سيبك من حكاية سوء الظن دي، خديها كتعليم ليكي مش أكتر،

    بالتوفيق ان شاء الله، وأتمنى باقي المقالات تعجبك

    فيصل عبد الواحد

  • hesham 7asan

    October 14, 2011 at 3:34 pm

    انا بجد عاجباني جدا لغة الجسد ونفسي اني اتعلمها و اتقنها كمان … بس ازاي انت بتعمل كورسات تدريب ؟

  • فيصل عبد ال

    October 15, 2011 at 10:25 am

    بالفعل بنعمل كورسات تدريب، وان شاء الله نازل في الجامعات المصرية قريباً جداً
    تابع الموقع لتعرف مواعيد وأخبار الندوات والمؤتمرات

    بالتوفيق،
    فيصل عبد الواحد

  • Neso Nasaneso

    February 4, 2012 at 6:45 pm

    ماشاء الله كلام رائع وجميل

    انا فعلا بلاحظ تصرفات الناس فى كل حاجة ودايما بحب اتامل الناس وسلوكهم حتى فى الشارع او المواصلات او فى اى مكان .. بس مكنتش عارفة ان ده علم وممكن اتعلمه

  • فيصل عبد ال

    February 6, 2012 at 4:39 pm

    هيبقى في منتج مخصص للغة الجسد، مدمجة بقانون الجذب بالتفصيل ان شاء الله قريب
    المفروض ان كان هيبقى في كورس خاص بلغة الجسد هيتعمل من فترة، لكن انشغالي في موقع
    modirnafsak
    هو الي أجل الحكاية
    ان شاء الله تقدري تتابعي المواضيع والأخبار باستمرار، بالتوفيق ان شاء الله
    فيصل عبد الواحد

  • Amany

    February 10, 2012 at 5:45 pm

    جميل جدا….

    محتاجه جدا اني اتعلم لغه الجسد لأني مفتقداها ومش بعرف خالص افهم نوايات الناس

  • فيصل عبد ال

    March 5, 2012 at 5:04 pm

    كلنا نعرف لغة الجسد، وان شاء الله جزء تعليمي مخصص للزوار قريباً

  • فيصل عبد ال

    March 5, 2012 at 5:05 pm

    بالظبط، كلنا عندنا القدرة على ترجمة لغة الجسد، لكن لعدم اعتمادنا عليها، بقت مندثرة نوعاً ما
    بالتوفيق ان شاء الله

  • Rama

    April 20, 2012 at 9:40 pm

    بارك الله فيك و يعطيك القوة دائما و يزيدك علما و نجاحا في حياتك العملية و العائلية انا عندي استفسار بالنسبة لمشهد المحامي على انه ماسك موبايل و قديم اشمعنى يعني ؟ما هو وجه الارتباط

  • فيصل عبد ال

    April 21, 2012 at 11:27 am

    كنت اشتغلت مساعد محامي لمدة يومين وأنا طالب، ولاحظت ان كل المحامين بيشيلوا موبايلات قديمة نوعاً ما، ولو شخص شايل موبايل قديم ومعاه شنطة، و مذكرات
    95% هو محامي
    ده من اللي لاحظته حواليا
    مش عارف ليه بصراحة المحامين بيفضلوا الموبايلات القديمة، يمكن عشان ناس عمليين أكتر، الله أعلم

  • Rama

    April 21, 2012 at 1:07 pm

    شكرا لك يا استاذ فيصل على ردك ممكن لاني انا كمان فسرتها زي ما حضرتك فسرتها ناس عمليين و تليفونهم مش بيسكت بس انا افتكرت  لمن قرات مقالك ممكن يكون من ناحية البخل معطيب من خبرتك في تحليل الشخصيات ازاي ممكن نعرف انه الشخص ده بخيل   

  • فيصل عبد ال

    April 21, 2012 at 10:13 pm

    الشكر لله يا Rama
    بالنسبة للشخص البخيل، مفيش حاجة معينة اقدر اقولك عليها تعرفيه منها مجرد ما تحصل، لكن عادة
    البخيل بيبان
    يعني لو في مطعم ولقيتي حد شيك جداً
    وفي نفس الوقت بيقرأ المنيو بتمعن، وبيحاول يحسب حاجة
    نسبة كبيرة ان الشخص ده يكون بخيل
    لو سمعتي حد بيتكلم في الموبايل أقل من دقيقة، والحكاية دي اتكررت أكتر من مرة يبقى بخيل
    و ممكن تلاقي حد ما بيصرفش الفلوس مش عشان هو بخيل، لكن عشان عنده وسواس انه هتحصله مصيبه يحتاج فيها فلوس كتير
    العلامات كتير، كل حاجة حسب الموقف وبتربطيها ببعضها
    بالتوفيق ان شاء الله

  • Rama

    April 22, 2012 at 1:31 pm

    شكرا يا استاذ فيصل

    و بارك الله فيك

  • فيصل عبد ال

    April 22, 2012 at 2:40 pm

    بالتوفيق ان شاء الله

  • Anonymous

    June 14, 2012 at 4:11 pm

    السلام عليكم 

    فعلا لغة الجسد وخاصة العيون شيء من اروع مايكون ولله الحمد والفضل والمنة انو اداني فهم بعض الاشياء حتى من قبل ما اعرف انو فيه حاجة اسمها لغة الجسد ولغة العيون بقدر اعرف الي قدامي حاسس بايه او عاوز ايه من عنيه ويمكن ده راجع لكوني حساسة زيادة عن اللزوم زي ما ماما بتقولي؟ الله اعلم

    بس المشكل انو فيه ناس عينهم مش مريحة ومش بقدر اصلا ابص فيها ولا افسر تصرفاتهم لان حركاتهم جامده يعني ممكن يكونو مش بيتعاملو بطبعتهم وهنا السؤال

    ازاي اقدر افهم الناس دي الي بيداري ازاي اكتشفو او افسر حركة جسمه وعنيه ؟

    كل الي بقدر احس بيه ان الي قدامي ده شخص مش طبيعي مش كويس وخاصة ف الجامعة بلاقي بعض بنات بيجو يتعرفو علي بخاف منهم وببعد والايام بتثبتلي اني كنت صح بس ازاي اقدر افسر قبل ما الايام تسبقني ف الاثبات او اني انتظر اثباتها ؟؟

    سؤال تاني 

    الصوت , من الصوت ف التيلفون ممكن تقدر تعرف الي قدامك شخص كويس ولا لاء يعني وتقدر تحكم عليه من صوتو انا شخصيا بحس  يعني مثلا ليا صاحبه لما بتكلمني بحس بحبها الكبير ليا ف كل مرة بتكلمني فيها ع الموبايل وتانية كل ما اكلمها بحس بحقدها عليا وبتأكد أكتر من نظراتها والتالتة بحس انا بتاخد مني الحاجات المهمة ف الدراسه وبس يعني مصلحة رغم كلام الحب الكتير الي بتقولو لكني بحس انو كلامها طالع من فريزر كلام وخلاص كل الي بعملو اني ببتسم بشكرها على رقتها المزيفة وبشرحلها الي محتجاه ومشفهاش ولا اسمع صوتها الا ع السنة الجديدة

    انا صح ف الي بحسو 

    يعني انا كده بقدر افسر او بفهم ف لغة الجسد ولا دي بدايات وانا ع اول الطريق

    منتظرة ردك استاذي الفاضل

    وبعتذر ع الاطالة

    وربنا يجعل ايامك كلها خير وسعادة دمت بحفظ الرحمن

    تحياتي صانعة الاحلام

  • nesma

    June 15, 2012 at 12:20 pm

    *طيب انا الحمدلله بعرف افسر تصرفات ناس كتير لدرجة اني سعات بتهم نفسي ان ده سوء ظن بس الايام بعد كده بتكشف اني كنت صح و ف معظم الاوقات بتكون تفسيراتي وتوقعاتي صح ونفسي اتعلم اوي لغة الجسد بجد ..

    لكن في شخص واحد مبقدرش افسر تصرفاتو الشخص ده كنت مرتبطة بي وسبنا بعض يمكن لان العاطفة بتلعب دور ف التوقعات دي

    الشخص ده كل م يشوفني من ساعت م سبنا بعض يحاول يهرب من المكان ومستحيل يجيب عنيه ف عنيا و من ساعت م سبنا بعض حاولت اتكلم معاه كتير ولا مرة بصلي ولا رفع عنيه و كان بيهرب علطول كأنو بيجري مني و ف نفس الوقت بيجي يقعد قدامي علطول ف اي مكان انا فيه اه مبيبصش بس لو انا مش مركزة معاه وبصتلو فجأة كده الاقيه كان باصصلي ويدور وشو علطول و ف مرة صحبتي كان قاعد قدامها وكنت المفرض انزل الجامعه ف اليوم ده بس منزلتش ف هو فضل قاعد ساعتين و طلع اتمشى برة لوحدو لف المبنى كلو حوالي 10 دقايق ورجع و بعدين كانت بتتكلم ف الموبايل بتقولي برفع عيني فجأة لقيتو كان باصصلها اوي و مركز كأنو عايز يعرف بتكلم مين .. و لما اكون ماشية بضهري بيفضل باصص عليا حتى صحابي اخدو بالهم وهما اصلا مش عارفين حاجة بس مجرد م الف مثلا يدور وشو ف ثانية ممكن تفسير بعد اذنك ؟

  • nesma

    June 15, 2012 at 12:22 pm

    *اه نسيت اقول اني بستخدم قانون الجذب معاه لاني لسه بحبو و مع الدعاء ودايما بتجيلي احلام مبشرة الحمدلله

  • فيصل عبد ال

    June 16, 2012 at 11:07 am

    وعليكم السلام ورحمة الله وبركاته
    كل الناس بتفهم لغة الجسد لأن دي طبيعه فينا
    بالنسبة لمقاومة العين، دي مشكلة فعلاً لأن العين هي مصدر قوي من مصادر دخول الطاقة، ومعظم الناس ما بتحبش حد يخترق طاقتها
    تقدري تتغلبي على الحكاية دي انك تبصي كل يوم وانتي رايحة الكلية أو جاية منها، لكل البنات الي تقابلك في عيونهم
    وما تحوليش نظرك عنهم الا أما هما يحولوه
    مع التمرين والاستمرار هتلاقي ان الحكاية بقت اسهل بعد كده بكتير

  • فيصل عبد ال

    June 16, 2012 at 11:19 am

    مش محتاجة تفسير يا نسمة
    أساليب للفت النظر
    بالتوفيق ان شاء الله

  • nesma

    June 16, 2012 at 5:00 pm

    *انا عايزة اعرف ده معناه انو لسه في حب ليا ولا خلاص ده اللي يهمني

    شكرا اوي ع ردك واهتمامك 🙂

  • ahmad azez

    July 19, 2012 at 8:02 pm

    kalamak gamel ya doctor fesal

  • فيصل عبد ال

    July 20, 2012 at 11:23 am

    شكراً لتعليقك الجميل يا أحمد
    ان شاء الله تعجبك باقي المقالات وتستفيد منها بإذن الله
    بالتوفيق لك بإذن الله

  • rania

    December 3, 2012 at 9:04 pm

    Nice

  • amirnafsak

    December 6, 2012 at 6:20 pm

    اشكرك، بالتوفيق بإذن الله

  • فيصل عبد الواحد

    February 15, 2013 at 3:52 pm

    اهلاً بك يا بارو
    نعم بالفعل، فهم لغة الجسد قد يسبب الحزن في بعض الأحيان
    تحياتي لك على مشاركاتك الفعالة
    وبالتوفيق بإذن الله

  • baro

    February 16, 2013 at 1:50 am

    *جزاك الله خير

  • فيصل عبد الواحد

    February 24, 2013 at 10:55 pm

    .لا مشكلة، بالتوفيق ان شاء الله

  • داليا

    August 28, 2015 at 7:52 am

    لغة الجسد مهارة رائعة انا عن نفسي اتمني انمي مهارتي فيها وفي دورة totكان موضوع التدريب عملته عن لغة الجسد وكنت الاولي في الترتيب اتمني اني اتعلم اكتر واكتر فيها وشكرا علي مواضيعك الرائعة وكمان محتاجة دورات في الطاقة والبرمجة لاني باتمني اكون مدربة في المجالات دي قوي

Leave a Reply

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close