main

قانون الجذب

Generalization – التعميم في قانون الجذب

March 26, 2012 — by فيصل عبد الواحد10

nlp-man-from-web.jpg
قانون الجذب والتعميم
قانون الجذب والتعميم

إزيك عامل ايه، كلمتك عن البارادايم، والكلام لسه ما خلصش ولا عمره هيخلص، انا لسه عايز كمان اعمل مقالتين او تلاتة عن البارادايم ان شاء الله عشان ألملك كل الي أعرفه عنه بإذن الله

لكن النهاردة حبيت اكلمك عن حاجة تانية، انا شخصياً بتسأل عنها كتير

وأنا بدرس البرمجة اللغوية العصبية، اتعلمت ان في دايماً "أبروتش"

Approach

الإنسان بيستخدمه في كل حياته،،وهو التعميم، يعني ايه التعميم

يعني ايه التعميم، وعلاقته ايه بقانون الجذب؟

التعميم ببساطة لما انت تقوم من النوم متأخر عشان تروح مشوار مهم، عشان راحت عليك نومة، تقول يووه، هو أنا كدة، كل ما أروح أقابل الشخص ده يحصلي كدة

انا كل ما أعمل كذا يحصل كذا

انا دايماً الناس تعاملني وحش

انت دايماً ظالمني

انت دايماً تفهمني غلط

نظرية التعميم نظرية خطيرة جداً جداً، واتعلمنا كمية أسألة بالذات عشان نكسر الحتة دي عند المريض في جلسة البرمجة اللغوية العصبية، واتعلمنا ازاي نقولها، وايه الكلام الي نضغط عليه وايه الكلام الي تعلي صوتك فيه..وحاجات كتير هتتعلمها لو درست البرمجة اللغوية العصبية

لكن النظرية دي خطيرة ليه..عشان أصلاً..هي مرتبطة بقانون الجذب

لو الشخص ده، مركز ان الناس دايماً وحشة معاه، الناس فعلاً دايماً هتبقى وحشة معاه

في رأيك..الزوجين اللي بيتخانقوا دايماً عشان نفس السبب

هي : ما بقاش حنين زي الأول بقى بيتعصب على أقل حاجة، كل ما اكلمه يتعصب عليا

!! هو: بقت دايماً تشوف الي يعصبني وتعمله، قلتلها 100 مرة ما تعمليش "..." وبتعمله برده، كل مرة كدة يعني

! تعميم

التعميم بيجذبلك أكتر من الي انت بتعممه، حتى لو الي انت شايفه ده حقيقه، عشان كده من الاتجاهات السائدة جداً في قانون الجذب، انك تقول لعقلك الباطن على حاجة بتحصل، وهي ما بتحصلش، اللي ببساطة انك تقول انا غني انا معايا فلوس كتير..أنا أنا انا

التعميم بيعمل عندك معتقدات، قانون الجذب بياخدها يشتغل بيها

لأن زي ما قولنا قبل كدة، المعتقدات هي اللي بتأثر على قانون الجذب، مش العكس

هقولك حاجة جميلة جداً ممكن ما تصدقهاش، لكن صدقها عشان انا شخصياً شوفتها

جو فيتالي، أحد عمالقة قانون الجذب في العالم، مؤمن انك لازم تنسى الحاجة عشان تنجذبلك، وشايف انك لو فضلت تفكر فيها عمرها ما هتجيلك

وناجح جداً بالاتجاه ده، ومن أغنى الناس في العالم، الحقيقة جو واحد من الناس الي عنده أغلى تجميعه لأغلى السيارات وأندرها في العالم

بوب بروكتور، أحد عمالقة قانون الجذب في العالم، أستاذ جو فيتالي، شايف انك لازم تفضل فاكر الحاجة الي انت عايزها عشان تنجذب ليك، وشايف انك لو ما عملتش كدة مش هتجذبها ليك، وناجح جداً بالاتجاه ده، ومن أغنى الناس في العالم، بوب من القلة في العالم الي عامل سيستم لجذب الأموال بقانون الجذب - لمدة شهر تقريباً - ونتايج نجاحه 100% يعني كل الي اتدربوا عليه جذبواً فعلاً النتيجة الي كانوا عايزنها

!! طب إزاي

الاتنين ماشيين بمبدأين عكس بعض

والاتنين ناجحين جداً جداً جداً بقانون الجذب، سواء مع نفسهم، او في تدريسه للناس

والاتنين أصدقاء جداً، بالمناسبة مفيش حد فيهم عيب على التاني ولا قال ده ما بيفهمش ولا بيقول ولا بيقول، أتخيل الموقف ده لو كان عندنا في مصر أو أي دولة عربية، كان ممكن نشوف الاتنين في قضايا سب وقذف..المهم

كل واحد في الاتنين دول عنده معتقد، عايش بيه، وشغال بيه

وناجح معاه جداً، وناجح مع كل واحد بيدربه عليه كمان

ده عشان ايه

عشان قانون الجذب مش اختراع عشان يحكمه قوانين

قانون الجذب، أو الجذب عشان نكون صح، طاقة، لا تحكمها قوانين البشر

كل الي بتعمله انك بتوجه الطاقة دي بترسانة المعتقدات الي بتتراكم عندك

فشوف انت ترسانة المعتقدات بتاعك بتتكون من معتقدات ايه، شيل المعتقدات السلبية، وسيب المعتقدات الإيجابية، أو المحايدة، أهم حاجة ما تكونش معتقدات تضرك

انا مكتوبلي اعيش كدة

احنا هنفضل في الفقر ده طول عمرنا

الأغنياء يدخلون النار

عشان اعمل مليون جنيه محتاج 10 سنين

عيش عيشة أهلك

احنا عايزين نعيش ونمشي جمب الحيط

راحة البال في الفقر

...

القايمة كبيرة، وما تستحقش مني اني أكتب عنها اكتر من كدة

أتمنى ان الموضوع يكون عجبك ان شاء الله

وأشوفك الموضوع الجاي

قانون الجذب

البارادايم 2

March 19, 2012 — by فيصل عبد الواحد71

Bad_DNA.jpg
فيصل عبد الواحد قانون الجذب
فيصل عبد الواحد قانون الجذب

السلام عليكم

إزيك يا جذاب، حلوة الكلمة دي، جذاب، مش كدة ؟

من النهاردة هخاطب كل مشتركين الموقع بكلمة الجذابيين

النهاردة جيبتلك الجزء التاني من المقالة اللي فاتت - البارادايم - وبرده من الموقع الشقيق - الأصغر للموقع الي انت عليه الوقتي

مدير نفسك

زي ما قلتلك برده ده موقع خاص بالربح من الانترنت بس في بيهتم بالجانب الداخلي والنفسي أكتر، مش هطول عليك

أسيبك مع المقالة وأتمنى تعجبك ان شاء الله

--

أتذكر؟

نعم، البارادايم، تذكره جيداً أليس كذلك ؟ إذا لم تكت تذكره فيمكنك انعاش ذاكرتك من هنا : الربح من الانترنت – الجانب الداخلي، حسناً، هذه المقالة تكملة للبارادايم

لا، المقالة السابقة تكفيك كي تتغلب عليه، ولكن رأيت أن أمدك بالمزيد من المعلومات عن البارادايم، عدوك – المؤقت – وستعلم لماذا استخدمت كلمة المؤقت بعد قليل، المهم..الحرب ستكون بينك وبين البارادايم، سيستخدم البارادايم الآتي من الأسلحة

المشاعر الداخلية – الجوع، الندم، التعب، الإرهاق، الخوف، التردد، الحزن، اليأس، التشاؤم، سيطرته على افرازاتك وهرموناتك

الأحلام – يمكن أيضاً للبارادايم أن يستخدم الأحلام كي يوصل لك رسالته، فقبل كل شيء، البارادايم جزء من العقل الباطن، وليس أي جزء، بل الجزء المسيطر

قانون الجذب – جذب أحداث تؤكد كلامه لك، ربما ترى علامات تؤكد صحة ترددك، ربما يصيبك حادث وأنت في الطريق لإنهاء اجراءات تتعلق بمشروعك الجديد

قانون الجذب – جذب أشخاص تؤيد وجهة نظره، تثنيك عما تحاول ان تفعله

قانون الجذب – جذب أحداث تؤدي إلى فشل مشروعك الجديد في أول أيامه

حسناً، الحرب تبدو غير متكافئة البتة، البارادايم يمتلك العديد من الأسلحة الفتاكة التي يمكن لها أن تقتل أي محاولة للتغيير، حسناً، لنر أسلحتك الآن

صلاة الاستخارة

اليقين بالله

الثقة بنفسك

الرغبة

العصيان

صلاة الاستخارة ستذكرك دائماً أنك استخرت الله قبل أي شيء وإذا ما تلاعبت بك الظنون، ستتذكر انك صليت استخارة، سواء في بداية الامر أو في منتصفه، فالله راض عما تفعله بإذن الله

اليقين بالله، طالما صليت الاستخارة، فطبيعي أن ينمو لديك اليقين بالله وبقدرته على نجاتك من أي شر، وعلى انجاح أي تغيير ترغب به

الثقة بنفسك، مع الأسلحة السابقة، الثقة بالنفس ستكون عامل مهم جداً في مواجهة البارادايم، مع الوقت ستتعود على “إهمال” كلام البارادايم لك طالما أنت واثق بنفسك

الرغبة..حسناً، سيحتاج هذا الأمر إلى شرح طويل، دعني أولاً ان أحدثك عن وهم كبير نعيش فيه، اسمه، الإرادة !

أو بمعنى أصح، الشق الخارجي من الإرادة، حسناً، مهما حدث لي، لن آكل أي شيء اليوم كي أحافظ على الريجيم، ساعة..ساعتين..ثلاثة..أربع ساعات، وتجد نفسك مجبراً على التخلي عن قرارك السابق، والذهاب إلى أقرب مطبخ وتتناول أكثر مما كنت تتناول في العادة، لذلك تفشل أغلب برامج الحميات الغذائية، نفس المشكلة مع التدخين والإقلاع عنه، ومع أي محاولة للتغيير

الشق الخارجي للإرادة هو اتخاذ قرار من الجزء المنطقي من العقل، أو العقل الواعي، الذي يفكر ويتخذ القرارات بناء على ما امامه من معطيات، فأنت فكرت في ما امامك من معطيات، وزنك زائد، نظرة الناس إليك ربما تحمل نصيباً من السخرية، الملابس التي ترتديها ربما تخجل وأنت ذاهب لشراءها، المهم أنك اتخذت قراراً بناء على وقائع ومنطقيات

طبيعي أن يفشل، خصوصاً مع ظهور العقل الباطن، بلاعبه المميز، البارادايم، في أرض الملعب !

أما الشق الداخلي من الإرادة، فهو الشق الذي يأتي من داخل العقل الباطن، كيف؟

هل رأيت أحداً في أحد الأيام يقوم بسلوك إيجابي أو سلبي، لأول مرة، ويعتاد عليه ويفعله دون أدنى صعوبة او مقاومة من داخله او ممن حوله ؟

ربما تكون أنت قد جربت شيئاً كذلك، سبب ذلك أن التغيير، أو الإرادة في التغيير، أتت من العقل الباطن لهذا الشخص، زرعت بداخله رسالة – بداخل عقله الباطن – أرغمته على التغيير، ولأنها أتت من العقل الباطن، فطبيعي أن تقل المقاومة، وربما تنعدم

لماذا تشرب كوكاكولا أو بيبسي؟ هل تتذكر أي إعلان لأي منهما يقول لك :

اشرب كوكاكولا لأن المادة “…” التي تحتوي عليها كوكاكولا تساعد في زيادة نسبة ال”…” في الدم، مما ينشط القدرة الذهنية ويساعد على التركيز، وأيضاً تحتوي على مادة منشطة لإنزيم “…” الذي يساعد على..

إطلاقاً !!

لأنهم ببساطة لا يخاطبوا الجانب المنطقي من عقلك، هناك رسالة موجهة لعقلك الباطن، يتلقاها هو دون أن تشعر أنت، ويقوم بتنفيذها تلقائياً حين يجد الحاجة، لعل آخر رسالة في اعلان كوكاكولا هي، اشرب تفرح، مع “البرهجة” و”الدوشة” في الإعلان لإلهائ العقل الواعي عنها، ربما وجدت نفسك في احد الأوقات مكتئباً، أو حزيناً، فقررت أن تشتري “كانز” وتشربه..!

اشرب .. تفرح

المهم.. هذا هو وهم الإرادة، إذاً ما هي الرغبة؟ الرغبة التي ستسخدمها ضد البارادايم، هي رغبتك وتعلقك بالحلم أو الهدف الذي تريد أن تتغير من أجله، رؤيتك لذلك الهدف وأنت محققه بفضل الله، ورغبتك الشديدة به كفيلة بمساعدتك على التغلب على أعتى بارادايم، المهم أن تتعلق بهدفك كفاية حتى تثق به كل الثقة، وتثق بقدرتك على تحقيقه بإذن الله مهما كانت الظروف

أما العصيان، فهو ببساطة، بعد تمكنك من كل ما سبق، ستتمكن من قول “لا” لأوامر البارادايم..ستتمكن من قول لا للبارادايم عندما يأمرك بالنوم ساعة زيادة، او بأكل ما تبقى في الطبق، او بعدم قراءة تلك المقالة لآخرها، ستكون قادراً ان تقول لا

وقتها، ووقتها فقط بإذن الله، ستكون قادراً على قهر البارادايم، ومن ثم..يتم برمجته على برنامج جديد من العادات والسلوكيات، ويتم تخزينها داخلك، ويصبح هو صديقك !

يحثك بكل ما يمتلك من أسلحة على تنفيذ تلك البرامج الجديدة، يوقظك قبل صلاة الفجر بدقيقتين حتى لا يؤلمك صوت جرس المنبة، اولاً وأخيراً هدف البارادايم الأسمى هو حمايتك، وطالما تمت برمجته على الاستيقاظ في موعد صلاة الفجر، ستجده يفعل كل يقوى عليه لإيقاظك وقتها، أو قبلها بقليل كما قلت الآن ليحميك من صوت رنين جرس المنبة

قانون الجذب

البارادايم

March 12, 2012 — by فيصل عبد الواحد42

willpower.jpg

إزيك عامل ايه

أخبارك؟

أخبار الجذب معاك ايه؟

وأخبار البارادايم؟

النهاردة جايبلك مقالة كتبتها في موقع تاني، مديرنفسك.كوم، مقالة عن البارادايم والمقاومة الذاتية، عشان توضحلك أكتر.ايه هو البارادايم، وتتغلب عليه، وتاخده في صفك إزاي

إزاي الصوت الي جواك ده..هو الي يديك العزيمة، هو الي يقويك بفضل الله، هو الي بإذن الله يجذبلك الناس والأشخاص الي انت محتاجهم في تحقيق أهدافك

أتمنى تعجبك ان شاء الله

ربما تجد هذا المصطلح غريباً نوعاً ما..خصوصاً إذا كنت تهتم بالربح من الانترنت، وربما سمعت عنه مرة أو مرتين، إذا كنت من المهتمين أو الباحثين في قانون الجذب و علومه المتشعبة، ربما قرأت لي مقالات في موقع أمير نفسك عن البارادايم من قبل، أو وعدتك هنا بموقع مدير نفسك المعني بتحقيق الربح من الانترنت باستخدام وتوظيف قانون الجذب

ربما

ولكن الأكيد، أنني لم أتحدث عنه من قبل، كما سأتحدث عنه في تلك المقالة بإذن الله

ولكن قل لي أولاً، قبل أن أجيبك “ما هو البارادايم”، كيف تنظر إلى الكلام الآن؟

أعني متى تتوقف، بعد أي عدد من الكلمات، ثم تفكر أو تسترجع شيء ما، ثم تواصل القراءة..فتتوقف

وأريد أيضاً أن أعرف..كيف تتحدث مع الناس، هل تتحدث ببطئ، هل تتحدث بسرعة، هل لك “لازمات” معينة أو طرق معينة أثناء الحديث ؟

أيضاً، إذا لم يضايقك بالطبع، أحب أن تقول لي، كيف تفكر، كيف ترى الفكرة وكيف تفكر في تطوراتها وكيف تحكم على الأشياء

إذا لم يكن قد أصابك الملل مني – وأعتذر عن ذلك – فقل لي، كيف تعرف اسمك..كيف تتحدث تلك اللغة، كيف تعرف أن أبيك أبيك وأمك أمك، وتعرف عنوان بيتك، تحفظ اسمك عن ظهر قلب، لماذا لا يتغير لون بشرتك على مر سنين عمرك ؟

قبل أن تغلق الموقع، أسارع وأقول لك، أنه البارادايم

فإنك عند فعل أي مما سبق، لا تفكر، ولكنك تنفذ

وما الفارق !

انت لا تفكر أين عنوان بيتك، وتحاول أن تتذكر جاهداً، في أي شارع، أي بيت، أي طابق، اي شقة !

بل تذهب تلقائياً إلى ذلك الشارع، تمشي إلى البيت، تصعد السلالم – أو الأسانسير ! – إلى الطابق الذي في شقتك، وتتوجه لها تلقائياً بالمفتاح في يدك – او تضرب جرس الباب !

المهم، أنك لا تفكر في كل ذلك مسبقاً، بل تنفذه فقط

كل ذلك مخزن في البارادايم، ويفكر هو ويعطيك الاوامر بناء على ما استقر لديه من البرمجة

لتنفذ أنت تلك الأوامر.

حسناً اذاً، يمكننا أن نستقر الآن – ونتفق – أن البارادايم هو مجموعة البرامج والثوابت المستقرة بداخلك – بداخل عقلك الباطن تحديداً – والتي يتم تنفيذها واتباعها تلقائياً اذا ما ظهر أمراً طاريء يستدعيها

فمثلاً لن تكن في خضم شغلك وأعمالك وفجأة تجد برنامج “العودة إلى المنزل” تم تشغيله، وتجد نفسك متوجه إلى المنزل الآن، فتشغيل البرنامج يحدث عندما يظهر ما يستدعيه، الا في حالات معينة سنعرفها في مراحل متقدمة ان شاء الله

حسناً، كيف تتم تلك البرمجة؟

التكرار، يعلم البارادايم أن ذلك السلوك، بتكراره، أنه يوجد رغبة قوية لديك في جعله دائماً لديك، ويبذل كل ما يستطيع، فهو يسيطر على افرازات هرموناتك وانزيماتك، ومشاعرك الداخلية، وتعبك وراحتك، شعورك بالنوم أو النشاط، شعورك باللذة أو البرود، المتعة أو الملل، يسيطر على كل ذلك، يستخدم ذلك لتنفيذ تلك البرامج بداخله، التي اتت إليه عن طريق تكرارك لها، فيتم تخزين ذلك السلوك، على أنه عادة، ومع التكرار والتواصل، ترتقي إلى مرتبة “البرنامج” ويتم تنفيذه فيما بعد حينما يطرأ طاريء

هذا فيما يختص بالجانب الجسدي، أما بالجانب الروحي أو الطاقي – الطاقوي حتى لا نغضب أساتذة اللغة العربية – فهو أيضاً – أي البارادايم – يجذب إليك أحداثاً تشابه، وتشجع، وتحثك على مواصلة تنفيذ تلك البرامج المخزنة بداخله، وهي الآداة التي وضعها الله فيك، فأنت مخير تمام التخيير أن تعصي او تتقي، ولك في ذلك الأداة التي تختار بها بل وتعينك على ذلك، حتى إذا حاسبك الله رب العالمين، لا تتذرع بذريعة أنه لم يكن لك دخل في المعصية.

إذا بيتت نية المعصية – وبداخلك التقوى وانت معتاد على تقوى الله – ستجد أولاً البارادايم بفضل الله يجذب لك أشخاصاً يثنوك عن تلك المعصية، او تجد أن المكان الذي ستذهب إليه قد أغلق أو أهدم، او أنه قد حدثت لك حادثة أثناء ذهابك لإتيان تلك المعصية، ولكن إذا ما قررت أن تعصي بعد كل ذلك، فتجد سبيل المعصية ميسر لك، جدير بالذكر ان الله يعينك على تلك المقاومة – مقاومة البارادايم – والمعروفة في ديننا الحنيف باسم “جهاد النفس” بل ويثيبك عليه أيضاً حينما تقرر العودة والتوبة إلى الله، فإنك إذا تقربت من الله شبراً، تقرب هو منك ذراعاً، واذا تقربت إليه ذراعاً، تقرب هو إليك باعاً

المهم، دون الدخول عميقاً في الجانب الديني، أن البارادايم يجذب إليك ما يتناسب مع ما بداخله من برامج أدخلتها أنت بتكرارك لها حتى وإن كنت لا تعلم

الأخبار السيئة أنه كلما حاولت تغيير ذلك السلوك، خصوصاً اذا ارتبط بشيء مادي، تجد البارادايم يفشل لك كل المحاولات الخاصة بهذا التغيير، فإذا كنت ستقوم غداً لموعد مهم يتعلق بتغيير مستقبلك المادي، تجده يشعرك بالتعب حتى الموت حتى يجعلك لا تذهب لذلك الموعد

تجده يشعرك بالغثيان اذا حاولت استخدام ريجيم أو حمية غذائية اذا رغبت في أن تقل وزناً، بل ويدفعك إلى الأكل كالمجنون !

تجده يثنيك عن التمارين الرياضية إذا لم تكن معتاد عليها، يقول لك بداخلك، لا تذهب إلى الجيم اليوم، أنت متعب، يوم واحد لن يفرق !

هل تسرعت في قرار الزواج هذا؟ أنت مازلت شاب، هل هذه حقاً هي من تريد

هل فعلاً تريد العمل في هذا المنصب ؟

بالمناسبة، مقاومة البارادايم لك لن تكون بتلك النعومة !، بل ستكون حرباَ ضروس، يمكنك تجربتها بمحاولة تغيير أي شيء أنت معتاد عليه، اذا كنت معتاد أن تستيقظ الساعة 8 كل يوم، حاول ان تستيقظ 7 ونصف، سترى !

الاخبار الأكثر سوءاً، أنه يتربط بهذا البارادايم، كثير، بمعنى كثير، من معتقداتك وبرامجك المالية – دون الدخول في المعتقدات السلبية الخاصة بكره المال دون أن تدري – ولكن البارادايم، ينفذ كل ما تم برمجته داخله مالياً أيضاً

اذا اعتاد أنك تكسب في الشهر 1000 جنيه، وتصرف 900، ستجد نفسك، مهما حاولت جاهداً، انك تكسب 1000، وتصرف 900

اذا كسبت 2000، ستجد مصاريف جديدة ظهرت لك كي تصرف 1800

البارادايم ذكي !

أتذكر يوماً، أنني كنت معتاد على شراء 4 تذاكر مترو في القاهرة كل يوم، ويوماً اشتريت 3 فقط لأنني لن أحتاج لـ”مشوار” التذكرة الرابعة، فوضعت يدي في جيبي كي أستخدم آخر تذكرة معي في المترو لم أجدها، لقد وقعت !

فاضطررت إلى شراء الرابعة

العجيب، أنه بعد شراء الرابعة واستخدامها، بعد ذهابي لمنزلي، وجدت التذكرة الموجودة في جيبي !

البارادايم خدعني ! جعلني أشعر أنه لا يوجد شيء في جيبي كي أنفذ ذلك البرنامج الذي برمجته عليه

بالمثل، إذا تمت برمجة البارادايم، أنك تعيش في مستوى مالي معين، إذا حاولت تغييره، ستنجذب لك نتائج تماثل البارادايم

لا تماثل سلوكك الجديد، وهو ما يجعل كل من يعلم قانون الجذب جديداً ويستخدمه، يلعن ذلك اليوم الذي فكر ان يستخدمه فيه، ويقول: لا يوجد قانون جذب

ذلك لأن ما ينجذب إليه، هو نتائج عكسية !

هذا البارادايم، يوجد في اعمق أعماق العقل الباطن، يختبئ هناك خلف جدران من المقاومات و المقاومات

لذا، ستجد صعوبة ومقاومات من الأشخاص المحيطين بك اذا فكرت في مشروع ما

سيخبرونك أنك ستفشل

سيخبرونك أنك تغامر، لقد جرب قبلك العديد وفشلوا

بارادايم !

لا تنصت لمن يحاول أن يحدد مصيرك، لو كان يعرف كيف يكون غنياً، لأصبح هو غنياً، أليس كذلك ؟

العجيب اننا نذهب إلى الفقراء ونسألهم كيف نكون أغنياء، ولعل المثال هنا بين، 99% مننا ذهب إلى أبيه يسأله :

بابا، إزاي أبقى غني

العجيب ان بابا، لم يكن غنياً أصلاً !!

والأعجب، أن الأب يبدأ وقتها في اعطاء النصائح !

اعلم اعلم، لقد أثقلت عليك في الأخبار السيئة

جاء دور الأخبار الجميلة – كما أحب أن أقول- وهي انه بإمكانك تغيير كل ذلك

صعب

وليس مستحيل، ولكنه ممكن

صعب لأنك ستحد مقاومة ضروس من البارادايم خصوصاً في أول 21 يوم من قيامك بتغيير سلوكك، سواء المالي أو الغذائي أو الاجتماعي..أو أو أو

وستنقسم تلك المقاومة إلى 3 مراحل

أول مرحلة – أول أسبوع – أشد درجات المقاومة وهي استخدام البارادايم للمشاعر والأحاسيس الداخلية لحثك على تنفيذ برامجه، يشعرك بالجوع القاتل كي تأكل، يشعرك بالتعب المميت كي تنام ولا تذهب لموعدك الهام، وإذا حاولت القيام، يقول لك لا تقلق يمكنك ترتيب موعد آخر في يوم آخر، أيضاً في تلك المرحلة تجد البارادايم يجذب لك أحداث وأشخاص تحثك على تنفيذ البرنامج الموجود بداخله، وترك ذلك السلوك الجديد !

ثاني مرحلة – ثاني أسبوع – يبدأ الآن البارادايم بالتركيز على جذب الأشخاص والأحداث التي تحثك على الرجوع للبرنامج القديم، مع تغيير اللهجة، فيبدأ في “التفاوض” معك، يذكرك بحياتك الماضية وكيف كانت مريحة، وأنك تعلم مافيها، واللي تعرفه، أحسن من الي ما تعرفوش.

ثالث المراحل – ثالث أسبوع – الآن، يلجأ إلى “إشعارك” بالذنب لتركك ذلك البرنامج القديم، والانتقال إلى مرحلة جديدة، وانك قد خنت حياتك السابقة، مع القليل من الأحداث التي تحاول أن تثنيك

رابع أسبوع – مبروك، لقد تغلبت على البارادايم ! الآن ستجد أن الحياة بفضل الله تعالى أصبحت سهلة

ولكن لا تأمن له، ستجده في أي فرصة تشعر فيا بالتعب، يذكرك بأيامك القديمة، وكيف كانت سهلة بلا متاعب التفكير في الأرباح، ولا الأعمال، ولا الموظفين الذين  يعملون عندك الآن، ولا ولا ولا..لا تنخدع وتفكر كم كانت تلك الأيام جميلة ومريحة، فبمجرد فعلك لذلك، بمجرد “استحسانك” لتلك الأيام، تعطي الإشارة للبارادايم بجذب الأحداث التي تعينك على الرجوع إلى سابق عهدك مرة أخرى.

أعلم أنني أطلت عليك، وأعلم أيضاً أنك طالما وصلت إلى هذا السطر، فلا خوف عليك من البارادايم، فقد قاومته حتى وصلت هنا بالرغم من محاولاته اثناءك عن ذلك وتشجيعك المستمر على غلق الصفحة أو على الأقل تأجيل قراءة المقال إلى وقت لاحق، خصوصاً مع “الأفخاخ” التي وضعتها في المقالة التي نشطت البارادايم الخاص بك رغما عنه، من الإطالة في الأمثلة إلى التفرع في المواضيع إلى التقسيم و”العنصرة” فتهنئتي لك، لقد أخذت أول خطوة، في تغيير حياتك للأفضل بإذن الله

ملحوظة: قبل ضغطي على زر بابليش أو “انشر” لنشر تلك المقالة، توقف المتصفح عن العمل واغلق تلقائياً وفقدت كل ما كتبته فيها، بارادايم !، و لعلمي انه بارادايم، قررت أن أقاومه، هدئت بفضل الله ونويت أن أجد المقالة، لا أعلم كيف، فتحت الموقع مرة أخرى فبالطبع لم أجدها مكتوبة ووجدت المساحة خالية من أي حرف ! لم أيئس، ولمعرفتي بأن الورد بريس – الخدمة المستخدمة في تصميم ذلك الموقع – تبقي نسخ احتياطية دائماً من المقالات بحثت فوجدت نسخة احتياطية، ولكنني وجدتها فارغة، وعندما انتويت انني سأجد المقالة أياً ما كان، وجدت نسخة أخرى بتاريخ أقدم بضع دقائق، وسبحان الله، وجدت فيها كل ما تقرأه الآن – باستثناء الملحوظة بالطبع – فالمهم، أن تعلم أنك ستجد مقاومة ضروساً، ولكن تعلم أيضاً، انه مع اصرارك، سيسهل الله لك الحال بإذن الله، وتجد من قلب المقاومة، مفتاح كل الحلول.

قانون الجذب

!! قانون الجذب ده كلام فارغ

March 5, 2012 — by فيصل عبد الواحد21

law-of-attraction.jpg
قانون الجذب لا يعمل

هذه المقالة إهداء لأحد قراءي وزوار موقعي، ارجو أن تفيدك وتفيد كل القراء ان شاء الله

"بص، ما تحاولش، انا قريت كتير وحاولت كتير بقانون الجذب بتاعك ده، انا يمكن قريت فيه اكتر ما انت قريت

وكل الي حصل ان ديوني كترت وصحاب الديون طلبوها قبل معادها، ومشاكلي بقت اكتر من الأول، وحاسس ان كل حاجة خلاص اتقفلت في وشي

"ياريتني ما عرفت قانون الجذب ده يا أخي

سمعت الجملة دي كتير جداً، سواء بنفس الأسلوب ده او بأسلوب تاني، المهم، ان ده الي ناس كتير بتفكر فيه،

قانون الجذب دايماً يجيب نتايج عكسية

قانون الجذب ما بيشتغلش

قانون الجذب لا يعمل

قانون الجذب دائماً ضدي..

بص، هقولك حاجة، الوقتي لو شخص ما تعبان بتعب معين، وعشان يتعالج بإذن الله، لازم ياخد كورس علاجي لمدة 6 شهور

! لو جينا قولنا في طريقة مختصرة للعلاج والشفاء بإذن الله، انه ياخد كل الأدوية والحقن والعقاقير الطبية الخاصة بالـ6 شهور، في أسبوع

وبالفعل، بدأنا نعمل كدة، الشخص التعبان ده، هيحس بإيه ؟

بالظبط، ممكن يحس انه هيموت من كتر ضغط الأدوية والحقن، وييجي في مرحلة يقول لأ خلاص، مش عايز

مش عايز اخف خالص

مش عايز الكورس العلاجي، ولا أسبوع ولا 6 شهور انا خلاص تعبت

نفس الحكاية، مع بداية استخدام قانون الجذب، خصوصاً لو مع حد بيفهم كويس وفيه وبيقولك على الحاجات الي بتجيب تأثير قوي

لازم هتجيب نتائج عكسية في الأول، عشان حاجتين

أول حاجة انت بالخطوات الفعالة جداً دي بتختصر الوقت بشكل هائل، وتاني حاجة، انك بتصطدم بـ"مطبات" جواك وجوا عقلك الباطن، وهي طريقة التغيير وحل المشاكل نفسها

يعني عقلك الباطن متبرمج ان التغيير لازم ياخد وقت

وان حل المشاكل لازم ياخد وقت، وان المشكلة لازم تقعد مدة معينة قبل ما الحل يجيلك..لما تيجي انت، بناء على مساعدة مدرب أو شخص فاهم في قانون الجذب، تحاول تغير كل ده

هتقابل..البارادايم، الي اتكلمنا عنه كتير جداً قبل كده

عشان كده لازم يحصل مشاكل، ولازم تحصل نتائج عكسية، ولازم تحصل مقاومة

المهم..انت هتستحمل؟ ولا هتستسلم؟

يا إما تفتكر الهدف ولما هتحققه بإذن الله هتبقى ايه، وده هيديك ال"بنزين" اللي يحركك قدام وتبقى بفضل الله وحمده والصبر على العوائق، قادر انك تحقق الي انت عايزه ان شاء الله

يا إما تستسلم، وتقف، وترجع أصعب من الأول

.عشان كدة اتكلمنا قبل كدة..ان قانون الجذب سلاح ذو حدين، زي ما هو سلاح ذو حدين للمتمرس فيه، برده هو سلاح ذو حدين اللي لسه بيجربه لأول مرة

قانون الجذب

عبدة الكون – قانون الجذب

February 19, 2012 — by فيصل عبد الواحد18

أمير نفسك قانون الجذب

اوعى تفهمني غلط !

أنا مش قصدي حاجة لا سمح الله

كل اللي قصدته، أن في ناس، مشهورة جداً

ممكن تكون شوفتهم في التليفزيون

ممكن تكون عارف حد منهم شخصياً، أنا شخصياً أعرف ناس كتير منهم بصفة شخصية وأصدقاء ليا

ممكن للأسف حد مصري أو عربي يكون كدة وهو مش واخد باله

يكون ايه؟

آسف، نسيت أقولك

يكون من عبدة الكون !

قبل ما أشرحلك يعني ايه عبدة الكون خليني أقولك قصة جميلة جداً

واحد حس بألم في صدره، وكل يوم كان الألم بيزيد، لغاية أما قرر انه يكشف عند دكتور

الدكتور اكتشف انه عنده مرض في القلب، وقاله لازم تعمل عملية بسرعة

الراجل خاف واتخض واكتئب وكان على وشك الموت من الاكتئاب بس

الدكتور وقف جمبه وطمنه وقاله ما تقلقش العملية سهلة ان شاء الله وأنا دكتور شاطر

واقنع المريض بالعملية، والمريض فعلاً اقتنع

وجه يوم العملية والمريض خايف، لكن الدكتور طمنه

وبالفعل، نجحت العملية بفضل الله

أول ما قام المريض من السرير، شكر الدكتور، وقال

الفضل كله ليك يا دكتور في شفائي !

وحب الدكتور

وعبد الدكتور !

وكان الشيء الوحيد الناقص انه يعمل تمثال له يتعبده بيه !

نفس الحكاية..

كتير من مدربي قانون الجذب بيقولوا:

الكون هيبعتلك الي انت عايزه

الكون عايزك تكون سعيد

صدقني الكون عايز مصلحتك

الكون بيحبك !

بس، مين الي خلق الكون ؟

والكون يعوز أو ما يعوزش، او يحب او يكره ازاي ؟

بصفته ايه يقدر يضر او ينفع ؟

بسلطة إيه

الا بسلطة وقدرة العظيم الجبار

الله رب العالمين؟

خللي بالك عشان في مدربين عرب - رغم نيتهم السليمة - بيستخدموا كلمة الكون، دون الاشارة لربنا سبحانه وتعالى

الكون آداة و خلق من مخلوقات الله، وأحد الاسباب ولكنه ليس المصدر

مش هو مصدر القدرة والسيطرة والتسبيب المطلق

ينفع يكون الدكتور هو مصدر الشفاء وسببه الوحيد ؟

بالظبط..ما ينفعش

ده ما يمنعش ان في ناس كتير - عالميين - بيرجعوا الفضل لله زي

John asaraf

و

Mahindra Trivedi

اللي عملي جلسة شخصياً، وكانت من أجمل الحاجات الي عملتها في حياتي بفضل الله والحمد لله

رغم اختلافي معاه في بعض المفاهيم المتعلقة بالخمر وفائدته النفسية - هو شايف انه مفيد للروح ! - لكن أنا شايف العكس

المهم، خللي بالك وانت بتقرأ أو تسمع أو تشوف لقانون الجذب

عشان حواليا وحواليك

في ناس كتير أوي

عبدة الكون، سواء بمعرفتهم واقرارهم ورضاهم - زي الأجانب - او بعدم ادراكهم وتقليدهم ونقلهم المجرد زي العرب

قانون الجذب

قانون الجذب – أيوة عايز فلوس

February 4, 2012 — by فيصل عبد الواحد14

مش عيب صدقني..!

آه مش عيب انك تكون عاوز فلوس..

العيب، انك تكون عاوز فلوس وتحاول تقنع نفسك، انك مش عاوز فلوس

أو تقنع نفسك انك غلطان، انك عاوز فلوس

أو تلوم نفسك انك ازاي، في يوم من الأيام تجرأت وفكرت، انك تعوز فلوس..

صدقني..مش عيب !

مجتمعنا هو الي ربانا على معتقدات غلط

الفقراء يدخلون الجنة

الأغنياء كلهم نصابين وحرامية

الفلوس الكتير بتقل راحة البال

المال لا يشتري السعادة

آخر واحد ده انا عارف ان ناس كتير أوي، هتعارضني فيه، لكن خليني معاك واحدة واحدة

أنا شخصياً، واحد من الناس، بفرح جداً لما أكون سبب في فرحة حد، أو قدرت إني أساعده

دي حاجة بتفرحني أوي

اختي مثلاً عايزة موبايل جديد، انا اشتريته ليها، وشوفت الفرحة في عينيها وهي بتفتح العلبة الجديدة بتاعته، دي عندي لحظة بالدنيا كلها

الفلوس الي خلتني قادر أشتري لأختي الموبايل..

نفس النظرة الي بشوفها في عين "شحاتة" محتاجة، لما بديلها حاجة بسيطة، قد تكون اعلى من الي هي متعودة انها تاخده من الناس، عشان أساعدها، وعشان اشوف الفرحة والرضا في عينيها..دي بتحققلي فرحة كبيرة جداً بحمد ربنا عليها اني كنت سبب فيها

الفلوس خلتني أقدر أسعد الست دي

الفلوس تقدر تخليني أساعد حد محتاج، وده الي بيفرحني جداً لما أعمله

يعني فعلاً الفلوس تقدر تشتري السعادة

الفلوس في حد ذاتها مالهاش لون..وسيط مالوش قيمة خيرية أو شريرة في حد ذاته

انت بمعتقداتك وأفكارك واستخداماتك الي تقدر تخلي الفلوس جميلة، وتفرحك وتفرح كل الناس الي حواليك، و"تشتريلك" السعادة، وانت برده الي بمعتقداتك وأفكارك، تقدر تشتري بيها البؤس ليك والي حواليك

يقول خاتم المرسلين وزينتهم - صلي على الحبيب المصطفى - عليه الصلاة والسلام ما معناه :

إذا غضب الله على أحد رزقه من حرام، وإذا اشتد غضبه بارك له فيه

المال، زي ما ممكن يكون وسيلة

ممكن ومش عيب يكون غاية

بالعكس، المهم تشيل من جواك الصوت الوحش ده

الي دايماً يأنبك ويلومك لما تفكر انك عايز فلوس كتير

لدرجة ان في ناس اقتنعت خلاص ان عشان تعمل فلوس كتير وبسرعة..

لازم ولابد..

تكون من حرام !

سبحان الله، من يرزق من يغضب عليه من حرام ويزيد له فيه، حتى يحاسبه عليه فيما بعد، ما بالك، ما يقدرش يرزقك بحلال، تحبه ويفرحك، وكمان يبارك ليك فيه بركته الربانية ؟

دينك كامل مكتمل، مفيش حاجة في ديني ودينك الحنيف تقول ان الأغنياء نصابين او حرامية او هيدخلوا النار

حب انك تكون غني معاك فلوس كتير، تعمل بيها كل الي انت عايزه، وتفرح وتفرح الناس، وتعمل بيها اعمال خير كتير كمان تكسبك ثواب

المهم، انك تعرف انك انت..الي بتدي للفلوس قيمة

مش العكس

قانون الجذب

س & ج

October 21, 2011 — by فيصل عبد الواحد7

المقالة دي، بعكس المقالة اللي فاتت -النقر 2
ممكن تقرأها وتستفيد منها جدا حتى لو كنت جديد في قانون الجذب
في ناس، بتكسل تقرأ كل المقالات اللي فاتت..
وفي ناس قرأتها بدون تطبيق..
وفي ناس لسه اول مرة تدخل السايت..
و في ناس عارفه وفاهمة قانون الجذب، لكن مش عارفه تجاوب عنه اسأله كتير
في المقالة دي، هجيب أكتر اسألة اتسألتها بخصوص قانون الجذب
واجاوبها ان شاء الله

اول سؤال

ايه هو قانون الجذب؟
- قانون الجذب هو ببساطة،استخدام قوانين الكون، عشان تخلي تحقيق اهدافك اسهل

كمان قانون الجذب، يعني الأفكار والمشاعر المسيطرة عليك، عندها القدرة على جذب الأشياء الي تشبهها في الترددات والطبيعة

بمعنى ادق، تقريب الفرص اكتر ليك

ازاي؟
- باختصار غير وافي، باستخدام العقل الباطن

ازاي وليه واشمعنى ؟
- عشان عقلك الباطن هو نقطة صلتك بكل قوانين الطبيعة والكون
واللي قانون الجذب واحد منهم
ازاي..عن طريق حاجات كتير، زي
المعايشة visualization
استرخاء التجلي manifestation meditation
مدارس ومعادلات، ودي اقوى في التأثير

ليه برده؟
- عشان بتجمع كل وسائل استخدام قانون الجذب بنسب معينة محددة بالوقت

طب لما الموضوع سهل كده ليه الناس كلها مابتعملوش؟
- بالعكس، الناس كلها بتستخدمه، لكن في غير صالحها

ازاي يعني؟
- زي بالظبط الناس اللي بتتوقع ان اي مشروع هيدخلوه هيبوظ
ويزعلوا لما الي توقعوه يحصل
قانون الجذب مش بس بياخد كلمة انا عايزبس ، لا، بياخد اكتر ويتأثر اكتر باللي بتفكر بيه
واللي بتتوقعه
واللي بتستناه
وكمان اللي بتتخيله قبل ما تنام

يعني عايزني دايما اتوقع النجاح والخير ؟
- لا تعليق!

ليه بس ؟!
- لو انت شخص شايف ان توقع وانتظار النجاح والخير، بأمر الله، غلط
او حتى صعب
يبقى لا قانون الجذب ولا غيره هيفيدك
عشان قانون الجذب، لو هتختصره في كلمتين
هيبقى:
انتظر الأفضل

في ناس كتير جربت قانون الجذب وفشل وزهقت منه، ايه رأيك ؟

أنا عايز أعمل عصير مانجة وبدل السكر أحط ملح، وبدل الميه أحط خل، ايه رأيك ! -

يعني ايه مش فاهم وده علاقته ايه باللي سألته ؟

يعني لو شخص متعود على السلبية طول عمره، وبيعيش بيها وبيمر كمان بظروف صعبه، لدرجة انها تراكمت جواه وبقى دايماً يتوقع السلبي..

والحاجات الي تخرجه عن شعوره، والحاجات الي هو مش عايزها

وييجي فوق كل ده ويحاول يستخدم قانون الجذب لصالحه بدل ما هو ضده، ويعمل ده في يوم أو يومين أو تلاتة ويستنى نتائج اسطورية، برده في يوم أو يومين أو تلاتة،

يبقى بالظبط زي الي مش معاه غير خل وملح، ومعتقد أنه لو حط عليهم مانجة، هتبقى عصير مانجة !

طب يعمل ايه ؟

3 حاجات سهلة جداً -

أول حاجة، أنه يعرف ان كل المعتقدات السلبية - سواء عالم بوجودها أو غير عالم - غلط، واتبنت بس بسبب التكرار في كل السنين اللي فاتت، وزي ما هو اللي كونها جواه من غير ما يعرف، يقدر يغيرها بسهولة جداً بعد ما عرف

تاني حاجة، يعرف انه مسئول بصورة أو بأخرى عن كل الي بيحصل حواليه، حتى لو فاهم ومقتنع انه مالوش أي دخل، لأن كل حاجة بتحصلك، ليها جذور جواك، و انت بتتفرج على التليفزيون، بتتراكم جواك حاجات من اللي بتشوفها، سواء اللي شوفته نشرة أخبار، نشرة حوادث، فيلم أكشن فيه مناظر قتل وضرب ودم كتير..كل ده بيتراكم جواك..حتى يمكن عشان كدة في أمريكا وأوروبا منعوا الأطفال من مشاهدة أفلام العنف، والكلام ده من زمان جداً، من السبعينات أعتقد، المهم، انك تعرف ان أي حاجة بتحصلك ليها سبب جواك و أنك ليك دخل فيها، شئت أم أبيت.

تالت حاجة، انك تعترف بقدرتك على تغيير كل اللي حواليك، حتى لو كان بالنسبة ليك مستحيل

لو قدرت تحس وتفهم ال3 خطوات دول، كل الكلام الباقي مش هيحتاج لشرح كتير، وهتبدأ كل حاجة حواليك بإذن الله تترسم زي ما انت عاوز، من غير حتى ما تقول أنا عايز

وبعد كده ؟

كل اللي بعد كده سهل جداً، سواء المعايشة أو الاسترخاء أو دراسة الطاقة للي يحب يتعمق، أو تطبيق المعادلات الشخصية، أهم حاجة يكون الأساس موجود، اللي تعرف تركب عليه أي-

نموذج لشخص تاني عنده خبره في قانون الجذب، والأساس ده، هو الـ3 حاجات الي كلمتك عنهم السؤال اللي فات.

 

طب الوقتي حالاً أعمل ايه، ايه أول حاجة اعملها ؟

تعرف بالظبط، وبالتفصيل، انت فعلاً فعلاً، عايز ايه، ودي خطوة مش سهلة زي ما ممكن تكون متخيل، عشان ممكن بعد كده تغير اللي -

انت عايزه، وترجع تعيد العملية من الأول، فأنصحك تاخد مع نفسك وقت، تقعد لواحدك، وتسأل نفسك انت عايز ايه من حياتك، وبعد ما تحدد ده، تبدأ تشتغل بقانون الجذب لصالحك.

أتمنى تكون المقالة دي فادتك، و انتظر ان شاء الله المقالة الجاية، اللي - على ضمانتي الشخصية - هتغير حاجات كتير

فيصل عبد الواحد

 

قانون الجذب

Tapping النقر 2

October 18, 2011 — by فيصل عبد الواحد97

أنصحك لو لسه جديد في عالم قانون الجذب، وعلوم الطاقة عموماً، ما تقرأش المقالة دي، عشان ممكن تديلك صورة خاطئة، وتخليك تبعد عن قانون الجذب

بالظبط لو اتكلمت عن معادلة كيميائية نووية، مع طالب في تانية ابتدائي، هيكره الكيمياء وهيكره حياته شخصياً!

وعدت بالمقالة دي من فترة كبيرة

وهي استكمال للجزء الأول ده

اتكلمنا عن حاجة جميلة جداً، اسمها النقر، أو

Tapping

وهي تقنية من تقنيات علم الراحة النفسية، أو الـ

EFT

باختصار، للي فاتته المقالة الي فاتت ومكسل يقرأها، اتكلمنا ازاي نستخدم العلم الجميل ده - اللي في أوربا والدول المتقدمة على رأي فناننا الكبير سمير غانم - أهم حتى من البرمجة اللغوية العصبية والتنويم الايحائي، وحتى في ناس بتشوف ان اتقانه، أفضل من القراءة عن قانون الجذب

لإن قانون الجذب للأسف ناس كتير بتدربه غلط، وبتقول عنه معلومات ممكن تدمر الجزء الوحيد الصحي المتبقي في العقل

وكمان محتاج حد فعلاً يكون استخدم الي بيقوله في نجاحاته الشخصية، ما يتكلمش عن نظريات  - المفروض تشتغل - ولو سألته ما اشتغلتش ليه ؟

يكون الرد "سوء في التطبيق" منك انت

أي نعم ده موجود، وسوء تطبيق قانون الجذب موجود، ويمكن في المنطقة العربية - للدول الي تعرفه - أكتر من أي مكان تاني

لكن ما بعترفش بأن شخص يبحث عن أسباب يقنع الناس بيها، ليه تدريبه صح، وتطبيق الناس هو الي غلط

لكن النقر والـ

EFT

ببساطة، بتعمل زي ما المدرب بيعمل

وبتقول نفس الجمل الي بيقولها

وبعد كده بتحفظ الجمل دي، وتعملها بنفس الطريقة لوحدك

وبتشوف النتيجة بشكل سريع جداً، لكن التحدي، انك في اول أيام بعد التجربة، ممكن تحس ببعض الألم زي ما اتكلمنا في المقالة السابقة

وتقدر تراجع تفاصيل أكتر في الجزء الأول.

لكن النهاردة، مع تطبيق متقدم نوعاً ما

في الصورة الي فاتت

النقط "الرئيسية" الخاصة بالنقر

الي انت بتقوم بعملية النقر عليها، مع الجمل الي المدرب بيحددهالك تقولها

عشان تجمع كل الطاقة السلبية المدفونة جواك، في النقط دي، وبعدين يحصلها

Release

المدرب الشاطر

أو الممارس المتميز لل

EFT

هو الي يقدر يخليك فعلاً تحس بالتغيير اللحظي وانت بتقول الجمل

ويقدر يخلصك من (الإحراج) الي ممكن تحسه لو عملت حركات النقر على النقط دي

أهم حاجة في ال

EFT

انها بتخليك تعترف بالقصور الموجود، انك ضعيف الثقة في النفس

انك في معتقد سلبي جواك عايزك تكون فقير

مهو لو انت عايز تكون غني، وانت مش غني

اكيد في حاجة جواك مانعاك !

أو انك بتكره التجمعات

ما بتحبش تقعد في مكان فيه ناس كتير

او انك بتكره البنات

أو انك بتكرهي الولاد

مارجريت إم لينش

واحدة من الناس الي ممكن تقع في حبها لو شوفت مدى قوة تمارينها

لدرجة انها عملت تمرين خاص، لجذب 50,000 دولار بالنقر

وتقدر تشوف رد فعل أكتر من 160,000 واحد شافوا الكليب ده بالتحديد

أسيبك مع الكليب ده، وعايز أعرف التغيير الي حصل معاك ايه، بعد ما تعمل الي في الكليب ده

لمدة 7 أيام متواصلة

خمس دقايق بس كل يوم (الكليب أول دقيقتين فيه مقدمة للنقر) مش خسارة في نفسك

قانون الجذب

يومك جميل

October 11, 2011 — by فيصل عبد الواحد19

جربت قبل كدة ؟

أنا آسف..

يمكن ما شرحتش قصدي ايه

أقصد، جربت تبدأ يومك الصبح

لما تصحى من النوم

وانت لسه على السرير

بأنك تقول

النهاردة ان شاء الله هيبقى يوم جميل

وتبتسم

وتحس انه فعلاً هيبقى يوم جميل

وتقول:

انا فرحان

جربت قبل كدة ؟

أنا آسف، برده تقريباً لسه ما وصلتلكش قصدي

جربت تخرج من البيت، وجواك احساس ان كل حاجة هتمشي زي مانت تحب

احساس، بدون أي شك، ولو سمعت صوتك الداخلي كعادته بيحاول يشكك في كدة

تتجاهله بابتسامة بسيطة..

وتسيبه يتكلم زي ماهو عايز..

عارف انك هتلاقي المواصلة الي عايز تركبها،

ممكن المترو نفسه يستنى ويفضل فاتح بابه لحد ما انت تركب، على غير العادة - بتحصل فعلاً  وحصلت قدامي كذا مرة- ، لما وقتها الناس تقول هو بايظ ولا ايه

لو خارج عشان امتحان، عارف ان يومك جميل، إزاي، ما تعرفش

بس تعرف ان كل حاجة، وكل الناس هتقف معاك، بدون سبب صريح

واحد اعرفه، كان لسه ما لحقش يخلص المادة الي بيذاكرها

راح قدام الكلية بدري يوم الامتحان

لقى واحد ما يعرفوش، لما شافه بيذاكر اوي في الكتاب

قاله بص يا كابتن

وفتحله كتاب اسمه "المرشد"، وجاب امتحان سنة سابقة، وقاله الامتحان النهاردة

هو ده بالظبط

بترتيب الأسأله

وسابه ومشي

الحكاية دي على فكرة حقيقة

حصلت بجد والله

وفعلاً دخل الامتحان لقى الامتحان بالظبط زي ما الشخص ده قاله

يمكن عشان كان عارف ان يومه جميل بإذن الله

الجميل، واللي مش غريب

ان حالاً وانا بكتب نفس الموضوع ده

جه اعلان سيراميكا فينيسيا، اللي بيبدأ بـ:

امتى هتبتدي كل يوم وكأنه احلى يوم

لما تخرج من البيت

وانت حاسس وعارف ان الكون كله هيقف معاك

ولو حصل وافتكرت انك نسيت حاجة مهمة في البيت ومش هتعرف ترجع

عارف ان هتحصل أي حاجة ان شاء الله

تخليك مش محتاجها

حتى لو فلوس، انت واثق في ان يومك بإذن الله، يومك جميل

هتلاقي أي حد يعرفك يوصلك

أو حتى ما يعرفكش !

وبرده الحكاية دي حصلت فعلاً وأكتر من مرة

شخص أعرفه، لما الناس بتمشي معاه

وتحصل معاه أحداث جميلة

الناس بتقول : ماشية معاك

محظوظ

بركة دعاء الوالدين !

الغريبة انه ما بيعترفش بالحظ

وما يعرفش مين دي اللي ماشيه معاه !

وأكيد بركة دعاء الوالدين ليها دور

لكن هو معتقد أكتر،

ان كل حاجة حواليه بتحبه

عشان هو بيحب كل حاجة حواليه

ان يومه جميل

عشان هو ابتداه بـ" ان شاء الله النهاردة هيبقى يوم جميل"، حتى وهو مروح البيت

بيفتح البوابة

ممكن المفاتيح ما تقعش

وتتعلق بشكل غريب في الشنطة عشان ما تقعش

ممكن وقتها تبتسم

وتضحك

وتقول، الحمد لله

النهاردة، كان يوم جميل

مش عايز منك، لأ

أنت ما تعوزش من نفسك

غير انك تعلق ورقة قدام سريرك

تفكرك أول ما تصحى

انك تقول الجملة دي

وتحسها بكل معانيها

"النهاردة ان شاء الله هيبقى يوم جميل"

"أنا فرحان"

وياريت، ياريت بعد ما تعمل كدة

تفكر انت هتعمل ايه النهاردة في يومك، وحتى لو هتحط الخطوط العريضة بس

لكن عشان تشوف يومك ان شاء الله، في الأحداث دي

هيبقى بإذن الله

جميل ازاي

تحياتي، وأتمنى ان كل يوم من أيامك الجاية ان شاء الله

يوم جميل،

فيصل عبد الواحد

قانون الجذب

النوم سلطان

October 4, 2011 — by فيصل عبد الواحد26

النوم سلطان

النوم فعلاً سلطان..لكن ليه؟

الأول قبل ما أكلمك عن المقالة دي وغرضها وشرحها المفصل، الي وعدت بيه لما اتكلمت قبل كده وقولت

"لو عندك مشكلة..نام"

هكلمك عن حاجة كتير من الناجحين جداً، ان ماكانش أنجح الناس، بيعملوها

وهي

Giving your mind a candy

اتكلمت عنها قبل كده في مقالة "الوعد" الي كان لازم توعده لنفسك

لكن هفكرك بيها

يعني ايه الجملة الي فاتت دي ؟

انت مجال شغلك ايه، لو بتشتغل يعني

الدعاية والاعلان مثلاً..؟

جميل، عايزك بكره أول ما تخلص شغل،

تجيب مجلة عن الموضة لشتاء 2011

وتتسلى فيها !

معلش..استحملني

انتي مجال شغلك ايه ؟

مهندسة ؟

عايزك أول ما تخلصي شغلك بكرة ان شاء الله

تقعدي عالنت، وتكتبي في جوجل :

سقراط

وتقرأي مقالاته الفلسفية

لأ.. مش عشان الثقافة

عشان مخك محتاج ياخد راحة من المجال الي انت بتستخدمه فيه كل أوقات شغلك

محتاج يشتغل في حاجة مختلفة

بص..لو فضلت في شغلك بس، هتنجز فيه، واحتمال تنجح

لكن استحالة

تكون مبدع، لو ما ريحتش عقلك، بإنك تقرأ أو تجرب أي حاجة مالهاش أي علاقة باللي انت بتعمله

بيل جيتس بيقرأ أشهر مجلة نسائية عن الموضة، كل أسبوع تقريباً

المهم..ده علاقته ايه بالنوم ؟

وعلاقته ايه بأنك يكون عندك مشكلة !

ما تقلقش، أنا مش مخليك تقرأ أكثر من 30 سطر الوقتي عشان أكلمك على المبدأ الي فات بس

انا بس بحاول أوصلك لفكرة قريبة

ان طول ما أنت وسط المشكلة، وبتفكر في حل، عمرك ما هتوصل لحل

خليني اسألك سؤال

أو عايزك تعمل حاجة بسيطة كدة الوقتي

عايزك تقوم تقف

وتبص تحت رجليك، انت واقف على كام "سيراميكه" أو كام "بلاطه"..على حسب المكان الي انت فيه

واحدة؟

آخرك اتنين..

صح ؟

تمام

لو تخيلت، ان كل بلاطة أو سيراميكه بتقف عليها، بتنور لما انت بتقف

هيبقى السيراميكة أو الاتنين دول الوقتي..منورين

مش كدة ؟

جميل جداً..

طب لو قلتلك ان بالظبط، وبدون أي مبالغة، محاولتك لتفكيرك لحل للمشكلة، وانت في وسط المشكلة، هي بالظبط، كإنك واقف على البلاطتين دول، وبتبص عليهم

وبتدور على الحل فيهم

صحيح هما الوقتي منورين من وسط كل بلاط الأوضة الي انت فيها، عشان انت مركز عليهم

لكن استحالة، هتلاقي الحل، الا لو حد، جه رماه تحت رجليك..

لكن..لو قلتلك

ان قاعدة بيانات معرفتك، تمثل كل البلاط اوالسيراميك الي في الدور الي انت واقف فيه كله

وتقدر تركز عليهم كلهم..

لكن بامكانياتك دي الوقتي..

وانت "واعي" استحالة تغطي كل المساحة دي

المفهوم قرب منك شوية..

ومتشوق لباقي المقالة..

مش هقولك الجزء التاني المقالة الجاية، لا تقلق

عايزك الوقتي، لو لا قدر الله كنت في مشكلة

تقفل كل حاجة قدامك

اقفل أمير نفسك، بعد ما تخلص المقالة، واقفل النور

واعمل الي هقولك عليه

روح نام

"استلقي" على سريرك

نام في الوضع الي انت بتحب تنام فيه دايماً

وانسى كل حاجة

وهتلاقي "سيل" من المعلومات والحلول، بيتدافع في عقلك

وهتفتكر ناس يحلولك مشاكلك كنت ناسيهم خالص

وهييجي في بالك طرق وأساليب عمرك ما فكرت فيها

وهتقول لنفسك لما تقوم، انا ازاي مافكرتش في كدة..

الوقتي..يا بختك لو عندك مشكلة

عشان بإذن الله وبفضله، عقلك الباطن، هيقدملك حلول ليها لما تطبق الي قلتلك عليه

ماجتش في بال أي حد قبل كده

بالعكس..ممكن المشكلة دي، تخليك "تبتكر" طريقة جديدة في التفكير

وطريقة جديدة لتطبيق حاجة انت بتحبها جداً، وتستخدمها كل مرة تحتاجها بفضل الله

وتروح تسجلها في وزارة الثقافة المصرية

زي العبد لله 🙂

مستني ردك على المقالة دي بالذات، وما تنساش

النوم..سلطان

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close