main

قانون الجذب

! أنت نجمك خفيف

May 9, 2012 — by فيصل عبد الواحد87

THird_Eye_by_ParmeneoN.jpg


Children Books Ar 728x90

قانون الجذب والحسد والقوى السلبية
قانون الجذب والحسد والقوى السلبية

ست طيبة قالتلي مرة..أنت نجمك خفيف

الكلمة دي كلمة مصرية بحتة، حتى ناس كتير مصريين ممكن ما يعرفوش يعني ايه

نجمك خفيف

يعني ايه نجمك خفيف؟

كنت لسه هسأل السؤال ده

بس فهمت أنها قصدها، من الأحداث المحيطة

أنني بتأثر بالحسد وبنظرات الناس بسرعة

كان ممكن أرد بالكلام الي هقوله ليك في المقالة دي

بس ما حبيتش ان حد يقول عليا مجنون - هتعرف ليه في آخر المقالة - ، خصوصاً الست الطيبة دي لأنها مهمة جداً ليا

زي ما انت عارف واتكلمنا كتير قبل كده،

في حاجة اسمها قوة الجذب

وعكس ما ناس كتير بتقول، وفي ناس كتير بتعارضني في الفكرة دي

لكن قوى جذب كل مننا بتأثر في التاني

ممكن انت تكون جذبت اني أقعد حالاً أكتب المقالة دي عشان عايز حاجة جديدة، رغم اني بكتبها من مكان عمل

فده خلاني فجأة أفتح أمير نفسك وأبدأ أكتب الحروف اللي انت شايفها الوقتي دي

أو ممكن أنت تفكر في حد تلاقيه يتصل بيك، ورغم ان الموضوع ده متصل بالتخاطر، لكن قوى الجذب هي أصل التخاطر

أنا ساعات كتير بفكر في حاجات وأنساها وتحصل بسرعة، مع اني لما بلاقي نفسي كده بحاول بقى أركز أجذب حاجة

ما تحصلش..ليه ؟

الموضوع ده كبير فخليه لمقاله تانية، لكن باختصار، لأن في حاجة اسمها تباعد قوى هنتكلم عنه بعدين ان شاء الله

المهم، ان كل واحد فينا قوة جذبه بتأثر في قوى جذب الناس التانيين اللي حتى ما يعرفهمش وممكن يكونوا في بلاد تانية

وصورة من صور التأثير بإذن الله طبعاً قبل و بعد كل شيء

التأثير السلبي للناس المحيطين بيك

يعني ممكن لو انت ليك هدف معين، وحد عرفه، يبقى شايف ومتأكد انك هتفشل

فده أكيد هيأثر عليك لو قوة جذبك أقل من قوة جذبه، وعشان تعرف مين اللي قوة جذبه أكبر برده عايز موضوع تاني

عشان ما ندخلش في كلام كتير مالوش لازمة - الوقتي - هدخل معاك في الموضوع على طول

الكلام العلمي عن موضوع التأثير والتأثر كبير جداً ممكن تعرفه من كتب كتير زي كتاب

The Holographic Universe

لكن خلينا نتكلم عن الوقائع وازاي نتغلب عليها

انتي دخلتي لوالدتك تقوليلها انك ان شاء الله بعد 3 شهور هيبقى معاكي 50 ألف جنيه

والدتك، اللي هي شخص عزيزي عليكي جداً، ما عملتش أي حاجة، والموضوع اتغير

لكن بعد كام دقيقة حسيتي بالخمول

الكسل..ممكن اتخنقتي

والدتك وقتها أول كلمة جت في ذهنها لما قلتيلها على هدفك

"ابقي قابليني"

كلمة مصرية معناها مستحيل

وعشان ماما، ما فكرتش كتير في الموضوع، ومن غير ما تعرف فصلت نفسها وفكت الارتباط، بانها غيرت الموضوع

الأثر بقى أكبر

وبدأ يأثر عليكي انتي

وبدأتي تحسي انك مش عايزه تكملي طريقك للهدف ده

وبدون الكلام، وبدون انك تقول على هدفك لأي حد

ممكن تدخل أي مكان تحس انك اتخنقت فجأة

صدعت

عايز تنام

المشكلة، انك لو ما اتعاملتش مع كل الطاقات المحيطة بيك دي، ممكن جداً تتعب وتلاقي مقاومة أكتر

أو ممكن..تفشل

 صورة تانية من صور التأثير

هو الحسد

الحسد ما هو الا طاقة بيتم توجيهها من شخص ما لشخص آخر، بدون قصد طبعاً

وأنا شخصياً بقدر أعرف في حد بيحسدني ولا  لأ، وبقدر اتعامل معاها، وبقدر أعكسها عليه

وده اللي هتتعلمه في آخر المقالة ان شاء الله

المهم، الصورة الأولى او التانية، أتعامل معاهم ازاي

ازاي اكسر تأثير الناس السلبي عليا، أو أعكس حسد أي حد

الطريقة واحدة بس بتختلف شوية ، لكن الأول، بالنسبة لتأثير الناس، ياريت تريح دماغك

وما تقولش اهدافك لحد

ندخل في الطريقة، بالنسبة للحسد

عايزك الوقتي تغمض عينيك

مش الوقتي طبعاً، بعد ما تخلص قراءة المقالة

تغمض عينيك، وتاخد أربع أو خمس أنفاس بطيئة

وياريت تعمل كده وانت مستلقي على سرير أو كرسي مريح

وتشوف نفسك من بره

شوف جسمك بكل تفاصيله

الوقتي، في الحالة اللي انت عليها

وشوف هالة من الطاقة بتحيط بجسمك كله

لو لاحظت ان في اماكن فيها ضعيفة او مفتوحة، كملها

ما تسيبش أي مكان مفتوح

ركز على الهالة دي جداً، وشوف لونها ايه

وكثافتها

ركز أكتر هتلاقي في أسهم كتير جداً بتحاول تخترق الهالة دي

قوي الهالة في المناطق اللي تحس انها ممكن تخترق، عشان الأسهم أو الأشعة - بعض الناس  قالوا أشعة - ما تخترقهاش

لغاية ما يبقى عندك هالة قوية، بلون مشع، مفيش اي سهم قادر يخترقها

اعمل التمرين ده مرة واحدة بس لواحدك

ووقت ما تحس انك قابلت حد، وحسيت انك اتخنقت فجأة

او صدعت بدون أي مقدمات

اعرف انه من غير ما يقصد بيحسدك - وعلى فكرة كلنا ساعات بنعمل كده من غير ما نعرف فماتظلمش الراجل وتقول عينه وحشه

والوقتي افتكر الهالة كويس جداً، وشوف الاختراق بيحاول يحصل من أي جهة واتعامل معاه

ممكن في اول كام مرة تبقى محتاج تغمض عينك

لكن بعد كده هتقدر تعملها وانت مفتح عادي

عرفت ليه خفت تقول عليا هي مجنون ؟

بالنسبة للتعامل مع الطاقة السلبية للناس اللي حواليك، لما تحس ان في حد بيحبطك

او انت فجأة حسيت بالاحباط، ركز على الشعور ده وغمض عينك وشوف منظر ازاز بيتكسر

وحس بيه واسمع صوته وشوفه وهو بيتكسر في ذهنك

كررها كذا مرة بسرعة جداً ورا بعض

مع الوقت هتقدر تستخدم التقنية دي لحاجات كتير

بالمناسبة، التقنية دي اتولدت من سؤال في امتحان ممارس البرمجة اللغوية العصبية المتقدم

كان في سؤال

Invent a Technique using NLP

وكانت دي التقنية بتاعتي

تقنية قوية جداً هتفيدك كتير ان شاء الله

أتمنى ما اكونش طولت عليك في المقالة دي

وبالتوفيق ان شاء الله

قانون الجذب

الخلاصة

May 6, 2012 — by فيصل عبد الواحد72

34cw1.png

اتكلمنا عن قانون الجذب، في كل مقالاتنا السابقة

خلاصة قانون الجذب
خلاصة قانون الجذب

واتكلمنا كمان عن الكتابة، وتكتب ولا ما تكتبش، ولو هتكتب هتكتب ليه، ولو هتكتب هتكتب ازاي، في معاك ورقة وقلم، و معاك ورقة وقلم 2

واتكلمنا ازاي تتعامل مع اهدافك وتبصلها ازاي من ناحية الفكرة والتركيز الشديد عليها والرغبة "الحارقة" اللي جواك أنك تحقق هدفك

اللي بتسندك بعد اليقين بالله وقت ما تحس انك تعبت، واتكلمنا كمان عن نظرتك من ناحية مدى تحقق الهدف، التأكد والثقة والطبيعة، كل ده اتكلمنا عنه في مفتاح قانون الجذب

واتكلمنا كمان عن حرق المعتقدات وإزاي تتخلص من المشاعرأو المعتقدات السلبية اللي أكيد ليها دور كبير في تعطيل جذب اللي انت عايزه

النهاردة المقالة مش هتبقى كبيرة، هي بالظبط زي ما العنوان بيقول

الخلاصة من كل الكلام ده

لو عايز حاجة، تعمل ايه؟

قبل أي شيء عايز أقولك ان ربنا اللي خلق الكون وخلق قانون الجذب وغيره من القوانين، فبإذن الله لما اهدافك تتحقق ما تقولش سبحان الله، قانون الجذب ده حاجة جميلة

قول الحمد لله وبفضل الله، أحمدك وأشكر فضلك يا رب، بس، ما تجيبش سيرة قانون الجذب، ما ينفعش تشكر الدواء وتجحد فضل الدكتور، مش كدة ؟

هقولك تعمل ايه بالتفصيل، وهقولك على حاجة جديدة، جميلة جداً، ما كلمتكش عنها قبل كده

أول حاجة انك تعرف انت عايز ايه، وناس كتير اوي شايفه الحكاية دي سهلة، لكن لما تعرف ان 99% من أهدافك ان ماكنش كلها

اهداف مفروضة عليك من البيئة المحيطة

بما فيها الأسرة والأصحاب والتربية والمدرسة والإعلام..إلى آخر القائمة الطويلة

هتتفاجئ

في طريقة جميلة جداً تعرف بيها انت فعلاً عايز ايه، خاصة بدكتور اسمه روبرت أنتوني، ممكن تكون قرأتها هنا قبل كده، هتلاقيها هنا ان شاء الله : حدد أهدافك

خلاص بعد ما عرفت انت عايز ايه بالظبط، خليك فاكره كويس جداً، وفكر فيه، شوف الصعوبات اللي هتيجي في دماغك ايه، يعني لو الهدف مادي مثلاً، 1000 جنيه مثلاً بعد اسبوعين

شوف الحاجات السلبية اللي هتيجي في دماغك ايه وخليك فاكرها، الوقتي بقى هتعمل طريقة حرق المعتقدات، وتبدأ تكتب اللي مضايقك كله

بنفس الطريقة الي اتكلمنا بيها قبل كده عنها، وابدأ كمان اكتب كل حاجة مضايقاك ، مش بس اللي جه في دماغك، واعمل في اللي هتكتبه زي ما مكتوب في مقالة حرق المعتقدات

جميل، الوقتي خلصت حرق المعتقدات

تقدر تتدخل على الخطوة التانية انك تبدأ تكتب أهدافك، بنفس الصيغة والكلام اللي اتفقنا عليها في معاك ورقة وقلم، و معاك ورقة وقلم 2

وتبدأ تفكر في أهدافك دي بالطريقة اللي اتكلمنا عنها في مفتاح قانون الجذب

وتقرأ الورقة دي مرتين على الأقل في اليوم، لكن الجديد النهاردة اني هقولك حاجتين

أول حاجة، ان هيفرق معاك جداً لو جيبت نفس الورقة دي، وعلى الأقل مرة في الأسبوع، جيبت القلم

ومشيت على نفس الكلام المكتوب كإنك بتكتبه تاني

تاني معلش

يعني ايه ؟

يعني تجيب الورقة اللي انت اصلاً كتبت فيها اهدافك بالصيغة اللي اتفقنا عليها

وتعيد على اللي انت كتبته بالقلم كإنك بتكتبه من أول وجديد

مرة على الأقل كل أسبوع زي ما اتفقنا

تاني حاجة، عايزك وانت بتقرأ الورقة كل يوم، الكلام اللي انت بتقوله، مع انه محدد بتاريخ مستقبلي

بس عايزك تحس انك حققته فعلاً، وفيصل اللي بيقرأ أهدافه الوقتي

هو فيصل اللي حققها

فيصل الوقتي حقق الهدف ده وشايف نفسه فعلاً حققه

الكلمة دي كبيرة جداً وياما سمعتها وقرأتها قبل كده ماكنتش بهتم بيها، كنت بعتقد اني فاهمها كويس

لكن لما تفهم كويس جداً يعني ايه معنى، انك تكون فعلاً، معاك الهدف ده الوقتي

وانت بتقرأ الورقة دي

هتفهم قصدي، هتحس بشعور

هيخليك تفهم انا أقصد ايه

كمان حاجة أخيرة أحب أكد عليك فيها، ما تقولش أهدافك لحد

بس، دي كانت الخلاصة، وأشوفك المقالة الجاية ان شاء الله

قانون الجذب

Attractitude

May 3, 2012 — by فيصل عبد الواحد59

attractitude-big-logo.jpg
attractitude فيصل عبد الواحد
attractitude فيصل عبد الواحد

المقالة دي مش هكلمك فيها عن قانون الجذب

!ولا عن أي حاجة ليها علاقة بالتنمية البشرية

! هكلمك فيها عن نفسي

أناني، مش كدة ؟

مش انانية، لكن كنوع من الاحتفال، انا بعتز بيك كزائر من زوار موقعي

وحابب احتفل معاك بحاجة جميلة جداً

انا بفتخر بيها شخصياً

من حوالي 3 أسابيع، انضميت كمدرب لشركة عالمية للتدريب

شركة أجنبية، كندية تحديداً

والحمد لله اسمي موجود هناك الوقتي مع كل المدربين اللي هناك - كلهم أجانب

وأنا العربي الوحيد اللي هناك

وبفضل الله أصغر مدرب فيهم

مش بتباهى، بس زي ما قلتلك عايز اشارك فرحتي معاك

كمان انا هدرب قانون الجذب هناك، تحت مسمى قانون الجذب الشرقي

والتدريب أونلاين

تكلفة الحضور للمتدرب 500 دولار - بالظبط497

ودي حاجة عايز الفت النظر ليها، ان هنا الشخص "بيستكتر" يدفع 100 أو 200 أو حتى 1000 جنيه في كورسات

وبره الشخص بيدفع أضعاف المبلغ ده، لأنه عارف ان أغلى شيء يستثمر فيه، هو نفسه

دي حاجة اعتز بيها عشان بتمثل ثقة الشركة فيا الحمد لله

تقدر تشوف صورتي مع المدربين من هنا

http://pinterest.com/attractitude/coaches-at-attractitude/

هتلاقيها تحت على اليمين اظن

و تقدر تشوف كلام مختصر عني من خلال صفحتي على موقعهم الخاص من هنا

http://www.attractitude.com/Faisal_Abdelwahed.html

انا وصلت للمرحلة دي بفضل الله تعالى وحده، الحمد لله، ثم بيك، عشان انت كنت السبب اللي بكتب مقالاتي عشانه

وان شاء الله اتمنى اني اكون عند حسن ظنك دايماً وأقدر اقدم كل شيء يفيدك بإذن الله

بالتوفيق ان شاء الله

قانون الجذب

حرق المعتقدات

April 28, 2012 — by فيصل عبد الواحد74

papel-calcinado-25761277746402Jjha.jpg
قانون الجذب - حرق المعتقدات
قانون الجذب - حرق المعتقدات

اتكلمت عن حرق المعتقدات كتير جداً

في أكتر من مناسبة، وأكتر من مقالة، ومع أكتر من شخص

لكن مع ذلك لسه في ناس بتسأل عنها أو مش فاهمة يعني ايه حرق المعتقدات

وعشان احنا هنحتاجها ان شاء الله المقالة الجاية - مقالة الخلاصة

شوفت انه مهم اعملها مقالة خاصة بيها، تقدر ترجع ليها في أي وقت

حرق المعتقدات ببساطة انك بتجيب ورقة - أو كمية أوراق

وتجيب قلم - مش كمية أقلام - قلم واحد كفاية وتبدأ تكتب كل حاجة بتضايقك

بالظبط، كل حاجة بتضايقك

كل حاجة بتزعلك

عشان ما تتوهش، حدد مثلاً حاجة واحدة مضايقاك واكتب عنها كل شيء متعلق بيها، بس مش مجرد كتابة

عيش الكلام اللي بتكتبه، لو الكلام ذكريات، عيش كل ذكرى كإنها بتحصل تاني

شوف كل كلمة بتكتبها، بص على كل حاجة حصلت

اسمع كل صوت فاكر انه حصل

حس بكل احساس حسيته وقت الحاجة اللي زعلتك أوي وأثرت فيك، حصلت

خيانة ؟

زعل..؟

حزن..؟

فقر؟ فشل ؟ استغلال؟

..

موت ؟

اكتب كل حاجة وعيشها كإنها بتحصل تاني

انا عارف انك مستغرب من اللي بتقراه، لكن خليك معايا للآخر، اكتب كل حاجة فاكرها متعلقة بالشيء ده واكتب كل تفاصيلها الي فاكرها

وعيش كل حاجة كإنها بتحصل قدامك فعلاً الوقتي

عيشها بكل حاجة فيك

واكتب تفاصيل على أد ما تقدر

!! ناس كتير وهي بتعمل الحكاية دي عيطت..وده ممتاز

هتعرف ليه بس مش الوقتي

الوقتي..عايزك تمسك الورقة دي - أو كمية الورق - بإيدك

بصلها كويس

ركز فيها

قطعها

ولما تخلص تقطيع

احرقها

وبصلها كويس أوي وهي بتتحرق

ياريت..ياريت تقوم تعمل كده الوقتي وتيجي، انا مستنيك ما تقلقش

مش هروح في أي حتة

يلا، قوم خد وقتك، احرق سلبياتك، وتعالى

حتى عشان اقولك عملنا كده ليه، والخطوة اللي جاية ايه

...

الوقتي بعد ما انت المفروض انك عملت الخطوة دي

حاجة من الاتنين، يا حسيت بارتياح كبير أوي الحمد لله

وان في حاجة اتشالت من جواك

أو حسيت باكتئاب وحزن

وفي الحالتين، أنصحك تعمل الخطوة دي

اللي هي عكس الخطوة اللي فاتت تماماً، الوقتي هات ورقة جديدة

وابدأ اكتب مشهد من حياتك متحقق فيه اهدافك كلها

اكتب مشهد بكل تفاصيله

وعيش كل حاجة حلوة فيه

كل حاجة حلوة بس

اضحك وانت بتكتب حاجة تفرح

حس بالراحة وانت بتوصف ازاي الحياة جميلة ومريحة وهدفك "...ده موجود

اوصف كل حاجة، واسمع كل صوت، وشوف كل مشهد

وحس كل احساس

كإن أهدافك دي موجودة فعلاً، وانت بتوصف حياتك بيها

اعمل كده بكل التفاصيل اللي تقدر عليها

ياريت برده تقوم تعمل كده، وتيجي

انا برده هستناك ما تقلقش

..

حرق المعتقدات بالظبط زي الجرح الملوث

اللي لازم "يتنضف" كويس جداً

قبل ما يبدأ يلتئم

وإلا، لو التئم - أو بالمصري لم - وهو فيه الملوثات دي، ممكن يعمل مشاكل جامدة بعد كده

ورغم ان عملية التنضيف أو التطهير بتوجع وبتسبب ألم كبير

لكن مهمة، وما ينفعش ما نعملهاش

عشان الجرح يلتئم كويس، وما يحصلش مشاكل بعد كده ان شاء الله

نفس المفهوم، ونفس المنطق

أي حاجة سلبية جواك لو سيبتها من غير ما تعالجها

ممكن يتهيألك انها راحت أو نسيتها

لكن وقت ما تحصل أي مشكلة، هتفتكر كل السلبي اللي جواك

وفجأة ممكن تلاقي الدنيا قفلت في وشك

او اتخنقت فجأة

او اتعصبت على حاجة تافهه جداً

سمعت مثل "القشة التي قسمت ظهر البعير" ؟

أيوة بالظبط..هو عشان كدة

أنصحك تكرر حرق المعتقدات عند الحاجة، لو حسيت ان في حاجة خانقاك او مضايقاك

وصدقني ان شاء الله، هتفرق معاك جداً جداً، حتى لو مش عايز تزرع بعدها حاجة ايجابية

بالتوفيق ان شاء الله، وأشوفك المقالة الجاية - الخلاصة

قانون الجذب

مفتاح قانون الجذب

April 22, 2012 — by فيصل عبد الواحد83

img-thing.jpg

اتكلمنا كتير عن قانون الجذب، ما بين أخطاء

تقنيات

مفاهيم

طرق..أصول و طرق تدريب

اتكلمنا كتير عشان نوضح كل حاجة عن قانون الجذب

زي ما كنت بقول دايماً لو كنت متابع الموقع من أوله، هدفي في كتاباتي او تدريبي أني أعرفك وأعرف كل الناس

ان قانون الجذب سهل

ومش بالصعوبة أبداً اللي ممكن تكون قرأتها عنه

مش بالصعوبة أبداً انك لازم تعمل جلسات استرخاء مكثفة ولازم تعمل تمرين معين لو نسيت تعمله قبل ما يخلص في اليوم يبقى تعيده من الأول

قانون الجذب مش كدة

قانون الجذب مش قانون بشري

قانون الجذب طاقة، قانون الجذب استقرار وسعادة واتزان نفسي

قانون الجذب، أو الجذب زي ما بحب أقوله، سهل جداً، أسهل مما تتخيل

والدليل على انه سهل جداً،

!! انه كان دايماً شغال ضدك، برغبتك، من غير ما تعرف

زي ما انت قرأت قبل كده، مفيش حاجة اسمها قانون جذب ما اشتغلش، يا إما اشتغل لصالحك، يا إما اشتغل ضدك

وفي الحالتين، بيكون عليك جانب من المسئولية

عشان ما أطولش عليك، في ناس كتير انتظرت المقالة دي

المقالة الي هربط فيها بين اللي قلناه في معاك ورقة و قلم، واللي شرحناه ووضحناه في معاك ورقة وقلم 2

اتكلمنا فيهم عن الكتابة وأهميتها و علاقتها بالنصف الأيمن والأيسر للمخ

اتكلمت معاك فيها عن حاجات كتير

والنهاردة، الجزء قبل الأخير في السلسلة دي

الجزء الأخير ان شاء الله هيكون بعنوان الخلاصة، اللي هقولك بعد ما تكون قرأت وفهمت كل اللي قلتهولك ان شاء الله

الطريقة المثالية، اللي في صورة خطوات اللي تقدر تستخدمها في أي حاجة بعد كدة ان شاء الله

وممكن ما تدخلش الموقع تاني بعد كده - بس اوعى تعمل كدة

النهاردة هكلمك عن مفتاح قانون الجذب

ندخل في الموضوع على طول، مفتاح قانون الجذب

3 حاجات

أول حاجة 

الفكرة

ان يكون عندك اختيار لهدف أو لشيء، وتركز عليه، هي دي الفكرة، قوة الفكرة قوة جبارة ما أقدرش أقولها في مقالة او اتنين او عشرة، لكن صدقني أول خطوة في طريق نجاح قانون الجذب بإذن الله، هي الفكرة، قوة فكرتك قوة رهيبة، مجرد انك تختار شيء وتركز عليه تفكيرك يبقى تمكنت من أول جزء من مفتاح قانون الجذب

اللي بيدعم الفكرة هو الرغبة فيها، اللي بيدعم التفكير في أمنية معينة، هو الرغبة الجامحة فيها، واللي بتخليك دايماً فاكرها، اللي بتخليك كل ما تكون عايز ترتاح من التعب، تفتكر الرغبة الحارقة جداً اللي جواك، وتديك القدرة والنشاط تاني على انك تشتغل، زي ما بيقولوا الحلم مش اللي بتشوفه و أنت نايم، الحلم هو اللي بيخليك ما تعرفش تنام

يبقى أول حاجة يكون عندك فكرة قوية جداً على هدف أو أمنية ما، وتركز عليها جداً وتدعمها برغبتك فيها، خليك عايزها أوي، ومن الحاجات اللي لقيتها بتساعد جداً في تقوية الرغبة، هي الحب، لو الهدف اللي اختارته عايزه أوي، وفي نفس الوقت بتحبه، هيساعدك كتير جداً على التركيز على الفكرة

كل ما تركيزك زاد على الفكرة دي كل ما هتلاقي تطورات أكتر وأحداث وحتى أشخاص انجذبت ليك تساعدك في تحقيق فكرتك دي، عن تجارب شخصية، والمرة دي انا اللي بقولك

على اد ما تقدر، خليك فاكر الفكرة دي ومركز عليها، ما تنساهاش، ممكن هتلاقي مقاومة الاول خصوصاً ان العقل الدافع شائع أكتر من الجاذب، لكن بعد كده النتائج اللي في الآخر تستحق، كفاية انك هتمتلك عقل، كل ما تركزه على حاجة بإذن الله وفضله، هتقربلك

ركز، ارغب، حب، اجمع التلاتة دول في حاجة واحدة، ويبقى ده أول جزء من مفتاح قانون الجذب

تاني حاجة في مفتاح قانون الجذب، او تاني تركيب، أو تاني جزء، المهم انه التاني وخلاص، الإيمان

الإيمان ؟

الإيمان ان الحاجة اللي انت عايزها هتحصل فعلاً بإذن الله، وفي الوقت اللي انت حددته في الورقة، وأن المرحلة اللي انت فيها دي - ودي حقيقة - مرحلة انتظار و اعداد، انت مؤمن جداً ان الهدف هيتحقق بإذن الله في التاريخ ده بالظبط، ان ماكنش قبل كده

وهنا عايز أكلمك عن نقطتين، أول حاجة نقطة قانون الجذب نفسه، قانون الجذب قانون كوني، يعني ايه؟

يعني ما ينفعش تبصله من زاويتك انت وانت بتفكر في مدى سهولة أو صعوبة تحقيق الهدف، زي مثال دايماً بحب أقوله

أب وعد ابنه الصغير - 7 سنين - انه هيشتريله لابتوب في عيد ميلاده، بالنسبة للطفل الصغير لابتوب ده هدف كبير جداً ، وصعب يعمله لواحده ان ماكنش مستحيل، لا يمتلك المقومات لا المادية ولا المعرفية، ولا يعرف هيشتريه منين ولا ازاي ولا هيجيبه البيت في ايه ولا يعرف أي حاجة، بالنسبة ليه، للطفل، اللاب هدف مستحيل

على عكس الأب، لابتوب هدف سهل جداً، ممكن يجيبه بتليفون صغير هيعمله وفي نفس اليوم

مع اختلاف الفارق طبعاً، بس عايزك تعرف دايماً انك لما بتستعصب الهدف يبقى بتبص ليه من زاويتك انت بس، ونسيت انك بتطلب من اللي أقوى مني و منك ومن أي حد، ومن الكون نفسه

رب الكون، خلي يقينك فيه كبير، كون انك تشك في ان الهدف ده يتحقق في الوقت ده يبقى سلبيتك، من غير ما تعرف، بتخليك تشك في قدرة ربنا والعياذ بالله، ربنا بيحبك، واليقين بالله أقوى من أي حاجة تانية، وكلنا عارفين قصص الصحابة ويقينهم بالله

تاني نقطة، الشك لما يبدأ يجيلك، خصوصاً عن طريق الصوت الداخلي، اللي ممكن يكون بيضايقك في حاجات كتير، المشكلة ان دايماً الناس شايفه ان الصوت ده هو الآمر الناهي

اللي يقوله لازم يبقى صح، ولازم يحصل، لو جربت مرة تبصله، مش تسمعله، لو جربت مرة تشوف الصوت ده على انه مثلاً، رأي زي أي رأي ممكن تسمعه من أي حد من صحابك أو عيلتك، وانت حر تصدقه أو ما تصدقوش، وان كلامه مش وحي منزل لازم يتحقق، هترتاح كتير، اتحكم انت في الصوت ده مش هو اللي يتحكم فيك، بصله على انه مجرد رأي زي أي رأي ممكن تسمعه،

وفي حاجة جميلة أوي هتساعدك في الحكاية دي، كل ما الصوت ده يقولك حاجة سلبية، مثلاً زي : عمرك ما هتعمل كده، الموضوع هيبوظ، هتفشل..الكلام ده كله

كل ما الصوت ده يقولك حاجة كدة، اضحك ضحكة استهزاء بسيطة، ضحكة حقيقية مش داخلية، ضحكة استهزاء بسيطة كدة تحمل كل معاني الاستهزاء

خلي عندك إيمان دايماً انك ان شاء الله عشان انت عايز كدة، في الوقت ده، يبقى بإذن الله تعالى، هيحصل كدة، في الوقت ده

تالت وآخر جزء في المفتاح الطويل أوي ده، هو الطبيعة

يعني ايه الطبيعة ؟

في شعورك في التعامل مع الهدف، في 3 أنواع

التأكيد..أنا متأكد ان الهدف ده هيحصل ان شاء الله

الثقة..أنا واثق ان الهدف ده هيحصل ان شاء الله

الطبيعة..

أنا عارف ان الهدف ده هيحصل ان شاء الله، عشان ده الطبيعي

يعني ايه ؟

!!يعني طبيعي انه يحصل

أيوة يعني ايه برده؟ يعني كدة كدة بإذن الله، العادي والطبيعي ان اللي انا عايزه هيحصل

!!عشان دي الطبيعة اصلاً

لو قدرت توصل للاحساس ده

يبقى تبدأ من دلوقتي تحجز مكان في قسم قصص النجاح هنا عالسايت

بس عشان تتمكن من الاحساس ده جداً، لازم الأول تكون قدرت تتعامل مع الجزئين اللي فاتوا، الفكرة والإيمان

!!وقتها هتلاقي الطبيعة بقت حاجة طبيعية

طبيعي، مش كدة ؟

كده انت عرفت قانون الجذب، بس في حاجة عايز انصحك بيها، اعتبرها حاجة تحط فيها المفتاح تحافظ عليه

هي انك ما تقولش لحد على أهدافك، خصوصاً خصوصاً، لو كنت لسه في بداية معرفتك بقانون الجذب، اتكلمنا عن الحكاية دي قبل كده بالتفصيل، لكن المهم

ما تقولش لأي حد، حتى أقرب الناس ليك عن أهدافك

كدة خلصنا المفتاح، وان شاء الله اشوفك المقالة الجاية - الخلاصة

بالتوفيق ان شاء الله

قانون الجذب

!! مفاجأة – عايزك تساعدني في كورس قانون الجذب الجديد

April 13, 2012 — by فيصل عبد الواحد40

thank-you.jpg

المقالة دي استثنائية، ماكنش محطوطلها جدول زمني، لأنها بتقطع الجدول الزمني الخاص بسلسلة مقالات "ورقة وقلم" لكن عشان هي مهمة

حطيتها ليك

انا مش هتكلم عن معلومات جديدة في المقالة دي

انا بس هقولك

اني عايزك تساعدني

بالظبط زي ما مكتوب في العنوان، ما حبتش أكتب "ساعدني" وأسيب التفاصيل للموضوع

حبيت أوضح كل حاجة في العنوان

انا عايز مساعدتك في الكورس الجديد لقانون الجذب اللي هعمله

هيبقى ان شاء الله كورس كامل شامل - والكمال لله وحده - عن كل ما يتعلق بقانون الجذب

من أول يعني ايه عقل واعي و عقل باطن

والمعايشة

والمعتقدات السلبية

وتحقيق الأهداف

والبرمجة اللغوية العصبية

والتنويم الإيحائي

وكل حاجة متعلقة بقانون الجذب من الـ أ إلى الـ ي، كل حاجة بمعنى كل حاجة، بتمنى انك تفضي نفسك لمدة كبيرة بعد ما تاخد الكورس عشان هيكون كبير جداً، انا مش هوقف خدمة الأبلود الغير محدود - ستريمر - من فودافون عشان أقدر أرفع محتويات الكورس

بوجه عام، ده الجزء الأول من الكورس، الجزء التاني من الكورس

هيكون استخدام كل ده - بشكل عملي - لجذب أهداف مخصصة

المال

الزواج

العمل

كمان هتكلم عن أنواع المعادلات الخاصة بيا، الكتابية، والتخاطر، واحتمال - مش أكيد - أتكلم عن المعادلة الأصلية

اللي عايز مساعدتك فيه، انك تقولي مشكلتك، تقولي اقتراحاتك، تقولي أي شيء تحب تضيفه للمنتج - الصوتي بالمناسبة مش هيكون مجرد كتب مملة تقراها وبعض المفاهيم لو احتاجت ممكن تكون مرئية كمان بإذن الله

قولي مشاكلك ايه، أو المشاكل العامة الي بتقابلك ايه عشان أقدر أحطلها حل ، انا عايز المنتج ده يكون مناسب لأكبر عدد ممكن من الناس، عايز كل اللي يشتريه يستفيد بيه لأقصى درجة ممكنة، مش عايز أسيب حاجة متعلقة بقانون الجذب ما أتكلمش فيها

عايز أديك كل اللي عندي

لو مشاركتك قصة نجاح، ابعتهالي، وهكتبها وهحط اسمك معاها

لو مشاركتك شهادة أو تقدير للموقع أو ليا، او انت استفدت من الموقع ولا لأ، ابعتهالي وبرده هحطها في المنتج وهحط اسمك - وصورتك معاها لو تحب

لو مشاركتك مشكلة أو كمية مشاكل - ياريت ياريت تبعتها عشان اقدر احطلها الحل اللي يخليك، ويخلي ناس كتير بتشاركك نفس المشكلة، يتغلبوا عليها ويحققوا كل اللي هما عايزينه ان شاء الله

ابعتلي أي حاجة من دول، او ابعتلي رأيك أو مقترحك، أي شيء تقدر تساعدني بيه عشان المنتج يكون أقرب ما يكون لفايدتك وفايدة الناس، ابعتهولي

لو تحب تشارك بيها هنا اوك

لو تحب تبعتهالي بشكل شخصي - وده يكون أحسن - ابعتهالي على

personal@amirnafsak.com

وابعت كل البيانات الخاصة بيها

مستني مشاركتك ان شاء الله

قانون الجذب

معاك ورقة و قلم ؟

April 11, 2012 — by فيصل عبد الواحد38

writing1-1024x692.jpg

لسه ما جبتش ؟

الورقة والقلم، لسه ما جبتهمش ؟

عنواني كان واضح، مش كدة؟

معاك ورقة و قلم؟

ما تخافش، مش هقولك تكتب حاجة، أنا بس هكلمك، ليه لازم يبقى معاك ورقة وقلم

أو بمعنى أصح، علاقة ده، بقانون الجذب

والمقالة الجاية ان شاء الله، هقولك على طريقة، انا ما قولتهاش لحد - لحد الوقتي - عن استخدام الكتابة

تعتبر تاني أهم الأسرار الي ما بحبش أقولها، ليه، عشان حاجات كتير، أولهم أنها فعالة جداً لدرجة اني خايف عليك منها، ممكن تشتغل ضدك من غير ما تعرف

عن تجارب شخصية، وكمان عشان عايزه خطوات مسبقة، المهم، خلينا في مقالة النهاردة

الورقة والقلم

خليني الأول، أعرف انت ايه، هل انت شخص بتحب تفكر بطريقة منطقية، أو بتحب القوانين واللوائح والالتزام - الشديد المستفز - بيهم، اما بتشوف حاجة مايلة تحب تعدلها، اما تشوف ورقة قدامك عالمكتب مش في وضعها الطبيعي، القائم بزاوية 90 درجة، بتبقى هتتجنن لو ما عدلتهاش

!! أو لما بتحب تفكر بتحب تفكر بالورقة والقلم، أو يمكن بتفكر كتير جداً قبل ما تعمل حاجة، يمكن أكتر، بتحب نسب نجاح أي حاجة تعملها تكون 100%..على الأقل

لو أنت شايف نفسك فيك حاجة من دي، أو حاجات زيها، يبقى مبروك، انت شخص يغلب عليك، تحكم الجانب الأيسر من المخ، هنعرف الكلام ده مهم ليه حالاً

بالنسبة للبنات، والبنات بس، انتي أوضتك مترتبة ولا الحاجات فيها بتضيع كتير؟ يعني المنظر العام لو حد دخل أوضتك - أو شقتك - ممكن يقول عليها مترتبة كويس جداً، ومنظمة، ولا عادية ؟

لو كنتي من النوع الأول، اللي أوضتها أو شقتها مترتبة وسهل تلاقي فيها الحاجة الي بتدور عليها، يبقى برده مبروك، انتي من اللي يغلب عليهم تحكم الجانب الأيسر من المخ، وبرده هنعرف الكلام ده مهم ليه، وبرده، حالاً

أما لو أنت ما بتحبش تتقيد بقواعد، ساعات كتير بتاخد القرارات بناء على احساسك او بناء على خيالك، أو يمكن بتحب الرسم، مواعيدك مش مظبوطة، دايماً ما بتحبش الحلول التقليدية، عايز تكون مبدع، أو شايف نفسك انك مبدع، يبقى مبروك، انت من الأشخاص الي يغلب عليهم تحكم الجانب الأيمن من المخ، ونفس الحكاية بالنسبة للبنات

المشكلة، اللي عارف انك أكيد بتفكر فيها الوقتي

!! انك شايف نفسك من النوعين

يعني ايه، يعني انا أيمن وأيسر

الحقيقة اللي ماحدش من المدربين عايز يقولها..آه، كل الناس بيحكمهم الجانبين من المخ

ما أظنش ان في حد عنده جانب من المخ مش موجود، او ما اتولدش بيه، او بينساه لما يخرج من البيت

الجانبين شغالين، وشغالين كويس جداً

في حد ممكن يكون بيقرأ الوقتي، يقول اه، المسألة مسألة نسب، نسبة وتناسب يعني

يعني ممكن يكون الجانب الأيمن متحكم بنسبة 60%، والأيسر بنسبة 40%، مش كدة؟

لأ معلش، برده مش كدة

هو آه ده صح نوعاً ما لكن مش بنسبة 100%، لكن الصح، ان الحياة ما ينفعش تحطها في خانة واحدة

انت مش كمبيوتر، ومواقفك الي بتتعرضلها في الحياة ما ينفعش تمشي بالنمطية دي، يعني ايه برده ؟

يعني في مواقف بتحصلك، بتكون فيها منطقي جداً، وما بيجيش في دماغك وانت بتفكر فيها، أو بتتعامل معاها أي محاولة للابداع

وفي مواقف تانية، بتنسى ان موجودلها أسس وخطوات لازم تمشي عليها

!!وأنت نفس الشخص

يعني ممكن تلاقي واحد عشان مثلاً، يتكلم مع خطيبته، بيفكر، ويرتب، ويحفظ، ويعمل خطوات، وفي باقي حياته، ما بيحبش يتقيد بأي قوانين، ودايماً أفكاره وكلامه مع الناس غير تقليدي، وبيقدم حلول ابداعية لكل حاجة تقابله، وممكن ده يكون أصلاً سر اعجاب خطيبته بيه

! الأمثلة كتير لكن ده مش موضوعنا، وعايز أدخل في الموضوع على طول عشان المقالة بدأت تكبر مني

لو سلمنا بمبدأ ان لأ، لازم يكون في جانب غالب على الشخص، الأيمن مثلاً - والمبدأ ده صحيح في حاجات وغلط في حاجات - يبقى أكيد طريقة تفكيره، وتعامله مع الحاجات حواليه، وحتى تعامل الحاجات الي حواليه معاه، تختلف مع شخص يغلب عليه الجانب المخالف، الأيسر

ومن ضمنهم، قانون الجذب

يعني لو شخص منطقي، أكيد هيفضل الورقة والقلم في التعامل، وسلسلة الأهداف، والتخطيط الكتابي، والمواعيد، وكل الحاجات دي

لكن لو شخص ابداعي، أكيد هيفضل المعايشة، الخيال، تكوين صور عن الأهداف

طب لما الحكاية سهلة كدة، الناس عندها مشاكل مع قانون الجذب ليه ؟

عشان المشكلة الي قولناها من شوية، مفيش شخص عايش بجانب واحد

أهمية الكتابة، مش عشان انت شخص أيمن أو أيسر، ودي مفاجأة للناس الي قرأت كتابي عن المعادلة، عشان أهمية الكتابة

هي طريقة تواصلك مع عقلك الباطن، لكن في صورة واحدة بس، انك بتأكد، انك عايز الشيء الي بتكتبه

العقل الباطن بيوصله منك يومياً آلاف الرسايل والأهداف والأماني - بدون أدنى مبالغة

قانون الجذب في تعامله مع عقلك الباطن بيلاقي أنصاف أهداف، أرباع أماني، أتمان أحلام، وبيجذلك كل ده

ولو حصل ولقى حاجتين متعارضين، بيجذب الأقوى، يعني لو في ربع أمنية دخلت لعقلك الباطن، انك عايز تبقى غني عشان شوفت واحد غني وشوفت اسلوب حياته مثلاً، هيجذبلك العكس تماماً لو في معتقد راسخ جواك، بتقوله لنفسك كل يوم، استحالة، عمري ما هبقى كدة لو بعد 100 سنة

وبرده، الامثلة كتير، المهم، الورقة الي بتطلع فيها أمنياتك، بتقول فيها لعقلك الباطن، هي دي، هي دي الحاجات الي انا عايزها

آه هيا دي، باقي الحاجات ماكنتش أقصد أوصلهالك

انا عايز اللي انا شايفه بعينيا، وأنا بكتبه بإيدي الوقتي

سيبك من أي حاجة تانية

!! انا بصراحة كنت ناوي أخلي المقالة على آخر 3 جمل، عشان تبقى قصيرة، لكن مش عارف طولت مني كدة إزاي

أشوفك المقالة الجاية ان شاء الله، والمعادلة الكتابية، وخطواتها ان شاء الله

قانون الجذب

Generalization – التعميم في قانون الجذب

March 26, 2012 — by فيصل عبد الواحد10

nlp-man-from-web.jpg
قانون الجذب والتعميم
قانون الجذب والتعميم

إزيك عامل ايه، كلمتك عن البارادايم، والكلام لسه ما خلصش ولا عمره هيخلص، انا لسه عايز كمان اعمل مقالتين او تلاتة عن البارادايم ان شاء الله عشان ألملك كل الي أعرفه عنه بإذن الله

لكن النهاردة حبيت اكلمك عن حاجة تانية، انا شخصياً بتسأل عنها كتير

وأنا بدرس البرمجة اللغوية العصبية، اتعلمت ان في دايماً "أبروتش"

Approach

الإنسان بيستخدمه في كل حياته،،وهو التعميم، يعني ايه التعميم

يعني ايه التعميم، وعلاقته ايه بقانون الجذب؟

التعميم ببساطة لما انت تقوم من النوم متأخر عشان تروح مشوار مهم، عشان راحت عليك نومة، تقول يووه، هو أنا كدة، كل ما أروح أقابل الشخص ده يحصلي كدة

انا كل ما أعمل كذا يحصل كذا

انا دايماً الناس تعاملني وحش

انت دايماً ظالمني

انت دايماً تفهمني غلط

نظرية التعميم نظرية خطيرة جداً جداً، واتعلمنا كمية أسألة بالذات عشان نكسر الحتة دي عند المريض في جلسة البرمجة اللغوية العصبية، واتعلمنا ازاي نقولها، وايه الكلام الي نضغط عليه وايه الكلام الي تعلي صوتك فيه..وحاجات كتير هتتعلمها لو درست البرمجة اللغوية العصبية

لكن النظرية دي خطيرة ليه..عشان أصلاً..هي مرتبطة بقانون الجذب

لو الشخص ده، مركز ان الناس دايماً وحشة معاه، الناس فعلاً دايماً هتبقى وحشة معاه

في رأيك..الزوجين اللي بيتخانقوا دايماً عشان نفس السبب

هي : ما بقاش حنين زي الأول بقى بيتعصب على أقل حاجة، كل ما اكلمه يتعصب عليا

!! هو: بقت دايماً تشوف الي يعصبني وتعمله، قلتلها 100 مرة ما تعمليش "..." وبتعمله برده، كل مرة كدة يعني

! تعميم

التعميم بيجذبلك أكتر من الي انت بتعممه، حتى لو الي انت شايفه ده حقيقه، عشان كده من الاتجاهات السائدة جداً في قانون الجذب، انك تقول لعقلك الباطن على حاجة بتحصل، وهي ما بتحصلش، اللي ببساطة انك تقول انا غني انا معايا فلوس كتير..أنا أنا انا

التعميم بيعمل عندك معتقدات، قانون الجذب بياخدها يشتغل بيها

لأن زي ما قولنا قبل كدة، المعتقدات هي اللي بتأثر على قانون الجذب، مش العكس

هقولك حاجة جميلة جداً ممكن ما تصدقهاش، لكن صدقها عشان انا شخصياً شوفتها

جو فيتالي، أحد عمالقة قانون الجذب في العالم، مؤمن انك لازم تنسى الحاجة عشان تنجذبلك، وشايف انك لو فضلت تفكر فيها عمرها ما هتجيلك

وناجح جداً بالاتجاه ده، ومن أغنى الناس في العالم، الحقيقة جو واحد من الناس الي عنده أغلى تجميعه لأغلى السيارات وأندرها في العالم

بوب بروكتور، أحد عمالقة قانون الجذب في العالم، أستاذ جو فيتالي، شايف انك لازم تفضل فاكر الحاجة الي انت عايزها عشان تنجذب ليك، وشايف انك لو ما عملتش كدة مش هتجذبها ليك، وناجح جداً بالاتجاه ده، ومن أغنى الناس في العالم، بوب من القلة في العالم الي عامل سيستم لجذب الأموال بقانون الجذب - لمدة شهر تقريباً - ونتايج نجاحه 100% يعني كل الي اتدربوا عليه جذبواً فعلاً النتيجة الي كانوا عايزنها

!! طب إزاي

الاتنين ماشيين بمبدأين عكس بعض

والاتنين ناجحين جداً جداً جداً بقانون الجذب، سواء مع نفسهم، او في تدريسه للناس

والاتنين أصدقاء جداً، بالمناسبة مفيش حد فيهم عيب على التاني ولا قال ده ما بيفهمش ولا بيقول ولا بيقول، أتخيل الموقف ده لو كان عندنا في مصر أو أي دولة عربية، كان ممكن نشوف الاتنين في قضايا سب وقذف..المهم

كل واحد في الاتنين دول عنده معتقد، عايش بيه، وشغال بيه

وناجح معاه جداً، وناجح مع كل واحد بيدربه عليه كمان

ده عشان ايه

عشان قانون الجذب مش اختراع عشان يحكمه قوانين

قانون الجذب، أو الجذب عشان نكون صح، طاقة، لا تحكمها قوانين البشر

كل الي بتعمله انك بتوجه الطاقة دي بترسانة المعتقدات الي بتتراكم عندك

فشوف انت ترسانة المعتقدات بتاعك بتتكون من معتقدات ايه، شيل المعتقدات السلبية، وسيب المعتقدات الإيجابية، أو المحايدة، أهم حاجة ما تكونش معتقدات تضرك

انا مكتوبلي اعيش كدة

احنا هنفضل في الفقر ده طول عمرنا

الأغنياء يدخلون النار

عشان اعمل مليون جنيه محتاج 10 سنين

عيش عيشة أهلك

احنا عايزين نعيش ونمشي جمب الحيط

راحة البال في الفقر

...

القايمة كبيرة، وما تستحقش مني اني أكتب عنها اكتر من كدة

أتمنى ان الموضوع يكون عجبك ان شاء الله

وأشوفك الموضوع الجاي

قانون الجذب

البارادايم 2

March 19, 2012 — by فيصل عبد الواحد71

Bad_DNA.jpg
فيصل عبد الواحد قانون الجذب
فيصل عبد الواحد قانون الجذب

السلام عليكم

إزيك يا جذاب، حلوة الكلمة دي، جذاب، مش كدة ؟

من النهاردة هخاطب كل مشتركين الموقع بكلمة الجذابيين

النهاردة جيبتلك الجزء التاني من المقالة اللي فاتت - البارادايم - وبرده من الموقع الشقيق - الأصغر للموقع الي انت عليه الوقتي

مدير نفسك

زي ما قلتلك برده ده موقع خاص بالربح من الانترنت بس في بيهتم بالجانب الداخلي والنفسي أكتر، مش هطول عليك

أسيبك مع المقالة وأتمنى تعجبك ان شاء الله

--

أتذكر؟

نعم، البارادايم، تذكره جيداً أليس كذلك ؟ إذا لم تكت تذكره فيمكنك انعاش ذاكرتك من هنا : الربح من الانترنت – الجانب الداخلي، حسناً، هذه المقالة تكملة للبارادايم

لا، المقالة السابقة تكفيك كي تتغلب عليه، ولكن رأيت أن أمدك بالمزيد من المعلومات عن البارادايم، عدوك – المؤقت – وستعلم لماذا استخدمت كلمة المؤقت بعد قليل، المهم..الحرب ستكون بينك وبين البارادايم، سيستخدم البارادايم الآتي من الأسلحة

المشاعر الداخلية – الجوع، الندم، التعب، الإرهاق، الخوف، التردد، الحزن، اليأس، التشاؤم، سيطرته على افرازاتك وهرموناتك

الأحلام – يمكن أيضاً للبارادايم أن يستخدم الأحلام كي يوصل لك رسالته، فقبل كل شيء، البارادايم جزء من العقل الباطن، وليس أي جزء، بل الجزء المسيطر

قانون الجذب – جذب أحداث تؤكد كلامه لك، ربما ترى علامات تؤكد صحة ترددك، ربما يصيبك حادث وأنت في الطريق لإنهاء اجراءات تتعلق بمشروعك الجديد

قانون الجذب – جذب أشخاص تؤيد وجهة نظره، تثنيك عما تحاول ان تفعله

قانون الجذب – جذب أحداث تؤدي إلى فشل مشروعك الجديد في أول أيامه

حسناً، الحرب تبدو غير متكافئة البتة، البارادايم يمتلك العديد من الأسلحة الفتاكة التي يمكن لها أن تقتل أي محاولة للتغيير، حسناً، لنر أسلحتك الآن

صلاة الاستخارة

اليقين بالله

الثقة بنفسك

الرغبة

العصيان

صلاة الاستخارة ستذكرك دائماً أنك استخرت الله قبل أي شيء وإذا ما تلاعبت بك الظنون، ستتذكر انك صليت استخارة، سواء في بداية الامر أو في منتصفه، فالله راض عما تفعله بإذن الله

اليقين بالله، طالما صليت الاستخارة، فطبيعي أن ينمو لديك اليقين بالله وبقدرته على نجاتك من أي شر، وعلى انجاح أي تغيير ترغب به

الثقة بنفسك، مع الأسلحة السابقة، الثقة بالنفس ستكون عامل مهم جداً في مواجهة البارادايم، مع الوقت ستتعود على “إهمال” كلام البارادايم لك طالما أنت واثق بنفسك

الرغبة..حسناً، سيحتاج هذا الأمر إلى شرح طويل، دعني أولاً ان أحدثك عن وهم كبير نعيش فيه، اسمه، الإرادة !

أو بمعنى أصح، الشق الخارجي من الإرادة، حسناً، مهما حدث لي، لن آكل أي شيء اليوم كي أحافظ على الريجيم، ساعة..ساعتين..ثلاثة..أربع ساعات، وتجد نفسك مجبراً على التخلي عن قرارك السابق، والذهاب إلى أقرب مطبخ وتتناول أكثر مما كنت تتناول في العادة، لذلك تفشل أغلب برامج الحميات الغذائية، نفس المشكلة مع التدخين والإقلاع عنه، ومع أي محاولة للتغيير

الشق الخارجي للإرادة هو اتخاذ قرار من الجزء المنطقي من العقل، أو العقل الواعي، الذي يفكر ويتخذ القرارات بناء على ما امامه من معطيات، فأنت فكرت في ما امامك من معطيات، وزنك زائد، نظرة الناس إليك ربما تحمل نصيباً من السخرية، الملابس التي ترتديها ربما تخجل وأنت ذاهب لشراءها، المهم أنك اتخذت قراراً بناء على وقائع ومنطقيات

طبيعي أن يفشل، خصوصاً مع ظهور العقل الباطن، بلاعبه المميز، البارادايم، في أرض الملعب !

أما الشق الداخلي من الإرادة، فهو الشق الذي يأتي من داخل العقل الباطن، كيف؟

هل رأيت أحداً في أحد الأيام يقوم بسلوك إيجابي أو سلبي، لأول مرة، ويعتاد عليه ويفعله دون أدنى صعوبة او مقاومة من داخله او ممن حوله ؟

ربما تكون أنت قد جربت شيئاً كذلك، سبب ذلك أن التغيير، أو الإرادة في التغيير، أتت من العقل الباطن لهذا الشخص، زرعت بداخله رسالة – بداخل عقله الباطن – أرغمته على التغيير، ولأنها أتت من العقل الباطن، فطبيعي أن تقل المقاومة، وربما تنعدم

لماذا تشرب كوكاكولا أو بيبسي؟ هل تتذكر أي إعلان لأي منهما يقول لك :

اشرب كوكاكولا لأن المادة “…” التي تحتوي عليها كوكاكولا تساعد في زيادة نسبة ال”…” في الدم، مما ينشط القدرة الذهنية ويساعد على التركيز، وأيضاً تحتوي على مادة منشطة لإنزيم “…” الذي يساعد على..

إطلاقاً !!

لأنهم ببساطة لا يخاطبوا الجانب المنطقي من عقلك، هناك رسالة موجهة لعقلك الباطن، يتلقاها هو دون أن تشعر أنت، ويقوم بتنفيذها تلقائياً حين يجد الحاجة، لعل آخر رسالة في اعلان كوكاكولا هي، اشرب تفرح، مع “البرهجة” و”الدوشة” في الإعلان لإلهائ العقل الواعي عنها، ربما وجدت نفسك في احد الأوقات مكتئباً، أو حزيناً، فقررت أن تشتري “كانز” وتشربه..!

اشرب .. تفرح

المهم.. هذا هو وهم الإرادة، إذاً ما هي الرغبة؟ الرغبة التي ستسخدمها ضد البارادايم، هي رغبتك وتعلقك بالحلم أو الهدف الذي تريد أن تتغير من أجله، رؤيتك لذلك الهدف وأنت محققه بفضل الله، ورغبتك الشديدة به كفيلة بمساعدتك على التغلب على أعتى بارادايم، المهم أن تتعلق بهدفك كفاية حتى تثق به كل الثقة، وتثق بقدرتك على تحقيقه بإذن الله مهما كانت الظروف

أما العصيان، فهو ببساطة، بعد تمكنك من كل ما سبق، ستتمكن من قول “لا” لأوامر البارادايم..ستتمكن من قول لا للبارادايم عندما يأمرك بالنوم ساعة زيادة، او بأكل ما تبقى في الطبق، او بعدم قراءة تلك المقالة لآخرها، ستكون قادراً ان تقول لا

وقتها، ووقتها فقط بإذن الله، ستكون قادراً على قهر البارادايم، ومن ثم..يتم برمجته على برنامج جديد من العادات والسلوكيات، ويتم تخزينها داخلك، ويصبح هو صديقك !

يحثك بكل ما يمتلك من أسلحة على تنفيذ تلك البرامج الجديدة، يوقظك قبل صلاة الفجر بدقيقتين حتى لا يؤلمك صوت جرس المنبة، اولاً وأخيراً هدف البارادايم الأسمى هو حمايتك، وطالما تمت برمجته على الاستيقاظ في موعد صلاة الفجر، ستجده يفعل كل يقوى عليه لإيقاظك وقتها، أو قبلها بقليل كما قلت الآن ليحميك من صوت رنين جرس المنبة

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close