main

قانون الجذب

حقق هدفك في 3 أيام

September 9, 2011 — by فيصل عبد الواحد185

واحد دخل مطعم، عشان ياكل

جاله الجرسون

سأله تاكل ايه يافندم

"بيتزا"

أنا عايز بيتزا

سأله الجرسون تاني، بيتزا إيه يا فندم؟

هنا..الواحد ده

بدأ يقول بيتزا كذا

وعليها كذا

وتكون عليها اضافات كذا

وفضل يوصف في كل تفصيلة صغيرة في البيتزا

وكل حاجة يقدر يضيفها ويقدر يفتكرها في تفاصيل البيتزا

كان بيضيفها..

والجرسون لسه واقف..

وهو لسه بيوصف

خليني اسألك انت سؤال

تتوقع البيتزا تجيله وهو لسه بيوصف كدة؟

بالظبط

عمرها ما هتجيله الا أما يبطل وصف، وتفاصيل

ويستنى على ما تتعمل

بالظبط، دي مشكلة 99% من الناس مع قانون الجذب

وحتى منهم المدربين

موقف البيتزا الي حكيتهولك الوقتي

بالظبط، هو موقفك وموقف ناس كتير، من "المعايشة" في قانون الجذب

بتفضل أيام كتير، ممكن شهور، وحتى سنين تعمل المعايشة

وتقول بعد كده قانون الجذب فشل

المعايشة غلط جداً جداً جداً انها تاخد اكتر من وقتها

وهنا مشكلة المدربين

بيقولوا ان المعايشة لازم تعملها على أد ما تقدر، وكل ما تفتكر هدفك تعمل المعايشة "وتتخيل" ان هدفك اتحقق بالفعل..وتتخيل هتعمل ايه وهو معاك..إلى آخر الكلام

الكلام ده غلط جداً

خلينا نمسك خطأ خطأ..

لو فضلت تعمل المعايشة كتير، هتبقى زي نفس الراجل اللي في المثال السابق، مش هيجيلك هدفك، آخر حاجة ممكن تعملها انك تشوف علامات لقرب الهدف ده، بالظبط لو صاحبنا بدأ ياخد باله ان في المطبخ المكونات الي هو عايزها..، لكن طول مانتا بتعمل المعايشة ومستمر فيها

استحالة تحقق اهدافك

اعادة تكرار المعايشة بمثابة رسالة لعقلك الباطن

"لأ..استنى، انا لسه كمان عايز اضيف كذا"

"أنا افتكرت حاجة كمان.."

عشان كدة، المعايشة لازم تكون في مدة محددة ، هقولك عليها في آخر الموضوع ان شاء الله وهقولك تعمل بعدها ايه

ثاني الأخطاء

"تتخيل"

طول ما انت شايف ان المعايشة دي "خيال" يبقى عقلك الباطن هيجذبلك خيال !

 بالظبط نفس مبدأ ان طول ما انت شايف انك محتاج الشيء ده، هيوصل لعقلك الباطن ان الشيء ده في ندره عندك، يعني قِلة، فهيركز على الِقلة

ومش هيجذبلك الا "قِلة الشيء" ده في حياتك

هنا نفس المبدأ بالظبط، طول ما انت بتقول هتخيل، هيوصل لعقلك الباطن ان ده "خيال"..وكده هتبقى تخليت عن ميزة مهمة جداً من مميزات العقل الباطن

انه ما بيفرقش بين التجربة الحقيقية

والتجربة الي تقوله عليها انها حقيقية

ما بالك..لو قلتله انها خيال ؟

ثالث الأخطاء

"وتتخيل هــتعمل  ايه وهو معاك"

تعرف ان الخطأ المميت هنا في حرف ال (ه) بس..

لأنك وانت حتى بتقول لنفسك كده وبتقول لعقلك الباطن كدة، بيشوف انها تجربة مستقبلية

فبيحاول على أد ما يقدر

يبعد عنك الهدف ده

حسب مفهومك لكلمة مستقبل

في ناس لو قلتلها تصورك ايه للمستقبل

هيفكر 10 سنين قدام

هنا بقى لو هو وقع في خطأ (ه) ده، هدفه مش هينجذبله قبل ال 10 سنين دول

طب امال الحل ايه ؟

وماتحاولش تستغنى عن المعايشة، المعايشة هي الهدف

الحل..الآتي

انك أول حاجة اما تعمل المعايشة، ما تقولش

"هتخيل"

قول بشوف

الهدف موجود بالفعل وبتشوف انت بتعيش بيه ازاي

هدفك الي انت عايزه موجود في حياتك في نفس الساعة ونفس اليوم ده، وبتشوف انت بتستخدمه ازاي

يبقى كده انت خلصت من خطأ التخيل، وخطأ (ه) الخاص بالمستقبل

كمان، أن أي هدف، مهما كان

كبير أو صغير

المعايشة الي هتعملها، ما تزيدش عن 3 أيام

هقولك ايه افضل الأوقات الي تعمل فيها المعايشة

والي هتبقى المرة الواحدة فيها، ب220 مرة من المرات العادية

قبل ما تنام

وانت نايم على سريرك

ومغمض عينيك

وخلاص، بتروح في النوم

هو ده الوقت

عايزك تعمل المعايشة هنا، بكل التفاصيل  الي تقدر عليها

خلال 3 أيام فقط

وكل يوم، حاول تكمل من عند آخر حاجة فاكر انك وقفت عندها، عشان احتمال كبير جداً انك هتنام وانت بتعمل المعايشة لهدفك

اهم حاجة ما تكررش التفاصيل الي عملتها اليوم الي قبله

وفي آخر يوم من ال3 أيام

تعيش حالة خاصة جداً

انك فرحان، بوجود الهدف دهي في حياتك

وشعورك بالرضا، عن وجود الهدف في حياتك بالفعل

بعد ال3 أيام

عايزك تنسى الموضوع خالص، تنساه فعلاً، ما تعملش معايشه، ما تفكرش في الهدف، ولا كإنك عايز الهدف حتى، عايز الهدف مش موجود في دماغك على أد ما تقدر !

لو عرفت تعمل ده، في 3 أيام

بإذن الله، أضمنلك تحقق اي حاجة انت عايزها

قانون الجذب

TAPPING النقر

September 6, 2011 — by فيصل عبد الواحد51

الأول بعتذر عن عدم كتابة مقالات الفترة الي فاتت

وأوعدك ان شاء الله باستمرار كتابة المقالات بانتظام

الحقيقة احتارت كتير قبل كتابة المقالة دي، عشان احتارت تكون في قسم ايه

والحقيقة كمان، انها لا تنتمي لأي قسم من أقسام الموقع بشكل خاص، وكمان تنتمي لكل أقسامه في نفس الوقت !

وكمان تستحق يتعملها قسم خاص بيها

بل إن المقالة دي، تعتبر منشقة من قسم من أقسام التنمية الذاتية وعلوم تنمية الذات، يستحق قسم خاص بيه

وهو الـ EFT

Emotional Freedom Techniques

فيما بيننا، متعارف عليها عربياً بتقنية الحرية النفسية

رغم خطأ هذا التعبير لغوياً..

المهم، يعني ايه

EFT

ببساطة هو علم خاص ببعض نقاط مجرى الطاقة في جسم الإنسان، بخلاف علم طاقات التشاكرا، رغم تشابههم في بعض النقاط

لكن العلم ده بيعني ببعض التقنيات، الخاصة بالتحكم وفتح وغلق النقاط دي

اللي هما حوالي 8 نقاط

هكلمك عنهم بالتفصيل في موضوع تاني..

لكن مقالتنا النهاردة مش على كدة

أو مش على كدة بس..على حاجة اسمها الـ

Tapping

أو النقر..

وهي تقنية من تقنيات الإي إف تي، لفتح النقاط الثمانية الي اتكلمنا عنهم الوقتي

عن طريق "النقر".. النقر على المواقع دي

الي هحددهالك بالشكل والصور في المقالة القادمة ان شاء الله

لكن برده مش هو ده هدفي من مقالة النهاردة

لحد كده..

المقالة تقليدية جداً

مقالة مكررة

عادية

ممكن تلاقيها في أي حتة..

لكن الجديد..في المقالة النهاردة

ان هنستخدم النقر، او الـ

Tapping

في قانون الجذب !

خليني اسألك سؤال، والسؤال ده بسأله لنفسي برده..

في اهداف رغم استخدامي قانون الجذب عليها، ما بتظهرش، او بتبدأ تظهر، وبعدين تختفي..

رغم مراعاتي لكل اخطاء تطبيق قانون الجذب

رغم تطبيقي لكل اساليب قانون الجذب الي اعرفها

رغم إزالة كل المعتقدات السلبية الي ممكن تكون بتأخر جذب اهدافي ليا

يمكن الأهداف الصغيرة بتتحقق، لكن عند الاهداف الكبيرة

بتظهر علامات عليها بس..لكن ما بتتحققش ليه؟

أكيد في حاجة غلط

في حاجة ناقصة

رغم ان ده موضوع كتابي الجديد ان شاء الله، لكن هقولك ايه الحاجة الناقصة

الطاقة

أو تمرير الطاقة

Flow of energy

كلمتك قبل كده ان أي حاجة اصلها طاقة، ولازم توجد في صورتها "الطاقية" أولاً قبل ما تنتقل لصورتها المادية

وده محتاج كلام اكتر عن فيزياء الكم، وهعلمك ازاي تشوف أصل الأشياء "الطاقي" في مقالة تانية هعلمك فيها ازاي تفتح عينك الثالثة أو الـ

Third Eye

لكن عشان الموضوع ما يتشعبش، طالما في حاجة ناقصة، وأهدافك ما بتجيش..

يبقى المشكلة في الطاقة،

ازاي نحلها ؟

بالـ Tapping

ممكن في تجربة التابنج في أول أيامه تلاقي تأثير عكسي على فكرة، زي الجرح الي بيتعمل في الجسم عشان العملية الجراحية..

لازم هيكون في وجع

وان ما حستش بنتائج سلبية في الأول يبقى انت بتعمل التابنج غلط

لكن بعد كده

صدقني، ان شاء الله

هتشوف حاجات هتحتاج حد يكون معاك، عشان يصدقوك وانت بتتكلم عليها.

أتمنى اني أكون فتحت شهيتك لسلسلة المقالات القادمة

وانك تكون خلاص أخدت القرار مع نفسك

ان مهما يكون الألم في الأول..

لكن الحياة الحلوة الجميلة الي دايماً حلمت بيها..

تستحق الاستحمال.

بالتوفيق، وأشوفك المقالة القادمة ان شاء الله رب العالمين

قانون الجذب

Hack in through your mind – اخترق داخل عقلك

August 10, 2011 — by فيصل عبد الواحد44

إزيك..

الأول بعتذر عن تأخيري كل الفترة الي فاتت دي، وعدم كتابة مقالات جديدة.

ويارب مقالة النهاردة تعجبك، وتكون إعتذار كافي ان شاء الله..

مقالة النهاردة بصراحة..احتارت في اسمها..

لأنها أولاً شاملة أكثر من حاجة، وكلهم أهم من بعض..

وثانياً..مفيش اسم واحد يقدر يحكم كل الي هنتكلم فيه..

لحد ما جه في خيالي اسم جميل جداً..

Hack in through your mind

او اخترق دخولك لعقلك..او داخل عقلك..

طب ليه مش Hack in your mind

أو

Hack up your mind ..

أو حتى بكل بساطة..

Hack your mind..

لإن كلمة through.. هي الي فيها المعنى الي عايز أوصله كله..وهتعرف ليه لما تقرأ المقالة ان شاء الله.

من فترة كتبت في جروب السايت على الفيس بوك، الجملة دي:

You have one brain, but two minds, with a gatekeeper in between

يعني انت عندك مخ واحد، لكن عقلين، وبين كل عقل منهم حارس..

ووعدت بشرحها..

المخ، اللي هو العضو الي في راسك، الي مليان خلايا عصبية..ووظيفته – في رأيي الشخصي – وظيفة عضوية بحتة..

لكن العقل..

مفهومه ونطاقه اوسع من كده بكتير..

والعقل، مش هو المخ..ولا موجود في المخ..

وانت عندك عقلين..

مش عقل واحد، العقل الواعي، والعقل اللاواعي او العقل الباطن..

و نقطة الصلة بين الاتنين جزء في المخ، جزء صغير جداً اسمه الـ Pineal gland

أو الغدة الصنوبرية..ودي صور ليها:

وفي ناس بتقول لأ..الغدة الصنوبرية دي هي نقطة التواصل بين الإنسان ككل، وبين العوالم الأخرى..

وفي ناس بتقول لأ..دي نقطة التواصل بين المخ، الي هو الكيان العضوي، وبين العقل بجزئيه، الي هما الواعي و الباطن..

وفي ناس بتقول المخ هو العقل الواعي..

في ناس بتقول حاجات كتير أوي..

لكنا مش هدخل معاك في كل النظريات دي وتفسيرها عشان انت في غنى عنها..

الغدة دي في نفس الوقت بيطلق عليها الـThird Eye.. أو العين التالتة..

دي العين الي بتشوف بيها أحلامك..

ودي العين الي من خلالها تقدر تشوف حاجات تانية، في عوالم متوازية موجودة حواليك..

وان شاء الله في مقالة جديدة هقولك على تجربة تقدر تشوف بيها البوابة لعالم من العوالم دي..

عشان ما أطولش عليك..العقل الواعي، هو المحيط بالعقل اللاواعي، وهو الي بيكون دفاعات عشان تمنع دخول أي شيء إلى العقل الباطن..

وعشان برده ما أطولش عليك، اختصرتلك كل حاجة في الصورة دي :

 

عشان كده كتير لو حد بيحاول يبطل تدخين مثلاً، يقول لنفسه خلاص انا قررت ما أدخنش، قررت ما أشربش سجاير تاني..

ده كلام بيقوله بعقله الواعي..

لكن "الحارس" او "البوابة" الي بين العقل الواعي والعقل اللاواعي..

ما بتسمحش بمرور الكلام ده..

ده غير انه حتى لو حصلت غلطة وفي حاجة دخلت من الكلام ده..

النفي بيتشال من الكلام، عشان العقل الباطن زي ماحنا عارفين ما بيفهمش النفي، ويستقبلها أنا قررت أدخن..انا قررت أشرب سجاير تاني..!

وعشان الحارس او البوابة..الدفاعات دي يعني، كتبت Through  في العنوان، عشان ان شاء الله لما تخلص قراءة المقالة وتفهمها كويس، هتقدر تخترق من خلالها..

عشان كده قليل جداً جداً التغيير ييجي بالإرادة أو القرار بس..

أكيد دول حاجتين مهمين، لكن لازم التغيير..

ييجي من العمق..

من المنبع..

عقلك الباطن 90% منك..زي الجبل الجليدي، باين منه 10% بس فوق المية، والباقي تحت المية مش باين منهم حاجة..

في طرق كتير جداً لاختراق الدفاعات دي زي البرمجة اللغوية العصبية والتنويم بالإيحاء وحاجات كتير مش مجالها المقالة دي..

لكن في العقل الباطن بيتخزن جواه حاجة..

اسمها الـParadigm

يعني ايه؟

ده الكيان الي اتكون داخل عقلك الباطن، من تراكم العادات والأفعال، واللي فيه لغتك واسمك وكل حاجة عنك..

عشان كده استحالة تنسى لغتك..

واستحالة تنسى اسمك..

الاخبار الغير ظريفة..

ان البارادايم ده مرتبط بيه حاجات كتير..

هي نفس الحاجات، الي بتأخرك وترجعك لورا في أي حاجة..

وهو ده..الي بيأثر على قانون الجذب، قانون الجذب بياخد الكيان ده من المعتقدات، ويشتغل بيه..

لو داخل البارادايم ده معتقد تراكم من صغرك بيقول:

"الثراء الفاحش"..الجملة الي كتير كنت بتسمعها وانت صغير..

وانت كنت انسان محب للخير بطبيعتك..

يبقى استحالة، استحالة تكون غني، من غير ما تغير البارادايم ده..

البارادايم ده هو الي بيقولك:

انت كسلان ما تقومش تصلي..

يووه لسه هكمل المقالة دي لآخرها..

يوووه انا لسه هقوم أروح الكلية..انا عايز أنام..

لو عرفت، ودي مفاجأة..

كل احساس انت بتحسه، حتى التعب والإرهاق..

مش شعور جسدي..

بدليل انك لو كنت هتموت من التعب، واشتغلت في أي حاجة واتحركت، بتلاقي نفسك فوقت فجأة..

ده شعور البارادايم، الي يعتبر المتحكم الأكبر في كل حاجة بتعملها..

هو الي بيديهولك، عشان من وجهة نظره..

عايز يحافظ عليك، بإنك تنام..

كل ما تحس بالنوم والتعب..مع ان وراك حاجة مهمة..

اعرف ان ده البارادايم..واعرف انها شعور مش حقيقي..

كل ما تسمع الآدان وتيجي تقوم تصلي، تلاقي شعور جواك بالكسل..

أو حتى ايدك او رجلك تتخبط وانت قايم..

اعرف ان ده البارادايم..

وما بيعملش غير انه بيكرر مجموعة متراكمة من العادات والافعال، بقت بالنسباله ان هي اللي صح..

وانها هي اللي المفروض تتعمل في الوقت ده..

أسهل طريقة تتغلب بيها على البارادايم – وهقولك على سلسلة خاصة بيه تانية ان شاء الله ازاي تحوله – انك تعمل عكس كل الي بيقولك عليه..

جرب مرة واحدة بس..

وبعدين التانية..وبعدين التالتة..والرابعة

مع الأيام هتلاقي البارادايم..

هو الي بيقولك تعمل الحاجة الجديدة دي..

لأنه خلاص، خد أمر بإن الحاجة الجديدة دي أفيد وأحسن بالنسبة ليك..

ممكن كمان كل ما تنام وتعبان ومش قادر من التعب..

تلاقي نفسك صحيت قبل معاد الصلاة ب10 دقايق..

قبل حتى ما تسمع صوت الآذان..

هو ده البارادايم..

وهي دي قوته..لو استغليته لصالحك..

وهو ده..

مفتاح قانون الجذب..

لأنه بس مش هيؤمرك بالحاجات الي تراكمت جواه..

لأ لما تحوله وتصاحبه، هو الي هيستخدم قانون الجذب، عشان يجذبلك الحاجات الي انت عايزها..

هو الي هيقولك امسك موبايلك وكلم "..."الوقتي..

هو الي هيقولك ما تجرب تمشي من الشارع ده النهاردة..

وهو الي هيرشدك ويوجهك لكل حاجة انت عايزها في حياتك بإذن الله..

استنى..

لأ الجزء الجميل من المقالة لسه جاي..

طب ليه ما سمتش المقالة The paradigm  ؟

لأن كل الكلام الي قرأته لحد الوقتي..

كان تمهيد للجزء ده..

جزء من المعادلة..

المعادلة دي خاصة بتسريع أثر قانون الجذب بشكل شبه لحظي..وجربها بنفسك ان شاء الله

وما تخافش..مش هقولك انا مش مسئول عن سوء التطبيق، لو انت جيت قلتلي المعادلة ما نجحتش..

لأن ان شاء الله..كده كده هتنجح..

قبل ما تستخدم المعادلة لازم تجهز الآتي:

1-    فكرة أو حاجة أو مشهد او ذكرى أو هدف، يكون بيفرحك جداً جداً، اكتر حاجة بتفرحك لما تفكر فيها.

2-    هدف انت عايزه أو أمنية بتتمناها وعايز تطبق المعادلة عليها.

3-    أكثر من شيء أو خبر مالهمش أي علاقة باللي هتعمله.

 

المعادلة تتلخص في الآتي..

أول حاجة..تفكر في اكتر حاجة بتخليك سعيد..الفكرة اللي بتخليك سعيد جداً وفرحان جداً..

فكر فيها وعيشها واعملها المعايشة لمدة 17 ثانية على الأقل..

وبعدها على طول..

هات الهدف الي عايز تطبق قانون الجذب عليه، وشوف المشهد الأخير فيه لما يكون اتحقق خلاص، في أقل من ثانية..!

آه، في أقل من ثانية، يادوب تشوف المشهد بس، ما تعملش معايشة ولا أي حاجة، وبعد الفترة الأقل من الثانية دي، تعمل الخطوة الأولى تاني، تجيب فكرة أو مشهد بتفرح أوي لما تفكر فيها، وتعملها المعايشة بكل تفاصيل المشهد ده لمدة 17 ثانية على الأقل..

وبعد كده انقل تفكيرك على أي حاجة مالهاش علاقة، من الي محضرهم قبل كده، الحيطة الي قدامك..لون التي شيرت الي لابسه، واحد صاحبك..

أي حاجة بعيد ومالهاش علاقة..

بس..

سهلة مش كدة..؟

ليه بقى 17 ثانية..

لإن ده أقل وقت، ممكن الفكرة (استخدام العقل الواعي) بمعايشتها وأحاسيسها (استخدام العقل الباطن) تقدر تعدي من دفاعات العقل الواعي عشان تدخل للعقل الباطن..

وتقدر تكون مشهد فعلاً في عقلك الباطن..

والثانية الواحدة، عشان أثبت احصائياً، أن العقل الباطن بيقدر يقرأ ويفهم أسرع، الحاجات الي سرعة ظهورها ثانية أو أقل..

عشان كده ساعات فكرة او احساس ييجي في دماغك ويروح في ثانية، وبعدها بفترة تلاقيه حصل..أو تلاقي الشخص الي لسه جاي على بالك اتصل بيك..

بل إن العقل الباطن بيقدر يقرأ ويفهم الجمل المعكوسة، وتجيب أثر فعال جداً، أكثر من الجمل المنطقية، عشان ببساطة العقل الواعي ما بيسيبهاش تدخل..

يعني العقل الباطن يقدر يفهم ويطبق ويجذب

rac a tnaw i

أكثر من

I want a car

بحوالي 220 مرة..

وده كان السر في ظهور تسجيلات خاصة بالتأثير في العقل الباطن، بتستخدم الحاجتين دول..

الأولى اسمها Quick affirmation subliminal recordings

و الثانية اسمها Backwards subliminal records

و بعد كده رجعنا عملنا الخطوة الأولى تاني، عشان أولاً ننسى الهدف الي طبقنا عليه خطوة الثانية او أقل، وكمان عشان – وده أهم – ان المشهد الي اتكون في العقل الباطن، (يتزرع) و(يتدفع) أكثر للبارادايم، الي موجود في أعماق العقل الباطن..

وبعد كده وجهنا تفكيرنا في أي حاجة مالهاش علاقة – اللي يستحسن تكون محضرها من أولها زي ما قلتلك – عشان تنسى كل اللي عملته، بمعنى أصح تدي حاجات تانية لمخك ينشغل بيها..

 

طبق المعادلة كذا مرة وعلى كذا هدف، و شوف النتيجة بإذن الله.

أتمنى ما أكونش طولت عليك، وأتمنى تكون المقالة عجبتك بإذن الله.

ملحوظة: هذه المعادلة جزء من معادلة مسجلة فكرياً في وزارة الثقافة المصرية تحت اسم"معادلة سحر قانون الجذب"

جميع الحقوق محفوظة.

قانون الجذب

القوانين الفرعية لقانون الجذب

August 2, 2011 — by فيصل عبد الواحد27

من زمان بكلمك عن المقالة دي..

أو بمعنى أدق، عن القوانين الي هكلمك عنها في المقالة دي..، وكنت محتاج أشرحهالك عشان تقدر تكون فاهم أكتر، الكلام الي بقولهولك، فهم القوانين دي هيساعدك كتير جداً في فهم المقالات اللي فاتت، وفي فهم قانون الجذب وجه عام، تقدر تقول على القوانين دي، القوانين الفرعية، أو المكملة لقانون الجذب، وأول قانون منها هو :

1-    قوة الجذب :

ببساطة، كل واحد فينا له قوة جذب لأهدافه، وبتتفرع لقوة سلبية و ايجابية، ايجابية في حالة جذب الأهداف الإيجابية، وسلبية في حالة جذب الأهداف السلبية، مقدار القوة دي هو الي بيفرق في قوة، والمدة الزمنية اللي بيتم فيها جذب هدف معين ليك، والقوة دي بتتأثر بنوعيها، بالمفاهيم والمعتقدات اللي جواك، لإن قانون الجذب بياخد معتقداتك ويشتغل على أساسها، وقانون الجذب بيتأثر بالمعتقدات، وليس العكس.

 

2-    تضاد قوة الجذب:

أو قانون الرد، أو قوة الجذب العكسية، أو قوة الجذب السلبية (من الغير)، القانون ده خاص بحالة، ان في أكتر من شخص، عايزين يجذبوا نفس الهدف، وخليني أشرحلك بمثال عشان تفهم أحسن:

لو س من الناس هدفه انه يرتبط بـ ع، وفي نفس الوقت

   ص من الناس هدفه أنه يرتبط بـ ع

لو افترضنا ان :

قوة جذب س = 100 .

قوة جذب ص = 80.

 

هنا، لازم تلاحظ ان كل قوة جذب خاصة بطرف، هتمثل رد، او جذب عكسي، او قوة جذب سلبية للطرف الآخر .

 

يعني المعادلة هتبقى كالآتي بالنسبة لجذب الطرفين لنفس الهدف:

قوة جذب س (100) + قوة جذب ص (-80) = ...

وهنا قوة جذب س هتغلب على قوة جذب ص، فاللي هيجذب الهدف هو س، وموجب في سالب بسالب، يعني :

 

يعني قوة جذب س(100) – قوة جذب ص (80) = 20 لصالح س

طيب حنا احنا اهملنا قوة الجذب الخاصة بالطرف التالت، الي هو ع، لو فرضنا ان ع عايزه ص، وقوة جذب ع = 50 مثلاً..

هتبقى المعادلة كالآتي :

قوة جذب س (100) + قوة جذب ص (-80) + *قوة جذب ع لـ ص (-50) = ...

  • ·        هتلاحظ هنا ان قوة جذب ع لـ ص ، تمثل قوة رد أو قوة سلبية بالنسبة لقوة جذب س، يعني سالب، وفي نفس الوقت، قوة جذب ع بالنسبة لقوة جذب ص قوة ايجابية، يعني موجب، يعني المعادلة هتبقى أحد صورتين :

1-    قوة جذب س (100) – قوة جذب ص و ع مجتمعة (130) = - 30، ونلاحظ هنا ان النتيجة بالسالب للطرف الاول، اللي هو س، لكن ايجابيه، موجب، بالنسبة لـ ص و ع ، وده في الصورة التانية للمعادلة :

2-    قوة جذب ص و ع مجتمعة (130) + قوة جذب س (-100) =

قوة جذب ص و ع مجتمعة (130) – قوة جذب س (100) = 30 .

اقرأ الجزء ده مرة كمان عشان تفهم كل جزئية فيه.

3-    توحد قوى الجذب :

و ده بيحصل في الحالات الي بيكون فيها توافق شبه جماعي على صورة معينة أو فكرة معينة، زي مثلا توقع كل مضاربي البورصة للخسارة بسبب خبر معين..، او توقع ناس كتير خسارة مشروع معين..، أو صورة تانية مختلفة شوية، أن حد يكون هيبدأ مشروع، فيقول لأصحابه عليه، المشروع ينجح نجاح ماكانش يتوقعه، بسبب توحد قوى جذبهم مع قوة جذبه، وده اسمه توحد ايجابي، والعكس صحيح، نفس الشخص ممكن يقول لأصحابه على المشروع، فجأه يلاقي كل حاجة اتعقدت، والمشروع فشل، ده يسمى بتوحد سلبي، أو فيما يعرف في ديننا الحنيف، بالحسد.

عشان كده في ديننا، سبحان الله، نفس المبدأ ده، الحسد نوعين، النوع المحمود، اللي هو اعجابك بنعمة أخيك، وتمني مثلها مع تمني الأفضل لأخيك صاحب النعمة، وده اللي بيسمى الغبطة، والحسد الحسد، الي هو تمني زوال النعمة من أخيك.

والحسد ده، سواء سلبي أو ايجابي ممكن يكون بدون ادراك منك..حتى على أقرب الناس ليك، ممكن تقول لوالدك، أنا ان شاء الله هعمل مليون جنيه خلال سنة، بينه وبين نفسه يقول "ايه الكلام اللي مالوش معنى ده" أو "خيالات".. أو حتى يقولك كدة في وشك..

ورغم ان والدك بيتمنالك الخير، لكن ممكن بدون ادراكه، يعمل قوة جذب عكسية للهدف اللي انت عايزه، عشان كده أنصحك ما تقولش لأي حد على هدفك الا اللي تكون واثق فيه 100% وانه يكون عارف المبدأ ده بالذات، وسبحان الله، نفس المبدأ موجود في شريعتنا الاسلامية، لكن بنطاق أوسع، على السلبي والإيجابي، بحديث سيدنا محمد عليه الصلاة والسلام :

"ذا رأى أحدكم من أخيه ما يعجبه فليدع له بالبركة"

و " ما أنعم الله عز وجل على عبد نعمة ، من أهل أو مال أو ولد ، فيقول : ما شاء الله لا قوة إلا بالله ، فيرى فيه آفة دون الموت "

يعني، قول ماشاء الله لا قوة الا بالله، يقي الحسد سواء من نفسك أو من غيرك، الا أن يكون الموت.

وكلنا حافظين الآية الكريمة الي بتقول "ولولا اذ دخلت جنتك قلت ماشاء الله لا قوة الا بالله"

وده دليل واضح جدا وجميل جداً، على أن قول التسبيحة دي، يقي من الحسد.

 

4-    توحيد قانون الجذب:

توحيد، مش توحد، عشان هنا بتبقى انت فهمت المبدأ السابق، وتبدأ تستغله لصالحك..

يعني ممكن حد تعرفه، تستخدم قوة جذبه لصالحك..

لكن برده لازم تتأكد ان الحد ده فعلاً بيحبك، فمثلاً ممكن تستغل ان واحد صاحبك فرحه قريب، وانت هدفك سيارة معينة، وتقوله : " تخيل بقى وانا عربيتي الـ(...) سايقها كده وبزفك فيها..وبنجري بالعربية وبنعمل كلاكسات، وانت بتقولي يا مجنون اهدى..وهكذا"

بكدة انت حطيته في صورة ذهنية غصب عنه، واستغليت قوة جذبه لصالحك.

 

5-    انتقال قانون الجذب (الجذب للغير):

من أهم القوانين، وعكس كتير جدا ما يتوقع الناس، انت تقدر باعتمادك على القانونين السابقين، انك تجذب لشخص ما، باستخدام قوة جذبه هو، من غير ما يعرف، نفس المثال السابق، هتقوله تخيل انك جيبت عربيتك الي انت عايزها من زمان، وخليتني أسوقها بقى عشان أزفك..وهكذا.." أو أي مثال تاني، كده انت بتخليه يعمل عملية المعايشة لنفسه من غير ما يعرف، وحتى ممكن يكون ما يعرفش يعني ايه قانون الجذب، أما الصورة التانية من الجذب للغير، هي انك انت تعمل المعايشة للشخص ده، وهو محقق الهدف اللي هو عايزه، وده مبدأ المعادلة بتاعتي المسجلة في وزارة الثقافة، تقدر انت تعمل المعايشة وتعمل كل الخطوات الخاصة بقانون الجذب، - ماعدا خطوة المعتقدات السلبية – لشخص تاني غيرك خالص، لكن الكلام في الموضوع ده عايز سلسلة تانية من المقالات، عشان ده جوهر المعادلة زي ما قلتلك.

بالمناسبة كل القوانين دي جزء من المعادلة ومسجلة في وزارة الثقافة المصرية، ان شاء الله انتظر قريب الشرح التفصيلي للمعادلة نفسها، عشان عايزة كلام كتير جدا عشان أقدر أشرحلك كل ركن فيها، وازاي تجمعهم في صورة فعلية، بالتجربة.

 

6-    قبول ورفض قانون الجذب:

مرحلة مهمة جداً من مراحل قانون الجذب، وهي اللي الهدف بيظهر حواليك علامات تدل على اقترابه منك..

وهنا، كإن الكون بيقولك "أنت متأكد انك عايز الهدف ده"..؟

لما تلاحظ العلامات دي، تقدر تقول لنفسك، وبصوت عالي، "أنا مستعد"..وتتقبل وجود الهدف في حياتك، وتبدأ تفكر هتعيش بيه ازاي أكتر مما كنت بتفكر كدة في مرحلة المعايشة..عشان فعلاً ترد انت الإشارات دي، بموافقتك وتقبلك للهدف، خليني أكلمك عن نقطة مهمة قبل ما أكمل، كتير من الناس بتقول حرام لما تقول "الكون" لأن الله هو مدبر كل شيء، بالفعل الله ربي وحبيبي، مدبر كل شيء في الكون..والكون ما هو الا وسيلة.. وكل ما حولك خلق لك لمنفعتك، حتى الكون بكل ما فيه، ربنا خلقه كله عشانك، عشان الإنسان..، فأنا شايف ان مش حرام لما نقول "الكون"..الكون طبعاً وسيلة، وكله بيد الله.

غير كده، ممكن انت ترفض الهدف ده، بإنك تشكك في مقدرتك على القيام به، زي اللي بيتمنى وظيفة عالية أوي في شركة، ولما يحس انها قربت منه، يبدأ يخاف منها ومن مسئوليتها، ومن عملها المرهق، فبالتالي، من غير ما يعرف، بيبدأ يبعت اشارات سلبية، انه لأ.. أنا مش مستعد ليها الوقتي.

 

7-    قوانين عامة :

  • ·        بوجه عام الهدف يكون أسرع في تحقيقه لو كان اكبر، لو كان الهدف، مبلغ معين من المال مثلاً، 1000 جنيه، في طريق جذبه إليك هينجذب ليك حاجات أقل، دي العلامات الخاصة بيه، 50 جنيه، 80..120.. وهكذا، لحد ما يجيلك ال1000 جنيه كلهم..فلو حسبتها هتلاقي ان اللي جالك أعلى من اللي انت عايزه، بس ده مرتبط بقانون تاني اسمه تضاعف قانون الجذب، اللي انت عايزه او بتفكر فيه هيجيلك اضعافه، لكنه مش انا اللي اكتشفته عشان اتكلم عليه هنا، لكن لو كان هدفك مثلاً 100000 جنيه، هيجذبوا في طريق تحقيقهم بإذن الله 1000، و2000، و3500..لحد ما توصل للـ100000 جنيه بفضل الله.
  • ·        تعديد الاهداف يساعد على جذبها أسرع، وده عكس ما هو سائد، لو كان هدفك واحد بس، المفروض انك بعد ما تعمل كل الخطوات، انك تنساه، وتعيش على انه فعلا لو ماجاش عادي انت مش هتزعل، لكن الحكاية دي بتبقى صعبة شوية لو الهدف واحد، لكن لو الأهداف 10 مثلاً، هتعمل خطوات الجذب لأول هدف، وتنساه، لكن عقلك الباطن ما بينساش، وقانون الجذب بيتعامل مع العقل الباطن زي ما قولنا، وبعدين تعمل نفس الخطوات لثاني الأهدف، وتنساه، ولثالث الاهداف، وتنساه، وهكذا..فتعديد الأهداف يساعد على جذبها أسرع من لو كان الهدف واحد بس.
  • ·        الهدف – بوجه عام – بيكون أسرع في جذبه بإذن الله، لو كان وسيلة، وماكانش هدف في حد ذاته..يعني لو كان الهدف مبلغ معين من المال(الهدف)، ممكن ينجذب ليك شغلة(الوسيلة) أو مشروع صغير هيجيبلك المبلغ ده بإذن الله، ولو كان هدفك عربية(الهدف)، هتلاقي الرخصة(الوسيلة) بتنجذب ليك بسرعة جداً، فتقدر انت تستغل الحكاية دي لصالحك، وتشوف ازاي هدفك يكون وسيلة مستخبية، لتحقيق هدف تاني، وتتمنى الهدف التاني، الأخير ده.
  • ·        ضروري عند استخدام قانون الجذب، انك ما تحددش الطريقة اللي انت عايز هدفك يجيلك بيها، سواء بادراكك أو بغير ادراكك، واحد صاحبي كان اللي مأخر جذبه لسيارة الأحلام، أنه كان جواه معتقد وهو مش عارف، انه هو اللي لازم يتعب عشان يجيب تمن العربية دي، ونسى ان ممكن والده يجيبهاله، او حتى يكسبها في جايزة!! ليه لأ ؟ دور جواك وشوف عند استخدامك لقانون الجذب على أي هدف، في اي معتقد، خاص بالطريقة؟ خاص بخطأ "إزاي"؟

 

دي تقريباً كل القوانين (ان شاء الله اكلمك عن باقي القوانين في مقالة تانية) المسجلة باسمي في وزارة الثقافة المصرية، تحت اسم "معادلة سحر قانون الجذب"، ودي جزء من المعادلة، مش المعادلة نفسها، ده يعتبر تمهيد لاستخدام المعادلة، وان شاء الله، يكون في موضوع قريب عن المعادلة نفسها، عشان تقدر تشوف بعينيك..

سحر، قانون الجذب.

قانون الجذب

المختصر المفيد – الجزء الثالث

July 30, 2011 — by فيصل عبد الواحد17

dreams.jpg

المختصر المفيد - قانون الجذب

قانون الجذب

قانون الجذب

الجزء الثالث من سلسلة المختصر المفيد.

كلمتك الجزء اللي فات عن المختصر المفيد في جذب المال بإذن الله..

واتكلمنا ازاي جذب المال من أسهل ما يكون، في الحديث عن قانون الجذب، ان لم يمكن الأسهل على الاطلاق..

لإن باختصار جداً، كل الي عليك انك – تسمح – للفلوس انها تجيلك..

يعني انك ما تفكرش فيها، وما تفكرش ايه الشغل الي ممكن يجيبلك فلوس..

اعمل اكتر الحاجات الي انت بتحبها، والفلوس – على ضمانتي بإذن الله – هتجيلك لواحدها..

لكن محتاج أكلمك أكثر عن حاجة اسمها الـ Inspired Action..

عشان ناس كتير جداً فاكرة ان قانون الجذب ده، يعني انك تقعد في البيت، وهتلاقي تاني يوم شنطة فلوس، أو عقد عمل، او عربية قدام باب البيت..

رغم ان الكلام ده مهم – في جزء المعايشة – انك تتخيل وتعيش وتحس وتفرح بكل ده كإنه موجود فعلاً..

لكن خليني اسألك سؤال..

لو انت ماشي، لقيت 100 جنيه واقعة في الشارع..

محتاج تعمل ايه عشان تاخدها..؟

بالظبط، تنزل تجيبها..

لأ.. مش هي دي الـ Inspired Action .. دي الAction العادية..اللي أي حد تاني سواء عارف قانون الجذب أو مش عارفه ممكن يعملها..

لكن الـ Inspired Action  هنا.. هي انك قررت فجأة انك تمشي في الشارع ده..

أو اختارت فجأة انك تمشي تبص في الأرض..

أو لمحت مطعم أو كافيه في آخر الشارع، حاجة جواك قالتلك..

ما تيجي نجرب المطعم ده..

هي دي الـ Inspired Action ..

وهي دي، اللي استخدام قانون الجذب، بواسطة عقلك الباطن..

بيخليك تعملها..

دي فكرة الـ Inspired Action

قانون الجذب مش معناه انك توقف في حياتك..وتقعد في بيتك تنقطع عن كل الناس..

بالعكس..

لكن لما تستخدم قانون الجذب زي ما اتكلمنا عنه قبل كده..

وعيشت حياتك عادي..

هتلاقي الفرص كلها بتقربلك

هتلاقي صوت جواك بيقولك تعمل حاجات غريبة عليك..

هتلاقي نفسك عايز تعمل حاجات جديدة..

لما تعملها..

هي دي الـ Inspired Action ..

يعني لحد ما تاخد الInspired Action  دي.. هيبقى كل دور قانون الجذب، انه يجذبلك كل الفرص وكل الأهداف الي انت عايزها..

ويخليها قريبة منك جداً..

في انتظارك، انك تمد ايدك تاخدها..

مش عايز خلاص..

وعلى فكرة مش معنى انك مش عايز ان ده غلط..

انا شخصياً كتير – في أول معرفتي بقانون الجذب - بفضل الله جذبت أهداف ليا، ولما قربت وكنت على بعد مكالمة تليفون واحدة..جاتلي حاجات أحسن..فمعملتش الـ Inspired Action  دي..

ودي نفسها مشكلة..تغيير الطلبات والأمنيات كتير، دي مشكلة – أو تحدي زي ما اتفقنا - ..

تخيل نفسك قاعد في كافيه..

طلبت عصير برتقان..

وبعد دقيقتين..

ندهت للجرسون قلتله لأ..معلش..

أنا عايز ليمون..

وبعد دقيقتين..

لأ معلش أنا آسف، بس هاتلي برتقان..

وبعد دقيقتين..معلش طب بص، هاتلي مانجة..أنا عايز مانجة خلاص..

وبعد خمس دقايق، قومت زعقت قولت يوووووه..

هو الي انا بطلبه ما بيجيش ليه !!!

وسيبت الكافيه كله وخرجت..، وقولت مش هدخل المكان ده تاني..

بالظبط..نفس المبدأ بالنسبة لكثرة تغيير الأهداف في قانون الجذب..

وفي الآخر بتقول يووووه..قانون الجذب ده وهم..

انا خلاص هنسى كل الكلام ده..

الكلام ده على كل حاجة..

على الشفاء..

على المال..

وعلى انقاص الوزن..

الي هكلمك عنه ان شاء الله، الجزء ده..

المختصر المفيد في انقاص الوزن..ثالث التحديات الي الناس عايزة تستخدم فيها قانون الجذب، انك أولاً:

1-    تشيل من جواك أي معتقد سلبي زي الي اتكلمت عنهم قبل كده في مقالة السر الجزء الأول، بس هنا لازم تاخد بالك من حاجة مهمة..

مش كل المعتقدات السلبية مرتبطة بإعاقة انقاص الوزن..

يعني ممكن يكون جواك معتقد انك "فاشل" في اتباع الريجيم أو انك ماعندكش ارادة..مفهوم الإرادة اتكلمنا عنه قبل كده انه ساعات كتير بنتخدع فيه..لكن خليني ما أكترش عليك، خصوصاً وانك عايز المختصر المفيد..

اعمل الطريقة الي كانت في الجزء الأول من مقالة السر..

وفكر..ايه كل الحاجات جواك الوحشة، السلبية، الي ممكن تكون تخليك بتاكل كتير..

بتاكل لما تتخنق..

بتاكلي لما تحسي بالوحدة..

بتاكل لما تتفرج على ماتشات الكورة..

بتاكلي لما تتفرجي على حلقات مسلسل بتحبيه أوي..عشان تستمعي أكتر وانتي بتتفرجي ؟

خليني اسألك سؤال..

انت بتاكل ليه ؟!

آه انت بتاكل ليه..؟

هتقولي عشان ببقى جعان..

عشان تعيش مثلاً..مش كدة؟

طيب خليني معاك بمنطقك ده واحدة واحدة..

انت كشخص عايز تقل في الوزن..

طبيعي انك عندك وزن زائد..تمام ؟

تمام..الوزن الزائد ده الكبد بيحوله لدهون..ويخزنها في جسمك، ده الي بيعمل الكرش والحاجات دي..

عشان لو احتاجتها..

هو يحرقها ويحولها لطاقة..

عشان كده كتير أوي بتكون جعان، وهتموت من الجوع، لكن بعد حوالي ساعة او ساعتين..تبدأ تحس بالشبع..

المهم..

ان معنى كده، انك مش محتاج تاكل..!

معنى كده..

انك المفروض..

ما تجوعش..!

بالظبط..

ودي حقيقة على فكرة..في دراسة قراتها في كتاب عن انقاص الوزن والتنويم بالإيحاء، كان في احصائية ان حوالي 95% من الشعور بالجوع، هو شعور وهمي..!

العقل الباطن هو المسئول الأول عنه عشان يحميك من خطر الموت، الناجم عن عدم الأكل..

عشان هو فاهم كدة..

عقلك الباطن فاهم انك لو ما كلتش..هتموت..!

يعني الطبيعي انك فعلاً ما تجوعش..

ده شعور وهمي..ناتج كمان عن حاجة تانية خطيرة..

عن عدم انضباط مواعيد أكلك..

ممكن تفطر الساعة 8 صباحا

وممكن تفطر 12 الظهر..

وممكن تفطر 10

وممكن تفطر 4 العصر..!

طبيعي، طبيعي.. ان عقلك الباطن، بعد كذا مرة من تكرار الكلام ده..

هييجي الساعة 8، و12،و10،و4.. يحسسك بالجوع..!

فعايزك تفهم وتقتنع وتحس..

انك فعلا، طالما عندك وزن زائد..

مش محتاج تاكل..

لو كلت..هيبقى روتين..

ولو عوزت..

تقدر تقاوم الاحساس بالجوع ده..

بكل سهولة..

لأنك أصلاً.. مش محتاج الأكل..

كمان عايزك تراقب مواعيد اكلك..

وتقلل الوجبات البينية على أد ما تقدر..عشان دي اكتر وجبات عقلك الباطن بيكدب عليك فيها، لما يحسسك بالجوع..

غير كده..عايزك تنسى حكاية انك تاكل وانت بتتفرج على أي حاجة..

وقت الأكل يبقى للأكل وبس..

كمان في حيلة حلوة اوي انا بستخدمها شخصياً..

للناس الكتير الي شافتني باكل – انا بحب الأكل جداً – وفي نفس الوقت محافظ على جسمي بفضل الله..وسألتني ازاي..

هي دي الحيلة الي بستخدمها..

الأول بقيت ألاحظ مثلاً..لو هاكل سندوتش معين

بخلصه في أد ايه..

لو 3 دقايق..

بعد كده اخلصه في 6..

"القطمة" الي بتاكلها..صغرها شوية بحيث انك تخلص السندوتش – أو الوجبة – في ضعف الوقت الي بتخلصه فيها في الظروف العادية..

وكل مرة حاول تزود الوقت ده..

الحيلة دي حيلة سحرية، عايزك تجربها..

2-    برده انتزع من جواك أي كلمة وحشة اتقالتلك عن وزنك الزيادة..وإنك لازم تخس عشان تكون سعيد..على فكرة في ناس كتير مبسوطة بوزنها كدة..وانا فعلا بحب جدا الناس دي وبحترمها.. عشان عايزة تمشي على مزاجها مش على مزاج الناس..

والعكس صحيح..في ناس – في بعض البيئات – معتقدة إن الأكل الكتير، دلالة على الرفاهية في العيش..

فمحتاج – لو عايز تخس – انك تقضي على المعتقدات دي كلها..

بانك تفكر ليه..ليه انت ماشي ورا المعتقد ده..

وياريت كل تفكيرك ده تكتبه في ورقة..

وبرده تقطعها وتحرقها لما تخلص..زي الجزء الأول من مقالة السر..

كمان لازم تبعد عن كلمة Weight loss  أو فقدان الوزن..

عقلك الباطن "مبرمج" على انه يدور على أي حاجة "يفقدها" ويستعيدها بشتى الطرق..

ما تقولش أنا عايز افقد وزن..

ما تقولش أنا عايز وزني يقل..

قول انا عايز أخس..

3-    أهم خطوة..انك وانت بتتخيل نفسك في أي حاجة..سواء بتعمل معايشة أو لأ..سواء بتفتكر حتى مشهد قديم من ذكرى قديمة..

انك تشوف نفسك في المشهد ده..في جسمك المثالي..

في الجسم المثالي الي انت عايزه..

وتفرح بشكلك ده..وتفرح بوزنك المثالي ده، وتفرح بجسمك المثالي ده..

وتخيل نفسك في كل المشاهد الي عايز تتخيلها..

بجسمك المثالي ده..

وبعد كده..

لما تظهر حواليك علامات أو اشارات خاصة بهدفك ده..انك تخس..، ياريت..

ياريت..

تاخد الـ Inspired Action..

 

أتمنى ما أكونش طولت عليك..واتمنى تكون المقالة عجبتك.

قانون الجذب

قانون الجذب

المختصر المفيد – الجزء الثاني

July 29, 2011 — by فيصل عبد الواحد9

law-of-attraction.jpg

المختصر المفيد - قانون الجذب

قانون الجذب

قانون الجذب

ملحوظة : يجب قراءة الجزء السابق من المقالة من هنــــــــــــا أولاً


الجزء الأول، الجزء اللي فات من السلسلة دي – المختصر المفيد – كلمتك عن ان أكتر 3 مواضيع الناس عايزة تستخدم قانون الجذب فيها هيا الصحة، والمال، وانقاص الوزن.

وكلمتك عن الصحة..

وقولنا فيها، المختصر المفيد..

النهاردة، هكلمك عن الموضوع التاني..

التحدي التاني..

المال..

المال ده تحديداً، يمكن من أسهل – ان ماكنش أسهل – شيء ممكن تستخدم قانون الجذب فيه..

لأن المال..أو الفلوس، بتاخد دورتها بين الناس وترجع تاني..يعني ممكن ال10 جنيه الي في جيبك الوقتي، يكون أخوك صرفها من 15 سنة..

وجاتلك بطريقة انت ما تعرفهاش..

في علم الاقتصاد، اسمها

Money circulation

خلينا ما ندخلش في تفاصيل اقتصادية..انت جاي هنا عشان المختصر المفيد..

بس خليني أقولك قصة جميلة أوي قرأتها..

سائح راح فندق صغير، لوكاندة يعني..حجز أوضة، وساب 100 دولار على الكاونتر بتاع الكاشير..السور الصغير الي قدام المسئون عن الحجز، وخد مفاتيح الأوضة وطلع..

خدها صاحب الفندق..راح دفعها لتاجر الخضار والفاكهة الي في الحي بتاعه عشان كان عليه ليه 100 دولار..

خدها التاجر، دفعها للمكتبة عشان كان عليه 100 دولار خاصين بكتاب كان شاريه لإبنه..

خدها صاحب المكتبة..وراح دفعها لبنت عشان كان عليه 100 دولار ليها..

خدتها البنت ودفعتها لصاحب الفندق عشان كان عليها 100 دولار متأخرة من ايجار أوضة..

حطها صاحب الفندق على الكاونتر..

نزل السائح بعد ما لقى ان مستوى الغرفة سيء للغاية..

وخد ال100 دولار بتاعته، ومشي..

كده 100 دولار واحدة..قضت خدمات 6 أشخاص..

وماحدش خسر في الآخر..!

كان لازم اقولك القصة الظريفة دي عشان أقربلك الحكاية شوية..

الفلوس سهل جدا جذبها ليك..ومش عشان كده بس..

عشان أسباب تانية كتير، بس مش هقدر أقلهملك هنا بالتفصيل عشان انت جاي تقرأ المختصر المفيد..

المختصر المفيد في جذب المال كالآتي :

1-    انك تشيل من جواك أي معتقد سلبي، ممكن يكون هو الي بيمنع جذب المال ليك..زي معتقد ازاي واني لازم اتعب وحاجات تانية كتير، اتكلمت عنهم أكتر في الجزء الأول من مقالة السر، ياريت تراجعها من هنا.

2-    أنك تشيل من جواك أي طاقة سلبية، زي مثلاً انك تكون شايل من أي حد، حتى لو هو الي غلط فيك..أو انك مش مسامحه، أو انك عايز تنتقم من حد، زي ما قلتلك في المقالة الي قبل الي فاتت..

قانون الجذب سلاح ذو حدين، ان عقلك الباطن ما بيشوفش الشخص التاني..انت بتشوفه بعقلك الواعي، الي عقلك الباطن بيشوفه، انك انت متضايق من نفسك ومش مسامح نفسك وعايز تنتقم من نفسك..! فبالتالي بيأخر عنك أي حاجة ممكن تخليك تكون فرحان !

3-    ثالث حاجة..ودي مهمة جداً، انك تعمل أكثر حاجة انت بتحبها – مش أكتر حاجة بتجيب فلوس – وتسيب الفلوس تجيلك لواحدها، من غير ما تفكر فيها هتجيلك من انك تعمل الي انت بتحبه ازاي..

ولو قدرت تسأل نفسك السؤالين دول:

أنا بحب أعمل ايه..؟

أنا بعرف أعمل ايه..؟

وتطلع منهم بنقطة مشتركة..يبقى هايل جداً جداً..

اهم حاجة انك تشوف ايه اكتر حاجة بتحب تعملها، بتبقى فرحان وانت بتعملها، حتى لو كنت هتعملها ومش هتاخد عليها مقابل..

مش مطلوب منك الا انك تعملها بس..

بعد كده..هيجيلك ناس كتير أوي بإذن الله، عايزينك تعمل نفس الحاجة دي..الي انت بتحبها..

وهيدوك مقابلها فلوس..

لكن، لو قعدت تسأل نفسك..ايه اسرع حاجة ممكن تخليني غني..

ايه أسرع حاجة ممكن تخليني أعمل فلوس..

ايه الشغلانة اللي لو اشتغلتها هعمل فلوس كتير..

الأسئلة دي أسئلة مشروعة..لكن انت جيت عشان المختصر المفيد، مش كدة..؟

الأسألة دي ممكن توصلك لشغلانة كده، وهتقعد تتعلم فيها كتير عشان توصل للنقطة الي يبقى في ناس تانية، عملاء حقيقين، عايزينك تشتغلها بمقابل مادي..

لكن لو كنت بتعمل حاجة بتحبها اوي، وشيلت تركيزك من على انك – ماعندكش فلوس – وأنك – محتاج فلوس -..وحتى لو عملتها من غير مقابل..

صدقني هتشوف الفلوس..حواليك، وانت مش عارف بتجيلك منين..

حتى كمان، ممكن تلاقي الفلوس بتجيلك من مصدر غير متعلق اطلاقا بالحاجة الي انت بتحبها دي..

وهو ده السر..

هو ده السر المطلق الخاص بجذب المال..

هو ده مركز ولب، المختصر المفيد في جذب المال، انك تشوف ايه اكتر الحاجات الي بتحبها..

وتعملها..

وتستمتع وتفرح وانت بتعملها..

وتسيب الفلوس تجيلك لواحدها..،

 

ده..المختصر المفيد في جذب المال..

انسف أي معتقد سلبي..

سامح وانسى وحب واعف واغفر لكل الناس، حتى لو كانوا ظلموك..

شوف ايه اكتر حاجة بتحبها..واعملها، وما تفكرش في الفلوس..

 

يلا..أشوفك الجزء القادم ان شاء الله، والمختصر المفيد في انقاص الوزن.

قانون الجذب

قانون الجذب

المختصر المفيد – الجزء الأول

July 28, 2011 — by فيصل عبد الواحد11

34cw1.png

المختصر المفيد - قانون الجذب

قانون الجذب

قانون الجذب

إزيك..

ايه أخبارك بعد المقالة الي فاتت..

اخبار دنيتك ايه وأخبار الجذب معاك ايه..

شايف الدنيا حواليك سحر وفرحة وسعادة..

ولا لسه في مشاكل ؟

أو بلاش كلمة مشاكل، ما بحبهاش..

لسه في تحديات ؟

شيل كلمة "مشكلة" وكلمة "هحاول" وكلمة "مستحيل" من حياتك..

وحط بدالهم "تحدي" و "هعمل" و "أكيد"..

وجرب طريقة كلامك بالمصطلحات دي..وشوف هتجذب ليك الي انت عايزه بس ولا لأ..

لأن قانون الجذب مش بس معايشة واحساس، رغم ان ده جزء كبير جداً منه..

لكن برده، وده شيء خطير جداً، قانون الجذب ألفاظ وكلمات..

جرب تراقب نفسك..أو تمشي بورقة وقلم، وكل ما تلاحظ انك في أي محادثة مع حد قولت أي كلمة من الي قلتلك عليهم..او أي كلمة محبطة او مثبطة لهمتك أو لهمة غيرة بوجه عام..

اكتبها..

وبعد كده اقعد مع نفسك دور على مرادف ايجابي ليها..

لو لسه حاسس ببعض التحديات، او حاسس ان لسه شيء ناقص، جرب تعمل الجزء الخاص بالتخلص من المعتقدات السلبية، الي في الجزء الأول من مقالة "السر – كيف تجذب المال".

اعمله مرة واتنين وتلاتة..، وطلع كل الي جواك في الورق وقطعه واحرقه، وشوفه بعينيك قدامك وهو بيتحرق..

شيل الجدران الي غصب عنك السنين بنيتها جواك..

لأ..اتطمن،

المقالة دي مش على كدة بس..

المقالة دي بعنوان – زي ما انت قرأت من دقيقتين – المختصر المفيد..

هقدملك حلول سريعة وفعالة جداً.. لأكثر 3 تحديات بتواجه الناس..

وده تبع احصائية امريكية عن اكثر طلبات الناس المتعلقة باستخدام قانون الجذب، وهما على الترتيب :

1-    الشفاء.

2-    المال.

3-    انقاص الوزن.

المواضيع دي أكثر 3 مواضيع الناس مهتمة وعايزة جداً، انها تستخدم قانون الجذب فيها..

وهنتكلم عليهم واحدة واحدة..

وبحلول بسيطة وسريعة وفعالة جداً..

وانت هتجرب بنفسك ان شاء الله..

أول تحدي، أو أول موضوع ، الشفاء..

كلمتك قبل كده عن موريس جودمان، الراجل الي وقع من طياره وجسمه اتكسر، ونظره راح وكل حتة فيه اتحطت في الجبس..وبفضل الله استخدم قانون الجذب من غير ما يعرفه..

عشان يرجع يمشي تاني..

لكن في موضوع الشفاء، الغالب ان الي بيتكلم، او الي بيطلب قانون الجذب، مش الشخص الي عنده المرض أو المشكلة الصحية – التحدي الصحي – خلاص زي ما اتفقنا..

وحتى المريض نفسه لو استخدم قانون الجذب بيبقى في صورة  "أنا مش عايز المرض ده"..

"أنا مش عايز اقعد في المستشفى"

"انا مش عايز.."

"..مش.."

خدت بالك أكيد..مش كدة ؟

بالظبط، قانون الجذب لا يعرف أدوات النفي..زي مانتا قرأت في مقالة "أخطاء تطبيق قانون الجذب"

العقل الباطن هيشيل اداة النفي ويسمع ويخزن ويتصرف ويجذب ليك كل حاجة شبه الجمل دي:

"أنا عايز المرض ده"

"أنا عايز اقعد في المستشفى"

"أنا عايز.."

فمحتاج انك تقول كدة للشخص المريض..

كمان المريض ممكن يكون يائس أو حالته النفسية مش كويسة، فكده بيعمل قوة جذب سلبية، أو عكسية لنفسه، بيجذب ليه اللي هو مش عايزه..الي هو زيادة المرض وسوء حالته أكتر وأكتر..

فهنا انت في تحدي كبير جداً..عشان لازم توازن القوة السلبية دي بقوة جذب ايجابية منه..

لكن التحدي الأكبر فين..

أن التحدي الصحي ده يبقى عند حد تاني غيرك، وانت عايز تستخدم قانون الجذب ليه..

وأنه يكون بيتسبب في قوة جذب سلبية..ويجذب ليه تدهور حالته الصحية..

وكمان لو كلمته عن قانون الجذب مش هيقتنع..

لأ ما تقلقش الموضوع أبسط مما تتخيل..

هنا ، لازم تعمل حاجتين ، وده الجزء الأول من المختصر المفيد، اللي هو متعلق بالشفاء بإذن الله :

أول حاجة، انك تعمل المعايشة، ليه هو..وهو معافى تماماً وسليم تماما بفضل الله..بس تعملها أكثر من مرة في اليوم..عشان على أد ما تقدر توازن القوة السلبية الي هو بيعملها دي..وقريب ان شاء الله هكلمك بالتفصيل عن قوة الجذب او طاقة الجذب، بمعادلات رياضية تفصيلية ان شاء الله.

تاني حاجة، إنك تقوله على قانون الجذب..

حتى لو ما اقتنعش بيه..

بس الوقتي انت الي عرفته عليه، و طبقاً لمبدأ تضاعف وتتابع قانون الجذب..

هتعرف ان مهما كانت قوته السلبية في الجذب، فأنت هتستخدمها لصالحه..

لأن ببساطة كل ما انت تعرف حد بقانون الجذب، قوتك انت بتتضاعف، وكل ما هو يقول لحد عن قانون الجذب، قوتك برده بتتضاعف، وكل ما هو يجذب حاجة ليه، سواء عايزها او مش عايزها..

بالظبط، قوتك برده بتتضاعف..

ده تفسير سريع لـمبدئين في قانون الجذب وهما:

What you put out there gets back at you multiplied

و

You have to give to recieve

الأولى يعني الشيء او الفكرة او الحاجة او الاحساس..أو أو أو..أي حاجة بتديها لغيرك، بتخرجها بره منك، هتتردلك مضاعفة.

والثانية معناها انك لازم تدي وتشارك الي عندك، عشان تستقبل وتسمح لقانون الجذب بإنه يشتغل لصالحك..قريبين شوية من مبدأ في شريعتنا،

"لا يؤمن أحدكم حتى يحب لأخيه ما يحب لنفسه".

"الحسنة بعشر أمثالها".

صح..؟

صدق رسول الله صلى الله عليه وسلم..

أسيبك مع الجزء الأول من سلسلة المختصر المفيد..

وأشوفك الجزء الجاي ان شاء الله ، مع تحدي المال..

رمضان كريم.

 

 

 

قانون الجذب

قانون الجذب سلاح ذو حدين

July 28, 2011 — by فيصل عبد الواحد25

قانون الجذب سلاح ذو حدين..

الوقتي..لو انت كنت متابع كل المقالات الي فاتت، وبتقرأ وبتدور في قانون الجذب..

وعملت كل الي قرأته..

المفروض، تكون متمرس في قانون الجذب..

وبدأت تشوف بعينك، حاجات بتحصل قدامك..غيرك، ممكن يقول عليها سحر..

سواء أهدافك وهي بتتحقق بطريق ما كنتش تتخيله، أو حتى لو كانت علامات في الظروف والواقع اللي حواليك..تقولك ان الي انت عايزه بفضل الله قرب..

عشان كدة..

كان لازم أحذرك..

في حوالي أوائل الستينات..

وزارة الدفاع الامريكية، خصصت ميزانية ضخمة، لمشروع كان يُعد الأضخم في التاريخ وقتها..

وهو صناعة صواريخ يتم توجيهها ببرامج كمبيوتر..

أول ما الكمبيوتر بدأ يتم ظهوره بشكل فعال في العالم ومختلف الصناعات..

وتم فعلا الاستثمار في المشروع ده..

وتصميم "البرامج" المسئولة عن توجيه الصواريخ دي..

وكانت بلغة برمجة بدائية جداً..وهي الـ

Basic

تعتبر من اول لغات البرمجة في تاريخ الكمبيوتر..

ومع ذلك، ومع الانفاقات والاستثمارات الضخمة في المشروع ده..

نجح تصميم برنامج ، بلغة الـ Basic  ويكون قادر على توجيه الصواريخ الأمريكية لأهداف محددة..

لكن فجأة..

تم تدمير المشروع..!

تم تدميره تماماً..ومحو أي بواقي برمجية خاصة بيه..

وعن طريق وزارة الدفاع الأمريكية نفسها..!!

ليه كل ده..

عشان اكتشفوا ان ممكن زيادة قوس واحد، او فاصلة واحدة في لغة البرمجة..

يخلي بدل ما الصاروخ ينطلق نحو الهدف..

انه ينطلق..وينزل يدمر مكان الانطلاق..!

يعني يفجر نفسه ويفجر كل حاجة محيطة بيه..!!

ورغم تأكديات المهندسين وقتها على ان مفيش أي خطأ في البرمجة وان الحكاية أمان..لكن ماكانش عند وزارة الدفاع الأمريكية أي استعداد للمغامرة..خصوصاً، مع رغبتهم في وضع رؤوس نووية على الصوارايخ دي..، عشان يبقى عندها أكثر الأسلحة تطوراً في العالم..

تقدر تدمر دولة، بضغطة Enter ..

المقدمة الطويلة دي كلها ليه..

عشان أحاول أقربلك الفكرة..

انت الوقتي..زي الصاروخ ده..

رجل متمرس جدا بفضل الله في قانون الجذب، وانت فرحان على طول..فبفضل الله برده، بتجذب ليك مواقف ايجابية وسعيدة ومفرحة..

لكن..

لو حصل ومرة اتضايقت..وفضلت في حالتك "السلبية" دي..

صدقني..

هتشوف بعينك كوارث..

وده عن تجارب شخصية..

اسمعني..مفيش أي حاجة في العالم مالهاش أخطار..

وزي ما قانون الجذب بإذن الله تقدر تستغله لصالحك..

ممكن وانت راجل متمكن وقوي جداً فيه..

يشتغل لعكس الي انت عايزه تماماً..

انا شخصياً..آخر مرة اتضايقت..وفضلت في الحالة دي لدقيقة..

شوفت بعيني كوارث..

الموقع بتاعي وقع..

الموقع الي انت بتقرأ المقالة دي عليه حالياً..

وحصلت مشاكل شخصية ليا لا حصر ولا عدد ليها..

وفضلت الأخبار الوحشة تيجي خبر ورا التاني لغاية ما امتلكت زمام نفسي..

وقولت لنفسي..

لا..انا مش عايز كدة..

I choose to be happy

I want to be happy

وخدت نفس وهديت خالص..وفجأة بدأت الأمور تتبدل بفضل الله..

مش كده وبس..

الامور السلبية مش هتحصلك لواحدك..هتحصل كمان لناس بتحبهم..

ومش شرط بتحبهم..هتحصل لأي حد حواليك..

وكل ما هتدخل في مكان لازم هيحصل فيه حاجة وحشة..

كوباية تتكسر..

نور يتقطع..

طفل صغير يصرخ..

كلنا بنطلع طاقة ما بنشوفهاش..وكلنا برده عقلنا الباطن بيستقبلها ويقرأها ويتصرف عليها..

وده مبدأ التخاطر الذهني او الـTelepathy..

كمان عايزك تسامح أي حد أساء ليك..

تسامحه عشانك انت..

لما حد بيعمل موقف يضايقك..

أو يزعلك..

وبتشيل جواك..وقلبك يبقى أسود..

عقلك الباطن ما بيشوفش الشخص التاني ده..

ما بيشوفش غيرك..

مش بيشوف غير انك خزنت جواك طاقة سلبية..

طاقة سوداء..

وده يمكن نوعا ما، مرتبط بفكرة حديث سيدنا محمد "إن العبد إذا أخطأ خطيئة نكتت في قلبه نكتة سوداء.." إلى آخر الحديث..

وصدقني، كون انك تشيل من حد أو تحط جواك فكرة الانتقام أو الحزن الشديد والرغبة في القطيعة..

دي في رأيي الشخصي، من أكبر الخطايا..

كان سيدنا الحبيب، سيدنا محمد عليه افضل الصلوات والتسليم..

جالس مع أصحابه..

فقال لهم، يطلع عليكم اليوم رجل من أهل الجنة..

فأتى رجل..

ونفس الموقف في ثاني يوم، وثالث يوم..

حتى تعجب عبد الله بن عمرو بن العاص..

وقال له يا رجل، لقد أخرجني أبي من البيت فأريد أن أبيت معك ثلاث ليال..

فأقام معه في الليلة الاولى، فلم ير منه صيام ولا قيام شديد..

وكذلك في الثانية..

وفي الثالثة..

حتى قال له يا رجل، بت معاك ثلاث ليال ولم أر منك صيام ولا قيام، وقال عنك رسول الله أنك رجل من أهل الجنة..فبالله عليك، ما الذي تفعله لذلك؟

فقال له : "أبيت وليس في قلبي حقد على مسلم فقال عبد الله هذه التي بلغت بك وهي التي لا نطيق"

فهمت قصدي ايه ؟

الحديث ده لما قراته من فتره، وقارنت بينه وبين الي بقوله على السماح وقوة التسامح والنسيان وأثرها على تضاعف قوة قانون الجذب بشكل وهمي..

ذهلت من عظمة ديننا..

وذهلت من حكمة سيدنا محمد عليه الصلاة والسلام..

وعرفت ان مفيش امر ديني..سواء فهمناه أو ما فهمناهوش..وسواء تعارض مع العلم أم لم يتعارض..

الا وكان له، بجانب الغرض الديني..جانب علمي سببي، لأن كل شيء في الكون يسير بقدر..

"كل في فلك يسبحون" ، "إنا كل شيء خلقناه بقدر"..

الطبيعي انك تسمع الكلام والاوامر وتبتعد عن النواهي..لكن لو فكرت وقارنت بين العلوم الدنيوية، وعلاقتها بالأوامر والنواهي الدينية..

هتزيد حباً وقرباً في حبيبك محمد عليه الصلاة والسلام، وفي حبيبك الله، ربي وربك ورب هذا الكون، وتفتخر بعبوديتك ليه، في وقت فيه ناس كتير جداً..ضالة، بلا إله..ومع ذلك..، ربنا بيكرمهم..ويديهم على اد ما بيشتغلوا..سواء بقانون الجذب، أو بغيره حتى لو كانوا مش عارفينه..

لما انت بتسامح حد..انت بتسامح نفسك انت..

داخل عقلك الباطن..

اتصورله انك زعلان من نفسك..مش زعلان من حد..

فبيتصورله برده انك بتسامح نفسك مش بتسامح حد تاني..

سامح بجد..

سامح من قلبك..

وحب واعف واغفر للناس..

كلنا بشر..وكلنا بنخطأ، واذا ابتدأت بانتقاد الناس..اعرف انك عندك وقت فاضي..تقدر تستغله في تطوير نفسك أحسن..

حب وعيش بالحب والعفو والسماح، واحنا داخلين على شهر كريم..

ربنا يتقبل مني ومنك ومن المسلمين جميعاً، ويحفظنا ويحفظ بلدنا وسائر بلاد المسلمين..

قول آمين.

 

قانون الجذب

قانون الجذب والأشخاص والبيئة

July 27, 2011 — by فيصل عبد الواحد16

متوسط دخلك هو متوسط دخل أقرب 5 أشخاص اليك..!

دي معلومة، وحقيقة، واحصائية..

لكن ليه؟ ايه وجه العلاقة، الـ

Cause and effect

زي مالقائمين على الدراسة بيقولوا..غير واضح..

غير واضح السبب، ليه متوسط دخل الشخص يساوي متوسط دخل أقرب 5 أشخاص ليه..

تفتكر ليه ؟

بما أنك راجل قاري وفاهم قانون جذب..

تفتكر ليه ؟

بالظبط..

قانون الجذب..

ناخد مثال، لو واحد دخله قليل..

واحد من صحابك، بيتكلم دايماً كالآتي:

اللي جاي على أد الي رايح..

يادوب عايشين بالعافية..

انا مصروفي على أدي (لو كان طالب)..

المرتب يادوب بيكفي (لو ماكانش طالب)..

من النحية التانية..مديرك المباشر في الشغل:

الشغل كتير..

مفيش موظفين كفاية..مفيش ميزانية نشغل موظفين..

انت شغلك مش عاجبني..

لازم كلنا نشتغل أكتر عشان نواجه ضغط الشغل..

من النحية التالتة، خطيبتك أو حبيبتك:

بص احنا ما نجيبش عفش غالي عشان بص، يعني نعيش على أدنا برده..

ولو عملت العكس..ممكن تحسسك بالعجز، انها تقولك العفش لازم يكون بأد كده..والشبكة بابا وماما مش هيرضوا بأقل من كده..وانت ظروفك كدة..لازم تشوفلك حل..

من النحية الرابعة..أنتيمك يقولك :

انا اضطريت اشتغل أي شغلانة كده عشان أقضي مصاريفي، يلا أهو أي حاجة والسلام احسن من مفيش..

ووالدك أو والدتك من النحية الأخيرة :

البلد حالها واقف..

مفيش شغل..

البلد بتخرب..

انا يادوب بصرف على اخواتك..

تتوقع كده، يكون دخلك انت وظروف معيشتك ايه ؟ حتى لو كنت مستقل بنفسك، وبتشتغل في شركة او مكان عمل مالوش أي علاقة بيهم..

كل الناس دي من غير ما يعرفوا، بيعملوا رد، او قوة جذب سلبية، أو قانون جذب عكسي، كل المصطلحات دي مساوية لبعضها وده الي هنعرفه بعد كده ان شاء الله في مقالة تفصيلية عن القوانين الفرعية لقوانين الجذب..

كل واحد فيهم، لا شعورياً، ساهم في الوضع الي انت فيه الوقتي..

وانت كان ليك الدور الاكبر، انك سمحت لنفسك انك تستوعب وتمتص كل المعلومات الي بتتقالك، وكل الكلام الي بتسمعه، سمحت لنفسك انك تتخيله..

في ميزه ، وعيب في نفس الوقت للعقل الباطن، انك دايماً اما تشوف أي مشهد، تتخيل نفسك مكان البطل..عشان كده دايماً في أفلام السينما، انت بتنفعل جدا مع الأحداث وتطور الخط الدرامي..عشان لاشعوريا، بتبقى شايف نفسك انك انت البطل.. انت ممكن كمان بعد كده تتخيل نفسك في دور البطل ده بعد كده..

نفس الحكاية بتحصل – لا شعوريا – لما تسمع كل الكلام السلبي ده، ولما تتحكالك كل الظروف والمشاهد الكئيبة دي..

ما تسمحش لحد انه يحددلك ظروفك..

ما تسمحش لحد انه يقولك كلام سلبي..

المرة الجاية لما حد يقولك أي كلمة سلبية..

وقفه..

قوله لو سمحت..

ما تحكيليش عن ظروفك، حتى لو لنفسك..الكلام عن المشكلة بيكبر المشكلة..لكن الكلام عن الحل بيخليك تعرف الحل فين..

ما تحكيليش عن ظروفك..

ولو ضروري هيحكيلك..الكلام الي يتقالك، خده واضحك جواك وهو بيتقالك..

ودايماً اسأل نفسك السؤال الي كلمتك عنه المقالة الي فاتت..

ازاي احول الحكاية دي لشيء ايجابي..

تعامل مع المشكلة وهي بتتحكالك، كإنها بتتحكالك عشان تحلها.. مش عشان تعيش فيها..

الشخص ده بيحكيلك مشكلته عشان تحلها..مش عشان تشاركه في انك تعيشها معاه..

المرة الجاية..حاول تبعد بقدر الإمكان عن الناس الي كل شغلها الشاغل انها تحكي المشاكل وتعيشها..

ولو ضروري..

حد يحكيلك مشكلة..

عشانك..قبل ما يكون عشانه..

ركز على الحل، ما تركزش على المشكلة..

إزاي بقى تغير الحقيقة الي قلتلك عليها في اول المقالة..

انك تبدأ تجذب ليك بإذن الله..ناس فرحانة..ناس أغنياء..ناس ظروفهم أحسن من الناس الي حواليك..

مابقولش ليك ما تكلمش الناس الي حواليك تاني..

بس زي ما هما جذبوا ليك الوضع الي انت فيه – لو كانت ظروفك مش عاجباك – انت تقدر تجذب ليهم وليك، الوضع والظروف الي انت عايزهم..

بإنك تعيش دايماً فرحان..بإنك تشوف نفسك حواليك ناس كتير فرحانة، وناس كتير أغنياء..وناس كتير عايشة الحياة الي بيحلموا بيها..

وشوف الناس الي حواليك دول..في ظروف أحسن..

في حال أحسن..

يعني الوقتي الي عليك..3 حاجات..

انك تجذب ليك ناس جديدة..معارف جديدة..أغنياء وظروفهم أكتر راحة من الناس الي حواليك..

انك تجذب للناس الي حواليك، ظروف احسن وحال احسن..وتشوفهم وتعملهم المعايشة ان ظروفهم أحسن..

انك تبعد بقدر الإمكان عن الكلام عن المشاكل، ولو ضروري، اسمعها بغرض حلها، اسمعها كإنك بتتحكالك المشكلة عشان تحلها، مش عشان تشاركهم في حمل الهم..

ودايماً خليك مصدر الفرحة لكل الي حواليك..

ومصدر السعادة، ومصدر كل الإيجابية..

شوف نفسك بتشع فرحة وسعادة وحب وايجابية لكل الناس..

شوف الناس بتجيلك عشان تفرح..

وصدقني..هتجذب ليك ولحواليك..

كل الفرحة..

وكل الحب..

أتمنى المقالة تكون عجبتك، وأشوفك المقالة الجاية ان شاء الله.

قانون الجذب

خد بالك

July 27, 2011 — by فيصل عبد الواحد16

خد بالك من نفسك..

فاكر لما قلتلك reflect from inner to outer ؟

في مقالة القطعة المفقودة..

مبدأ شبيه شوية..وهتشوف أثره ان شاء الله، رغم انه سهل جداً..

هل تتوقع ان الناس تحبك..لو كنت انت ما بتحبش نفسك..

إزاي هتتوقع ان ناس كتير هتحبك، وانت بتقول لنفسك، وأهم حاجة انك بتقول لنفسك..انك دماغك ناشفة..انك عنيد، انك قلبك اسود..أنك أنك انك..

وإزاي تتوقع فلوس كتير..وانت شايف نفسك، انك فقير؟

عايز تجذب فلوس..اجذبها على انك عندك فلوس، بس عايز اكتر..

وفي نفس الوقت، ما تستخسرش حاجة في نفسك، ما تستخرش اكله غالية أوي، شايف انها هتبوظ ميزانيتك لو كلتها، انت مش هتاكلها كل يوم..جربها مرة حتى في السنة..

عايز تجذب حب الناس؟ حب نفسك..

افرح بنفسك..

امشي فرحان انك انت الشخص ده..احمد ربنا على انك انت الشخص ده..

افرح بكل الصفات الي فيك، حب نفسك بنفسك..

كل حاجة بتشوفها في حياتك هي انعكاس لكل الي بيحصل جواك، وهتكلم معاك اكثر ان شاء الله عن الجملة دي في سلسلة مقالات تانية، بالاثبات والتجربة..

لكن المقدمة الي فاتت دي كلها عشان أقربلك المبدأ الي عايز اكلمك عنه..

هو انك تاخد بالك من نفسك..

ما تسيبيش نفسك شعرك مش متسرح وتقولي أصلي كده كده محجبة..

ما تسيبش نفسك دقنك طويلة – على غير عادتك – وتقول أصلي مش فاضي..

ما تلبسش أي لون على أي لون وتقول ياعم انا ما بهتمش بالمظاهر..

ما تناميش في اليوم 4 ساعات بس وتقولي أصلي ورايا حاجات كتير..

ما تقعدش في البيت وتقول اصلي مش فاضي أخرج..مجرد خروجك وانك تبص في عيون ناس غريبة..ده في حد ذاته احسن 100 مرة من قعدتك في البيت..

حب نفسك..البس كويس..اعرف ستايلات اللبس المختلفة وشوف انت بتحب ايه فيهم..

كدب الي قالك المظهر مش مهم..

لو شجرة أساسها قوي..جذورها ثابتة..

لكن شكلها من بره وحش..

مفيش ورد..

مفيش ثمار..

مفيش حاجة !

ماحدش هيقربلها، ماحدش هيبصلها، ولو حصل وحد بصلها هيتقرف منها..

الجوهر اكيد مهم..لكن برده المظهر مهم..

وأي حاجة تحصلك، لو شايفها وحشة، وممكن تكون واقعيا وحشة..حاول تحولها لشيء جميل..شيء يخليك تبتسم..

حتى لو مش لاقي الحاجة الجميلة الي في الحاجة السلبية دي الوقتي..ثق من جواك انه ربنا ما وضعكش في الموقف ده الا لصالحك ولخيرك..حتى لو ماكنتش انت شايفه الوقتي..واستنى الخير ان شاء الله وثق في الي خلقك، انه بيحبك، ومش عايز الا الخير والحب ليك..

لما بقرأ لعمالقة قانون الجذب، الي ناس منهم اصدقاء شخصيين ليا، بيكلموني عن حاجات، بكون نفسي أقولهم نفس المبادئ دي في شريعتنا..

لكن سبحان الله رغم ان عقلهم متفتح جدا عشان يتكلموا في قانون الجذب، لكن بييجوا عند الدين، وتُسكر آذانهم..!

Joe Vitale .. أستاذي، عنده حاجة جميلة أوي..

بيسميها

TIISG

اختصار لـ Turn it into something good

يعني أي حاجة تحصلك، استنى، ما تزعلش، حولها لحاجة تفرحك..

زوجته ناريسا، اللي برده متخصصة في برامج التنمية الذاتية، بعد ما صرفت آلاف الدولارات على السايت بتاعها، طلع في غلط خطير في السايت بعد الانتهاء منه، وماكانش في وقت انه يتصلح..

الراجل ده بكل بساطة، بعت رسالة لكل المشتركين على السايت..

قالهم في غلط في موقع ناريسا، الي هيلاقيه له هدية خاصة..!

الدخول على السايت بعد الرسالة دي تضاعف..والمبيعات الخاصة بكورساتها تضاعفت..!

والأمثلة كتير..شوف أي حاجة تحصلك، شايفها وحشة..واول حاجة تعملها

اهدى خالص..ابتسم، قول:

ممم..ايه الشيء الإيجابي اللي هنا..؟

صدقني، مهما كان، حتى لو كان مفرق الملذات – الموت – لازم هتلاقي حاجة..

حتى لو هتلاقي انك ان شاء الله، هتشوفه في الجنة..

حتى لو هتلاقي انه بطريقة او بأخرى..الحادثة دي وضعت في حياتك عشان تتحمل المسئولية..

عميل، يعتبر صديق شخصي ليا، تعرض لحادثة من أسوأ ما يمكن أن يتعرض له رجل من حوادث..

فضل مكتئب بعدها بفترة..بس حس بعدها انه بقى واحد تاني..

حس انه كان في أوضة صغيرة، والوقتي طلع فوق، وبقى قادر يبص على البيت كله..

عرف ان في ناس أذكياء زيه..وجايز أذكى، وعرف ان في ناس مش زي ماحنا فاكرينهم..

بيحكيلي ويقولي، بعد مالحكاية دي حصلتلي انا كرهت نفسي وكرهت كل الي حواليا..لكن الوقتي

والله العظيم..بحمد ربنا ألف مرة، انها حصلتلي..

وإلا كنت فضلت زي مانا، وضيعت من ايدي حاجات كتير، معايا الوقتي.

ما تنساش..

خد بالك من نفسك..

حب نفسك..

اهتم بنفسك..

ودايماً دور على الجانب الإيجابي..

وأشوفك في المقالة الجاية ان شاء الله.

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close