main

قانون الجذب

كورساتك..تغيير حياتك

December 8, 2012 — by فيصل عبد الواحد14

Improve-Memory-Brain-Training-3.jpg

قانون الجذب

إزيك عامل ايه

بتوصل ليا رسايل كتيرة جداً

عن طلبات معينة في الكورسات

وبصراحة قرأت أفكار أكثر من ممتازة لكورسات كتير

لكن عشان اليوم محدود

وأنا شخصياً ليا حياة خاصة - رغم حرصي اني أقدم ليك كل الكورسات المتاحة

وكل الخبرات والمعلومات اللي تهمك

اقتصرت حالياً على 4 كورسات جديدة

تقدر تلبي أغلب الاحتياجات اللي لقيتها موجودة عند أكبر شريحة

من الناس ممكنة، على الأقل في الوقت الحالي

غير كدة، عادة لما بعمل كورس جديد

بعمل مقالة خاصة عنه عشان أعرفك بيه

مش كدة ؟

لكن عشان المرة دي

مش كورس واحد أو اتنين

4 كورسات جديدة بإذن الله

قررت بدل ما أعمل 4 مقالات

وبين كل مقالة اكتر من يوم

قررت اعملك مقالة واحدة اكلمك فيها باختصار عن كل كورس

وبعد كدة ان شاء الله انشر صفحات الكورسات دي على هيئة مقالات في أي وقت

عشان هتكون انت بالفعل قرأت عنهم سواء في الشرح المختصر

او في صفحاتهم الخاصة

قانون الجذب المخصص - كورس الفرد الواحد

أول كورس..واللي مش موضوع في قسم الكورسات

أصلاً مش كورس، هو شغل فردي مع واحد بس

بشتغل معاك من 22-26 يوم لحد ما تتغيير تماماً بإذن الله، او لحد ما تحقق هدفك، او على الأقل تكون على طريق تحقيقه بإذن الله

مش أي حد يدفع مقابل الكورس يتم قبوله طبعاً، في بعض الشروط زي اللي مكتوبة في صفحة الكورس من هنا

وشروط تانية، زي مثلاً غير مقبول ان يكون الهدف جذب شخص ما، او جذب هدف غير منطقي - بالنسبة للمتدرب

كورس جذب المال - طاقة المال

في الكورس ده، زي ما العنوان بيقول

هيبقى عن جذب المال بس

4 أيام تدريبية

موجهة لكل حاجة خاصة بالمال وجذبه، وليه لحد الوقتي ما جذبتوش

والمشكلة فين، وعلاجها إيه بإذن الله

كورس جذب العمل - طاقة العمل

مش بس عشان تشتغل، لكن عشان تشتغل الشغل اللي انت بتحبه

ممكن تكون عايز صاحب عمل

مش تشتغل بس

أو ممكن تكون عايز تشتغل فعلاً

أياً كان..كل ده معمول حسابه في كورس جذب العمل، أو طاقة العمل

وزي ما انت عارف..ان كلمة طاقة، يعني إن 75% من الكورس..طاقة

كورس جذب شريك الحياة - طاقة شريك الحياة

عارف ان الحكاية دي عند ناس كتير

وبيتحرجوا يتكلموا عنها

يمكن عشان حساسية الهدف

أو نظرة المجتمع

وكل ده تم أخذه في الاعتبار

سواء للراجل، أو للبنت

طبعاً لمعلومات اكتر عن كل كورس تقدر تضغط على اللينك الخاص بيه

وهتلاقي معلومات أكتر بكتير ان شاء الله

بالنسبة للكورسات الموجودة بالفعل

كورس طاقة الجذب - تدريب قانون الجذب المكثف

كورس سيدونا - التطهير الداخلي

ان شاء الله تلاقي الكورس المناسب لاحتياجاتك

وان شاء الله تحققها

فيصل عبد الواحد

قانون الجذب

! يا كسلان

December 4, 2012 — by فيصل عبد الواحد45

lazy-town-iceland-series.jpg

قانون الجذب - يا كسلان

ناس كتير أوي

بتكسل أنها تقرأ مقالة

وتبعت تسأل عن حل مشكلة

ولما أشير بحل المشكلة، انه مكتوب في مقالة

وممكن كمان اني اكتب الرابط ليها

ألاقي رد غريب

ان في كسل في القراءة

وأن في رغبة في الحل على طول

أنا أقدر اكتب الحل على طول

بالعكس ده هيبقى أسهل ليا

من أني ادورلك على المقالة واجيب اللينك بتاعه واكتبه في رد

لكن اذا انت حتى مكسل تبذل مجهود في قراءة حاجة

شخص بيقولك عليها..حلك هناك

الحل بتاع مشكلتك هناك

وانت "مكسل" تقرأ

متوقع ايه ؟

طيب اذا كتبتلك الحل

متوقع تنفذه ؟

طيب انت ليه مكسل انك تعمل معايشة داخلية - مثلاً - بعد التحرر والتحديد كل يوم ؟

هل دقيقة ونص، أو دقيقتين، أو حتى ساعة

كل يوم

كتير على انك تعمل اللي انت عايزه ان شاء الله

استنى..البارادايم هيبدأ يشتغل

ايه حجتك المنطقية، او ردك المنطقي عليا الوقتي ؟

أصل برده اني أقعد دقيقة ونص او دقيقتين معملش حاجة كدة

بحس بملل

جميل..حتى لو هتحس بملل، اذا قلتلك هتحس بملل بس هتحقق اللي انت عايزه ان شاء الله، هتقول لأ ؟

أصل برده يعني الحكاية غريبة

غريبة ليه؟ انت بتقعد مع نفسك، وحتى قبل ما تنام عشان ما تخصصش وقت تاني، ولمدة قصيرة جداً بتحس انك معاك الهدف اللي انت عايزه ان شاء الله

آه مانا عارف بس أصل يعني ساعات بنسى اعملها كل يوم

مفيش مشاكل، اذا نسيت كمل اما تفتكر، او تقدر تكتبها في ورقة وتعلقها قدام السرير عشان ما تنساش

أصل ممكن حد يشوفها، خلاص، خليها في جيبك

وهتستمر الحجج

وتستمر الردود

وهنوصل لمرحلة انك مش لاقي حجة مقنعة

انت ليه مكسل

ليه..لأن ببساطة انا صوت المنطق

وأنت صوت البارادايم

وطبيعي اني عمري ما هقدر اكسب الحرب دي

لكن اذا الثمن انك ان شاء الله عشان تحقق هدفك، انك تعمل سيدونا، لمدة 5 دقايق، أو انك تعمل معايشة داخلية لمدة 90 ثانية

انا شخصياً شايف انه ثمن قليل جداً جداً جداً

في مشكلة تانية، ان ممكن حد يجيلي

يقولي بص انا محتاج اجذب فلوس عشان عايز ادفع مصاريف كذا

أحيي فيك ثقتك فيا، انا شخصياً ما عنديش مشكلة

لكن هل انت جواك، مقتنع انك "أنت" تقدر تجذب الحل ده، أو المبلغ ده، في المدة دي ؟

انا شخصياً ماعنديش مشكلة

لكن عايزك تعرف انك جاي، "مُحمل" بالسلبيات والمواقف والذكريات السلبية، والبارادايم

تقدر تتغلب عليه في يوم او اتنين أو اسبوع ؟

عايز اقولك

آه تقدر

وتقدر تجذب اللي انت عايزه في أقل من المدة القليلة اللي انت عايزها كمان ان شاء الله

لكن المهم..أنت عارف كدة ؟

أو بمعنى أصح..تقدر..وبكل صراحة مع نفسك

تقدر..تتقبل انك تقدر ؟

تقدر..ما تكسلش انك تدور على حلك لما أقولك الحل في أمير نفسك بإذن الله ؟

تقدر تتحرر من كل رغبة عايزه تنزلك وتقلل منك ؟

تقدر تعرف..وتتقبل، ان كل حاجة انت بتكسل تعملها

هتفيدك..؟

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

قانون الجذب

غير حياتك في 20 دقيقة

December 1, 2012 — by فيصل عبد الواحد50

قانون الجذب - غير حياتك الآن

بإذن الله..غير حياتك في 20 دقيقة بإذن الله

اذا كنت اشتركت في أمير نفسك، هتجيلك رسالة الوقتي ان شاء الله على إيميلك، فيها لينك التأكيد

اضغطه لتفعيل اشتراكك بإذن الله، وهتوصلك الأمسية على الإيميل بإذن الله

جذب المال..جذب الزواج..جذب النجاح..جذب العمل، تجارب في قانون الجذب،

أكيد حاجات زي دي كتبتها كتير في جوجل..مش كدة؟

التسجيل ده، "جريت" فيه على أد ما أقدر

وهتعرف ليه في الآخر

حاولت اتكلم بسرعة، وفي نفس الوقت ادي لكل حرف وكل كلمة حقها

عشان تفهم كل حاجة بقولها

وفي نفس الوقت ما اطولش عليك

عشان..هتعرف في الآخر ان شاء الله

في التسجيل ده انا اختصرتلك كل اللي في أمير نفسك

كل اللي أعرفه، في حوالي 20 دقيقة

وقلتلك الخطوات اللي تعملها عشان تجذب اللي انت عايزه

بإذن الله

وبفضل الله وضحتلك فيه كل حاجة انت بتعملها غلط

عشان ان شاء الله

تبدأ تعملها صح

التسجيل ده..هيغير حياتك بإذن الله

التسجيل ده كنت ناوي أعمل أمسية مدفوعة، ممتدة بيه لحوالي ساعتين

لكن فضلت اني اعمله بالصورة "المضغوطة" دي عشان تحس ان كل كلمة فيها معاني كتير

وعشان كمان أفيد بيه أكبر كم ممكن ان شاء الله

قررت أخليه مجاناً ليك بإذن الله

تحياتي ليك، وتغيير حياة ممتع ان شاء الله

اذا كنت لسه ما اشتركتش، تقدر بسهولة تشترك من اليمين بأنك تدخل اسمك وايميلك

اشوفك بعد ما تخلص التسجيل..هنا

ان شاء الله

في أمير نفسك

قانون الجذب

! الوعي..تاني

November 30, 2012 — by فيصل عبد الواحد55

cr-thinking.png

! قانون الجذب - الوعي..تاني

مقالة "انت واعي" عملت ضجة كبيرة جداً

انا شخصياً ما توقعتهاش

وناس كتير طلبت مني توضيح أكتر عن يعني ايه وعي

حاسس اني زي ما بنقول عندنا في مصر

"جيت عالجرح"

أو لمست منطقة "حرجة" في حياة كل واحد فينا

يعني ايه انا مش واعي ؟

يعني لما تسمع كلمة زي

"الثراء يأتي من الداخل"

ايه اللي بيجي في تفكيرك الوقتي ؟

أكيد هتقول ان لازم نشتغل من جوا..عشان التغيير الداخلي أهم، والكلام ده كله

مش كدة ؟

طيب جميل..خلينا نفترض ان ده اللي انت شايفه فعلاً

انت ليه ما بتعملش كدة ؟

بمعنى تاني..لما انت شايف كدة

ومقتنع بيه

ليه حياتك - غالباً - مش زي ما انت عايز ؟

طب ليه دايماً بتحاول تتغير من بره..مش من جوه ؟

الوعي ان ممكن جملة تتعرض عليك

ما تفهمهاش خالص

بل انك تعارض صاحبها

وتيجي بعد شهر، شهرين، سنة، سنتين، تلاتة

وحتى 20 سنة

تسمع الكلمة دي تاني

تحس بحاجة جواك..عاصفة ذهنية

بتاخدك بالزمن للخلف..وتفكرك بالجملة دي

وتقول ازاي..ازاي ما فهمتش ده

لسه المعنى مش واضح..مش كدة ؟

كل أما بتسمع تسجيل مهم

او كورس لحاجة حتى انت ما بتحبهاش

او مش مهتم بيها

مستوى فكرك وثقافتك..ووعيك بيزيد

كل ما بتقرأ أكتر - ومش عارف ليه بصراحة الناس ما بتحبش تقرأ - وعيك بيزيد

بكل حرف تقرأه

بمعنى كل حرف، بدون أي مبالغة

في القراءة متعة ما لقيتهاش في أي حاجة تانية

وانا حاسس وانا بقرأ كل كلمة ومعلومة

ان وراها سنين خبرة وعلم وعمل من صاحبها

وانا باخدها..عالجاهز، في دقيقة او دقيقتين

أنانية..مش كدة ؟

عشان ما تبقاش انانية، انا برده بكلمك الوقتي، بنفس المبدأ

الوعي هو امكانية تقبلك لمعلومات معينة

اذا عندك الوعي، والرغبة، هتلاقي حصلت أي حاجة تخليك تاخد المعلومات دي

سواء ظروف تخليك تمتلك المقابل المادي لها، أو ظروف تخليك تعرف المعلومات دي بالصدفة

أي حاجة هتحصل، طالما بالفعل تمتلك الجاهزية لاستقبالها، والرغبة

ويمكن حتى الجاهزية أهم من الرغبة، عشان كده بنلاقي نفسنا في مواقف كتير

نعرف فيها معلومات، ما تهمناش في حاجة

الوعي هو اللي بيخليك تقبل او تعترض

تحب او تكره

تمارس..أو تمتنع، ممكن تسمع بتقنية قوية جداً

لكن عشان ما عندكش الوعي الجاهز ليها

هتلاقي نفسك غير مهتم بيها

ده بارادايم؟ لأ

حتى البارادايم ممكن نجنبه، ونخليه معانا بالتحرر زي ما قولنا قبل كدة كتير

تقدر تعتبر الوعي..وعاء

وعاء، كل ما الوعاء اتسع..كل ما أخذ كمية اكبر من المعلومات

اذا كان عندك وعاء بمساحة 2 لتر

استحالة تستوعب جواه، 20 لتر..مش كدة ؟

أي حاجة هتحاول تدخلها جواه، بعد الـ2 لتر

هتقع عالأرض..مش هتستفيد بيها بحاجة..مش كدة ؟

هو ده الوعي بالظبط

طيب الوعي ده بكتسبه ازاي

من خلال الاطلاع، انك تسمع كورسات، دورات، تسجيلات، أمسيات، تقرأ حتى لو في حاجات مش مهتم بيها

حتى اذا انت "ملأت" الوعاء ده بحاجة انت مش عايزها

تقدر تفرغها بعد كدة، وتملأ الوعاء ده بأي حاجة انت عايزها بعد كده

المهم ان الوعاء..يكون "اتسع" بالفعل

جملة سمعتها قبل كده وحبيتها كتير جداً

When the student is ready..the teacher will appear

وانا حصلت معايا مرات كتير جداً

كمان الناس اللي حواليك في بيئتك

العائلة

المدرسة

الكلية

العمل

الأصدقاء

كل ده بيساهم بشكل كبير جداً في تشكيل وعيك

عشان كده ممكن تلاحظ ان اهل دولة معينة يتميزوا بشيء معين

زي ما حبيبنا النبي عليه الصلاة والسلام

خص مناطق معينة بصفات معينة

زي حديثه الجميل "الحكمة يمانية" عن حبايبنا أهل اليمن

انت الوقتي تعمل ايه ؟

تسمع تسجيلات وندوات وأمسيات على أد ما تقدر للحاجة اللي انت بتحبها

او حتى ما بتحبهاش

المهم انك تسمع

المهم انك تقرا

نسيت اقولك ان خلايا المخ..أُثبت في بحث علمي انها بتتمدد كل ما تطلع وتقرأ أكثر

عشان تستوعب كمية المعلومات دي

رغم اعتراضي على جزء في البحث ده، لأن في رأيي مركز الذاكرة أو تخزين المعلومات مش في المخ

رأيي ان المخ فقط "آداة توصيل" بين الجسد، وبين كيان تاني، الروح، ومش بس رأيي ده رأي علماء كتير في العالم كله

لكن بدون ما ندخل في الكلام ده ممكن نخليه في وقت تاني

الوقتي عايزك تطلع وتقرأ ولو حتى صفحة كل كام يوم

لو بعد ما خلصت قراءة المقالة دي

حسيت انك غير مهتم

!! يبقى لسه محتاج..شوية وعي

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

قانون الجذب

واحد…عشرة

November 26, 2012 — by فيصل عبد الواحد34

happy-o-meter-300x180.jpg

قانون الجذب - واحد...عشرة

المفروض اني اكلمك عن سيدونا والإدمان..مش كدة؟

زي ما اتفقت معاك المقالة اللي فاتت هنا

لكن لقيت ان المقالة دي نوعاً ما الوقتي أهم

..من حوالي 3 أيام

كتبت على صفحة أمير نفسك على الفيس

من 1 إلى 10

كم ترى درجة سعادتك الآن

ورغم ان نسبة السعادة كانت مرتفعة نوعاً ما عند حوالي 98% من الردود

لكن شوفت اني لازم اكتب المقالة دي

واللي كنت ناوي اكتبها من الأول، قبل ردود الأعضاء والمتابعين

تفتكر ليه طلبت منك، او من اللي رد

انك تجاوب على سؤال زي ده ؟

بريندن برشارد

مدرب، رجل أعمال، مسوق الكتروني، محفز شخصي، منوم بالايحاء، متحدث عام

راجل أكثر من جميل، كنت من سعداء الحظ اللي شافوله محاضرات وكورسات

كان دايماً، كل أسبوع يعمل محاضرات تنشيطية، عن النفس والتحفيز والـ"تريكات" النفسية

اللي تقدر تحولك من يائس لايجابي في ثواني قليلة

ومقابل اشتراك شهري قليل جداً - مقارنة مع اللي بيقدمه - بس ده مش موضوعنا

كان بيقول طريقة جميلة جداً، عشان تفوق نفسك لحظياً

يعني بأثر لحظي

وتطلع من الحالة "الخاملة" اللي انت ممكن تكون فيها

انك أولاً تعرف انك "تقدر" تعمل كدة

مجرد ما "تختار" انك تعمل كدة

يعني "تدرك" الحقيقة، انك تقدر بإذن الله تطلع من الحالة دي وقت ما تحب، ووقت ما تختار ان شاء الله

تاني خطوة..تسأل نفسك

من واحد لعشرة..أنا

Active

أد ايه الوقتي

انا نشيط، متحرك، حيوي، حاسس بطاقة ونشاط أد ايه؟

1، 2،3..؟

أربعة أو خمسة ؟

جميل

اذا كانت اجابتك - بصدق - حاجة من اللي فاتوا

قوم اقف وحرك جسمك بحيوية ونشاط

واختار انك تنشط نفسك

وتحس بالحيوية

نفس الحكاية دي

تقدر تعملها للفرحة

بس بشرط

تعرف انك مش لازم "تربط" سعادتك، بفعل خارجي

يعني مش لازم تسمع حاجة

او تشوف حاجة

او شخص يخليك تحس بحاجة

..تفرحك

انك تعرف، اذا كنت شايف انك عشان تفرح

..لازم سبب، أو حد "خارجي" يفرحك

تعرف انك ممكن تفرح

عشان تفرح

وعشان انت حابب تفرح

..ولمجرد انك

..اختارت تكون

فرحان

فكر مع نفسك كدة، أد ايه من عمرك ضيعته

وانت "فاكر" انك عشان تفرح

لازم حاجة تانية مالهاش دعوة بيك

او حد تاني غيرك تماما

! هو..اللي يفرحك

بعد ما توصل للحقيقة، انك تقدر تكون فرحان

عشان عايز تكون فرحان

..اسأل نفسك

انت..من واحد لعشرة

فرحان أد ايه ؟

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

قانون الجذب

وهم الإرادة

November 19, 2012 — by فيصل عبد الواحد38

willpower.jpg

قانون الجذب - وهم الإرادة

المقالة دي مش متعلقة أوي باللي احنا بنتكلم فيه بقالنا فترة

سواء التحرر او قانون الجذب بوجه عام

لكن ليها علاقة قوية بتحقيق الأهداف، وليها علاقة أقوى بالعقل الباطن

غير ان أكيد زي ما انت عارف، اذا كنت متابع جيد لأمير نفسك

اني من فترة لفترة

بحب أكسر مود التتابع

وأاتكلم عن حاجة مختلفة نوعاً ما

كتير قولت لنفسك

خلاص، مهما حصل مش هعمل كدة تاني

مهما حصل مش همسك سيجارة تاني

مهما كنت عايز أنام مش هنام عشان أذاكر

عشان أروح المعاد ده

مهما حصل مش هاكل تاني

وتحس جواك بحماس قوي جداً

وتقول خلاص انا حاسس فعلاً اني دي آخر مرة هعمل فيها كدة

تعدي ساعة

تعدي ساعتين

تلاتة

تحس بالجوع

تقول لأ

انا خدت قراري

مش هاكل

أربع ساعات

بعد خمس ساعات بتلاقي نفسك على صينية الأكل

في ايه ؟

انا ارادتي ضعيفة ؟

انا معنديش عزيمة ؟

لأ، انت اللي فاهم نفسك غلط

انت دخلت حرب خسرانة

ايه هي الحرب ،الحرب هي حرب ضد عقلك الباطن، وخاصة البارادايم

وخسرانة ليه، عشان بتحارب فيها نفسك، وزي ما قولنا قبل كده ان كل ما بتقاوم حاجة جواك، المقاومة دي بتزيد، لأنك ببساطة..بتقاوم نفسك، حاول تشوف كدة صورة ليك

وانت بتحارب نفسك، وتخيل ان كل ما قوتك تزودها، برده هتزيد في "نفسك التانية" اللي بتحاربك وبتقاومها

وده سر قوة سيدونا لكن خلي ده لمقالة تانية ان شاء الله

غير كدة..انك الجانب بتاعك

لا يمثل الا 5% بس، وبالكتير 10% من قوتك الاجمالية، على رأي أشد المتفائلين، لما كان بيتكلم عن تقسيم العقل الواعي واللاواعي

مقاومة البارادايم

صحيح ساعات بتحصل معجزات وتكسب حرب خسرانة، لكن نسبتها قليلة جداً

زي ما نسبة النجاح في مقاومة البارادايم هي 3% بس

اللي حصل ده ليه

عشان انت عندك وهم اسمه..الإرادة

عارف ان الكلام ده هيزعل ناس كتير

وناس كتير ممكن ما تقتنعش بيه

لكن زي ما بنقول دايماً المسألة مسألة وعي

لكن الإرادة..وهم كبير

ليه ؟

لأنك بتبدأها غلط

بتبدأها بقرار "منطقي"..وبتحارب بيهم

شعور داخلي

استحالة المنطق يهزم الشعور الا في حالات شبه منعدمة

وبتبقى هزيمة مؤقتة كمان في الحالات دي

عارف، لو كان المنطق بيهزم الشعور

كان كل المدخنين بطلوا يشربوا سجاير

كان كل اللي عندهم وزن زيادة، وعايزين يخسوا، ما كلوش

لأن طبيعة الجسم ان عند الاحتياج لغذاء، بتحول الوزن الزائد ده لطاقة عن طريق الكبد

وطالما انت عندك وزن زائد - وده أكيد والا ماكنتش عملت ريجيم - يبقى المنطق بيقول

! انك ما تاكلش

لو المنطق يهزم الشعور، لو العقل الواعي يهزم العقل اللاواعي

يبقى كانت البنت ما تقعش بسهولة لواحد مفيش فيه أي صفة "عقلانية" بتحبها او عايزاها أو قالت انها شرط أساسي في فتى احلامها

لمجرد انها..بتبقى "فرحانة" معاه

عارف امتى الارادة تتولد ؟

لما تيجي من داخل العقل الباطن

امتى..؟

لما تنبع من شعور

لما الأب يشوف ان ابنه تعب من التدخين

وحصله مرض صدري بسبب تدخين والده

والأب "يشعر" بالذنب

وقتها لو قدامه السجاير دي، من ذهب

مش هيقرب منها

وقتها لو كان بيموت عشان يشم دخان سيجارة

مش هيشرب

وقتها ممكن فعلاً يبدأ يتضايق من اللي بيشربوا سجاير

طيب ازاي؟ يعني لازم استنى موقف قاسي يحصل عشان أبطل حاجة عايز ابطلها

او اعمل حاجة عايز اعملها

! آه

أو انك تقرر ببساطة

انك ما تقاومش نفسك

وتتحرر بأي تقنية تحرر

من شعورك ناحية الحاجة دي

المهم

انك تلغي تماماً

حكاية..الإرادة

ان شاء الله المقالة الجاية

! هكلمك عن سيدونا..والإدمان

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

قانون الجذب

! خمسة

November 12, 2012 — by فيصل عبد الواحد56

-الجذب-خمسة.jpg

قانون الجذب - خمسة

من فترة مش صغيرة، كتبت مقالة

بعنوان

"خمسة..خمسة بس"

كانت عن اني عايز خمس أشخاص فقط يحضروا كورس تدريب قانون الجذب المكثف مجاناً

النهاردة المقالة بعنوان مشابهه

لكن مضمون مختلف جداً

النهاردة، في المقالة دي هتعرف حاجة يمكن كانت مستخبية عنك

ولما تفكر فيها وتقارنها بالواقع بتاعك

هتلاقيها حقيقية

كمان المقالة دي..بقولهالك النهاردة

عشان امهد للمقالة الجاية

اللي هتغير "وعيك" 180 درجة بإذن الله

لأن الناس طلبت مقالات أكتر عن الوعي

النهاردة ممكن ما اتكلمش معاك كتير

وهقولك جملة بسيطة

أنت دخلك الشهري كام ؟

حتى لو ما بتشتغلش

كمية الفلوس اللي بتحصلها في الشهر أد ايه ؟

...

...

جميل

الوقتي عايزك تشوف أقرب خمس أشخاص ليك

أصحاب

اخ

اخت

أب

أم

أصدقاء عمل

مش لازم أقرب خمس أشخاص يكونوا من نفس التصنيف

شوف أقرب خمس أشخاص ليك مين

جميل

دخل كل واحد فيهم الشهري ايه

حتى لو ما بيشتغلش

بيحصل في الشهر..كام ؟

..جميل

اجمعهم على بعض

واقسمهم على خمسة

لقيت ايه..؟

عارف الاحساس ده..جربته قبل كدة

لقيت ان الناتج، قريب جداً من دخلك الشهري..أنت

صح ؟

هو ده اللي عايز أقولك عليه

في احصائية من حوالي سنتين على ما أذكر

لقوا ان دخل أي شخص، يساوي متوسط دخل أقرب خمس أشخاص ليه

غريب جداً لما بقول لحد بيستشيرني في حاجة

انه لازم يقطع صلته بأصدقاء معينين عشان حياته تتغير بإذن الله

ويصمم أنه لا

! مالهمش دعوة

أضطر أثبتله الحقيقة دي

وأضطر أثبتله ان البيئة كمان متشابهه، لكن نسيب دي لمقالة تانية

انتوا عشان معتقداتكوا..تفكيركوا

أحاسيسكوا متشابهة

انجذبتوا لبعض

هقولك على حاجة تانية

ما حصلش ان كان ليك صاحب قريب منك أوي

أوي

أو صاحبة زي اختك

ومع الأيام..بعدت عنك ؟

وظروفكوا اختلفت، حد فيكوا نجح جداً

والتاني يادوب..عايش؟

وكلنا عايشين بفضل الله وحده

أكيد في..مش كدة؟

لما بدأ يغير في تفكيره

وانت لسه شخص سلبي

على فرض انك انت السلبي

ابتدت بفضل الله تنجذب الظروف

اللي تخليكوا تبعدوا عن بعض

عشان كدة واحد من أهم الحاجات الي لازم تعملها عشان تغير حياتك بفضل الله

انك "تكون" صداقات جديدة

تشوف الناس اللي انت عايز تبقى زيهم

سواء أغنياء

ناجحين

متزوجين

مديري شركات

وتبدأ بس..تشوف هما بيعملوا ايه

وتفكر زيهم

وما تفكرش هصاحبهم ازاي

فكر بس انك عايز كدة

وهتلاقي الظروف اتغيرت لصالحك بإذن الله

غريب اما تلاقي اصدقاء ليك، أو حتى أفراد من العائلة الكريمة

كنت قبل كده في محيطهم، مفيش أي مشاكل

لكن مجرد ما بتشوفهم رغم انك بتحبهم

لازم تحصل مشاكل وخناقات وخلافات

ليه ؟

لأن ببساطة

دي مش طاقتك

الوقتي..دي مش بيئتك

في تنافر بين طاقتك الايجابية الجميلة

وبين طاقتهم السلبية

مع العلم ان مفيش حاجة في علم الطاقة اسمها طاقة سلبية وايجابية

اللي بيدي الوصف ده للطاقة، هو حكمك عليها

لكن خلي دي لمقالة تانية برده

أستاذ ليا، اسمه ستيف جي جونز، قال لي مرة

الحياة، في انتقالك بين مراحلها

عاملة زي السفر من قرية لقرية

بتقعد في قرية فترة

وترتاح فيها

وتتعود على ناسها

ولما تحب تطور نفسك

لما تحب تروح لقرية تانية

القرية المجاورة ليها حتى

تلاقي نفسك مش عايز تمشي

وتقول لنفسك انا خلاص استقريت هنا

وعرفت الناس والناس عرفتني

وحبيت المكان

وتبدأ تلاقي المكان، وطاقته بتشدك

زي ما المرحلة اللي انت فيها..بتشدك

ولو كملت..هتلاقي الناس نفسهم بيقولولك ما تمشيش

زي ما لو كملت في الانتقال من مرحلة في حياتك لمرحلة تانية..هتلاقي حد بيقولك

مش وقته..لسه بدري عليك..أنت لسه صغير..

! أنت بتحلم

كمان وأنت في نص الطريق

ممكن تحس بالحنين للقرية القديمة

والناس القديمة

وتفكر تلف..وترجع

لكن تعرف..؟

القرية الجديدة، كمان فيها ناس طيبين

وفيها أماكن جميلة

وهترتاح فيها أكتر

المهم..أنك فعلاً، عايز تكمل الطريق ؟

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

قانون الجذب

اعتذار

November 10, 2012 — by فيصل عبد الواحد26

 

أعتذر عن التغيب وعدم المتابعة تلك الفترة للموقع او للصفحة

او الاستفسارات، نظراً لأنني في اجازة زواجي

تحياتي لكم جميعاً ووفقكم الله، ورزقكم بإذنه شريك الحياة

 

قانون الجذب

أنت واعي ؟

November 3, 2012 — by فيصل عبد الواحد58

cns.jpg

أختي..كلمتها عن حاجات بدربها في قانون الجذب

وبعض الأسرار اللي أعرفها

على هدف كانت بتاخد رأيي فيه

وبفضل الله بعدها بأيام اتحقق

ليا أخت تانية، يمكن كانت في وضع أكثر حاجة فيه

للمعلومات دي

بس ما قلتهاش

نفس الحكاية مع أخ ليا، لكن المشكلة هنا..أني ما عرفتش اتصرف صح

يعني ايه..أنا أناني؟

أو هل انا بحب أختي الأولى أكتر من أختي التانية، او أخويا؟

أكيد لأ

لكن في حالة أختي الأولى..لاحظت انها وصلت لدرجة وعي معينة

بفضل الله وحده

تسمحلها انها تفهم الكلام اللي هقوله وتطبقه وتحصل على نتائج بإذن الله

كنت من فترة بقولها معلومة بسيطة، ومعلومة بسيطة، ومعلومة بسيطة

عشان الوعي ده يتشكل

وتبقى قادرة انها تستفيد من المعلومات الكبيرة اللي عرفتها بعد كدة

وبفضل الله، عملت اللي هي عايزاه

أخويا..لاحظت انه محتاج المعلومات دي جداً

وعلى أد ما حاولت امنع نفسي ما أقولهاش ليه - وهنعرف ليه الوقتي - لكن كنت كل ما أشوفه

أقول مش مشكلة

انا هقوله

وللأسف - هنعرف ليه الوقتي برده - قلتله

النتيجة كانت انه..مفيش حاجة

لما بتوجه معلومات قيمة، وأسرار انت عارفها عن قانون الجذب

لشخص مش بالوعي المطلوب..اللي بيحصل انه بيقول لنفسه، ويقولك

ده كلام نظري

الكلام ده صعب التطبيق

حتى اذا ما قالش الكلام ده بلسانه

لكن بتشوفه في عينيه

وبتلاحظ بعد كده ان وضعه زي ما هو، يعني هو ما استفادش حاجة من الأسرار دي

مش دي المشكلة، ومش المشكلة انه قال كلام زي اللي فات

المشكلة..أن الوقتي الأسرار دي

عمرها ما هتجيب نتيجه معاه

لأنه خلاص وضعها في خانة المعتقدات الفاشلة

وكده..انا ظلمته

ظلمته بأني قلتله حقيقة من حقايق الكون االلي حواليه

كان المفروض أصبر لحد ما يوصل لدرجة وعي معين عشان يقدر يستخدمها

أختي التانية..لما لقيتها محتاجة الأسرار والمعلومات دي

وللعلم، منها أسرار ما دربتهاش لحد الوقتي

رفضت اني أقولها ليا

واكتفيت بأني أعرفها انها مش بالوعي الكافي

وضربت مثال بأختي الاولى، لما تمتعت بالوعي الكافي، وعرفت الأسرار دي

بفضل الله وحده وحمده، حققت اللي هي عايزاه

أنا بقولك كدة ليه..مش عشان أحكيلك قصة حياة أسرتي

لكن عشان أعرفك..

أن اه بالفعل في حاجات كتير ما بقولهاش في المقالات

لكن مش بُخلاً مني عليك

بالعكس، أنا بكتب معلومات وأسرار كتير جداً، منها الواضح ومنها بين السطور

وناس كتير بتلاحظها وتبعتلي تتأكد اذا كانت فهمت صح ولا غلط

لكن انا كده بحميك من نفسك..نسبة كبيرة جداً من اللي بيقرأ

ممكن ما يكونش وصل لدرجة الوعي المناسب

لتحمل أسرار معينة

قانون الجذب بحر كبير

مش بس انك تجذب أهداف، او تحقق أمنياتك

قانون الجذب أسرار ومعلومات وقصص ونظريات

وكل حاجة من دول أبواب وفصول

عشان كده، عشان الوعي

كورس زي طاقة الجذب - تدريب قانون الجذب المكثف - أنا مش بقول فيه الأسرار دي الا في الآخر

بعد ما أكون بفضل الله  قدرت أرفع وعيك في أول يومين بدرجة المتدرب بيلاحظها في ثالث يوم

المسألة مش مسألة أسرار ومعلومات..بس

المسألة مسألة..أنت مستعد ؟

عارف انك أكيد الوقتي هتقول اه مستعد

صدقني انا مستعد بس قولي السر ده ايه

قولي اجذب كذا ازاي في المدة دي عشان انا محتاج اعمل كده

والا الدنيا كلها هتنفجر

ومستقبلي هيضيع

لأ

أنا آسف

صدقني حتى لو كنت لسه بتفكر بالعقلية دي

يبقى انت مش مستعد

أنت مستعد تدفع في كورس عشان تتعلم ؟

آه..هنا بدأت الشكوك تطلع جواك

مش كدة ؟

أنا مش بعمل كده عشان أشجعك تحضر كورسات التدريبية على أمير نفسك

رغم ان ده شيئ مشروع

لكن انا بعمل كده عشان أشجعك ترفع وعيك

وصدقني لما ترفع وعيك، هتحصل أي حاجة تقربك للي انت عايزه بفضل الله

When the student is ready..the teacher will appear

عندما يكون الطالب مستعداً..سيظهر الأستاذ

عايز تعرف كمان انت مستعد للتغيير ولا لأ، وفعلاً تقدر توصل لدرجة الوعي دي ولا لأ؟

بالإضافة للسؤال السابق، تقدر تدفع في كورس عشان تتعلم ؟

وعايز أقولك اذا انت عايز، هتعرف، بغض النظر عن معاك أو مش معاك

لكن في سؤال تاني..ايه أكتر حاجة بتحبها في حياتك

حاجة دنيوية طبعاً..

تقدر..تستغنى عنها لمدة شهر أو شهرين أو تلاتة، عشان تتعلم ؟

خليك صريح مع نفسك

وجاوب السؤالين دول

وشوف..أنت واعي ؟

 

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

قانون الجذب

المسلّمات والبارادايم 2

October 28, 2012 — by فيصل عبد الواحد41

certainity-.jpg

كنت نايم

صحيت من النوم عشان عطشان

قومت من السرير

روحت تشرب

شربت

..الحمد لله

لاحظت ايه ؟

..لسه

اختارت هدف

حددته..فكرت فيه

عملت المعايشة

ركزت عليه

عملت التوكيدات

لاحظت ايه ؟

لسه برده ؟

في أول حاجة..لما عطشت وروحت تشرب

طبعاً كله بإذن الله وفضله وحوله وقوته، ولا نتحرك ولا نحيا ولا نقوم الا ببركة وفضل وحول وقوة، الحي القيوم

هل فكرت " انا هوصل للتلاجة" ؟

لأ

طب هل قعدت تقول لنفسك

انا هوصل للتلاجة، أنا هوصل للتلاجة

انا هشرب..انا هشرب

لأ

طب هل مثلاً جربت توكيدات عشان توصل للتلاجة عشان تشرب؟

أنا شخص مرتوي - غير عطشان يعني

!! انا ذهبت للتلاجة

!! الآن أنا أشعر بالارتواء

لأ..

ومع ذلك..بفضل الله واذنه، وصلت للتلاجة وشربت

تمام ؟

لكن ليه لما حددت هدفك، وعملت التوكيدات

والمعايشة

وكل حاجة تعرفها

نسبة كبيرة أوي

ما حققتش الهدف، ليه ؟

لأ

مش بس عشان درجة اليقين

رغم ان دي مش الاجابة

الاجابة حاجتين

أول حاجة عشان انت جواك..مش في مرحلة اليقين

انت في مرحلة "الطبيعية" اللي هوا، عادي

ما بتفكرش اصلاً انت هتقدر تروح التلاجة ولا لأ

ماجاتش في بالك الفكرة دي

فبالتالي..ما تسربش الشك

دي درجة أعلى من اليقين

تاني سبب..عشان انت جواك مفيش أي معتقد سلبي

او برمجة داخلية

ضد انك تروح التلاجة تشرب

بعكس الأهداف اللي بتبقى عايز تجذبها

في الجزء اللي فات من مقالة "المسلّمات والبارادايم" اتكلمنا عن مقدمة المقالة دي

انك ممكن تستغنى عن الحفظ والذاكرة

اذا عاملت المعلومات والأشياء

على أنها مسلمات

على انك "تعرفها" مش تحفظها

فاكر ؟

نفس الحكاية هنا..مع الأهداف

اذا قدرت توصل للمرحلة دي، هتحققها بنفس السهولة ان شاء الله

توصل إزاي؟

هقولك على حاجة

اذا اصلاً خدت الحكاية، وفعلاً عرفت الحقيقة، انها مجرد 1+1=2

وصدقتها كدة - لأن دي الحقيقة

هتبقى معاك سهلة

ومش هتحتاج الحل اللي هقولك عليه الوقتي

هتاخد أي هدف كأنه من المسلّمات..وهتبقى معاك حاجة عادية جداً بإذن الله

اما اذا ماكنتش قدرت توصل للمرحلة دي - وده شيء اتفهمه تماماً - ومش معناه انك أقل ذكاءاً من أي حد

يعني بس انك ممكن تكون مريت بتجارب سلبية زيادة

تقدر تروح للحل السحري

التحرر

وقريب ان شاء الله، هتوسع جداً معاك في تقنيات التحرر

عشان ما أجبركش على سيدونا وحرق المعتقدات، رغم معرفتي الثابتة بفضل الله

بقوة وفاعلية سيدونا، سواء عن تجاربي الشخصية، أو تجارب اللي جربوها بعد ما عرفوا يستخدموها ازاي

لمتابعتي على الفيس بوك

لمتابعتي على تويتر

لصفحة أمير نفسك على الفيس بوك

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close