main

قانون الجذب

حرق المعتقدات

April 28, 2012 — by فيصل عبد الواحد74

papel-calcinado-25761277746402Jjha.jpg
قانون الجذب - حرق المعتقدات
قانون الجذب - حرق المعتقدات

اتكلمت عن حرق المعتقدات كتير جداً

في أكتر من مناسبة، وأكتر من مقالة، ومع أكتر من شخص

لكن مع ذلك لسه في ناس بتسأل عنها أو مش فاهمة يعني ايه حرق المعتقدات

وعشان احنا هنحتاجها ان شاء الله المقالة الجاية - مقالة الخلاصة

شوفت انه مهم اعملها مقالة خاصة بيها، تقدر ترجع ليها في أي وقت

حرق المعتقدات ببساطة انك بتجيب ورقة - أو كمية أوراق

وتجيب قلم - مش كمية أقلام - قلم واحد كفاية وتبدأ تكتب كل حاجة بتضايقك

بالظبط، كل حاجة بتضايقك

كل حاجة بتزعلك

عشان ما تتوهش، حدد مثلاً حاجة واحدة مضايقاك واكتب عنها كل شيء متعلق بيها، بس مش مجرد كتابة

عيش الكلام اللي بتكتبه، لو الكلام ذكريات، عيش كل ذكرى كإنها بتحصل تاني

شوف كل كلمة بتكتبها، بص على كل حاجة حصلت

اسمع كل صوت فاكر انه حصل

حس بكل احساس حسيته وقت الحاجة اللي زعلتك أوي وأثرت فيك، حصلت

خيانة ؟

زعل..؟

حزن..؟

فقر؟ فشل ؟ استغلال؟

..

موت ؟

اكتب كل حاجة وعيشها كإنها بتحصل تاني

انا عارف انك مستغرب من اللي بتقراه، لكن خليك معايا للآخر، اكتب كل حاجة فاكرها متعلقة بالشيء ده واكتب كل تفاصيلها الي فاكرها

وعيش كل حاجة كإنها بتحصل قدامك فعلاً الوقتي

عيشها بكل حاجة فيك

واكتب تفاصيل على أد ما تقدر

!! ناس كتير وهي بتعمل الحكاية دي عيطت..وده ممتاز

هتعرف ليه بس مش الوقتي

الوقتي..عايزك تمسك الورقة دي - أو كمية الورق - بإيدك

بصلها كويس

ركز فيها

قطعها

ولما تخلص تقطيع

احرقها

وبصلها كويس أوي وهي بتتحرق

ياريت..ياريت تقوم تعمل كده الوقتي وتيجي، انا مستنيك ما تقلقش

مش هروح في أي حتة

يلا، قوم خد وقتك، احرق سلبياتك، وتعالى

حتى عشان اقولك عملنا كده ليه، والخطوة اللي جاية ايه

...

الوقتي بعد ما انت المفروض انك عملت الخطوة دي

حاجة من الاتنين، يا حسيت بارتياح كبير أوي الحمد لله

وان في حاجة اتشالت من جواك

أو حسيت باكتئاب وحزن

وفي الحالتين، أنصحك تعمل الخطوة دي

اللي هي عكس الخطوة اللي فاتت تماماً، الوقتي هات ورقة جديدة

وابدأ اكتب مشهد من حياتك متحقق فيه اهدافك كلها

اكتب مشهد بكل تفاصيله

وعيش كل حاجة حلوة فيه

كل حاجة حلوة بس

اضحك وانت بتكتب حاجة تفرح

حس بالراحة وانت بتوصف ازاي الحياة جميلة ومريحة وهدفك "...ده موجود

اوصف كل حاجة، واسمع كل صوت، وشوف كل مشهد

وحس كل احساس

كإن أهدافك دي موجودة فعلاً، وانت بتوصف حياتك بيها

اعمل كده بكل التفاصيل اللي تقدر عليها

ياريت برده تقوم تعمل كده، وتيجي

انا برده هستناك ما تقلقش

..

حرق المعتقدات بالظبط زي الجرح الملوث

اللي لازم "يتنضف" كويس جداً

قبل ما يبدأ يلتئم

وإلا، لو التئم - أو بالمصري لم - وهو فيه الملوثات دي، ممكن يعمل مشاكل جامدة بعد كده

ورغم ان عملية التنضيف أو التطهير بتوجع وبتسبب ألم كبير

لكن مهمة، وما ينفعش ما نعملهاش

عشان الجرح يلتئم كويس، وما يحصلش مشاكل بعد كده ان شاء الله

نفس المفهوم، ونفس المنطق

أي حاجة سلبية جواك لو سيبتها من غير ما تعالجها

ممكن يتهيألك انها راحت أو نسيتها

لكن وقت ما تحصل أي مشكلة، هتفتكر كل السلبي اللي جواك

وفجأة ممكن تلاقي الدنيا قفلت في وشك

او اتخنقت فجأة

او اتعصبت على حاجة تافهه جداً

سمعت مثل "القشة التي قسمت ظهر البعير" ؟

أيوة بالظبط..هو عشان كدة

أنصحك تكرر حرق المعتقدات عند الحاجة، لو حسيت ان في حاجة خانقاك او مضايقاك

وصدقني ان شاء الله، هتفرق معاك جداً جداً، حتى لو مش عايز تزرع بعدها حاجة ايجابية

بالتوفيق ان شاء الله، وأشوفك المقالة الجاية - الخلاصة

قانون الجذب

مفتاح قانون الجذب

April 22, 2012 — by فيصل عبد الواحد83

img-thing.jpg

اتكلمنا كتير عن قانون الجذب، ما بين أخطاء

تقنيات

مفاهيم

طرق..أصول و طرق تدريب

اتكلمنا كتير عشان نوضح كل حاجة عن قانون الجذب

زي ما كنت بقول دايماً لو كنت متابع الموقع من أوله، هدفي في كتاباتي او تدريبي أني أعرفك وأعرف كل الناس

ان قانون الجذب سهل

ومش بالصعوبة أبداً اللي ممكن تكون قرأتها عنه

مش بالصعوبة أبداً انك لازم تعمل جلسات استرخاء مكثفة ولازم تعمل تمرين معين لو نسيت تعمله قبل ما يخلص في اليوم يبقى تعيده من الأول

قانون الجذب مش كدة

قانون الجذب مش قانون بشري

قانون الجذب طاقة، قانون الجذب استقرار وسعادة واتزان نفسي

قانون الجذب، أو الجذب زي ما بحب أقوله، سهل جداً، أسهل مما تتخيل

والدليل على انه سهل جداً،

!! انه كان دايماً شغال ضدك، برغبتك، من غير ما تعرف

زي ما انت قرأت قبل كده، مفيش حاجة اسمها قانون جذب ما اشتغلش، يا إما اشتغل لصالحك، يا إما اشتغل ضدك

وفي الحالتين، بيكون عليك جانب من المسئولية

عشان ما أطولش عليك، في ناس كتير انتظرت المقالة دي

المقالة الي هربط فيها بين اللي قلناه في معاك ورقة و قلم، واللي شرحناه ووضحناه في معاك ورقة وقلم 2

اتكلمنا فيهم عن الكتابة وأهميتها و علاقتها بالنصف الأيمن والأيسر للمخ

اتكلمت معاك فيها عن حاجات كتير

والنهاردة، الجزء قبل الأخير في السلسلة دي

الجزء الأخير ان شاء الله هيكون بعنوان الخلاصة، اللي هقولك بعد ما تكون قرأت وفهمت كل اللي قلتهولك ان شاء الله

الطريقة المثالية، اللي في صورة خطوات اللي تقدر تستخدمها في أي حاجة بعد كدة ان شاء الله

وممكن ما تدخلش الموقع تاني بعد كده - بس اوعى تعمل كدة

النهاردة هكلمك عن مفتاح قانون الجذب

ندخل في الموضوع على طول، مفتاح قانون الجذب

3 حاجات

أول حاجة 

الفكرة

ان يكون عندك اختيار لهدف أو لشيء، وتركز عليه، هي دي الفكرة، قوة الفكرة قوة جبارة ما أقدرش أقولها في مقالة او اتنين او عشرة، لكن صدقني أول خطوة في طريق نجاح قانون الجذب بإذن الله، هي الفكرة، قوة فكرتك قوة رهيبة، مجرد انك تختار شيء وتركز عليه تفكيرك يبقى تمكنت من أول جزء من مفتاح قانون الجذب

اللي بيدعم الفكرة هو الرغبة فيها، اللي بيدعم التفكير في أمنية معينة، هو الرغبة الجامحة فيها، واللي بتخليك دايماً فاكرها، اللي بتخليك كل ما تكون عايز ترتاح من التعب، تفتكر الرغبة الحارقة جداً اللي جواك، وتديك القدرة والنشاط تاني على انك تشتغل، زي ما بيقولوا الحلم مش اللي بتشوفه و أنت نايم، الحلم هو اللي بيخليك ما تعرفش تنام

يبقى أول حاجة يكون عندك فكرة قوية جداً على هدف أو أمنية ما، وتركز عليها جداً وتدعمها برغبتك فيها، خليك عايزها أوي، ومن الحاجات اللي لقيتها بتساعد جداً في تقوية الرغبة، هي الحب، لو الهدف اللي اختارته عايزه أوي، وفي نفس الوقت بتحبه، هيساعدك كتير جداً على التركيز على الفكرة

كل ما تركيزك زاد على الفكرة دي كل ما هتلاقي تطورات أكتر وأحداث وحتى أشخاص انجذبت ليك تساعدك في تحقيق فكرتك دي، عن تجارب شخصية، والمرة دي انا اللي بقولك

على اد ما تقدر، خليك فاكر الفكرة دي ومركز عليها، ما تنساهاش، ممكن هتلاقي مقاومة الاول خصوصاً ان العقل الدافع شائع أكتر من الجاذب، لكن بعد كده النتائج اللي في الآخر تستحق، كفاية انك هتمتلك عقل، كل ما تركزه على حاجة بإذن الله وفضله، هتقربلك

ركز، ارغب، حب، اجمع التلاتة دول في حاجة واحدة، ويبقى ده أول جزء من مفتاح قانون الجذب

تاني حاجة في مفتاح قانون الجذب، او تاني تركيب، أو تاني جزء، المهم انه التاني وخلاص، الإيمان

الإيمان ؟

الإيمان ان الحاجة اللي انت عايزها هتحصل فعلاً بإذن الله، وفي الوقت اللي انت حددته في الورقة، وأن المرحلة اللي انت فيها دي - ودي حقيقة - مرحلة انتظار و اعداد، انت مؤمن جداً ان الهدف هيتحقق بإذن الله في التاريخ ده بالظبط، ان ماكنش قبل كده

وهنا عايز أكلمك عن نقطتين، أول حاجة نقطة قانون الجذب نفسه، قانون الجذب قانون كوني، يعني ايه؟

يعني ما ينفعش تبصله من زاويتك انت وانت بتفكر في مدى سهولة أو صعوبة تحقيق الهدف، زي مثال دايماً بحب أقوله

أب وعد ابنه الصغير - 7 سنين - انه هيشتريله لابتوب في عيد ميلاده، بالنسبة للطفل الصغير لابتوب ده هدف كبير جداً ، وصعب يعمله لواحده ان ماكنش مستحيل، لا يمتلك المقومات لا المادية ولا المعرفية، ولا يعرف هيشتريه منين ولا ازاي ولا هيجيبه البيت في ايه ولا يعرف أي حاجة، بالنسبة ليه، للطفل، اللاب هدف مستحيل

على عكس الأب، لابتوب هدف سهل جداً، ممكن يجيبه بتليفون صغير هيعمله وفي نفس اليوم

مع اختلاف الفارق طبعاً، بس عايزك تعرف دايماً انك لما بتستعصب الهدف يبقى بتبص ليه من زاويتك انت بس، ونسيت انك بتطلب من اللي أقوى مني و منك ومن أي حد، ومن الكون نفسه

رب الكون، خلي يقينك فيه كبير، كون انك تشك في ان الهدف ده يتحقق في الوقت ده يبقى سلبيتك، من غير ما تعرف، بتخليك تشك في قدرة ربنا والعياذ بالله، ربنا بيحبك، واليقين بالله أقوى من أي حاجة تانية، وكلنا عارفين قصص الصحابة ويقينهم بالله

تاني نقطة، الشك لما يبدأ يجيلك، خصوصاً عن طريق الصوت الداخلي، اللي ممكن يكون بيضايقك في حاجات كتير، المشكلة ان دايماً الناس شايفه ان الصوت ده هو الآمر الناهي

اللي يقوله لازم يبقى صح، ولازم يحصل، لو جربت مرة تبصله، مش تسمعله، لو جربت مرة تشوف الصوت ده على انه مثلاً، رأي زي أي رأي ممكن تسمعه من أي حد من صحابك أو عيلتك، وانت حر تصدقه أو ما تصدقوش، وان كلامه مش وحي منزل لازم يتحقق، هترتاح كتير، اتحكم انت في الصوت ده مش هو اللي يتحكم فيك، بصله على انه مجرد رأي زي أي رأي ممكن تسمعه،

وفي حاجة جميلة أوي هتساعدك في الحكاية دي، كل ما الصوت ده يقولك حاجة سلبية، مثلاً زي : عمرك ما هتعمل كده، الموضوع هيبوظ، هتفشل..الكلام ده كله

كل ما الصوت ده يقولك حاجة كدة، اضحك ضحكة استهزاء بسيطة، ضحكة حقيقية مش داخلية، ضحكة استهزاء بسيطة كدة تحمل كل معاني الاستهزاء

خلي عندك إيمان دايماً انك ان شاء الله عشان انت عايز كدة، في الوقت ده، يبقى بإذن الله تعالى، هيحصل كدة، في الوقت ده

تالت وآخر جزء في المفتاح الطويل أوي ده، هو الطبيعة

يعني ايه الطبيعة ؟

في شعورك في التعامل مع الهدف، في 3 أنواع

التأكيد..أنا متأكد ان الهدف ده هيحصل ان شاء الله

الثقة..أنا واثق ان الهدف ده هيحصل ان شاء الله

الطبيعة..

أنا عارف ان الهدف ده هيحصل ان شاء الله، عشان ده الطبيعي

يعني ايه ؟

!!يعني طبيعي انه يحصل

أيوة يعني ايه برده؟ يعني كدة كدة بإذن الله، العادي والطبيعي ان اللي انا عايزه هيحصل

!!عشان دي الطبيعة اصلاً

لو قدرت توصل للاحساس ده

يبقى تبدأ من دلوقتي تحجز مكان في قسم قصص النجاح هنا عالسايت

بس عشان تتمكن من الاحساس ده جداً، لازم الأول تكون قدرت تتعامل مع الجزئين اللي فاتوا، الفكرة والإيمان

!!وقتها هتلاقي الطبيعة بقت حاجة طبيعية

طبيعي، مش كدة ؟

كده انت عرفت قانون الجذب، بس في حاجة عايز انصحك بيها، اعتبرها حاجة تحط فيها المفتاح تحافظ عليه

هي انك ما تقولش لحد على أهدافك، خصوصاً خصوصاً، لو كنت لسه في بداية معرفتك بقانون الجذب، اتكلمنا عن الحكاية دي قبل كده بالتفصيل، لكن المهم

ما تقولش لأي حد، حتى أقرب الناس ليك عن أهدافك

كدة خلصنا المفتاح، وان شاء الله اشوفك المقالة الجاية - الخلاصة

بالتوفيق ان شاء الله

قانون الجذب

!! مفاجأة – عايزك تساعدني في كورس قانون الجذب الجديد

April 13, 2012 — by فيصل عبد الواحد40

thank-you.jpg

المقالة دي استثنائية، ماكنش محطوطلها جدول زمني، لأنها بتقطع الجدول الزمني الخاص بسلسلة مقالات "ورقة وقلم" لكن عشان هي مهمة

حطيتها ليك

انا مش هتكلم عن معلومات جديدة في المقالة دي

انا بس هقولك

اني عايزك تساعدني

بالظبط زي ما مكتوب في العنوان، ما حبتش أكتب "ساعدني" وأسيب التفاصيل للموضوع

حبيت أوضح كل حاجة في العنوان

انا عايز مساعدتك في الكورس الجديد لقانون الجذب اللي هعمله

هيبقى ان شاء الله كورس كامل شامل - والكمال لله وحده - عن كل ما يتعلق بقانون الجذب

من أول يعني ايه عقل واعي و عقل باطن

والمعايشة

والمعتقدات السلبية

وتحقيق الأهداف

والبرمجة اللغوية العصبية

والتنويم الإيحائي

وكل حاجة متعلقة بقانون الجذب من الـ أ إلى الـ ي، كل حاجة بمعنى كل حاجة، بتمنى انك تفضي نفسك لمدة كبيرة بعد ما تاخد الكورس عشان هيكون كبير جداً، انا مش هوقف خدمة الأبلود الغير محدود - ستريمر - من فودافون عشان أقدر أرفع محتويات الكورس

بوجه عام، ده الجزء الأول من الكورس، الجزء التاني من الكورس

هيكون استخدام كل ده - بشكل عملي - لجذب أهداف مخصصة

المال

الزواج

العمل

كمان هتكلم عن أنواع المعادلات الخاصة بيا، الكتابية، والتخاطر، واحتمال - مش أكيد - أتكلم عن المعادلة الأصلية

اللي عايز مساعدتك فيه، انك تقولي مشكلتك، تقولي اقتراحاتك، تقولي أي شيء تحب تضيفه للمنتج - الصوتي بالمناسبة مش هيكون مجرد كتب مملة تقراها وبعض المفاهيم لو احتاجت ممكن تكون مرئية كمان بإذن الله

قولي مشاكلك ايه، أو المشاكل العامة الي بتقابلك ايه عشان أقدر أحطلها حل ، انا عايز المنتج ده يكون مناسب لأكبر عدد ممكن من الناس، عايز كل اللي يشتريه يستفيد بيه لأقصى درجة ممكنة، مش عايز أسيب حاجة متعلقة بقانون الجذب ما أتكلمش فيها

عايز أديك كل اللي عندي

لو مشاركتك قصة نجاح، ابعتهالي، وهكتبها وهحط اسمك معاها

لو مشاركتك شهادة أو تقدير للموقع أو ليا، او انت استفدت من الموقع ولا لأ، ابعتهالي وبرده هحطها في المنتج وهحط اسمك - وصورتك معاها لو تحب

لو مشاركتك مشكلة أو كمية مشاكل - ياريت ياريت تبعتها عشان اقدر احطلها الحل اللي يخليك، ويخلي ناس كتير بتشاركك نفس المشكلة، يتغلبوا عليها ويحققوا كل اللي هما عايزينه ان شاء الله

ابعتلي أي حاجة من دول، او ابعتلي رأيك أو مقترحك، أي شيء تقدر تساعدني بيه عشان المنتج يكون أقرب ما يكون لفايدتك وفايدة الناس، ابعتهولي

لو تحب تشارك بيها هنا اوك

لو تحب تبعتهالي بشكل شخصي - وده يكون أحسن - ابعتهالي على

personal@amirnafsak.com

وابعت كل البيانات الخاصة بيها

مستني مشاركتك ان شاء الله

قانون الجذب

Generalization – التعميم في قانون الجذب

March 26, 2012 — by فيصل عبد الواحد10

nlp-man-from-web.jpg
قانون الجذب والتعميم
قانون الجذب والتعميم

إزيك عامل ايه، كلمتك عن البارادايم، والكلام لسه ما خلصش ولا عمره هيخلص، انا لسه عايز كمان اعمل مقالتين او تلاتة عن البارادايم ان شاء الله عشان ألملك كل الي أعرفه عنه بإذن الله

لكن النهاردة حبيت اكلمك عن حاجة تانية، انا شخصياً بتسأل عنها كتير

وأنا بدرس البرمجة اللغوية العصبية، اتعلمت ان في دايماً "أبروتش"

Approach

الإنسان بيستخدمه في كل حياته،،وهو التعميم، يعني ايه التعميم

يعني ايه التعميم، وعلاقته ايه بقانون الجذب؟

التعميم ببساطة لما انت تقوم من النوم متأخر عشان تروح مشوار مهم، عشان راحت عليك نومة، تقول يووه، هو أنا كدة، كل ما أروح أقابل الشخص ده يحصلي كدة

انا كل ما أعمل كذا يحصل كذا

انا دايماً الناس تعاملني وحش

انت دايماً ظالمني

انت دايماً تفهمني غلط

نظرية التعميم نظرية خطيرة جداً جداً، واتعلمنا كمية أسألة بالذات عشان نكسر الحتة دي عند المريض في جلسة البرمجة اللغوية العصبية، واتعلمنا ازاي نقولها، وايه الكلام الي نضغط عليه وايه الكلام الي تعلي صوتك فيه..وحاجات كتير هتتعلمها لو درست البرمجة اللغوية العصبية

لكن النظرية دي خطيرة ليه..عشان أصلاً..هي مرتبطة بقانون الجذب

لو الشخص ده، مركز ان الناس دايماً وحشة معاه، الناس فعلاً دايماً هتبقى وحشة معاه

في رأيك..الزوجين اللي بيتخانقوا دايماً عشان نفس السبب

هي : ما بقاش حنين زي الأول بقى بيتعصب على أقل حاجة، كل ما اكلمه يتعصب عليا

!! هو: بقت دايماً تشوف الي يعصبني وتعمله، قلتلها 100 مرة ما تعمليش "..." وبتعمله برده، كل مرة كدة يعني

! تعميم

التعميم بيجذبلك أكتر من الي انت بتعممه، حتى لو الي انت شايفه ده حقيقه، عشان كده من الاتجاهات السائدة جداً في قانون الجذب، انك تقول لعقلك الباطن على حاجة بتحصل، وهي ما بتحصلش، اللي ببساطة انك تقول انا غني انا معايا فلوس كتير..أنا أنا انا

التعميم بيعمل عندك معتقدات، قانون الجذب بياخدها يشتغل بيها

لأن زي ما قولنا قبل كدة، المعتقدات هي اللي بتأثر على قانون الجذب، مش العكس

هقولك حاجة جميلة جداً ممكن ما تصدقهاش، لكن صدقها عشان انا شخصياً شوفتها

جو فيتالي، أحد عمالقة قانون الجذب في العالم، مؤمن انك لازم تنسى الحاجة عشان تنجذبلك، وشايف انك لو فضلت تفكر فيها عمرها ما هتجيلك

وناجح جداً بالاتجاه ده، ومن أغنى الناس في العالم، الحقيقة جو واحد من الناس الي عنده أغلى تجميعه لأغلى السيارات وأندرها في العالم

بوب بروكتور، أحد عمالقة قانون الجذب في العالم، أستاذ جو فيتالي، شايف انك لازم تفضل فاكر الحاجة الي انت عايزها عشان تنجذب ليك، وشايف انك لو ما عملتش كدة مش هتجذبها ليك، وناجح جداً بالاتجاه ده، ومن أغنى الناس في العالم، بوب من القلة في العالم الي عامل سيستم لجذب الأموال بقانون الجذب - لمدة شهر تقريباً - ونتايج نجاحه 100% يعني كل الي اتدربوا عليه جذبواً فعلاً النتيجة الي كانوا عايزنها

!! طب إزاي

الاتنين ماشيين بمبدأين عكس بعض

والاتنين ناجحين جداً جداً جداً بقانون الجذب، سواء مع نفسهم، او في تدريسه للناس

والاتنين أصدقاء جداً، بالمناسبة مفيش حد فيهم عيب على التاني ولا قال ده ما بيفهمش ولا بيقول ولا بيقول، أتخيل الموقف ده لو كان عندنا في مصر أو أي دولة عربية، كان ممكن نشوف الاتنين في قضايا سب وقذف..المهم

كل واحد في الاتنين دول عنده معتقد، عايش بيه، وشغال بيه

وناجح معاه جداً، وناجح مع كل واحد بيدربه عليه كمان

ده عشان ايه

عشان قانون الجذب مش اختراع عشان يحكمه قوانين

قانون الجذب، أو الجذب عشان نكون صح، طاقة، لا تحكمها قوانين البشر

كل الي بتعمله انك بتوجه الطاقة دي بترسانة المعتقدات الي بتتراكم عندك

فشوف انت ترسانة المعتقدات بتاعك بتتكون من معتقدات ايه، شيل المعتقدات السلبية، وسيب المعتقدات الإيجابية، أو المحايدة، أهم حاجة ما تكونش معتقدات تضرك

انا مكتوبلي اعيش كدة

احنا هنفضل في الفقر ده طول عمرنا

الأغنياء يدخلون النار

عشان اعمل مليون جنيه محتاج 10 سنين

عيش عيشة أهلك

احنا عايزين نعيش ونمشي جمب الحيط

راحة البال في الفقر

...

القايمة كبيرة، وما تستحقش مني اني أكتب عنها اكتر من كدة

أتمنى ان الموضوع يكون عجبك ان شاء الله

وأشوفك الموضوع الجاي

قانون الجذب

المختصر المفيد – الجزء الثالث

July 30, 2011 — by فيصل عبد الواحد17

dreams.jpg

المختصر المفيد - قانون الجذب

قانون الجذب

قانون الجذب

الجزء الثالث من سلسلة المختصر المفيد.

كلمتك الجزء اللي فات عن المختصر المفيد في جذب المال بإذن الله..

واتكلمنا ازاي جذب المال من أسهل ما يكون، في الحديث عن قانون الجذب، ان لم يمكن الأسهل على الاطلاق..

لإن باختصار جداً، كل الي عليك انك – تسمح – للفلوس انها تجيلك..

يعني انك ما تفكرش فيها، وما تفكرش ايه الشغل الي ممكن يجيبلك فلوس..

اعمل اكتر الحاجات الي انت بتحبها، والفلوس – على ضمانتي بإذن الله – هتجيلك لواحدها..

لكن محتاج أكلمك أكثر عن حاجة اسمها الـ Inspired Action..

عشان ناس كتير جداً فاكرة ان قانون الجذب ده، يعني انك تقعد في البيت، وهتلاقي تاني يوم شنطة فلوس، أو عقد عمل، او عربية قدام باب البيت..

رغم ان الكلام ده مهم – في جزء المعايشة – انك تتخيل وتعيش وتحس وتفرح بكل ده كإنه موجود فعلاً..

لكن خليني اسألك سؤال..

لو انت ماشي، لقيت 100 جنيه واقعة في الشارع..

محتاج تعمل ايه عشان تاخدها..؟

بالظبط، تنزل تجيبها..

لأ.. مش هي دي الـ Inspired Action .. دي الAction العادية..اللي أي حد تاني سواء عارف قانون الجذب أو مش عارفه ممكن يعملها..

لكن الـ Inspired Action  هنا.. هي انك قررت فجأة انك تمشي في الشارع ده..

أو اختارت فجأة انك تمشي تبص في الأرض..

أو لمحت مطعم أو كافيه في آخر الشارع، حاجة جواك قالتلك..

ما تيجي نجرب المطعم ده..

هي دي الـ Inspired Action ..

وهي دي، اللي استخدام قانون الجذب، بواسطة عقلك الباطن..

بيخليك تعملها..

دي فكرة الـ Inspired Action

قانون الجذب مش معناه انك توقف في حياتك..وتقعد في بيتك تنقطع عن كل الناس..

بالعكس..

لكن لما تستخدم قانون الجذب زي ما اتكلمنا عنه قبل كده..

وعيشت حياتك عادي..

هتلاقي الفرص كلها بتقربلك

هتلاقي صوت جواك بيقولك تعمل حاجات غريبة عليك..

هتلاقي نفسك عايز تعمل حاجات جديدة..

لما تعملها..

هي دي الـ Inspired Action ..

يعني لحد ما تاخد الInspired Action  دي.. هيبقى كل دور قانون الجذب، انه يجذبلك كل الفرص وكل الأهداف الي انت عايزها..

ويخليها قريبة منك جداً..

في انتظارك، انك تمد ايدك تاخدها..

مش عايز خلاص..

وعلى فكرة مش معنى انك مش عايز ان ده غلط..

انا شخصياً كتير – في أول معرفتي بقانون الجذب - بفضل الله جذبت أهداف ليا، ولما قربت وكنت على بعد مكالمة تليفون واحدة..جاتلي حاجات أحسن..فمعملتش الـ Inspired Action  دي..

ودي نفسها مشكلة..تغيير الطلبات والأمنيات كتير، دي مشكلة – أو تحدي زي ما اتفقنا - ..

تخيل نفسك قاعد في كافيه..

طلبت عصير برتقان..

وبعد دقيقتين..

ندهت للجرسون قلتله لأ..معلش..

أنا عايز ليمون..

وبعد دقيقتين..

لأ معلش أنا آسف، بس هاتلي برتقان..

وبعد دقيقتين..معلش طب بص، هاتلي مانجة..أنا عايز مانجة خلاص..

وبعد خمس دقايق، قومت زعقت قولت يوووووه..

هو الي انا بطلبه ما بيجيش ليه !!!

وسيبت الكافيه كله وخرجت..، وقولت مش هدخل المكان ده تاني..

بالظبط..نفس المبدأ بالنسبة لكثرة تغيير الأهداف في قانون الجذب..

وفي الآخر بتقول يووووه..قانون الجذب ده وهم..

انا خلاص هنسى كل الكلام ده..

الكلام ده على كل حاجة..

على الشفاء..

على المال..

وعلى انقاص الوزن..

الي هكلمك عنه ان شاء الله، الجزء ده..

المختصر المفيد في انقاص الوزن..ثالث التحديات الي الناس عايزة تستخدم فيها قانون الجذب، انك أولاً:

1-    تشيل من جواك أي معتقد سلبي زي الي اتكلمت عنهم قبل كده في مقالة السر الجزء الأول، بس هنا لازم تاخد بالك من حاجة مهمة..

مش كل المعتقدات السلبية مرتبطة بإعاقة انقاص الوزن..

يعني ممكن يكون جواك معتقد انك "فاشل" في اتباع الريجيم أو انك ماعندكش ارادة..مفهوم الإرادة اتكلمنا عنه قبل كده انه ساعات كتير بنتخدع فيه..لكن خليني ما أكترش عليك، خصوصاً وانك عايز المختصر المفيد..

اعمل الطريقة الي كانت في الجزء الأول من مقالة السر..

وفكر..ايه كل الحاجات جواك الوحشة، السلبية، الي ممكن تكون تخليك بتاكل كتير..

بتاكل لما تتخنق..

بتاكلي لما تحسي بالوحدة..

بتاكل لما تتفرج على ماتشات الكورة..

بتاكلي لما تتفرجي على حلقات مسلسل بتحبيه أوي..عشان تستمعي أكتر وانتي بتتفرجي ؟

خليني اسألك سؤال..

انت بتاكل ليه ؟!

آه انت بتاكل ليه..؟

هتقولي عشان ببقى جعان..

عشان تعيش مثلاً..مش كدة؟

طيب خليني معاك بمنطقك ده واحدة واحدة..

انت كشخص عايز تقل في الوزن..

طبيعي انك عندك وزن زائد..تمام ؟

تمام..الوزن الزائد ده الكبد بيحوله لدهون..ويخزنها في جسمك، ده الي بيعمل الكرش والحاجات دي..

عشان لو احتاجتها..

هو يحرقها ويحولها لطاقة..

عشان كده كتير أوي بتكون جعان، وهتموت من الجوع، لكن بعد حوالي ساعة او ساعتين..تبدأ تحس بالشبع..

المهم..

ان معنى كده، انك مش محتاج تاكل..!

معنى كده..

انك المفروض..

ما تجوعش..!

بالظبط..

ودي حقيقة على فكرة..في دراسة قراتها في كتاب عن انقاص الوزن والتنويم بالإيحاء، كان في احصائية ان حوالي 95% من الشعور بالجوع، هو شعور وهمي..!

العقل الباطن هو المسئول الأول عنه عشان يحميك من خطر الموت، الناجم عن عدم الأكل..

عشان هو فاهم كدة..

عقلك الباطن فاهم انك لو ما كلتش..هتموت..!

يعني الطبيعي انك فعلاً ما تجوعش..

ده شعور وهمي..ناتج كمان عن حاجة تانية خطيرة..

عن عدم انضباط مواعيد أكلك..

ممكن تفطر الساعة 8 صباحا

وممكن تفطر 12 الظهر..

وممكن تفطر 10

وممكن تفطر 4 العصر..!

طبيعي، طبيعي.. ان عقلك الباطن، بعد كذا مرة من تكرار الكلام ده..

هييجي الساعة 8، و12،و10،و4.. يحسسك بالجوع..!

فعايزك تفهم وتقتنع وتحس..

انك فعلا، طالما عندك وزن زائد..

مش محتاج تاكل..

لو كلت..هيبقى روتين..

ولو عوزت..

تقدر تقاوم الاحساس بالجوع ده..

بكل سهولة..

لأنك أصلاً.. مش محتاج الأكل..

كمان عايزك تراقب مواعيد اكلك..

وتقلل الوجبات البينية على أد ما تقدر..عشان دي اكتر وجبات عقلك الباطن بيكدب عليك فيها، لما يحسسك بالجوع..

غير كده..عايزك تنسى حكاية انك تاكل وانت بتتفرج على أي حاجة..

وقت الأكل يبقى للأكل وبس..

كمان في حيلة حلوة اوي انا بستخدمها شخصياً..

للناس الكتير الي شافتني باكل – انا بحب الأكل جداً – وفي نفس الوقت محافظ على جسمي بفضل الله..وسألتني ازاي..

هي دي الحيلة الي بستخدمها..

الأول بقيت ألاحظ مثلاً..لو هاكل سندوتش معين

بخلصه في أد ايه..

لو 3 دقايق..

بعد كده اخلصه في 6..

"القطمة" الي بتاكلها..صغرها شوية بحيث انك تخلص السندوتش – أو الوجبة – في ضعف الوقت الي بتخلصه فيها في الظروف العادية..

وكل مرة حاول تزود الوقت ده..

الحيلة دي حيلة سحرية، عايزك تجربها..

2-    برده انتزع من جواك أي كلمة وحشة اتقالتلك عن وزنك الزيادة..وإنك لازم تخس عشان تكون سعيد..على فكرة في ناس كتير مبسوطة بوزنها كدة..وانا فعلا بحب جدا الناس دي وبحترمها.. عشان عايزة تمشي على مزاجها مش على مزاج الناس..

والعكس صحيح..في ناس – في بعض البيئات – معتقدة إن الأكل الكتير، دلالة على الرفاهية في العيش..

فمحتاج – لو عايز تخس – انك تقضي على المعتقدات دي كلها..

بانك تفكر ليه..ليه انت ماشي ورا المعتقد ده..

وياريت كل تفكيرك ده تكتبه في ورقة..

وبرده تقطعها وتحرقها لما تخلص..زي الجزء الأول من مقالة السر..

كمان لازم تبعد عن كلمة Weight loss  أو فقدان الوزن..

عقلك الباطن "مبرمج" على انه يدور على أي حاجة "يفقدها" ويستعيدها بشتى الطرق..

ما تقولش أنا عايز افقد وزن..

ما تقولش أنا عايز وزني يقل..

قول انا عايز أخس..

3-    أهم خطوة..انك وانت بتتخيل نفسك في أي حاجة..سواء بتعمل معايشة أو لأ..سواء بتفتكر حتى مشهد قديم من ذكرى قديمة..

انك تشوف نفسك في المشهد ده..في جسمك المثالي..

في الجسم المثالي الي انت عايزه..

وتفرح بشكلك ده..وتفرح بوزنك المثالي ده، وتفرح بجسمك المثالي ده..

وتخيل نفسك في كل المشاهد الي عايز تتخيلها..

بجسمك المثالي ده..

وبعد كده..

لما تظهر حواليك علامات أو اشارات خاصة بهدفك ده..انك تخس..، ياريت..

ياريت..

تاخد الـ Inspired Action..

 

أتمنى ما أكونش طولت عليك..واتمنى تكون المقالة عجبتك.

قانون الجذب

قانون الجذب

المختصر المفيد – الجزء الثاني

July 29, 2011 — by فيصل عبد الواحد9

law-of-attraction.jpg

المختصر المفيد - قانون الجذب

قانون الجذب

قانون الجذب

ملحوظة : يجب قراءة الجزء السابق من المقالة من هنــــــــــــا أولاً


الجزء الأول، الجزء اللي فات من السلسلة دي – المختصر المفيد – كلمتك عن ان أكتر 3 مواضيع الناس عايزة تستخدم قانون الجذب فيها هيا الصحة، والمال، وانقاص الوزن.

وكلمتك عن الصحة..

وقولنا فيها، المختصر المفيد..

النهاردة، هكلمك عن الموضوع التاني..

التحدي التاني..

المال..

المال ده تحديداً، يمكن من أسهل – ان ماكنش أسهل – شيء ممكن تستخدم قانون الجذب فيه..

لأن المال..أو الفلوس، بتاخد دورتها بين الناس وترجع تاني..يعني ممكن ال10 جنيه الي في جيبك الوقتي، يكون أخوك صرفها من 15 سنة..

وجاتلك بطريقة انت ما تعرفهاش..

في علم الاقتصاد، اسمها

Money circulation

خلينا ما ندخلش في تفاصيل اقتصادية..انت جاي هنا عشان المختصر المفيد..

بس خليني أقولك قصة جميلة أوي قرأتها..

سائح راح فندق صغير، لوكاندة يعني..حجز أوضة، وساب 100 دولار على الكاونتر بتاع الكاشير..السور الصغير الي قدام المسئون عن الحجز، وخد مفاتيح الأوضة وطلع..

خدها صاحب الفندق..راح دفعها لتاجر الخضار والفاكهة الي في الحي بتاعه عشان كان عليه ليه 100 دولار..

خدها التاجر، دفعها للمكتبة عشان كان عليه 100 دولار خاصين بكتاب كان شاريه لإبنه..

خدها صاحب المكتبة..وراح دفعها لبنت عشان كان عليه 100 دولار ليها..

خدتها البنت ودفعتها لصاحب الفندق عشان كان عليها 100 دولار متأخرة من ايجار أوضة..

حطها صاحب الفندق على الكاونتر..

نزل السائح بعد ما لقى ان مستوى الغرفة سيء للغاية..

وخد ال100 دولار بتاعته، ومشي..

كده 100 دولار واحدة..قضت خدمات 6 أشخاص..

وماحدش خسر في الآخر..!

كان لازم اقولك القصة الظريفة دي عشان أقربلك الحكاية شوية..

الفلوس سهل جدا جذبها ليك..ومش عشان كده بس..

عشان أسباب تانية كتير، بس مش هقدر أقلهملك هنا بالتفصيل عشان انت جاي تقرأ المختصر المفيد..

المختصر المفيد في جذب المال كالآتي :

1-    انك تشيل من جواك أي معتقد سلبي، ممكن يكون هو الي بيمنع جذب المال ليك..زي معتقد ازاي واني لازم اتعب وحاجات تانية كتير، اتكلمت عنهم أكتر في الجزء الأول من مقالة السر، ياريت تراجعها من هنا.

2-    أنك تشيل من جواك أي طاقة سلبية، زي مثلاً انك تكون شايل من أي حد، حتى لو هو الي غلط فيك..أو انك مش مسامحه، أو انك عايز تنتقم من حد، زي ما قلتلك في المقالة الي قبل الي فاتت..

قانون الجذب سلاح ذو حدين، ان عقلك الباطن ما بيشوفش الشخص التاني..انت بتشوفه بعقلك الواعي، الي عقلك الباطن بيشوفه، انك انت متضايق من نفسك ومش مسامح نفسك وعايز تنتقم من نفسك..! فبالتالي بيأخر عنك أي حاجة ممكن تخليك تكون فرحان !

3-    ثالث حاجة..ودي مهمة جداً، انك تعمل أكثر حاجة انت بتحبها – مش أكتر حاجة بتجيب فلوس – وتسيب الفلوس تجيلك لواحدها، من غير ما تفكر فيها هتجيلك من انك تعمل الي انت بتحبه ازاي..

ولو قدرت تسأل نفسك السؤالين دول:

أنا بحب أعمل ايه..؟

أنا بعرف أعمل ايه..؟

وتطلع منهم بنقطة مشتركة..يبقى هايل جداً جداً..

اهم حاجة انك تشوف ايه اكتر حاجة بتحب تعملها، بتبقى فرحان وانت بتعملها، حتى لو كنت هتعملها ومش هتاخد عليها مقابل..

مش مطلوب منك الا انك تعملها بس..

بعد كده..هيجيلك ناس كتير أوي بإذن الله، عايزينك تعمل نفس الحاجة دي..الي انت بتحبها..

وهيدوك مقابلها فلوس..

لكن، لو قعدت تسأل نفسك..ايه اسرع حاجة ممكن تخليني غني..

ايه أسرع حاجة ممكن تخليني أعمل فلوس..

ايه الشغلانة اللي لو اشتغلتها هعمل فلوس كتير..

الأسئلة دي أسئلة مشروعة..لكن انت جيت عشان المختصر المفيد، مش كدة..؟

الأسألة دي ممكن توصلك لشغلانة كده، وهتقعد تتعلم فيها كتير عشان توصل للنقطة الي يبقى في ناس تانية، عملاء حقيقين، عايزينك تشتغلها بمقابل مادي..

لكن لو كنت بتعمل حاجة بتحبها اوي، وشيلت تركيزك من على انك – ماعندكش فلوس – وأنك – محتاج فلوس -..وحتى لو عملتها من غير مقابل..

صدقني هتشوف الفلوس..حواليك، وانت مش عارف بتجيلك منين..

حتى كمان، ممكن تلاقي الفلوس بتجيلك من مصدر غير متعلق اطلاقا بالحاجة الي انت بتحبها دي..

وهو ده السر..

هو ده السر المطلق الخاص بجذب المال..

هو ده مركز ولب، المختصر المفيد في جذب المال، انك تشوف ايه اكتر الحاجات الي بتحبها..

وتعملها..

وتستمتع وتفرح وانت بتعملها..

وتسيب الفلوس تجيلك لواحدها..،

 

ده..المختصر المفيد في جذب المال..

انسف أي معتقد سلبي..

سامح وانسى وحب واعف واغفر لكل الناس، حتى لو كانوا ظلموك..

شوف ايه اكتر حاجة بتحبها..واعملها، وما تفكرش في الفلوس..

 

يلا..أشوفك الجزء القادم ان شاء الله، والمختصر المفيد في انقاص الوزن.

قانون الجذب

قانون الجذب

المختصر المفيد – الجزء الأول

July 28, 2011 — by فيصل عبد الواحد11

34cw1.png

المختصر المفيد - قانون الجذب

قانون الجذب

قانون الجذب

إزيك..

ايه أخبارك بعد المقالة الي فاتت..

اخبار دنيتك ايه وأخبار الجذب معاك ايه..

شايف الدنيا حواليك سحر وفرحة وسعادة..

ولا لسه في مشاكل ؟

أو بلاش كلمة مشاكل، ما بحبهاش..

لسه في تحديات ؟

شيل كلمة "مشكلة" وكلمة "هحاول" وكلمة "مستحيل" من حياتك..

وحط بدالهم "تحدي" و "هعمل" و "أكيد"..

وجرب طريقة كلامك بالمصطلحات دي..وشوف هتجذب ليك الي انت عايزه بس ولا لأ..

لأن قانون الجذب مش بس معايشة واحساس، رغم ان ده جزء كبير جداً منه..

لكن برده، وده شيء خطير جداً، قانون الجذب ألفاظ وكلمات..

جرب تراقب نفسك..أو تمشي بورقة وقلم، وكل ما تلاحظ انك في أي محادثة مع حد قولت أي كلمة من الي قلتلك عليهم..او أي كلمة محبطة او مثبطة لهمتك أو لهمة غيرة بوجه عام..

اكتبها..

وبعد كده اقعد مع نفسك دور على مرادف ايجابي ليها..

لو لسه حاسس ببعض التحديات، او حاسس ان لسه شيء ناقص، جرب تعمل الجزء الخاص بالتخلص من المعتقدات السلبية، الي في الجزء الأول من مقالة "السر – كيف تجذب المال".

اعمله مرة واتنين وتلاتة..، وطلع كل الي جواك في الورق وقطعه واحرقه، وشوفه بعينيك قدامك وهو بيتحرق..

شيل الجدران الي غصب عنك السنين بنيتها جواك..

لأ..اتطمن،

المقالة دي مش على كدة بس..

المقالة دي بعنوان – زي ما انت قرأت من دقيقتين – المختصر المفيد..

هقدملك حلول سريعة وفعالة جداً.. لأكثر 3 تحديات بتواجه الناس..

وده تبع احصائية امريكية عن اكثر طلبات الناس المتعلقة باستخدام قانون الجذب، وهما على الترتيب :

1-    الشفاء.

2-    المال.

3-    انقاص الوزن.

المواضيع دي أكثر 3 مواضيع الناس مهتمة وعايزة جداً، انها تستخدم قانون الجذب فيها..

وهنتكلم عليهم واحدة واحدة..

وبحلول بسيطة وسريعة وفعالة جداً..

وانت هتجرب بنفسك ان شاء الله..

أول تحدي، أو أول موضوع ، الشفاء..

كلمتك قبل كده عن موريس جودمان، الراجل الي وقع من طياره وجسمه اتكسر، ونظره راح وكل حتة فيه اتحطت في الجبس..وبفضل الله استخدم قانون الجذب من غير ما يعرفه..

عشان يرجع يمشي تاني..

لكن في موضوع الشفاء، الغالب ان الي بيتكلم، او الي بيطلب قانون الجذب، مش الشخص الي عنده المرض أو المشكلة الصحية – التحدي الصحي – خلاص زي ما اتفقنا..

وحتى المريض نفسه لو استخدم قانون الجذب بيبقى في صورة  "أنا مش عايز المرض ده"..

"أنا مش عايز اقعد في المستشفى"

"انا مش عايز.."

"..مش.."

خدت بالك أكيد..مش كدة ؟

بالظبط، قانون الجذب لا يعرف أدوات النفي..زي مانتا قرأت في مقالة "أخطاء تطبيق قانون الجذب"

العقل الباطن هيشيل اداة النفي ويسمع ويخزن ويتصرف ويجذب ليك كل حاجة شبه الجمل دي:

"أنا عايز المرض ده"

"أنا عايز اقعد في المستشفى"

"أنا عايز.."

فمحتاج انك تقول كدة للشخص المريض..

كمان المريض ممكن يكون يائس أو حالته النفسية مش كويسة، فكده بيعمل قوة جذب سلبية، أو عكسية لنفسه، بيجذب ليه اللي هو مش عايزه..الي هو زيادة المرض وسوء حالته أكتر وأكتر..

فهنا انت في تحدي كبير جداً..عشان لازم توازن القوة السلبية دي بقوة جذب ايجابية منه..

لكن التحدي الأكبر فين..

أن التحدي الصحي ده يبقى عند حد تاني غيرك، وانت عايز تستخدم قانون الجذب ليه..

وأنه يكون بيتسبب في قوة جذب سلبية..ويجذب ليه تدهور حالته الصحية..

وكمان لو كلمته عن قانون الجذب مش هيقتنع..

لأ ما تقلقش الموضوع أبسط مما تتخيل..

هنا ، لازم تعمل حاجتين ، وده الجزء الأول من المختصر المفيد، اللي هو متعلق بالشفاء بإذن الله :

أول حاجة، انك تعمل المعايشة، ليه هو..وهو معافى تماماً وسليم تماما بفضل الله..بس تعملها أكثر من مرة في اليوم..عشان على أد ما تقدر توازن القوة السلبية الي هو بيعملها دي..وقريب ان شاء الله هكلمك بالتفصيل عن قوة الجذب او طاقة الجذب، بمعادلات رياضية تفصيلية ان شاء الله.

تاني حاجة، إنك تقوله على قانون الجذب..

حتى لو ما اقتنعش بيه..

بس الوقتي انت الي عرفته عليه، و طبقاً لمبدأ تضاعف وتتابع قانون الجذب..

هتعرف ان مهما كانت قوته السلبية في الجذب، فأنت هتستخدمها لصالحه..

لأن ببساطة كل ما انت تعرف حد بقانون الجذب، قوتك انت بتتضاعف، وكل ما هو يقول لحد عن قانون الجذب، قوتك برده بتتضاعف، وكل ما هو يجذب حاجة ليه، سواء عايزها او مش عايزها..

بالظبط، قوتك برده بتتضاعف..

ده تفسير سريع لـمبدئين في قانون الجذب وهما:

What you put out there gets back at you multiplied

و

You have to give to recieve

الأولى يعني الشيء او الفكرة او الحاجة او الاحساس..أو أو أو..أي حاجة بتديها لغيرك، بتخرجها بره منك، هتتردلك مضاعفة.

والثانية معناها انك لازم تدي وتشارك الي عندك، عشان تستقبل وتسمح لقانون الجذب بإنه يشتغل لصالحك..قريبين شوية من مبدأ في شريعتنا،

"لا يؤمن أحدكم حتى يحب لأخيه ما يحب لنفسه".

"الحسنة بعشر أمثالها".

صح..؟

صدق رسول الله صلى الله عليه وسلم..

أسيبك مع الجزء الأول من سلسلة المختصر المفيد..

وأشوفك الجزء الجاي ان شاء الله ، مع تحدي المال..

رمضان كريم.

 

 

 

قانون الجذب

حدد أهدافك

July 27, 2011 — by فيصل عبد الواحد33

stock-photo-confident-man-in-business-suit-against-white-background-9916192.jpg

قانون الجذب
قانون الجذب

قانون الجذب

قانون الجذب - حدد أهدافك

المقالة دي مش تكملة للمقالة الي فاتت "أخطاء تطبيق قانون الجذب"..دي مقالة زيادة عشان اساعد الي قرأ المقالة الي فاتت..يحدد هو عايز ايه..

لكن المقالة الجاية ان شاء الله هتبقى التكملة بتاعة المقالة السابقة "أخطاء تطبيق قانون الجذب".

المهم..

فاكر لما قلتلك ان ساعات كتير كان بيتفرض علينا اهداف، ومع السنين، كانت بتتبرمج جوانا على انها اهدافنا احنا..

يمكن عشان كده ناس كتير لما بتحقق حاجة كانت عايزاها من زمان..ما بتحسش بالإشباع أو بالفرحة الي كانوا متوقعينها..

آه انا بقيت دكتور..وبعدين !

مش حاسس اني فرحان أوي زي ما كنت متخيل..

انا كنت في ثانوي بذاكر وأموت نفسي واقول يارب ادخل كلية طب يارب نفسي أبقى دكتور..

وهكذا..

في راجل عظيم جدا..بس للأسف مش فاكر اسمه، بيقول

I can give people anything they want, but the problem is, they don’t know what they want..!

 

طب إزاي..نعرف احنا عايزين ايه.

الطرق كتير، لكن في طريقة جميلة جدا..لأستاذي الدكتور

Robert Anthony

بتتلخص في الآتي :

انك تقعد مع نفسك..وتجيب اهداف عشوائية انت عايز تحققها

وتشوف نفسك محقق كل هدف من الاهداف دي..وتشوف هيحققلك فرحة بنسبة كام في ال100

يعني مثلا تجيب خمس أو ست اهداف، وتشوف نفسك محقق كل واحد فيهم، وتحاول تعيشه بكل تفاصيله..وتشوف هيحققلك فرحة معاه كام في ال100

نصيحة..ما تكملش قراءة الجزء الي جاي الا اما تعمل الطريقة دي..عشان ما تبوظش على نفسك متعتها..

اعملها، وتعالى كمل قراءة..

...

الوقتي، المفروض تكون عملت الطريقة فعلا..وخلاص اختارت كذا هدف وعملت الطريقة دي عليهم..

النتيجة إيه ؟

لو الهدف، أي هدف، كانت الفرحة الي شايف انها هتحس بيها معاه، أقل من90%..يبقى ده مش هدفك انت..

يبقى ده مش هدف مرتبط بإحساس، يبقى ده فكرة، مش رغبة..

والهدف الي بيحققلك فرحة بنسبة 90% أو أعلى، هيتحقق أسرع من غيره..

بس ما تفهمش غلط، الأهداف التانية مش صعب تحقيقها عشان أقل من 90%،

لأ.. دي بس لو اتحققت مش هتحققلك الرضا والفرحة الي انت كنت متوقعهم..

كمان الهدف الي بيحققلك فرحة اكتر من 90% هيتحقق اسرع، لأنه مرتبط بإحساس..وده اتكلمنا عنه في المقالة الي فاتت..

بس..

واعمل الطريقة دي حتى لما تكون محتار بين حاجتين..ودايما، امشي مع الي يفرحك أكتر..

 

تحياتي، وأتمنى ان المقالة تكون عجبتك..وأشوفك في مقالة تانية ان شاء الله عن قانون الجذب

قانون الجذب

أخطاء تطبيق قانون الجذب 4

July 27, 2011 — by فيصل عبد الواحد20

Success-1024x1024.jpg

قانون الجذب
قانون الجذب

قانون الجذب

أخطاء تطبيق قانون الجذب 4

وقفنا المرة الي فاتت عند خطأ أنا محتاج وأنا نفسي..وإزاي ساعات بتقولها لنفسك وبكدة بتبعد عنك الهدف الي بتفكر فيه، حتى لو كنت بتعمل كل الخطوات التانية صح..

المرة دي مع الجزء الأخير ان شاء الله مع أخطاء تطبيق قانون الجذب..

خطأ الوقت..

بص هقولك حاجة..

خليني قبل ما أكلمك عن خطأ الوقت..أربطهولك بخطأ اتكلمنا عنه قبل كده..

خطأ إزاي..

الوقتي لو طفل صغير.. هدفه انه يجيله عجلة أو كمبيوتر أو أو أو..بالنسبة له..

لو سأل نفسه إزاي هجيب الكمبيوتر ده..أو العجلة دي..

بالنسبة ليه طبعا هدف صعب..إن ماكنش مستحيل..

وبرده في نفس الوقت..حتى لو كان تحقيقه ممكن ليه (هيقول لنفسه انا هحوش من مصروفي كل يوم أد كده وبعد أد كدة هجيب الي انا عايزه..) تحقيق الهدف ده..هياخد منه وقت كبير..مش كدة؟

 

لكن لو الي هيجيبهاله حد تاني أكبر منه، والده على سبيل المثال..أو أخوه الكبير..

 

ها..؟

بالظبط..نفس المبدأ الي انت بتفكر فيه الوقتي بيحكم خطأ الوقت وخطأ إزاي..

انت بتقيس الحاجة من مقياسك انت..

وبالتالي بتقول لنفسك ان عشان تحقق الهدف ده..هتاخد وقت كبير..

فكرة عامة بقى..لو انت قبل ما تطبق قانون الجذب، حطيت جواك انك عشان تجذب مليون جنيه محتاج 5 سنين..يبقى ما تزعلش لو ما عملتش مليون جنيه قبل ال 5 سنين دول..!

كل أخطاء قانون الجذب مرتبطة ببعض..الكلام ده مرتبط بخطأ عدم تقدير الذات..والتشكيك في انك تستحق الهدف ده (العربية – الفلوس – الشفاء – الزوجة – الشغل..) بإذن الله..

لو قعدت كل يوم تسأل امتى بقى امتى بقى امتى بقى..يبقى برده انت بتنفي الي اتكلمنا عنه المقالة الي فاتت..وهو انك تفصل نفسك عن الهدف..وتقتنع فعلا انك مش (محتاجه) لكن انت (عايزه)..

كمان قانون الجذب داخل في كل حاجة انت بتعملها في حياتك..

لو انت خارج تمتحن..ونسيت قلمك في البيت وقولت لنفسك يوووه..ده انا ما بعرفش احل من غير قلمي ده..

حتى لو كان الامتحان سهل..ما تتوقعش انك تحل كويس !

لو ضهرك وجعك وقولت لنفسك..انا ضهري بيوجعني أوي..يبقى ما تتوقعش ان الوجع يروح !

لو صحيت ما نمتش كويس وقولت انا لما بصحى ناقص نوم يومي كله بيبوظ..ما تتوقعش ان ده يكون افضل يوم في حياتك..!

لو حد عزيز عليك مسافر..واتأخر عليك..صدقني، صدقني عن تجارب كتير اتحكتلي..

ما تقولش انا حاسس ان حاجة وحشة هتحصل..وتقعد تتخيل حاجات مالهاش أي لازمة..

قانون الجذب في كل حاجة في حياتك..

قانون الجذب كل حاجة بتعملها وكل حاجة بتقولها..

راقب الي بتقوله..راقب الي بتفكر فيه..

وشوف السحر وهو بيحصل حواليك..

اتمنى يكون الجزء المهم جدا ده عجبك (أخطاء تطبيق قانون الجذب).. وانتظر ان شاء الله الجزء الجاي..الخاص بالتخيل وتقنيات مخاطبة العقل الباطن..

انا قاعد عالميل مستني قصة نجاحك في جذبك لأهدافك..ومستني أقراها بفارغ الصبر.. ابعت قصة نجاحك مع اسمك على  

success@amirnafsak.com

أتمنى لك جذباً ساحراً..وحياة مليئة بالسعادة..وقانون الجذب

قانون الجذب

اخطاء تطبيق قانون الجذب 3

July 27, 2011 — by فيصل عبد الواحد11

question-mark-guy.jpg

قانون الجذب
قانون الجذب

قانون الجذب

اخطاء تطبيق قانون الجذب 3

الجزء الثالث من أخطاء تطبيق قانون الجذب..

وقفنا المرة الي فاتت اننا لازم نظبط مواعيد نومنا عشان نبدأ نستفيد الاستفادة القصوى من قانون الجذب..

مخك لو مش صافي وتركيزك مش في حالته..صدقني لا هتعرف تستفيد بقانون الجذب، ولا بغير قانون الجذب..

النهاردة هتكلم عن حاجات مهمة جدا بالنسبة للأخطاء، أولهم، ما يعتبرش خطأ بمعنى خطأ..لكن هي قاعدة مرتبطة بقانون الجذب عموما..

وهي، إن قانون الجذب لا يعرف أدوات النفي..

يعني ايه ؟

يعني لو بدأت خلاص تحدد هدفك انك مش عايز تكون مديون لحد..وقعدت تتخيل وتقول "أنا ليس عندي ديون".. الي هتجذبه ليك ان شاء الله..الديون !

قانون الجذب زي ما هنعرف، ان شاء الله، في المقالات الجاية، بيتعامل مع العقل الباطن، وما بيفهمش أدوات النفي..حتى الحكاية دي مرتبطة بتقنية في البرمجة اللغوية العصبية اسمها الـ Analogue marking .. المهم مش كلامنا، اختصارا وتبسيطاً..لو كل الأخطاء الي فاتت كانت بتأخر أو بتضعف او حتى بتعدم فرصة تحقق الهدف..فالخطأ ده، مش كده وبس، لأ كمان هيجذبلك ان شاء الله، الي انت مش عايزه..الي هو في حالتنا هنا..الديون..

يعني الوقتي، ما تفكرش بصيغة "اللا"..ما تقولش أنا نفسي ما أسقطش تاني..أنا نفسي ما يكونش عليا ديون..أنا نفسي ما أكونش عاطل..

شوف عكس الكلام ده كله ايه..انا عايز انجح..أنا عايز يكون معايا فلوس كتير – وهنتكلم في الجزئية دي اكتر - ، أنا عايز اشتغل..

ركز على الجملتين اللي فاتوا دول وهقولك ليه كمان شوية..

القائمة الي عملتها بأهدافك الي اتفقنا عليها في أول مقالة..شيل منها كل الأهداف الي بالصيغة دي، وحولها للصيغة الإيجابية..

أقولك حاجة جميلة أوي..ليه الأطباء بيقولوا ان 50% - وده مثبت علميا – من نسبة شفاء أي مرض، متوقف على "الحالة النفسية" للمريض..

أي مرض.. على فكرة الكلام ده مثبت علميا وباحصائيات وأبحاث..

 

حاجة من الاتنين، يا إما مريض مش مقتنع بالإحصائية وبالتالي بيبقى معدل تعافيه من المرض بطيء..

يا إما المريض حتى الي مقتنع بالكلام ده، كل الي بيشوفه لنفسه.. إنه "معندوش" المرض ده..!!

وبالتالي..المرض هيزيد..!

هنا الصح ان الشخص يتخيل نفسه صحي تماماً..وبيمارس حياته العادية زي ماهو بيحب..انما ما يفكرش انه معندوش المرض ده..عشان كده..ان شاء الله، مش هيجذب غيره !

Morris Goodman

أو الرجل المعجزة زي ما بيقولوا..الراجل ده يا جماعة وقع من طيارة وجسمه اتكسر، ونظره راح، ومبقاش فيه حتة سليمة..

الراجل ده لما قام جري وبقى طبيعي زي الأول – اه طبيعي -، سألوه ازاي..الدكاتره كانوا بيقولوا خلاص ده هيعيش طول حياته كده..!

قال حاجة بسيطة خالص..كنت بتخيل نفسي وانا خارج من باب المستشفى عادي..في كامل صحتي، قبل ليلة الكريسماس..وأقعد مع عيلتي وافرح معاهم ونعمل الي بنعمله كل سنة..!

على فكرة الراجل ده فعلا – بفضل الله ورحمته طبعا رغم انه غير مسلم – حقق الي كان بيتخيله ده..

مش مصدق كلامي صح؟

http://www.law-of-attraction-guide.com/morris-goodman.html

تقدر تتأكد من اللينك ده،

موريس جودمان ده واحد من أبطال فيلم The secret .. الي كشف للعالم قانون الجذب – رغم تحفظي على كلمة كشف لأني مؤمن ان قانون الجذب موجود في شريعتنا الاسلامية من اكتر من 1400 سنة -.. وواحد رغم انه عادي جدا..لكن يعتبر من أقوى الناس في العالم..استخداما لقانون الجذب..

فاكر لما قلتلك ركز في الجملتين دول كويس عشان هرجع أفكرك بيهم ؟

أفكرك بيهم :

1-    ما تقولش أنا نفسي ما أسقطش تاني..أنا نفسي ما يكونش عليا ديون..أنا نفسي ما أكونش عاطل.

2-    انا عايز انجح..أنا عايز يكون معايا فلوس كتير – وهنتكلم في الجزئية دي اكتر - ، أنا عايز اشتغل..

ليه قلتلك تركز عليهم؟

عشان ده موضوع الخطأ الي بعد كدة..

انك بتتعامل مع الهدف على انه حاجة..مش رغبة، وده بيعدم تحقق الهدف..ليه ؟

لأن عقلك الباطن لما بيشوفك بتبص على الهدف على انه حاجة..، بيعتبر على طول انها في نقص..يعني نفي..يعني لا..!

يبدأ يجذبلك عكس الي انت نفسك فيه ده..

لكن العكس..لو قولت أنا عايز..انا أحب يكون عندي كذا..يبقى بتعكس الحكاية..

حتى لو انت فعلا محتاج الحاجة دي..بس برده ما تقولش محتاج، وما تفكرش فيها على انك محتاجها..

Joe Vitale

بيقول في كتابه عن قانون الجذب، وان شاء الله هيتبعتلك قريب في الـNewsletter الخاصة بالموقع، بيقول ان أهم حاجة لجذب الأهداف اليك..

انك بعد ما تتخيلها وتفرح بوجودها كإنها موجودة فعلاً..أنك تـ:

To detach yourself from it ..

يعني تفصل نفسك عنها !!

إزاي، دانتا لسه بتقول نعيش كإن الهدف موجود فعلا وافرح كإني محققه..وتقولي تفصل نفسك عنها..!

تفصل نفسك عنها يعني ما تربطش حياتك بيها، ما تبنيش حياتك عليها، تقول انا عايز كذا وكذا..بس حياتي مش متوقفة عليه..انا عايزه عشان انا بحبه..انا عايزه عشان هفرح لما يحصل ان شاء الله، أنا عايزه عشان بالهدف ده..حياتي هتكون لذيذة..!

انما ما تقولش انا عايز مرتب في الشهر (...) عشان انا مصاريفي كتير ومش قادر اعيش بأقل من كدة..!!

العقل الباطن – والحمد لله – ما بيقدرش يميز الي بتقوله حقيقة ولا ايحاء – رغم تحفظي على تطبيق المبدأ على اطلاقه -، يعني ما تخافش انك لما تقول كدة ان مش هيوصل لعقلك الباطن غير كدة..

زي ما عقلك الباطن بيجبرك تشرب السجاير عشان وصله منك اقتراح انها مفيدة ليك..رغم اقتناعك – العقلي – انها مضرة..

صدقني..برده تقدر توصله كل الإقتراحات والرسائل..بالصورة الي انت تختار توصلها بيها..بمجرد انك تقولها وتسمعها بس..

بس..أسيبك مع المقالة الطويلة دي النهاردة..وأتمنى اكون ما طولتش عليك، وأتمنى ان شاء الله تكون استفدت منها، وأشوفك المقالة الجاية في الجزء الرابع والاخير من أخطاء تطبيق قانون الجذب.

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close