<img height="1" width="1" style="display:none" src="https://www.facebook.com/tr?id=738791696263823&ev=PageView&noscript=1">

main

قانون الجذب

! أنت نجمك خفيف

May 9, 2012 — by فيصل عبد الواحد87

THird_Eye_by_ParmeneoN.jpg


Children Books Ar 728x90

قانون الجذب والحسد والقوى السلبية
قانون الجذب والحسد والقوى السلبية

ست طيبة قالتلي مرة..أنت نجمك خفيف

الكلمة دي كلمة مصرية بحتة، حتى ناس كتير مصريين ممكن ما يعرفوش يعني ايه

نجمك خفيف

يعني ايه نجمك خفيف؟

كنت لسه هسأل السؤال ده

بس فهمت أنها قصدها، من الأحداث المحيطة

أنني بتأثر بالحسد وبنظرات الناس بسرعة

كان ممكن أرد بالكلام الي هقوله ليك في المقالة دي

بس ما حبيتش ان حد يقول عليا مجنون - هتعرف ليه في آخر المقالة - ، خصوصاً الست الطيبة دي لأنها مهمة جداً ليا

زي ما انت عارف واتكلمنا كتير قبل كده،

في حاجة اسمها قوة الجذب

وعكس ما ناس كتير بتقول، وفي ناس كتير بتعارضني في الفكرة دي

لكن قوى جذب كل مننا بتأثر في التاني

ممكن انت تكون جذبت اني أقعد حالاً أكتب المقالة دي عشان عايز حاجة جديدة، رغم اني بكتبها من مكان عمل

فده خلاني فجأة أفتح أمير نفسك وأبدأ أكتب الحروف اللي انت شايفها الوقتي دي

أو ممكن أنت تفكر في حد تلاقيه يتصل بيك، ورغم ان الموضوع ده متصل بالتخاطر، لكن قوى الجذب هي أصل التخاطر

أنا ساعات كتير بفكر في حاجات وأنساها وتحصل بسرعة، مع اني لما بلاقي نفسي كده بحاول بقى أركز أجذب حاجة

ما تحصلش..ليه ؟

الموضوع ده كبير فخليه لمقاله تانية، لكن باختصار، لأن في حاجة اسمها تباعد قوى هنتكلم عنه بعدين ان شاء الله

المهم، ان كل واحد فينا قوة جذبه بتأثر في قوى جذب الناس التانيين اللي حتى ما يعرفهمش وممكن يكونوا في بلاد تانية

وصورة من صور التأثير بإذن الله طبعاً قبل و بعد كل شيء

التأثير السلبي للناس المحيطين بيك

يعني ممكن لو انت ليك هدف معين، وحد عرفه، يبقى شايف ومتأكد انك هتفشل

فده أكيد هيأثر عليك لو قوة جذبك أقل من قوة جذبه، وعشان تعرف مين اللي قوة جذبه أكبر برده عايز موضوع تاني

عشان ما ندخلش في كلام كتير مالوش لازمة - الوقتي - هدخل معاك في الموضوع على طول

الكلام العلمي عن موضوع التأثير والتأثر كبير جداً ممكن تعرفه من كتب كتير زي كتاب

The Holographic Universe

لكن خلينا نتكلم عن الوقائع وازاي نتغلب عليها

انتي دخلتي لوالدتك تقوليلها انك ان شاء الله بعد 3 شهور هيبقى معاكي 50 ألف جنيه

والدتك، اللي هي شخص عزيزي عليكي جداً، ما عملتش أي حاجة، والموضوع اتغير

لكن بعد كام دقيقة حسيتي بالخمول

الكسل..ممكن اتخنقتي

والدتك وقتها أول كلمة جت في ذهنها لما قلتيلها على هدفك

"ابقي قابليني"

كلمة مصرية معناها مستحيل

وعشان ماما، ما فكرتش كتير في الموضوع، ومن غير ما تعرف فصلت نفسها وفكت الارتباط، بانها غيرت الموضوع

الأثر بقى أكبر

وبدأ يأثر عليكي انتي

وبدأتي تحسي انك مش عايزه تكملي طريقك للهدف ده

وبدون الكلام، وبدون انك تقول على هدفك لأي حد

ممكن تدخل أي مكان تحس انك اتخنقت فجأة

صدعت

عايز تنام

المشكلة، انك لو ما اتعاملتش مع كل الطاقات المحيطة بيك دي، ممكن جداً تتعب وتلاقي مقاومة أكتر

أو ممكن..تفشل

 صورة تانية من صور التأثير

هو الحسد

الحسد ما هو الا طاقة بيتم توجيهها من شخص ما لشخص آخر، بدون قصد طبعاً

وأنا شخصياً بقدر أعرف في حد بيحسدني ولا  لأ، وبقدر اتعامل معاها، وبقدر أعكسها عليه

وده اللي هتتعلمه في آخر المقالة ان شاء الله

المهم، الصورة الأولى او التانية، أتعامل معاهم ازاي

ازاي اكسر تأثير الناس السلبي عليا، أو أعكس حسد أي حد

الطريقة واحدة بس بتختلف شوية ، لكن الأول، بالنسبة لتأثير الناس، ياريت تريح دماغك

وما تقولش اهدافك لحد

ندخل في الطريقة، بالنسبة للحسد

عايزك الوقتي تغمض عينيك

مش الوقتي طبعاً، بعد ما تخلص قراءة المقالة

تغمض عينيك، وتاخد أربع أو خمس أنفاس بطيئة

وياريت تعمل كده وانت مستلقي على سرير أو كرسي مريح

وتشوف نفسك من بره

شوف جسمك بكل تفاصيله

الوقتي، في الحالة اللي انت عليها

وشوف هالة من الطاقة بتحيط بجسمك كله

لو لاحظت ان في اماكن فيها ضعيفة او مفتوحة، كملها

ما تسيبش أي مكان مفتوح

ركز على الهالة دي جداً، وشوف لونها ايه

وكثافتها

ركز أكتر هتلاقي في أسهم كتير جداً بتحاول تخترق الهالة دي

قوي الهالة في المناطق اللي تحس انها ممكن تخترق، عشان الأسهم أو الأشعة - بعض الناس  قالوا أشعة - ما تخترقهاش

لغاية ما يبقى عندك هالة قوية، بلون مشع، مفيش اي سهم قادر يخترقها

اعمل التمرين ده مرة واحدة بس لواحدك

ووقت ما تحس انك قابلت حد، وحسيت انك اتخنقت فجأة

او صدعت بدون أي مقدمات

اعرف انه من غير ما يقصد بيحسدك - وعلى فكرة كلنا ساعات بنعمل كده من غير ما نعرف فماتظلمش الراجل وتقول عينه وحشه

والوقتي افتكر الهالة كويس جداً، وشوف الاختراق بيحاول يحصل من أي جهة واتعامل معاه

ممكن في اول كام مرة تبقى محتاج تغمض عينك

لكن بعد كده هتقدر تعملها وانت مفتح عادي

عرفت ليه خفت تقول عليا هي مجنون ؟

بالنسبة للتعامل مع الطاقة السلبية للناس اللي حواليك، لما تحس ان في حد بيحبطك

او انت فجأة حسيت بالاحباط، ركز على الشعور ده وغمض عينك وشوف منظر ازاز بيتكسر

وحس بيه واسمع صوته وشوفه وهو بيتكسر في ذهنك

كررها كذا مرة بسرعة جداً ورا بعض

مع الوقت هتقدر تستخدم التقنية دي لحاجات كتير

بالمناسبة، التقنية دي اتولدت من سؤال في امتحان ممارس البرمجة اللغوية العصبية المتقدم

كان في سؤال

Invent a Technique using NLP

وكانت دي التقنية بتاعتي

تقنية قوية جداً هتفيدك كتير ان شاء الله

أتمنى ما اكونش طولت عليك في المقالة دي

وبالتوفيق ان شاء الله

قانون الجذب

أمسية قانون الجذب الاثنين 7/5/2012

May 8, 2012 — by فيصل عبد الواحد34

e-learning-2.jpg
أمسية قانون الجذب الاثنين 7/5/2012
أمسية قانون الجذب الاثنين 7/5/2012

تم بحمد الله الانتهاء من أمسية يوم الاثنين 7/5/2012

بفضل الله انا شخصياً استمتعت بيها جداً واستمتعت بالناس الجميلة اللي حضرت

بعتز بيهم كلهم وبعتز بحضورهم ونقاشهم وأسئلتهم الجميلة

كانت أمسية أكثر من رائعة الحمد لله وبفضل الله

أتمنى اني أكون قدرت أفيد فيها الناس اللي حضرت وقدرت على الأقل حتى تستمتع بالطاقة الإيجابية

اللي كانت في الأمسية الجميلة دي

الموضوع ده مخصوص عشان أشكر الناس اللي حضرت وأقولهم اتشرفت بيكم

وان شاء الله أشوفكم في لقاءات وأمسيات وندوات تانية بإذن الله

ده لينك الإعادة للي ما قدرش يحضر الندوة لايف

أمسية قانون الجذب يوم الاثتنين 7/5/2012

بالتوفيق ان شاء الله للجميع

 

قانون الجذب

الخلاصة

May 6, 2012 — by فيصل عبد الواحد72

34cw1.png

اتكلمنا عن قانون الجذب، في كل مقالاتنا السابقة

خلاصة قانون الجذب
خلاصة قانون الجذب

واتكلمنا كمان عن الكتابة، وتكتب ولا ما تكتبش، ولو هتكتب هتكتب ليه، ولو هتكتب هتكتب ازاي، في معاك ورقة وقلم، و معاك ورقة وقلم 2

واتكلمنا ازاي تتعامل مع اهدافك وتبصلها ازاي من ناحية الفكرة والتركيز الشديد عليها والرغبة "الحارقة" اللي جواك أنك تحقق هدفك

اللي بتسندك بعد اليقين بالله وقت ما تحس انك تعبت، واتكلمنا كمان عن نظرتك من ناحية مدى تحقق الهدف، التأكد والثقة والطبيعة، كل ده اتكلمنا عنه في مفتاح قانون الجذب

واتكلمنا كمان عن حرق المعتقدات وإزاي تتخلص من المشاعرأو المعتقدات السلبية اللي أكيد ليها دور كبير في تعطيل جذب اللي انت عايزه

النهاردة المقالة مش هتبقى كبيرة، هي بالظبط زي ما العنوان بيقول

الخلاصة من كل الكلام ده

لو عايز حاجة، تعمل ايه؟

قبل أي شيء عايز أقولك ان ربنا اللي خلق الكون وخلق قانون الجذب وغيره من القوانين، فبإذن الله لما اهدافك تتحقق ما تقولش سبحان الله، قانون الجذب ده حاجة جميلة

قول الحمد لله وبفضل الله، أحمدك وأشكر فضلك يا رب، بس، ما تجيبش سيرة قانون الجذب، ما ينفعش تشكر الدواء وتجحد فضل الدكتور، مش كدة ؟

هقولك تعمل ايه بالتفصيل، وهقولك على حاجة جديدة، جميلة جداً، ما كلمتكش عنها قبل كده

أول حاجة انك تعرف انت عايز ايه، وناس كتير اوي شايفه الحكاية دي سهلة، لكن لما تعرف ان 99% من أهدافك ان ماكنش كلها

اهداف مفروضة عليك من البيئة المحيطة

بما فيها الأسرة والأصحاب والتربية والمدرسة والإعلام..إلى آخر القائمة الطويلة

هتتفاجئ

في طريقة جميلة جداً تعرف بيها انت فعلاً عايز ايه، خاصة بدكتور اسمه روبرت أنتوني، ممكن تكون قرأتها هنا قبل كده، هتلاقيها هنا ان شاء الله : حدد أهدافك

خلاص بعد ما عرفت انت عايز ايه بالظبط، خليك فاكره كويس جداً، وفكر فيه، شوف الصعوبات اللي هتيجي في دماغك ايه، يعني لو الهدف مادي مثلاً، 1000 جنيه مثلاً بعد اسبوعين

شوف الحاجات السلبية اللي هتيجي في دماغك ايه وخليك فاكرها، الوقتي بقى هتعمل طريقة حرق المعتقدات، وتبدأ تكتب اللي مضايقك كله

بنفس الطريقة الي اتكلمنا بيها قبل كده عنها، وابدأ كمان اكتب كل حاجة مضايقاك ، مش بس اللي جه في دماغك، واعمل في اللي هتكتبه زي ما مكتوب في مقالة حرق المعتقدات

جميل، الوقتي خلصت حرق المعتقدات

تقدر تتدخل على الخطوة التانية انك تبدأ تكتب أهدافك، بنفس الصيغة والكلام اللي اتفقنا عليها في معاك ورقة وقلم، و معاك ورقة وقلم 2

وتبدأ تفكر في أهدافك دي بالطريقة اللي اتكلمنا عنها في مفتاح قانون الجذب

وتقرأ الورقة دي مرتين على الأقل في اليوم، لكن الجديد النهاردة اني هقولك حاجتين

أول حاجة، ان هيفرق معاك جداً لو جيبت نفس الورقة دي، وعلى الأقل مرة في الأسبوع، جيبت القلم

ومشيت على نفس الكلام المكتوب كإنك بتكتبه تاني

تاني معلش

يعني ايه ؟

يعني تجيب الورقة اللي انت اصلاً كتبت فيها اهدافك بالصيغة اللي اتفقنا عليها

وتعيد على اللي انت كتبته بالقلم كإنك بتكتبه من أول وجديد

مرة على الأقل كل أسبوع زي ما اتفقنا

تاني حاجة، عايزك وانت بتقرأ الورقة كل يوم، الكلام اللي انت بتقوله، مع انه محدد بتاريخ مستقبلي

بس عايزك تحس انك حققته فعلاً، وفيصل اللي بيقرأ أهدافه الوقتي

هو فيصل اللي حققها

فيصل الوقتي حقق الهدف ده وشايف نفسه فعلاً حققه

الكلمة دي كبيرة جداً وياما سمعتها وقرأتها قبل كده ماكنتش بهتم بيها، كنت بعتقد اني فاهمها كويس

لكن لما تفهم كويس جداً يعني ايه معنى، انك تكون فعلاً، معاك الهدف ده الوقتي

وانت بتقرأ الورقة دي

هتفهم قصدي، هتحس بشعور

هيخليك تفهم انا أقصد ايه

كمان حاجة أخيرة أحب أكد عليك فيها، ما تقولش أهدافك لحد

بس، دي كانت الخلاصة، وأشوفك المقالة الجاية ان شاء الله

قانون الجذب

Attractitude

May 3, 2012 — by فيصل عبد الواحد59

attractitude-big-logo.jpg
attractitude فيصل عبد الواحد
attractitude فيصل عبد الواحد

المقالة دي مش هكلمك فيها عن قانون الجذب

!ولا عن أي حاجة ليها علاقة بالتنمية البشرية

! هكلمك فيها عن نفسي

أناني، مش كدة ؟

مش انانية، لكن كنوع من الاحتفال، انا بعتز بيك كزائر من زوار موقعي

وحابب احتفل معاك بحاجة جميلة جداً

انا بفتخر بيها شخصياً

من حوالي 3 أسابيع، انضميت كمدرب لشركة عالمية للتدريب

شركة أجنبية، كندية تحديداً

والحمد لله اسمي موجود هناك الوقتي مع كل المدربين اللي هناك - كلهم أجانب

وأنا العربي الوحيد اللي هناك

وبفضل الله أصغر مدرب فيهم

مش بتباهى، بس زي ما قلتلك عايز اشارك فرحتي معاك

كمان انا هدرب قانون الجذب هناك، تحت مسمى قانون الجذب الشرقي

والتدريب أونلاين

تكلفة الحضور للمتدرب 500 دولار - بالظبط497

ودي حاجة عايز الفت النظر ليها، ان هنا الشخص "بيستكتر" يدفع 100 أو 200 أو حتى 1000 جنيه في كورسات

وبره الشخص بيدفع أضعاف المبلغ ده، لأنه عارف ان أغلى شيء يستثمر فيه، هو نفسه

دي حاجة اعتز بيها عشان بتمثل ثقة الشركة فيا الحمد لله

تقدر تشوف صورتي مع المدربين من هنا

http://pinterest.com/attractitude/coaches-at-attractitude/

هتلاقيها تحت على اليمين اظن

و تقدر تشوف كلام مختصر عني من خلال صفحتي على موقعهم الخاص من هنا

http://www.attractitude.com/Faisal_Abdelwahed.html

انا وصلت للمرحلة دي بفضل الله تعالى وحده، الحمد لله، ثم بيك، عشان انت كنت السبب اللي بكتب مقالاتي عشانه

وان شاء الله اتمنى اني اكون عند حسن ظنك دايماً وأقدر اقدم كل شيء يفيدك بإذن الله

بالتوفيق ان شاء الله

قانون الجذب

حرق المعتقدات

April 28, 2012 — by فيصل عبد الواحد74

papel-calcinado-25761277746402Jjha.jpg
قانون الجذب - حرق المعتقدات
قانون الجذب - حرق المعتقدات

اتكلمت عن حرق المعتقدات كتير جداً

في أكتر من مناسبة، وأكتر من مقالة، ومع أكتر من شخص

لكن مع ذلك لسه في ناس بتسأل عنها أو مش فاهمة يعني ايه حرق المعتقدات

وعشان احنا هنحتاجها ان شاء الله المقالة الجاية - مقالة الخلاصة

شوفت انه مهم اعملها مقالة خاصة بيها، تقدر ترجع ليها في أي وقت

حرق المعتقدات ببساطة انك بتجيب ورقة - أو كمية أوراق

وتجيب قلم - مش كمية أقلام - قلم واحد كفاية وتبدأ تكتب كل حاجة بتضايقك

بالظبط، كل حاجة بتضايقك

كل حاجة بتزعلك

عشان ما تتوهش، حدد مثلاً حاجة واحدة مضايقاك واكتب عنها كل شيء متعلق بيها، بس مش مجرد كتابة

عيش الكلام اللي بتكتبه، لو الكلام ذكريات، عيش كل ذكرى كإنها بتحصل تاني

شوف كل كلمة بتكتبها، بص على كل حاجة حصلت

اسمع كل صوت فاكر انه حصل

حس بكل احساس حسيته وقت الحاجة اللي زعلتك أوي وأثرت فيك، حصلت

خيانة ؟

زعل..؟

حزن..؟

فقر؟ فشل ؟ استغلال؟

..

موت ؟

اكتب كل حاجة وعيشها كإنها بتحصل تاني

انا عارف انك مستغرب من اللي بتقراه، لكن خليك معايا للآخر، اكتب كل حاجة فاكرها متعلقة بالشيء ده واكتب كل تفاصيلها الي فاكرها

وعيش كل حاجة كإنها بتحصل قدامك فعلاً الوقتي

عيشها بكل حاجة فيك

واكتب تفاصيل على أد ما تقدر

!! ناس كتير وهي بتعمل الحكاية دي عيطت..وده ممتاز

هتعرف ليه بس مش الوقتي

الوقتي..عايزك تمسك الورقة دي - أو كمية الورق - بإيدك

بصلها كويس

ركز فيها

قطعها

ولما تخلص تقطيع

احرقها

وبصلها كويس أوي وهي بتتحرق

ياريت..ياريت تقوم تعمل كده الوقتي وتيجي، انا مستنيك ما تقلقش

مش هروح في أي حتة

يلا، قوم خد وقتك، احرق سلبياتك، وتعالى

حتى عشان اقولك عملنا كده ليه، والخطوة اللي جاية ايه

...

الوقتي بعد ما انت المفروض انك عملت الخطوة دي

حاجة من الاتنين، يا حسيت بارتياح كبير أوي الحمد لله

وان في حاجة اتشالت من جواك

أو حسيت باكتئاب وحزن

وفي الحالتين، أنصحك تعمل الخطوة دي

اللي هي عكس الخطوة اللي فاتت تماماً، الوقتي هات ورقة جديدة

وابدأ اكتب مشهد من حياتك متحقق فيه اهدافك كلها

اكتب مشهد بكل تفاصيله

وعيش كل حاجة حلوة فيه

كل حاجة حلوة بس

اضحك وانت بتكتب حاجة تفرح

حس بالراحة وانت بتوصف ازاي الحياة جميلة ومريحة وهدفك "...ده موجود

اوصف كل حاجة، واسمع كل صوت، وشوف كل مشهد

وحس كل احساس

كإن أهدافك دي موجودة فعلاً، وانت بتوصف حياتك بيها

اعمل كده بكل التفاصيل اللي تقدر عليها

ياريت برده تقوم تعمل كده، وتيجي

انا برده هستناك ما تقلقش

..

حرق المعتقدات بالظبط زي الجرح الملوث

اللي لازم "يتنضف" كويس جداً

قبل ما يبدأ يلتئم

وإلا، لو التئم - أو بالمصري لم - وهو فيه الملوثات دي، ممكن يعمل مشاكل جامدة بعد كده

ورغم ان عملية التنضيف أو التطهير بتوجع وبتسبب ألم كبير

لكن مهمة، وما ينفعش ما نعملهاش

عشان الجرح يلتئم كويس، وما يحصلش مشاكل بعد كده ان شاء الله

نفس المفهوم، ونفس المنطق

أي حاجة سلبية جواك لو سيبتها من غير ما تعالجها

ممكن يتهيألك انها راحت أو نسيتها

لكن وقت ما تحصل أي مشكلة، هتفتكر كل السلبي اللي جواك

وفجأة ممكن تلاقي الدنيا قفلت في وشك

او اتخنقت فجأة

او اتعصبت على حاجة تافهه جداً

سمعت مثل "القشة التي قسمت ظهر البعير" ؟

أيوة بالظبط..هو عشان كدة

أنصحك تكرر حرق المعتقدات عند الحاجة، لو حسيت ان في حاجة خانقاك او مضايقاك

وصدقني ان شاء الله، هتفرق معاك جداً جداً، حتى لو مش عايز تزرع بعدها حاجة ايجابية

بالتوفيق ان شاء الله، وأشوفك المقالة الجاية - الخلاصة

قانون الجذب

مفتاح قانون الجذب

April 22, 2012 — by فيصل عبد الواحد83

img-thing.jpg

اتكلمنا كتير عن قانون الجذب، ما بين أخطاء

تقنيات

مفاهيم

طرق..أصول و طرق تدريب

اتكلمنا كتير عشان نوضح كل حاجة عن قانون الجذب

زي ما كنت بقول دايماً لو كنت متابع الموقع من أوله، هدفي في كتاباتي او تدريبي أني أعرفك وأعرف كل الناس

ان قانون الجذب سهل

ومش بالصعوبة أبداً اللي ممكن تكون قرأتها عنه

مش بالصعوبة أبداً انك لازم تعمل جلسات استرخاء مكثفة ولازم تعمل تمرين معين لو نسيت تعمله قبل ما يخلص في اليوم يبقى تعيده من الأول

قانون الجذب مش كدة

قانون الجذب مش قانون بشري

قانون الجذب طاقة، قانون الجذب استقرار وسعادة واتزان نفسي

قانون الجذب، أو الجذب زي ما بحب أقوله، سهل جداً، أسهل مما تتخيل

والدليل على انه سهل جداً،

!! انه كان دايماً شغال ضدك، برغبتك، من غير ما تعرف

زي ما انت قرأت قبل كده، مفيش حاجة اسمها قانون جذب ما اشتغلش، يا إما اشتغل لصالحك، يا إما اشتغل ضدك

وفي الحالتين، بيكون عليك جانب من المسئولية

عشان ما أطولش عليك، في ناس كتير انتظرت المقالة دي

المقالة الي هربط فيها بين اللي قلناه في معاك ورقة و قلم، واللي شرحناه ووضحناه في معاك ورقة وقلم 2

اتكلمنا فيهم عن الكتابة وأهميتها و علاقتها بالنصف الأيمن والأيسر للمخ

اتكلمت معاك فيها عن حاجات كتير

والنهاردة، الجزء قبل الأخير في السلسلة دي

الجزء الأخير ان شاء الله هيكون بعنوان الخلاصة، اللي هقولك بعد ما تكون قرأت وفهمت كل اللي قلتهولك ان شاء الله

الطريقة المثالية، اللي في صورة خطوات اللي تقدر تستخدمها في أي حاجة بعد كدة ان شاء الله

وممكن ما تدخلش الموقع تاني بعد كده - بس اوعى تعمل كدة

النهاردة هكلمك عن مفتاح قانون الجذب

ندخل في الموضوع على طول، مفتاح قانون الجذب

3 حاجات

أول حاجة 

الفكرة

ان يكون عندك اختيار لهدف أو لشيء، وتركز عليه، هي دي الفكرة، قوة الفكرة قوة جبارة ما أقدرش أقولها في مقالة او اتنين او عشرة، لكن صدقني أول خطوة في طريق نجاح قانون الجذب بإذن الله، هي الفكرة، قوة فكرتك قوة رهيبة، مجرد انك تختار شيء وتركز عليه تفكيرك يبقى تمكنت من أول جزء من مفتاح قانون الجذب

اللي بيدعم الفكرة هو الرغبة فيها، اللي بيدعم التفكير في أمنية معينة، هو الرغبة الجامحة فيها، واللي بتخليك دايماً فاكرها، اللي بتخليك كل ما تكون عايز ترتاح من التعب، تفتكر الرغبة الحارقة جداً اللي جواك، وتديك القدرة والنشاط تاني على انك تشتغل، زي ما بيقولوا الحلم مش اللي بتشوفه و أنت نايم، الحلم هو اللي بيخليك ما تعرفش تنام

يبقى أول حاجة يكون عندك فكرة قوية جداً على هدف أو أمنية ما، وتركز عليها جداً وتدعمها برغبتك فيها، خليك عايزها أوي، ومن الحاجات اللي لقيتها بتساعد جداً في تقوية الرغبة، هي الحب، لو الهدف اللي اختارته عايزه أوي، وفي نفس الوقت بتحبه، هيساعدك كتير جداً على التركيز على الفكرة

كل ما تركيزك زاد على الفكرة دي كل ما هتلاقي تطورات أكتر وأحداث وحتى أشخاص انجذبت ليك تساعدك في تحقيق فكرتك دي، عن تجارب شخصية، والمرة دي انا اللي بقولك

على اد ما تقدر، خليك فاكر الفكرة دي ومركز عليها، ما تنساهاش، ممكن هتلاقي مقاومة الاول خصوصاً ان العقل الدافع شائع أكتر من الجاذب، لكن بعد كده النتائج اللي في الآخر تستحق، كفاية انك هتمتلك عقل، كل ما تركزه على حاجة بإذن الله وفضله، هتقربلك

ركز، ارغب، حب، اجمع التلاتة دول في حاجة واحدة، ويبقى ده أول جزء من مفتاح قانون الجذب

تاني حاجة في مفتاح قانون الجذب، او تاني تركيب، أو تاني جزء، المهم انه التاني وخلاص، الإيمان

الإيمان ؟

الإيمان ان الحاجة اللي انت عايزها هتحصل فعلاً بإذن الله، وفي الوقت اللي انت حددته في الورقة، وأن المرحلة اللي انت فيها دي - ودي حقيقة - مرحلة انتظار و اعداد، انت مؤمن جداً ان الهدف هيتحقق بإذن الله في التاريخ ده بالظبط، ان ماكنش قبل كده

وهنا عايز أكلمك عن نقطتين، أول حاجة نقطة قانون الجذب نفسه، قانون الجذب قانون كوني، يعني ايه؟

يعني ما ينفعش تبصله من زاويتك انت وانت بتفكر في مدى سهولة أو صعوبة تحقيق الهدف، زي مثال دايماً بحب أقوله

أب وعد ابنه الصغير - 7 سنين - انه هيشتريله لابتوب في عيد ميلاده، بالنسبة للطفل الصغير لابتوب ده هدف كبير جداً ، وصعب يعمله لواحده ان ماكنش مستحيل، لا يمتلك المقومات لا المادية ولا المعرفية، ولا يعرف هيشتريه منين ولا ازاي ولا هيجيبه البيت في ايه ولا يعرف أي حاجة، بالنسبة ليه، للطفل، اللاب هدف مستحيل

على عكس الأب، لابتوب هدف سهل جداً، ممكن يجيبه بتليفون صغير هيعمله وفي نفس اليوم

مع اختلاف الفارق طبعاً، بس عايزك تعرف دايماً انك لما بتستعصب الهدف يبقى بتبص ليه من زاويتك انت بس، ونسيت انك بتطلب من اللي أقوى مني و منك ومن أي حد، ومن الكون نفسه

رب الكون، خلي يقينك فيه كبير، كون انك تشك في ان الهدف ده يتحقق في الوقت ده يبقى سلبيتك، من غير ما تعرف، بتخليك تشك في قدرة ربنا والعياذ بالله، ربنا بيحبك، واليقين بالله أقوى من أي حاجة تانية، وكلنا عارفين قصص الصحابة ويقينهم بالله

تاني نقطة، الشك لما يبدأ يجيلك، خصوصاً عن طريق الصوت الداخلي، اللي ممكن يكون بيضايقك في حاجات كتير، المشكلة ان دايماً الناس شايفه ان الصوت ده هو الآمر الناهي

اللي يقوله لازم يبقى صح، ولازم يحصل، لو جربت مرة تبصله، مش تسمعله، لو جربت مرة تشوف الصوت ده على انه مثلاً، رأي زي أي رأي ممكن تسمعه من أي حد من صحابك أو عيلتك، وانت حر تصدقه أو ما تصدقوش، وان كلامه مش وحي منزل لازم يتحقق، هترتاح كتير، اتحكم انت في الصوت ده مش هو اللي يتحكم فيك، بصله على انه مجرد رأي زي أي رأي ممكن تسمعه،

وفي حاجة جميلة أوي هتساعدك في الحكاية دي، كل ما الصوت ده يقولك حاجة سلبية، مثلاً زي : عمرك ما هتعمل كده، الموضوع هيبوظ، هتفشل..الكلام ده كله

كل ما الصوت ده يقولك حاجة كدة، اضحك ضحكة استهزاء بسيطة، ضحكة حقيقية مش داخلية، ضحكة استهزاء بسيطة كدة تحمل كل معاني الاستهزاء

خلي عندك إيمان دايماً انك ان شاء الله عشان انت عايز كدة، في الوقت ده، يبقى بإذن الله تعالى، هيحصل كدة، في الوقت ده

تالت وآخر جزء في المفتاح الطويل أوي ده، هو الطبيعة

يعني ايه الطبيعة ؟

في شعورك في التعامل مع الهدف، في 3 أنواع

التأكيد..أنا متأكد ان الهدف ده هيحصل ان شاء الله

الثقة..أنا واثق ان الهدف ده هيحصل ان شاء الله

الطبيعة..

أنا عارف ان الهدف ده هيحصل ان شاء الله، عشان ده الطبيعي

يعني ايه ؟

!!يعني طبيعي انه يحصل

أيوة يعني ايه برده؟ يعني كدة كدة بإذن الله، العادي والطبيعي ان اللي انا عايزه هيحصل

!!عشان دي الطبيعة اصلاً

لو قدرت توصل للاحساس ده

يبقى تبدأ من دلوقتي تحجز مكان في قسم قصص النجاح هنا عالسايت

بس عشان تتمكن من الاحساس ده جداً، لازم الأول تكون قدرت تتعامل مع الجزئين اللي فاتوا، الفكرة والإيمان

!!وقتها هتلاقي الطبيعة بقت حاجة طبيعية

طبيعي، مش كدة ؟

كده انت عرفت قانون الجذب، بس في حاجة عايز انصحك بيها، اعتبرها حاجة تحط فيها المفتاح تحافظ عليه

هي انك ما تقولش لحد على أهدافك، خصوصاً خصوصاً، لو كنت لسه في بداية معرفتك بقانون الجذب، اتكلمنا عن الحكاية دي قبل كده بالتفصيل، لكن المهم

ما تقولش لأي حد، حتى أقرب الناس ليك عن أهدافك

كدة خلصنا المفتاح، وان شاء الله اشوفك المقالة الجاية - الخلاصة

بالتوفيق ان شاء الله

قانون الجذب

سبليمينال السعادة

April 16, 2012 — by فيصل عبد الواحد104

! يعني ايه سبليمينال اصلاً، وايه علاقته بالسعادة

عشان نتكلم عن التكنولوجيا نفسها اللي ورا "الشيء" ده اللي بنتكلم عليه، هنحتاج موضوع كبير جداً

ممكن نعمل موقع مخصص عنها

خليني الأول أقولك الكورس ده ايه

الكورس، أو المنتج ده، عبارة عن تسجيلات بتكنولوجيا السبليمينال، لبرمجة - او لاعادة برمجة - العقل الباطن

برسائل معينة، اللي بيحدد الرسائل دي هو نوع السبليمينال نفسه

في سبليمينال لجذب المال

سبليمينال لتخسيس الوزن

سبليمينال للزواج والارتباط

في حاجات كتير جداً

التكنولوجيا بقى اللي ورا التسجيلات دي، ببساطة

هي ان أي رسالة بتتقالك، أو أي طلب، أو مقترح، أو محاولة لادخال معلومة للعقل الباطن

بتفشل في الوصول بالطرق العادية له، عشان في حاجة اسمها

Gatekeeper

اتكلمنا عنه قبل كده في مقالة اخترق داخل عقلك، وظيفته انه يحميك من الخطر بأنه يمنع دخول أي حاجة للعقل الباطن

تخالف البرمجة الداخلية ليه

السبليمينال، بيستغل الموسيقى والأصوات الطبيعية، ومعاها موجات صوتية بذبذات معينة، بتتخطى الـ

Gatekeeper

وبتوصل الرسالة للعقل الباطن، ممكن تكون رسالة واضحة، وممكن تكون رسالة مخفية في هيئة كلام معكوس

أو كلام سريع العقل الواعي ما يقدرش يفهمه

لكن العقل الباطن يقدر

التقنيات كتير، لكن التكنولوجيا نفسها واحدة

النهاردة انا بقيم لمنتج شركة كبيرة اسمها

Subliminal Mp3

بتتخصص في التكنولوجيا دي، فيها أكتر من 200 تسجيل مختلف لكل شيء

النهاردة انا اختارتلك حاجات معينة، ممكن تكون هي اللي شائعة الطلب بين الناس، لو احتاجت أكتر، ابعتلي رسالة على

personal@amirnafsak.com

بنوع التسجيل اللي بتدور عليه، وانا هجيبهولك ان شاء الله

 

: التسجيلات اللي اختارتهالك النهاردة هي

Change Your Beliefs About Money

غير معتقداتك المالية

التسجيلات المتعلقة بالمال كتير، لكن فضلت اختار المتعلق بالمعتقدات السلبية اللي ممكن تكون جواك

المتعلقة بالفلوس، زي الفلوس الكتير حرام، أو راحة البال مع الفقير، أو الأغنياء يدخلون النار..إلى آخر كل تلك المعتقدات

استخدم التسجيل ده في جو هادي تماماً، وبحذرك انك تسمعه وانت سايق او بتعمل أي حاجة تتطلب تركيز

-----------------------------------------------------------------------------------------------------------------------

: تاني حاجة اختارتهالك النهاردة هي

Win Friends And Influence People

التأثير على الآخرين و اكتساب الأصدقاء

التسجيل ده بيغير المعتقدات السلبية اللي جواك للي ممكن تكون مسببالك حالات زي الرهاب الاجتماعي، او الخوف من التجمعات

أو الخوف من التحدث امام جمهور، كلنا في مرحلة من حياتنا عانينا من المشكلة دي، انا شخصياً وأنا طالب كنت بخاف أقف في المحاضرة

وأرد على اجابة الدكتور، رغم اني كنت ببقى عارفها، وبعد لما المحاضرة تخلص كنت ببقى زعلان جداً اني كنت عارف الاجابة وحد تاني جاوب

في الآخر غيري، عشان خوفي من اني اقف واتكلم كان بيغلبني كل مرة أحاول آخد فيها القرار بأني أقف، وأتكلم

التسجيل ده هيساعدك في أنك تأثر على الناس، ودي نتيجة تلقائية عن علاج أي حالة من الحالات الأولى، وبالمناسبة

لو كنت بتسأل، التسجيل ده ينفع للولاد والبنات، آه، ينفع للاتنين

تالت حاجة جايبهالك، وهتعجبك جداً

---------------------------------------------------------------------------------------------------------------------------------

Attraction Accelerator

تسريع أثر قانون الجذب

التسجيل ده بيقوم بعملية حرق المعتقدات السلبية جواك، لكن عشان أكون صريح معاك، لازم تسمعه على الأقل 3 أيام متواصلة

قبل ما تنام، بالظبط كإنك بتستخدم طريقة المعايشة 3 أيام اللي اتكلمنا عنها هنا، التسجيل ده جميل جداً

وهتشوف نتايجه في وقت قصير جداً ان شاء الله، لو هتشتري حاجة واحدة بس من كل اللي اختارهم ليك، أو لو محتار تشتري ايه

يبقى هو ده

ما أقدرش أسيب الحاجات المحددة، اللي دايماً الناس بتدور عليها، خصوصاً وان في ناس بتتعلم قانون الجذب مخصوص عشانها، عشان كدة جيبت التسجيلات اللي هتشوفها الوقتي

-----------------------------------------------------------------------------------------------------------------------------

Boost Self Confidenceعزز ثقتك بنفسك

التسجيل ده معمول، برسائل صوتية مخصوص، عشان يعلي ثقتك بنفسك، اتسألت سؤال قبل كده هل لو استخدمته أكتر من اللازم

ممكن يعمل غرور ؟ بصراحة مش عارف، الاستعمال الزائد للتكنولوجيا دي ماكنش حد قبل كده بيحاول يستفهم عنه خصوصاً وانها

كلها كانت موجهه لقانون الجذب وبرمجة العقل الباطن بالوفرة والثراء وكل المفاهيم التانية المرتبطة بيه، لكن مع وجود التسجيلات دي

وتنافس أكتر من شركة على تطوير التكنولوجيا بتاعها - ليها براءات اختراع - المفهوم اتطور نوعاً ما، فماصادفتش حد قبل كده ممكن

تكون قابلته المشكلة دي، برده أنصحك انك تسمعه على الأقل 3 أيام قبل ما تنام ان شاء الله

 ---------------------------------------------------------------------------------------------------------------------------------

 

Subliminal Weight Loss

تخسيس الوزن

التسجيل ده خاص بتخسيس الوزن بوجه عام، في تسجيلات تانية زي الجسد المثالي والصورة المثلى للجسم، وبتختلف من الراجل للبنت

بس التسجيل ده هو التسجيل المثالي لتخسيس الوزن، المهم ما تقولش فقدان الوزن، العقل الباطن مبرمج على البحث عن "أي شيء" يفقده

عشان كده ناس كتير من اللي "بتفقد" الوزن، بترجع أتخن من الأول

 

 

-----------------------------------------------------------------------------------------------------------------------------------------------

Stop Smoking

الإقلاع عن التدخين

من أكتر الحاجات اللي الناس بتروح للايف كوتش أو مدرب، عشان تبطلها، تقدر الوقتي بأنك تواظب على سماع التسجيل ده

لمدة مش أقل من 3 أيام متواصلة قبل النوم، تبطل تدخين نهائياً بإذن الله، سؤال مهم اتسألته، لو انا بطلت اسمع التسجيل ده

هرجع أدخن تاني ؟ لأ، المهم انك تكون بطلت تدخين نهائي، ممكن بعد كده تستغنى عنه تماماً، لأنه ببساطة التسجيل ده أو أي

تسجيل سبليمينال تاني، ما بيقومش على مبدأ التعود على العادة أو السلوك، لكن بيقوم على زرع المعتقد داخل العقل الباطن

حتى لو حاول حد يخليك تدخن بعد كده، هتلاقي نفسك بتكح من ريحة الدخان

دول أكتر حاجات أعتقد ان الناس بتدور على تسجيلات ليها، أو ممكن تكون حتى بتتعلم قانون الجذب عشانها

لو عايز تسجيلات لأي حاجة تانية ابعتلي إيميل زي ما قلتلك على

personal@amirnafsak.com

بنوع التسجيل، وان شاء الله أقدر أوفرهولك

للعينات المجانية

Try subliminal audio for free

 

ملحوظة - ان شاء الله هتلاقي المقالة دي في صورة صفحة دائمة ان شاء الله في القسم الجديد اللي فوق - منتجات تهمك وكل فترة هحط منتج ان شاء الله يفيدك سواء في قانون الجذب، أو التنمية البشرية بوجه عام

بالتوفيق

قانون الجذب

معاك ورقة وقلم 2

April 15, 2012 — by فيصل عبد الواحد150

j0439382-1024x717.jpg

كلمتك المرة اللي فاتت - او اللي قبل اللي فاتت، عشان اضطررنا نقطع سلسلة ورقة وقلم

بمقالة اقتراحاتك ومشاكلك الشخصية، اللي عايزها تكون في الكورس التدريبي الجديد لقانون الجذب، هكلمك عنه أكتر في مناسبة تانية ان شاء الله

اتكلمنا في مقالة "معاك ورقة وقلم" عن الكتابة، وأهميتها، وعشان نقدر نحدد أهميتها اكتر

اتكلمنا عن النصف الأيمن، والنصف الأيسر، من المخ

ومدى تأثير كل منهم

النهاردة ان شاء الله، هكلمك عن الكتابة، وأفضل طريقة تستخدمها بيها

الكتابة، عشان تدرك مدى أهميتها، هي أول خطوة في نقل الفكرة من الوسط الروحي، للوسط العقلي وأخيراً، للوسط المادي

لو تفتكر، اتكلمنا قبل كده عن الأبعاد للفكرة وقولنا ان هم 3 أبعاد،

الروحي

العقلي

المادي

لو ناسي، أو ما قرأتش المقالة دي تقدر تقراها من هنا

الكتابة زي ما قولنا، هي أول خطوة في نقل الفكرة دي بعد التركيز عليها، من الوسط العقلي للوسط المادي، أول حاجة تبدأ بيها تاخد الخطوة في

Materializing

الهدف بتاعك، أو انك تدي وجود مادي بدائي للهدف بتاعك، في صورة وجودها على الورق

وتبدأ الفكرة فعلاً واحدة واحدة تتنقل للوسط المادي، وتقرب منك، وتتحقق بإذن الله، وكده تبقى اتنقلت بكامل تفاصيلها للوسط المادي

مرة تانية أنصحك بقراءة مقالة ال3 أبعاد عشان تفهم الحكاية دي أكتر

طب لما الكتابة مهمة أوي كدة، نعملها ازاي؟

نجيب ورقة ونكتب مثلاً

أنا عايز شغل ؟

مش بالظبط، انت اه هتجيب ورقة وقلم - زي ما اتفقنا المقالة اللي فاتت - وآه هتكتب انت عايز تشتغل - لو ده هدفك، لكن في حاجات مهمة كمان لازم تعملها

قبل ما تبدأ تكتب أي حاجة، حدد تاريخ معين، باليوم والشهر والسنة، عايز هدفك ده

يتحقق فيه بإذن الله

آه، حدد انت الوقت، شوفت الحكاية سهلة ازاي ؟

طب لو ما اتحققش؟

جميل، لسه بتفكر تفكير سلبي، هايل

عموماً ما تخافش، هيتحقق ان شاء الله، بس المهم تفضل على الخطوات الي انا هقولك عليها بالظبط، بالظبط جداً، بالظبط جداً جداً

لكن هكون صريح معاك، لو الهدف ما اتحققش عشان نسيت تعمل خطوة من الخطوات، أو شايف مثلاً

انك عملت كل حاجة صح بس برده ما اتحققش في معاده، على الأقل، هتبقى قربت منه جداً

وهتبقى فرحان جداً انك خدت الخطوة دي، عشان آه هو ممكن يكون ما اتحققش في نفس اليوم

بس ظهرلك حاجات، وخطط، تقولك هدفك هتحققه امتى بإذن الله، وهنعرف الوقتي بالتفصيل

زي ما قلتلك، هتحدد التاريخ اللي انت عايز الهدف ده يتحقق فيه ان شاء الله

يعني مثلاً، كمان 3 شهور

حدد يوم ايه

مثلاً يوم 15/8

هيبقى يوم ايه؟ وليكن هيبقى يوم سبت، جميل

يبقى ان شاء الله الهدف ده هيتحقق يوم السبت 15/8/2012

تاني حاجة، تحدد المقابل

المقابل ؟؟

آه، تحدد المقابل، مفيش حاجة ببلاش

لو كان هدفك كمية معينة من الفلوس مثلاً

ماحدش هييجي في اليوم اللي حددته

ويقولك بص، انت عملت المعادلة صح، وكتبت كل حاجة صح

خد الفلوس أهيه

مش هيحصل

لازم تحدد المقابل للفلوس دي ايه

هتدي ايه في مقابلها، خدمة معينة هتوفرها للناس، شغل معين هتعمله

طيب بالنسبة لو حد ما بيشتغلش، ومبيفهمش في أي حاجة

يبدأ يرجع خطوة لورا، بدل ما يطلب فلوس، يطلب شغل، ويحدد مرتب الشغل،

والمقابل هنا، يكون نوعية الشغل

هناخد مثال عشان نوضح العملية أكتر، لو هدفك كان وظيفة مثلاً، هتكتب كده في الورقة:

يوم السبت 15-8-2012 ان شاء الله هكون بشتغل كذا..وبقبض كذا

انا في الشغلانة دي هعمل "كذا و كذا و كذا".. وهقدم أفضل ما عندي ان شاء الله للناس 

---

ونيجي عند اهم فقرة، الفقرة الأخيرة

هتكتب فيها : انا عارف ان ان شاء الله، هكون بشتغل في اليوم ده، يوم "..." الوظيفة دي "..." وفرحان أوي، عشان متأكد انها هتيجي ان شاء الله

وكمان عشان هتحللي مشاكل كتير، وشايف نفسي بشتغل الشغلانة دي

وبروح كل يوم الشغل الساعة كذا، وبفتكر اليوم اللي كتبت فيه الورقة دي وبضحك

وفرحان جداً الحمد لله، ومستني أفكار وخطط وعروض، أقدر بيها احقق اللي أنا عايزه ده

وأشتغل الشغلانة دي وأقبض المرتب ده بإذن الله

-----

وتعمل نفس الحكاية لكل هدف

تحديد الهدف

تحديد المعاد

تحديد المقابل

تحديد المشهد الأخير ومعايشته

!! المهم، انك ما تكتبش

ايه.. ما أكتبش

أصدي انك ما تكتفيش بأنك تكتب، لازم وانت بتكتب كل كلمة وكل حرف، تعيشه، تشوف المنظر، تشوف المشهد

تشوف نفسك جواه

افرح بأنك فعلاً اشتغلت

افرح بأنك فعلاً معاك فلوس

افرحي بأنك فعلاً خلفتي وبقى عندك طفل جميل

افرح بأنك اتجوزت

افرح وانت بكتب، المهم تعيش اللي انت بتكتبه

وبعد ما تخلص كتابة الورقة المهمة دي، تقراها كل يوم مرتين

مرة قبل ما تنام مباشرة، ومرة قبل ما تصحى

وما تنساش برده، مش مجرد قراءة، لازم تعيش الاحساس في اللي بتقرأه

خد وقتك في الكتابة، وخد وقتك في القراءة

دقيقة او دقيقتين أو حتى خمس دقايق

مش خسارة في مستقبلك، مش كدة ؟

أتمنى ان شاء الله تكون المقالة عجبتك

انا عارف ان الأسألة هتكون كتير جداً على المقالة دي

في انتظار تعليقك او سؤالك ان شاء الله

بالتوفيق

قانون الجذب

!! مفاجأة – عايزك تساعدني في كورس قانون الجذب الجديد

April 13, 2012 — by فيصل عبد الواحد40

thank-you.jpg

المقالة دي استثنائية، ماكنش محطوطلها جدول زمني، لأنها بتقطع الجدول الزمني الخاص بسلسلة مقالات "ورقة وقلم" لكن عشان هي مهمة

حطيتها ليك

انا مش هتكلم عن معلومات جديدة في المقالة دي

انا بس هقولك

اني عايزك تساعدني

بالظبط زي ما مكتوب في العنوان، ما حبتش أكتب "ساعدني" وأسيب التفاصيل للموضوع

حبيت أوضح كل حاجة في العنوان

انا عايز مساعدتك في الكورس الجديد لقانون الجذب اللي هعمله

هيبقى ان شاء الله كورس كامل شامل - والكمال لله وحده - عن كل ما يتعلق بقانون الجذب

من أول يعني ايه عقل واعي و عقل باطن

والمعايشة

والمعتقدات السلبية

وتحقيق الأهداف

والبرمجة اللغوية العصبية

والتنويم الإيحائي

وكل حاجة متعلقة بقانون الجذب من الـ أ إلى الـ ي، كل حاجة بمعنى كل حاجة، بتمنى انك تفضي نفسك لمدة كبيرة بعد ما تاخد الكورس عشان هيكون كبير جداً، انا مش هوقف خدمة الأبلود الغير محدود - ستريمر - من فودافون عشان أقدر أرفع محتويات الكورس

بوجه عام، ده الجزء الأول من الكورس، الجزء التاني من الكورس

هيكون استخدام كل ده - بشكل عملي - لجذب أهداف مخصصة

المال

الزواج

العمل

كمان هتكلم عن أنواع المعادلات الخاصة بيا، الكتابية، والتخاطر، واحتمال - مش أكيد - أتكلم عن المعادلة الأصلية

اللي عايز مساعدتك فيه، انك تقولي مشكلتك، تقولي اقتراحاتك، تقولي أي شيء تحب تضيفه للمنتج - الصوتي بالمناسبة مش هيكون مجرد كتب مملة تقراها وبعض المفاهيم لو احتاجت ممكن تكون مرئية كمان بإذن الله

قولي مشاكلك ايه، أو المشاكل العامة الي بتقابلك ايه عشان أقدر أحطلها حل ، انا عايز المنتج ده يكون مناسب لأكبر عدد ممكن من الناس، عايز كل اللي يشتريه يستفيد بيه لأقصى درجة ممكنة، مش عايز أسيب حاجة متعلقة بقانون الجذب ما أتكلمش فيها

عايز أديك كل اللي عندي

لو مشاركتك قصة نجاح، ابعتهالي، وهكتبها وهحط اسمك معاها

لو مشاركتك شهادة أو تقدير للموقع أو ليا، او انت استفدت من الموقع ولا لأ، ابعتهالي وبرده هحطها في المنتج وهحط اسمك - وصورتك معاها لو تحب

لو مشاركتك مشكلة أو كمية مشاكل - ياريت ياريت تبعتها عشان اقدر احطلها الحل اللي يخليك، ويخلي ناس كتير بتشاركك نفس المشكلة، يتغلبوا عليها ويحققوا كل اللي هما عايزينه ان شاء الله

ابعتلي أي حاجة من دول، او ابعتلي رأيك أو مقترحك، أي شيء تقدر تساعدني بيه عشان المنتج يكون أقرب ما يكون لفايدتك وفايدة الناس، ابعتهولي

لو تحب تشارك بيها هنا اوك

لو تحب تبعتهالي بشكل شخصي - وده يكون أحسن - ابعتهالي على

personal@amirnafsak.com

وابعت كل البيانات الخاصة بيها

مستني مشاركتك ان شاء الله

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close