main

قانون الجذب

قانون الجذب – أيوة عايز فلوس

February 4, 2012 — by فيصل عبد الواحد14

مش عيب صدقني..!

آه مش عيب انك تكون عاوز فلوس..

العيب، انك تكون عاوز فلوس وتحاول تقنع نفسك، انك مش عاوز فلوس

أو تقنع نفسك انك غلطان، انك عاوز فلوس

أو تلوم نفسك انك ازاي، في يوم من الأيام تجرأت وفكرت، انك تعوز فلوس..

صدقني..مش عيب !

مجتمعنا هو الي ربانا على معتقدات غلط

الفقراء يدخلون الجنة

الأغنياء كلهم نصابين وحرامية

الفلوس الكتير بتقل راحة البال

المال لا يشتري السعادة

آخر واحد ده انا عارف ان ناس كتير أوي، هتعارضني فيه، لكن خليني معاك واحدة واحدة

أنا شخصياً، واحد من الناس، بفرح جداً لما أكون سبب في فرحة حد، أو قدرت إني أساعده

دي حاجة بتفرحني أوي

اختي مثلاً عايزة موبايل جديد، انا اشتريته ليها، وشوفت الفرحة في عينيها وهي بتفتح العلبة الجديدة بتاعته، دي عندي لحظة بالدنيا كلها

الفلوس الي خلتني قادر أشتري لأختي الموبايل..

نفس النظرة الي بشوفها في عين "شحاتة" محتاجة، لما بديلها حاجة بسيطة، قد تكون اعلى من الي هي متعودة انها تاخده من الناس، عشان أساعدها، وعشان اشوف الفرحة والرضا في عينيها..دي بتحققلي فرحة كبيرة جداً بحمد ربنا عليها اني كنت سبب فيها

الفلوس خلتني أقدر أسعد الست دي

الفلوس تقدر تخليني أساعد حد محتاج، وده الي بيفرحني جداً لما أعمله

يعني فعلاً الفلوس تقدر تشتري السعادة

الفلوس في حد ذاتها مالهاش لون..وسيط مالوش قيمة خيرية أو شريرة في حد ذاته

انت بمعتقداتك وأفكارك واستخداماتك الي تقدر تخلي الفلوس جميلة، وتفرحك وتفرح كل الناس الي حواليك، و"تشتريلك" السعادة، وانت برده الي بمعتقداتك وأفكارك، تقدر تشتري بيها البؤس ليك والي حواليك

يقول خاتم المرسلين وزينتهم - صلي على الحبيب المصطفى - عليه الصلاة والسلام ما معناه :

إذا غضب الله على أحد رزقه من حرام، وإذا اشتد غضبه بارك له فيه

المال، زي ما ممكن يكون وسيلة

ممكن ومش عيب يكون غاية

بالعكس، المهم تشيل من جواك الصوت الوحش ده

الي دايماً يأنبك ويلومك لما تفكر انك عايز فلوس كتير

لدرجة ان في ناس اقتنعت خلاص ان عشان تعمل فلوس كتير وبسرعة..

لازم ولابد..

تكون من حرام !

سبحان الله، من يرزق من يغضب عليه من حرام ويزيد له فيه، حتى يحاسبه عليه فيما بعد، ما بالك، ما يقدرش يرزقك بحلال، تحبه ويفرحك، وكمان يبارك ليك فيه بركته الربانية ؟

دينك كامل مكتمل، مفيش حاجة في ديني ودينك الحنيف تقول ان الأغنياء نصابين او حرامية او هيدخلوا النار

حب انك تكون غني معاك فلوس كتير، تعمل بيها كل الي انت عايزه، وتفرح وتفرح الناس، وتعمل بيها اعمال خير كتير كمان تكسبك ثواب

المهم، انك تعرف انك انت..الي بتدي للفلوس قيمة

مش العكس

قانون الجذب

المختصر المفيد – الجزء الثالث

July 30, 2011 — by فيصل عبد الواحد17

dreams.jpg

المختصر المفيد - قانون الجذب

قانون الجذب

قانون الجذب

الجزء الثالث من سلسلة المختصر المفيد.

كلمتك الجزء اللي فات عن المختصر المفيد في جذب المال بإذن الله..

واتكلمنا ازاي جذب المال من أسهل ما يكون، في الحديث عن قانون الجذب، ان لم يمكن الأسهل على الاطلاق..

لإن باختصار جداً، كل الي عليك انك – تسمح – للفلوس انها تجيلك..

يعني انك ما تفكرش فيها، وما تفكرش ايه الشغل الي ممكن يجيبلك فلوس..

اعمل اكتر الحاجات الي انت بتحبها، والفلوس – على ضمانتي بإذن الله – هتجيلك لواحدها..

لكن محتاج أكلمك أكثر عن حاجة اسمها الـ Inspired Action..

عشان ناس كتير جداً فاكرة ان قانون الجذب ده، يعني انك تقعد في البيت، وهتلاقي تاني يوم شنطة فلوس، أو عقد عمل، او عربية قدام باب البيت..

رغم ان الكلام ده مهم – في جزء المعايشة – انك تتخيل وتعيش وتحس وتفرح بكل ده كإنه موجود فعلاً..

لكن خليني اسألك سؤال..

لو انت ماشي، لقيت 100 جنيه واقعة في الشارع..

محتاج تعمل ايه عشان تاخدها..؟

بالظبط، تنزل تجيبها..

لأ.. مش هي دي الـ Inspired Action .. دي الAction العادية..اللي أي حد تاني سواء عارف قانون الجذب أو مش عارفه ممكن يعملها..

لكن الـ Inspired Action  هنا.. هي انك قررت فجأة انك تمشي في الشارع ده..

أو اختارت فجأة انك تمشي تبص في الأرض..

أو لمحت مطعم أو كافيه في آخر الشارع، حاجة جواك قالتلك..

ما تيجي نجرب المطعم ده..

هي دي الـ Inspired Action ..

وهي دي، اللي استخدام قانون الجذب، بواسطة عقلك الباطن..

بيخليك تعملها..

دي فكرة الـ Inspired Action

قانون الجذب مش معناه انك توقف في حياتك..وتقعد في بيتك تنقطع عن كل الناس..

بالعكس..

لكن لما تستخدم قانون الجذب زي ما اتكلمنا عنه قبل كده..

وعيشت حياتك عادي..

هتلاقي الفرص كلها بتقربلك

هتلاقي صوت جواك بيقولك تعمل حاجات غريبة عليك..

هتلاقي نفسك عايز تعمل حاجات جديدة..

لما تعملها..

هي دي الـ Inspired Action ..

يعني لحد ما تاخد الInspired Action  دي.. هيبقى كل دور قانون الجذب، انه يجذبلك كل الفرص وكل الأهداف الي انت عايزها..

ويخليها قريبة منك جداً..

في انتظارك، انك تمد ايدك تاخدها..

مش عايز خلاص..

وعلى فكرة مش معنى انك مش عايز ان ده غلط..

انا شخصياً كتير – في أول معرفتي بقانون الجذب - بفضل الله جذبت أهداف ليا، ولما قربت وكنت على بعد مكالمة تليفون واحدة..جاتلي حاجات أحسن..فمعملتش الـ Inspired Action  دي..

ودي نفسها مشكلة..تغيير الطلبات والأمنيات كتير، دي مشكلة – أو تحدي زي ما اتفقنا - ..

تخيل نفسك قاعد في كافيه..

طلبت عصير برتقان..

وبعد دقيقتين..

ندهت للجرسون قلتله لأ..معلش..

أنا عايز ليمون..

وبعد دقيقتين..

لأ معلش أنا آسف، بس هاتلي برتقان..

وبعد دقيقتين..معلش طب بص، هاتلي مانجة..أنا عايز مانجة خلاص..

وبعد خمس دقايق، قومت زعقت قولت يوووووه..

هو الي انا بطلبه ما بيجيش ليه !!!

وسيبت الكافيه كله وخرجت..، وقولت مش هدخل المكان ده تاني..

بالظبط..نفس المبدأ بالنسبة لكثرة تغيير الأهداف في قانون الجذب..

وفي الآخر بتقول يووووه..قانون الجذب ده وهم..

انا خلاص هنسى كل الكلام ده..

الكلام ده على كل حاجة..

على الشفاء..

على المال..

وعلى انقاص الوزن..

الي هكلمك عنه ان شاء الله، الجزء ده..

المختصر المفيد في انقاص الوزن..ثالث التحديات الي الناس عايزة تستخدم فيها قانون الجذب، انك أولاً:

1-    تشيل من جواك أي معتقد سلبي زي الي اتكلمت عنهم قبل كده في مقالة السر الجزء الأول، بس هنا لازم تاخد بالك من حاجة مهمة..

مش كل المعتقدات السلبية مرتبطة بإعاقة انقاص الوزن..

يعني ممكن يكون جواك معتقد انك "فاشل" في اتباع الريجيم أو انك ماعندكش ارادة..مفهوم الإرادة اتكلمنا عنه قبل كده انه ساعات كتير بنتخدع فيه..لكن خليني ما أكترش عليك، خصوصاً وانك عايز المختصر المفيد..

اعمل الطريقة الي كانت في الجزء الأول من مقالة السر..

وفكر..ايه كل الحاجات جواك الوحشة، السلبية، الي ممكن تكون تخليك بتاكل كتير..

بتاكل لما تتخنق..

بتاكلي لما تحسي بالوحدة..

بتاكل لما تتفرج على ماتشات الكورة..

بتاكلي لما تتفرجي على حلقات مسلسل بتحبيه أوي..عشان تستمعي أكتر وانتي بتتفرجي ؟

خليني اسألك سؤال..

انت بتاكل ليه ؟!

آه انت بتاكل ليه..؟

هتقولي عشان ببقى جعان..

عشان تعيش مثلاً..مش كدة؟

طيب خليني معاك بمنطقك ده واحدة واحدة..

انت كشخص عايز تقل في الوزن..

طبيعي انك عندك وزن زائد..تمام ؟

تمام..الوزن الزائد ده الكبد بيحوله لدهون..ويخزنها في جسمك، ده الي بيعمل الكرش والحاجات دي..

عشان لو احتاجتها..

هو يحرقها ويحولها لطاقة..

عشان كده كتير أوي بتكون جعان، وهتموت من الجوع، لكن بعد حوالي ساعة او ساعتين..تبدأ تحس بالشبع..

المهم..

ان معنى كده، انك مش محتاج تاكل..!

معنى كده..

انك المفروض..

ما تجوعش..!

بالظبط..

ودي حقيقة على فكرة..في دراسة قراتها في كتاب عن انقاص الوزن والتنويم بالإيحاء، كان في احصائية ان حوالي 95% من الشعور بالجوع، هو شعور وهمي..!

العقل الباطن هو المسئول الأول عنه عشان يحميك من خطر الموت، الناجم عن عدم الأكل..

عشان هو فاهم كدة..

عقلك الباطن فاهم انك لو ما كلتش..هتموت..!

يعني الطبيعي انك فعلاً ما تجوعش..

ده شعور وهمي..ناتج كمان عن حاجة تانية خطيرة..

عن عدم انضباط مواعيد أكلك..

ممكن تفطر الساعة 8 صباحا

وممكن تفطر 12 الظهر..

وممكن تفطر 10

وممكن تفطر 4 العصر..!

طبيعي، طبيعي.. ان عقلك الباطن، بعد كذا مرة من تكرار الكلام ده..

هييجي الساعة 8، و12،و10،و4.. يحسسك بالجوع..!

فعايزك تفهم وتقتنع وتحس..

انك فعلا، طالما عندك وزن زائد..

مش محتاج تاكل..

لو كلت..هيبقى روتين..

ولو عوزت..

تقدر تقاوم الاحساس بالجوع ده..

بكل سهولة..

لأنك أصلاً.. مش محتاج الأكل..

كمان عايزك تراقب مواعيد اكلك..

وتقلل الوجبات البينية على أد ما تقدر..عشان دي اكتر وجبات عقلك الباطن بيكدب عليك فيها، لما يحسسك بالجوع..

غير كده..عايزك تنسى حكاية انك تاكل وانت بتتفرج على أي حاجة..

وقت الأكل يبقى للأكل وبس..

كمان في حيلة حلوة اوي انا بستخدمها شخصياً..

للناس الكتير الي شافتني باكل – انا بحب الأكل جداً – وفي نفس الوقت محافظ على جسمي بفضل الله..وسألتني ازاي..

هي دي الحيلة الي بستخدمها..

الأول بقيت ألاحظ مثلاً..لو هاكل سندوتش معين

بخلصه في أد ايه..

لو 3 دقايق..

بعد كده اخلصه في 6..

"القطمة" الي بتاكلها..صغرها شوية بحيث انك تخلص السندوتش – أو الوجبة – في ضعف الوقت الي بتخلصه فيها في الظروف العادية..

وكل مرة حاول تزود الوقت ده..

الحيلة دي حيلة سحرية، عايزك تجربها..

2-    برده انتزع من جواك أي كلمة وحشة اتقالتلك عن وزنك الزيادة..وإنك لازم تخس عشان تكون سعيد..على فكرة في ناس كتير مبسوطة بوزنها كدة..وانا فعلا بحب جدا الناس دي وبحترمها.. عشان عايزة تمشي على مزاجها مش على مزاج الناس..

والعكس صحيح..في ناس – في بعض البيئات – معتقدة إن الأكل الكتير، دلالة على الرفاهية في العيش..

فمحتاج – لو عايز تخس – انك تقضي على المعتقدات دي كلها..

بانك تفكر ليه..ليه انت ماشي ورا المعتقد ده..

وياريت كل تفكيرك ده تكتبه في ورقة..

وبرده تقطعها وتحرقها لما تخلص..زي الجزء الأول من مقالة السر..

كمان لازم تبعد عن كلمة Weight loss  أو فقدان الوزن..

عقلك الباطن "مبرمج" على انه يدور على أي حاجة "يفقدها" ويستعيدها بشتى الطرق..

ما تقولش أنا عايز افقد وزن..

ما تقولش أنا عايز وزني يقل..

قول انا عايز أخس..

3-    أهم خطوة..انك وانت بتتخيل نفسك في أي حاجة..سواء بتعمل معايشة أو لأ..سواء بتفتكر حتى مشهد قديم من ذكرى قديمة..

انك تشوف نفسك في المشهد ده..في جسمك المثالي..

في الجسم المثالي الي انت عايزه..

وتفرح بشكلك ده..وتفرح بوزنك المثالي ده، وتفرح بجسمك المثالي ده..

وتخيل نفسك في كل المشاهد الي عايز تتخيلها..

بجسمك المثالي ده..

وبعد كده..

لما تظهر حواليك علامات أو اشارات خاصة بهدفك ده..انك تخس..، ياريت..

ياريت..

تاخد الـ Inspired Action..

 

أتمنى ما أكونش طولت عليك..واتمنى تكون المقالة عجبتك.

قانون الجذب

قانون الجذب

المختصر المفيد – الجزء الثاني

July 29, 2011 — by فيصل عبد الواحد9

law-of-attraction.jpg

المختصر المفيد - قانون الجذب

قانون الجذب

قانون الجذب

ملحوظة : يجب قراءة الجزء السابق من المقالة من هنــــــــــــا أولاً


الجزء الأول، الجزء اللي فات من السلسلة دي – المختصر المفيد – كلمتك عن ان أكتر 3 مواضيع الناس عايزة تستخدم قانون الجذب فيها هيا الصحة، والمال، وانقاص الوزن.

وكلمتك عن الصحة..

وقولنا فيها، المختصر المفيد..

النهاردة، هكلمك عن الموضوع التاني..

التحدي التاني..

المال..

المال ده تحديداً، يمكن من أسهل – ان ماكنش أسهل – شيء ممكن تستخدم قانون الجذب فيه..

لأن المال..أو الفلوس، بتاخد دورتها بين الناس وترجع تاني..يعني ممكن ال10 جنيه الي في جيبك الوقتي، يكون أخوك صرفها من 15 سنة..

وجاتلك بطريقة انت ما تعرفهاش..

في علم الاقتصاد، اسمها

Money circulation

خلينا ما ندخلش في تفاصيل اقتصادية..انت جاي هنا عشان المختصر المفيد..

بس خليني أقولك قصة جميلة أوي قرأتها..

سائح راح فندق صغير، لوكاندة يعني..حجز أوضة، وساب 100 دولار على الكاونتر بتاع الكاشير..السور الصغير الي قدام المسئون عن الحجز، وخد مفاتيح الأوضة وطلع..

خدها صاحب الفندق..راح دفعها لتاجر الخضار والفاكهة الي في الحي بتاعه عشان كان عليه ليه 100 دولار..

خدها التاجر، دفعها للمكتبة عشان كان عليه 100 دولار خاصين بكتاب كان شاريه لإبنه..

خدها صاحب المكتبة..وراح دفعها لبنت عشان كان عليه 100 دولار ليها..

خدتها البنت ودفعتها لصاحب الفندق عشان كان عليها 100 دولار متأخرة من ايجار أوضة..

حطها صاحب الفندق على الكاونتر..

نزل السائح بعد ما لقى ان مستوى الغرفة سيء للغاية..

وخد ال100 دولار بتاعته، ومشي..

كده 100 دولار واحدة..قضت خدمات 6 أشخاص..

وماحدش خسر في الآخر..!

كان لازم اقولك القصة الظريفة دي عشان أقربلك الحكاية شوية..

الفلوس سهل جدا جذبها ليك..ومش عشان كده بس..

عشان أسباب تانية كتير، بس مش هقدر أقلهملك هنا بالتفصيل عشان انت جاي تقرأ المختصر المفيد..

المختصر المفيد في جذب المال كالآتي :

1-    انك تشيل من جواك أي معتقد سلبي، ممكن يكون هو الي بيمنع جذب المال ليك..زي معتقد ازاي واني لازم اتعب وحاجات تانية كتير، اتكلمت عنهم أكتر في الجزء الأول من مقالة السر، ياريت تراجعها من هنا.

2-    أنك تشيل من جواك أي طاقة سلبية، زي مثلاً انك تكون شايل من أي حد، حتى لو هو الي غلط فيك..أو انك مش مسامحه، أو انك عايز تنتقم من حد، زي ما قلتلك في المقالة الي قبل الي فاتت..

قانون الجذب سلاح ذو حدين، ان عقلك الباطن ما بيشوفش الشخص التاني..انت بتشوفه بعقلك الواعي، الي عقلك الباطن بيشوفه، انك انت متضايق من نفسك ومش مسامح نفسك وعايز تنتقم من نفسك..! فبالتالي بيأخر عنك أي حاجة ممكن تخليك تكون فرحان !

3-    ثالث حاجة..ودي مهمة جداً، انك تعمل أكثر حاجة انت بتحبها – مش أكتر حاجة بتجيب فلوس – وتسيب الفلوس تجيلك لواحدها، من غير ما تفكر فيها هتجيلك من انك تعمل الي انت بتحبه ازاي..

ولو قدرت تسأل نفسك السؤالين دول:

أنا بحب أعمل ايه..؟

أنا بعرف أعمل ايه..؟

وتطلع منهم بنقطة مشتركة..يبقى هايل جداً جداً..

اهم حاجة انك تشوف ايه اكتر حاجة بتحب تعملها، بتبقى فرحان وانت بتعملها، حتى لو كنت هتعملها ومش هتاخد عليها مقابل..

مش مطلوب منك الا انك تعملها بس..

بعد كده..هيجيلك ناس كتير أوي بإذن الله، عايزينك تعمل نفس الحاجة دي..الي انت بتحبها..

وهيدوك مقابلها فلوس..

لكن، لو قعدت تسأل نفسك..ايه اسرع حاجة ممكن تخليني غني..

ايه أسرع حاجة ممكن تخليني أعمل فلوس..

ايه الشغلانة اللي لو اشتغلتها هعمل فلوس كتير..

الأسئلة دي أسئلة مشروعة..لكن انت جيت عشان المختصر المفيد، مش كدة..؟

الأسألة دي ممكن توصلك لشغلانة كده، وهتقعد تتعلم فيها كتير عشان توصل للنقطة الي يبقى في ناس تانية، عملاء حقيقين، عايزينك تشتغلها بمقابل مادي..

لكن لو كنت بتعمل حاجة بتحبها اوي، وشيلت تركيزك من على انك – ماعندكش فلوس – وأنك – محتاج فلوس -..وحتى لو عملتها من غير مقابل..

صدقني هتشوف الفلوس..حواليك، وانت مش عارف بتجيلك منين..

حتى كمان، ممكن تلاقي الفلوس بتجيلك من مصدر غير متعلق اطلاقا بالحاجة الي انت بتحبها دي..

وهو ده السر..

هو ده السر المطلق الخاص بجذب المال..

هو ده مركز ولب، المختصر المفيد في جذب المال، انك تشوف ايه اكتر الحاجات الي بتحبها..

وتعملها..

وتستمتع وتفرح وانت بتعملها..

وتسيب الفلوس تجيلك لواحدها..،

 

ده..المختصر المفيد في جذب المال..

انسف أي معتقد سلبي..

سامح وانسى وحب واعف واغفر لكل الناس، حتى لو كانوا ظلموك..

شوف ايه اكتر حاجة بتحبها..واعملها، وما تفكرش في الفلوس..

 

يلا..أشوفك الجزء القادم ان شاء الله، والمختصر المفيد في انقاص الوزن.

قانون الجذب

قانون الجذب

المختصر المفيد – الجزء الأول

July 28, 2011 — by فيصل عبد الواحد11

34cw1.png

المختصر المفيد - قانون الجذب

قانون الجذب

قانون الجذب

إزيك..

ايه أخبارك بعد المقالة الي فاتت..

اخبار دنيتك ايه وأخبار الجذب معاك ايه..

شايف الدنيا حواليك سحر وفرحة وسعادة..

ولا لسه في مشاكل ؟

أو بلاش كلمة مشاكل، ما بحبهاش..

لسه في تحديات ؟

شيل كلمة "مشكلة" وكلمة "هحاول" وكلمة "مستحيل" من حياتك..

وحط بدالهم "تحدي" و "هعمل" و "أكيد"..

وجرب طريقة كلامك بالمصطلحات دي..وشوف هتجذب ليك الي انت عايزه بس ولا لأ..

لأن قانون الجذب مش بس معايشة واحساس، رغم ان ده جزء كبير جداً منه..

لكن برده، وده شيء خطير جداً، قانون الجذب ألفاظ وكلمات..

جرب تراقب نفسك..أو تمشي بورقة وقلم، وكل ما تلاحظ انك في أي محادثة مع حد قولت أي كلمة من الي قلتلك عليهم..او أي كلمة محبطة او مثبطة لهمتك أو لهمة غيرة بوجه عام..

اكتبها..

وبعد كده اقعد مع نفسك دور على مرادف ايجابي ليها..

لو لسه حاسس ببعض التحديات، او حاسس ان لسه شيء ناقص، جرب تعمل الجزء الخاص بالتخلص من المعتقدات السلبية، الي في الجزء الأول من مقالة "السر – كيف تجذب المال".

اعمله مرة واتنين وتلاتة..، وطلع كل الي جواك في الورق وقطعه واحرقه، وشوفه بعينيك قدامك وهو بيتحرق..

شيل الجدران الي غصب عنك السنين بنيتها جواك..

لأ..اتطمن،

المقالة دي مش على كدة بس..

المقالة دي بعنوان – زي ما انت قرأت من دقيقتين – المختصر المفيد..

هقدملك حلول سريعة وفعالة جداً.. لأكثر 3 تحديات بتواجه الناس..

وده تبع احصائية امريكية عن اكثر طلبات الناس المتعلقة باستخدام قانون الجذب، وهما على الترتيب :

1-    الشفاء.

2-    المال.

3-    انقاص الوزن.

المواضيع دي أكثر 3 مواضيع الناس مهتمة وعايزة جداً، انها تستخدم قانون الجذب فيها..

وهنتكلم عليهم واحدة واحدة..

وبحلول بسيطة وسريعة وفعالة جداً..

وانت هتجرب بنفسك ان شاء الله..

أول تحدي، أو أول موضوع ، الشفاء..

كلمتك قبل كده عن موريس جودمان، الراجل الي وقع من طياره وجسمه اتكسر، ونظره راح وكل حتة فيه اتحطت في الجبس..وبفضل الله استخدم قانون الجذب من غير ما يعرفه..

عشان يرجع يمشي تاني..

لكن في موضوع الشفاء، الغالب ان الي بيتكلم، او الي بيطلب قانون الجذب، مش الشخص الي عنده المرض أو المشكلة الصحية – التحدي الصحي – خلاص زي ما اتفقنا..

وحتى المريض نفسه لو استخدم قانون الجذب بيبقى في صورة  "أنا مش عايز المرض ده"..

"أنا مش عايز اقعد في المستشفى"

"انا مش عايز.."

"..مش.."

خدت بالك أكيد..مش كدة ؟

بالظبط، قانون الجذب لا يعرف أدوات النفي..زي مانتا قرأت في مقالة "أخطاء تطبيق قانون الجذب"

العقل الباطن هيشيل اداة النفي ويسمع ويخزن ويتصرف ويجذب ليك كل حاجة شبه الجمل دي:

"أنا عايز المرض ده"

"أنا عايز اقعد في المستشفى"

"أنا عايز.."

فمحتاج انك تقول كدة للشخص المريض..

كمان المريض ممكن يكون يائس أو حالته النفسية مش كويسة، فكده بيعمل قوة جذب سلبية، أو عكسية لنفسه، بيجذب ليه اللي هو مش عايزه..الي هو زيادة المرض وسوء حالته أكتر وأكتر..

فهنا انت في تحدي كبير جداً..عشان لازم توازن القوة السلبية دي بقوة جذب ايجابية منه..

لكن التحدي الأكبر فين..

أن التحدي الصحي ده يبقى عند حد تاني غيرك، وانت عايز تستخدم قانون الجذب ليه..

وأنه يكون بيتسبب في قوة جذب سلبية..ويجذب ليه تدهور حالته الصحية..

وكمان لو كلمته عن قانون الجذب مش هيقتنع..

لأ ما تقلقش الموضوع أبسط مما تتخيل..

هنا ، لازم تعمل حاجتين ، وده الجزء الأول من المختصر المفيد، اللي هو متعلق بالشفاء بإذن الله :

أول حاجة، انك تعمل المعايشة، ليه هو..وهو معافى تماماً وسليم تماما بفضل الله..بس تعملها أكثر من مرة في اليوم..عشان على أد ما تقدر توازن القوة السلبية الي هو بيعملها دي..وقريب ان شاء الله هكلمك بالتفصيل عن قوة الجذب او طاقة الجذب، بمعادلات رياضية تفصيلية ان شاء الله.

تاني حاجة، إنك تقوله على قانون الجذب..

حتى لو ما اقتنعش بيه..

بس الوقتي انت الي عرفته عليه، و طبقاً لمبدأ تضاعف وتتابع قانون الجذب..

هتعرف ان مهما كانت قوته السلبية في الجذب، فأنت هتستخدمها لصالحه..

لأن ببساطة كل ما انت تعرف حد بقانون الجذب، قوتك انت بتتضاعف، وكل ما هو يقول لحد عن قانون الجذب، قوتك برده بتتضاعف، وكل ما هو يجذب حاجة ليه، سواء عايزها او مش عايزها..

بالظبط، قوتك برده بتتضاعف..

ده تفسير سريع لـمبدئين في قانون الجذب وهما:

What you put out there gets back at you multiplied

و

You have to give to recieve

الأولى يعني الشيء او الفكرة او الحاجة او الاحساس..أو أو أو..أي حاجة بتديها لغيرك، بتخرجها بره منك، هتتردلك مضاعفة.

والثانية معناها انك لازم تدي وتشارك الي عندك، عشان تستقبل وتسمح لقانون الجذب بإنه يشتغل لصالحك..قريبين شوية من مبدأ في شريعتنا،

"لا يؤمن أحدكم حتى يحب لأخيه ما يحب لنفسه".

"الحسنة بعشر أمثالها".

صح..؟

صدق رسول الله صلى الله عليه وسلم..

أسيبك مع الجزء الأول من سلسلة المختصر المفيد..

وأشوفك الجزء الجاي ان شاء الله ، مع تحدي المال..

رمضان كريم.

 

 

 

قانون الجذب

حدد أهدافك

July 27, 2011 — by فيصل عبد الواحد33

stock-photo-confident-man-in-business-suit-against-white-background-9916192.jpg

قانون الجذب
قانون الجذب

قانون الجذب

قانون الجذب - حدد أهدافك

المقالة دي مش تكملة للمقالة الي فاتت "أخطاء تطبيق قانون الجذب"..دي مقالة زيادة عشان اساعد الي قرأ المقالة الي فاتت..يحدد هو عايز ايه..

لكن المقالة الجاية ان شاء الله هتبقى التكملة بتاعة المقالة السابقة "أخطاء تطبيق قانون الجذب".

المهم..

فاكر لما قلتلك ان ساعات كتير كان بيتفرض علينا اهداف، ومع السنين، كانت بتتبرمج جوانا على انها اهدافنا احنا..

يمكن عشان كده ناس كتير لما بتحقق حاجة كانت عايزاها من زمان..ما بتحسش بالإشباع أو بالفرحة الي كانوا متوقعينها..

آه انا بقيت دكتور..وبعدين !

مش حاسس اني فرحان أوي زي ما كنت متخيل..

انا كنت في ثانوي بذاكر وأموت نفسي واقول يارب ادخل كلية طب يارب نفسي أبقى دكتور..

وهكذا..

في راجل عظيم جدا..بس للأسف مش فاكر اسمه، بيقول

I can give people anything they want, but the problem is, they don’t know what they want..!

 

طب إزاي..نعرف احنا عايزين ايه.

الطرق كتير، لكن في طريقة جميلة جدا..لأستاذي الدكتور

Robert Anthony

بتتلخص في الآتي :

انك تقعد مع نفسك..وتجيب اهداف عشوائية انت عايز تحققها

وتشوف نفسك محقق كل هدف من الاهداف دي..وتشوف هيحققلك فرحة بنسبة كام في ال100

يعني مثلا تجيب خمس أو ست اهداف، وتشوف نفسك محقق كل واحد فيهم، وتحاول تعيشه بكل تفاصيله..وتشوف هيحققلك فرحة معاه كام في ال100

نصيحة..ما تكملش قراءة الجزء الي جاي الا اما تعمل الطريقة دي..عشان ما تبوظش على نفسك متعتها..

اعملها، وتعالى كمل قراءة..

...

الوقتي، المفروض تكون عملت الطريقة فعلا..وخلاص اختارت كذا هدف وعملت الطريقة دي عليهم..

النتيجة إيه ؟

لو الهدف، أي هدف، كانت الفرحة الي شايف انها هتحس بيها معاه، أقل من90%..يبقى ده مش هدفك انت..

يبقى ده مش هدف مرتبط بإحساس، يبقى ده فكرة، مش رغبة..

والهدف الي بيحققلك فرحة بنسبة 90% أو أعلى، هيتحقق أسرع من غيره..

بس ما تفهمش غلط، الأهداف التانية مش صعب تحقيقها عشان أقل من 90%،

لأ.. دي بس لو اتحققت مش هتحققلك الرضا والفرحة الي انت كنت متوقعهم..

كمان الهدف الي بيحققلك فرحة اكتر من 90% هيتحقق اسرع، لأنه مرتبط بإحساس..وده اتكلمنا عنه في المقالة الي فاتت..

بس..

واعمل الطريقة دي حتى لما تكون محتار بين حاجتين..ودايما، امشي مع الي يفرحك أكتر..

 

تحياتي، وأتمنى ان المقالة تكون عجبتك..وأشوفك في مقالة تانية ان شاء الله عن قانون الجذب

قانون الجذب

أخطاء تطبيق قانون الجذب 4

July 27, 2011 — by فيصل عبد الواحد20

Success-1024x1024.jpg

قانون الجذب
قانون الجذب

قانون الجذب

أخطاء تطبيق قانون الجذب 4

وقفنا المرة الي فاتت عند خطأ أنا محتاج وأنا نفسي..وإزاي ساعات بتقولها لنفسك وبكدة بتبعد عنك الهدف الي بتفكر فيه، حتى لو كنت بتعمل كل الخطوات التانية صح..

المرة دي مع الجزء الأخير ان شاء الله مع أخطاء تطبيق قانون الجذب..

خطأ الوقت..

بص هقولك حاجة..

خليني قبل ما أكلمك عن خطأ الوقت..أربطهولك بخطأ اتكلمنا عنه قبل كده..

خطأ إزاي..

الوقتي لو طفل صغير.. هدفه انه يجيله عجلة أو كمبيوتر أو أو أو..بالنسبة له..

لو سأل نفسه إزاي هجيب الكمبيوتر ده..أو العجلة دي..

بالنسبة ليه طبعا هدف صعب..إن ماكنش مستحيل..

وبرده في نفس الوقت..حتى لو كان تحقيقه ممكن ليه (هيقول لنفسه انا هحوش من مصروفي كل يوم أد كده وبعد أد كدة هجيب الي انا عايزه..) تحقيق الهدف ده..هياخد منه وقت كبير..مش كدة؟

 

لكن لو الي هيجيبهاله حد تاني أكبر منه، والده على سبيل المثال..أو أخوه الكبير..

 

ها..؟

بالظبط..نفس المبدأ الي انت بتفكر فيه الوقتي بيحكم خطأ الوقت وخطأ إزاي..

انت بتقيس الحاجة من مقياسك انت..

وبالتالي بتقول لنفسك ان عشان تحقق الهدف ده..هتاخد وقت كبير..

فكرة عامة بقى..لو انت قبل ما تطبق قانون الجذب، حطيت جواك انك عشان تجذب مليون جنيه محتاج 5 سنين..يبقى ما تزعلش لو ما عملتش مليون جنيه قبل ال 5 سنين دول..!

كل أخطاء قانون الجذب مرتبطة ببعض..الكلام ده مرتبط بخطأ عدم تقدير الذات..والتشكيك في انك تستحق الهدف ده (العربية – الفلوس – الشفاء – الزوجة – الشغل..) بإذن الله..

لو قعدت كل يوم تسأل امتى بقى امتى بقى امتى بقى..يبقى برده انت بتنفي الي اتكلمنا عنه المقالة الي فاتت..وهو انك تفصل نفسك عن الهدف..وتقتنع فعلا انك مش (محتاجه) لكن انت (عايزه)..

كمان قانون الجذب داخل في كل حاجة انت بتعملها في حياتك..

لو انت خارج تمتحن..ونسيت قلمك في البيت وقولت لنفسك يوووه..ده انا ما بعرفش احل من غير قلمي ده..

حتى لو كان الامتحان سهل..ما تتوقعش انك تحل كويس !

لو ضهرك وجعك وقولت لنفسك..انا ضهري بيوجعني أوي..يبقى ما تتوقعش ان الوجع يروح !

لو صحيت ما نمتش كويس وقولت انا لما بصحى ناقص نوم يومي كله بيبوظ..ما تتوقعش ان ده يكون افضل يوم في حياتك..!

لو حد عزيز عليك مسافر..واتأخر عليك..صدقني، صدقني عن تجارب كتير اتحكتلي..

ما تقولش انا حاسس ان حاجة وحشة هتحصل..وتقعد تتخيل حاجات مالهاش أي لازمة..

قانون الجذب في كل حاجة في حياتك..

قانون الجذب كل حاجة بتعملها وكل حاجة بتقولها..

راقب الي بتقوله..راقب الي بتفكر فيه..

وشوف السحر وهو بيحصل حواليك..

اتمنى يكون الجزء المهم جدا ده عجبك (أخطاء تطبيق قانون الجذب).. وانتظر ان شاء الله الجزء الجاي..الخاص بالتخيل وتقنيات مخاطبة العقل الباطن..

انا قاعد عالميل مستني قصة نجاحك في جذبك لأهدافك..ومستني أقراها بفارغ الصبر.. ابعت قصة نجاحك مع اسمك على  

success@amirnafsak.com

أتمنى لك جذباً ساحراً..وحياة مليئة بالسعادة..وقانون الجذب

قانون الجذب

اخطاء تطبيق قانون الجذب 3

July 27, 2011 — by فيصل عبد الواحد11

question-mark-guy.jpg

قانون الجذب
قانون الجذب

قانون الجذب

اخطاء تطبيق قانون الجذب 3

الجزء الثالث من أخطاء تطبيق قانون الجذب..

وقفنا المرة الي فاتت اننا لازم نظبط مواعيد نومنا عشان نبدأ نستفيد الاستفادة القصوى من قانون الجذب..

مخك لو مش صافي وتركيزك مش في حالته..صدقني لا هتعرف تستفيد بقانون الجذب، ولا بغير قانون الجذب..

النهاردة هتكلم عن حاجات مهمة جدا بالنسبة للأخطاء، أولهم، ما يعتبرش خطأ بمعنى خطأ..لكن هي قاعدة مرتبطة بقانون الجذب عموما..

وهي، إن قانون الجذب لا يعرف أدوات النفي..

يعني ايه ؟

يعني لو بدأت خلاص تحدد هدفك انك مش عايز تكون مديون لحد..وقعدت تتخيل وتقول "أنا ليس عندي ديون".. الي هتجذبه ليك ان شاء الله..الديون !

قانون الجذب زي ما هنعرف، ان شاء الله، في المقالات الجاية، بيتعامل مع العقل الباطن، وما بيفهمش أدوات النفي..حتى الحكاية دي مرتبطة بتقنية في البرمجة اللغوية العصبية اسمها الـ Analogue marking .. المهم مش كلامنا، اختصارا وتبسيطاً..لو كل الأخطاء الي فاتت كانت بتأخر أو بتضعف او حتى بتعدم فرصة تحقق الهدف..فالخطأ ده، مش كده وبس، لأ كمان هيجذبلك ان شاء الله، الي انت مش عايزه..الي هو في حالتنا هنا..الديون..

يعني الوقتي، ما تفكرش بصيغة "اللا"..ما تقولش أنا نفسي ما أسقطش تاني..أنا نفسي ما يكونش عليا ديون..أنا نفسي ما أكونش عاطل..

شوف عكس الكلام ده كله ايه..انا عايز انجح..أنا عايز يكون معايا فلوس كتير – وهنتكلم في الجزئية دي اكتر - ، أنا عايز اشتغل..

ركز على الجملتين اللي فاتوا دول وهقولك ليه كمان شوية..

القائمة الي عملتها بأهدافك الي اتفقنا عليها في أول مقالة..شيل منها كل الأهداف الي بالصيغة دي، وحولها للصيغة الإيجابية..

أقولك حاجة جميلة أوي..ليه الأطباء بيقولوا ان 50% - وده مثبت علميا – من نسبة شفاء أي مرض، متوقف على "الحالة النفسية" للمريض..

أي مرض.. على فكرة الكلام ده مثبت علميا وباحصائيات وأبحاث..

 

حاجة من الاتنين، يا إما مريض مش مقتنع بالإحصائية وبالتالي بيبقى معدل تعافيه من المرض بطيء..

يا إما المريض حتى الي مقتنع بالكلام ده، كل الي بيشوفه لنفسه.. إنه "معندوش" المرض ده..!!

وبالتالي..المرض هيزيد..!

هنا الصح ان الشخص يتخيل نفسه صحي تماماً..وبيمارس حياته العادية زي ماهو بيحب..انما ما يفكرش انه معندوش المرض ده..عشان كده..ان شاء الله، مش هيجذب غيره !

Morris Goodman

أو الرجل المعجزة زي ما بيقولوا..الراجل ده يا جماعة وقع من طيارة وجسمه اتكسر، ونظره راح، ومبقاش فيه حتة سليمة..

الراجل ده لما قام جري وبقى طبيعي زي الأول – اه طبيعي -، سألوه ازاي..الدكاتره كانوا بيقولوا خلاص ده هيعيش طول حياته كده..!

قال حاجة بسيطة خالص..كنت بتخيل نفسي وانا خارج من باب المستشفى عادي..في كامل صحتي، قبل ليلة الكريسماس..وأقعد مع عيلتي وافرح معاهم ونعمل الي بنعمله كل سنة..!

على فكرة الراجل ده فعلا – بفضل الله ورحمته طبعا رغم انه غير مسلم – حقق الي كان بيتخيله ده..

مش مصدق كلامي صح؟

http://www.law-of-attraction-guide.com/morris-goodman.html

تقدر تتأكد من اللينك ده،

موريس جودمان ده واحد من أبطال فيلم The secret .. الي كشف للعالم قانون الجذب – رغم تحفظي على كلمة كشف لأني مؤمن ان قانون الجذب موجود في شريعتنا الاسلامية من اكتر من 1400 سنة -.. وواحد رغم انه عادي جدا..لكن يعتبر من أقوى الناس في العالم..استخداما لقانون الجذب..

فاكر لما قلتلك ركز في الجملتين دول كويس عشان هرجع أفكرك بيهم ؟

أفكرك بيهم :

1-    ما تقولش أنا نفسي ما أسقطش تاني..أنا نفسي ما يكونش عليا ديون..أنا نفسي ما أكونش عاطل.

2-    انا عايز انجح..أنا عايز يكون معايا فلوس كتير – وهنتكلم في الجزئية دي اكتر - ، أنا عايز اشتغل..

ليه قلتلك تركز عليهم؟

عشان ده موضوع الخطأ الي بعد كدة..

انك بتتعامل مع الهدف على انه حاجة..مش رغبة، وده بيعدم تحقق الهدف..ليه ؟

لأن عقلك الباطن لما بيشوفك بتبص على الهدف على انه حاجة..، بيعتبر على طول انها في نقص..يعني نفي..يعني لا..!

يبدأ يجذبلك عكس الي انت نفسك فيه ده..

لكن العكس..لو قولت أنا عايز..انا أحب يكون عندي كذا..يبقى بتعكس الحكاية..

حتى لو انت فعلا محتاج الحاجة دي..بس برده ما تقولش محتاج، وما تفكرش فيها على انك محتاجها..

Joe Vitale

بيقول في كتابه عن قانون الجذب، وان شاء الله هيتبعتلك قريب في الـNewsletter الخاصة بالموقع، بيقول ان أهم حاجة لجذب الأهداف اليك..

انك بعد ما تتخيلها وتفرح بوجودها كإنها موجودة فعلاً..أنك تـ:

To detach yourself from it ..

يعني تفصل نفسك عنها !!

إزاي، دانتا لسه بتقول نعيش كإن الهدف موجود فعلا وافرح كإني محققه..وتقولي تفصل نفسك عنها..!

تفصل نفسك عنها يعني ما تربطش حياتك بيها، ما تبنيش حياتك عليها، تقول انا عايز كذا وكذا..بس حياتي مش متوقفة عليه..انا عايزه عشان انا بحبه..انا عايزه عشان هفرح لما يحصل ان شاء الله، أنا عايزه عشان بالهدف ده..حياتي هتكون لذيذة..!

انما ما تقولش انا عايز مرتب في الشهر (...) عشان انا مصاريفي كتير ومش قادر اعيش بأقل من كدة..!!

العقل الباطن – والحمد لله – ما بيقدرش يميز الي بتقوله حقيقة ولا ايحاء – رغم تحفظي على تطبيق المبدأ على اطلاقه -، يعني ما تخافش انك لما تقول كدة ان مش هيوصل لعقلك الباطن غير كدة..

زي ما عقلك الباطن بيجبرك تشرب السجاير عشان وصله منك اقتراح انها مفيدة ليك..رغم اقتناعك – العقلي – انها مضرة..

صدقني..برده تقدر توصله كل الإقتراحات والرسائل..بالصورة الي انت تختار توصلها بيها..بمجرد انك تقولها وتسمعها بس..

بس..أسيبك مع المقالة الطويلة دي النهاردة..وأتمنى اكون ما طولتش عليك، وأتمنى ان شاء الله تكون استفدت منها، وأشوفك المقالة الجاية في الجزء الرابع والاخير من أخطاء تطبيق قانون الجذب.

قانون الجذب

أخطاء تطبيق قانون الجذب 2

July 27, 2011 — by فيصل عبد الواحد4

Question-Mark-Man.jpg
قانون الجذب
قانون الجذب

أخطاء تطبيق قانون الجذب 2

قانون الجذب

قانون الجذب

إزيك..

عامل ايه..

ايه أخبار الجذب معاك ؟

لو لسه حاسس ان في حاجات مش متظبطة معاك..يبقى اقرأ المقالة دي..

دي الجزء التاني من المقالة السابقة، أخطاء تطبيق قانون الجذب.

خلصنا في الجزء الاول..خطأ إزاي..والخطأ ده مرتبط جدا بالخطأ الي هتكلم عنه الوقتي..

التشكيك..

بس ده أخطر من الخطأ الي فات..ليه؟

لإن هنا، ما بتاخدش حتى الخطوة في انك تفكر في تحقيق الهدف..

يعني ايه برده..

يعني في الصورة السابقة من أخطاء تطبيق قانون الجذب..خطأ "إزاي".. كنت بتفكر في هدف وتحطه، وبعد ما تفكر في تحقيقه..كنت بتقول لنفسك..إزاي !

إزاي أنا هعمل كدة..

واتكلمنا عن الموضوع ده، لكن هنا، الشخص بيشكك اصلا في انه يحط الهدف لنفسه !!

مثال مثلا..

يا سلام لو يبقى معايا فلوس كتير..ياه، دانا هعمل وهعمل وهعمل..لحد كده انت ماشي صح..

وتقوم قايل لنفسك..بس استحالة طبعا..أنا يكون معايا المبلغ ده كله..

هقولك على حاجة لطيفة جداً..

في أمريكا، عملوا بحث جميل أوي، نزلوا اعلانين في أشهر جريدة في أمريكا، نيويورك تايمز، لوظيفة واحدة..

بس كتبوا في اعلان ، الراتب الشهري 18 ألف دولار، وفي الإعلان التاني، 120 ألف دولار..في الشهر..!

اعلانين، لنفس الوظيفة، بنفس المسمى، لكن لشركتين مختلفتين..

لقوا ان الإعلان الي مكتوب فيه الراتب الشهري 18 ألف دولار، اتقدمله ناس 3 أضعاف الي اتقدموا للإعلان التاني..!

الناس للأسف عندها رغبة في انها ما تقدرش نفسها، ازاي يعني اخد 120 ألف دولار في الشهر..ليه يعني..اكيد غلطة !

ما تشككش في نفسك وفي حقك، وترجع تقول انا مظلوم في الدنيا دي ليه..

المفروض الوقتي تكون بالفعل حددت انت عايز ايه..

والمطلوب منك الوقتي، ما تشككش في نفسك، مالكش دعوة الي انت عايزه ان شاء الله هيتحققلك ازاي، مالكش دعوة هتجذبه ليك ازاي..

حاجة مضحكة جدا فينا كمصريين، ان دايما بعد الخبر الحلو، بعد ما نفرح..

نقول "خير اللهم اجعله خير".. بنهيأ نفسنا خلاص للخبر الوحش الي هييجي عشان لسه كنا بنضحك..!

اهو ده، صورة من أقوى صور قانون الجذب في حياتنا..عشان كده في معظم الحالات دي..لازم هتلاقي خبر وحش بعد الخبر الحلو على طول..

عشان انت اتبرمجت على كدة..

في ناس لما بتقوم من النوم الصبح، تحس بالنشاط والسعادة..تقول خير اللهم اجعله خير..اليوم ماله مش طبيعي ليه من أوله كده ..!

هيأ نفسك للفرحة..هيأ نفسك للسعادة، اضحك، افرح، عيش كل لحظة حلوة في حياتك وما تستناش حاجة بايخة تحصلك بعدها..

غريبة فعلا، الناس تقول خير اللهم اجعله خير، ولما ييجي الخبر الوحش..تقول ليه بس هو انا كنت عملت ايه عشان ده كله !!

وهقولك على حاجة جميلة كمان..

عارف ايه أول حاجة تقدر بيها تظبط قانون الجذب..وتظبط بيها حياتك عامة..؟

تظبيط مواعيد النوم !

اه..انت قرأت صح..

تظبيط مواعيد النوم..

لو انت بتقرأ المقالة دي الوقتي وانت بقالك 3 أيام ما نمتش..هتقول لنفسك الآتي:

"كلام جميل..انا فعلا حصلي حاجات شبه الكلام ده قبل كده..خلاص انا نويت اطبق الكلام ده من بكره ان شاء الله عشان مش قادر اعمل اي حاجة الوقتي.."

وتنام، وتصحى في نفس المعاد، وتلاقي اليوم راح منك، وفي نفس الوقت مطلوب منك تعمل حاجات تانية كتير – انت – شايف انها أهم من قانون الجذب..

ظبط مواعيد نومك عشان تظبط حياتك..أما تصحى الصبح يبقى قدامك اليوم كله تقدر تعمل فيه الي انت عاوزه..هتفرق معاك كتير..جرب تقرأ المقالة دي مرتين، مرة وانت صاحي الصبح كلك نشاط وطاقة..ومرة وانت عايز تنام ومش قادر تفتح عينك..وشوف هتفرق معاك ولا لأ..

 

بس..أسيبك مع المقالة دي النهاردة..

ونكمل باقي أخطاء تطبيق قانون الجذب المقالة الجاية ان شاء الله..

 

 

قانون الجذب

أخطاء تطبيق قانون الجذب

July 27, 2011 — by فيصل عبد الواحد9

question-mark-guy-red.jpg
قانون الجذب
قانون الجذب

طب لما قانون الجذب سهل كدة، ماحنا ياما اتخيلنا اهداف واحنا صغيرين..

ده عشان كلنا، كنا بنقع في أخطاء قانون الجذب، أخطاء كلنا كنا بنعملها، قبل ما نعرف يعني ايه قانون الجذب..

أخطاء تطبيق قانون الجذب كتير عشان كده هنقسمها على أكتر من مقالة ان شاء الله

أول حاجة، في حاجات كنا بنعملها واحنا صغيرين، مفروضة علينا، يعني لازم تجيب مجموع كويس ، لازم تدخل كليب طب، فده ماكانش هدفنا احنا، كانت أهداف معروضة علينا، فكنا عشان كده، مش قادرين نحس بالفرحة المطلوبة لتحقيق الهدف ده، وده مرتبط بخطأ تاني هنتكلم عنه الوقتي..

تاني حاجة، ان واحنا كنا بنتخيل زمان الي عايزين نعمله، كنا بنتخيل بس، بنفكر بس..وده مش كفايه، بالعكس، كده يعتبر التفكير مالوش لازمة، لكن الصح، التفكير، مع الإحساس..يعني ايه؟

يعني تحس بالفرحة، المصاحبة للهدف لما يتحق..

يعني لو كان الهدف مثلا انك يكون معاك 100000 جنيه، ما بتحسش بالفرحة الي هتحس بيها لو فعلا معاك ال100000 جنيه، ما بتشوفش نفسك وانت بتصرف الفلوس دي، ما بتحسش فرحتك وانت ماشي بتعدي على محل موبايلات، تشوف موبايل عجبك تدخل تشتريه، عشان في جيبك فلوس كتير..

فدايما اما بتتخيل أي هدف، وتمزج الإحساس ده مع الفرحة المصاحبة ليه، كإن الهدف فعلا اتحقق، قوة جذبك للهدف ده بتتضاعف 50 مرة..

يعني تخيل معايا، لو قوة جذبك ليها قيمة معينة، بتجذب بيها هدفك في وقت معين..فالقيمة دي هتتضاعف 50 مرة، و الوقت ده هيقل بمقدار 50 مرة، يعني لو هتجذب الهدف في خمسين يوم بقوة جذبك، هتجذبه في يوم واحد..

كمان خليني اسألك سؤال، دايما لما كنت بتحط هدف قدامك، عشان تعمله..أول سؤال كنت بتسأله لنفسك كان ايه..؟

اه بالظبط..كنت بتسأل نفسه..إزاي ؟

إزاي هعمل كدة

إزاي هشتري العربية الي بحبها

ازاي هيبقى دخلي في الشهر (...) وأنا لسه طالب، وأنا ما بشتغلش، وانا حتى مديون..صح ؟

خليني اسألك برده..لما اتنين..قالوا احنا عايزين نطير..

كان وقتها على فكرة الفيزياء وقوانينها لسه في تطورها..لما اتنين قالوا احنا هنتحدى جاذبية نيوتن..ونطير..

ماكانوش يعرفوا ازاي..

دول كانوا اتنين بيصلحوا العجل..الدراجات يعني..!

لكن بدأت عندهم بإيه..؟

لأ، مش بفكرة..

بدأت برغبة..بدأت بإحساس..

عايزين نطير..

الأخوين رايت .

قانون الجذب لو جيت تتبع قصص حياة كل العظماء، هتلاقيهم اتكلموا عنه بصورة أو بأخرى، ولو شوفت فيلم

The secret

هتتاكد من كدة، هتتأكد ان كل العظماء قالوا اقوال مأثورة، اتكلموا فيها عن قانون الجذب..

المهم..مالكش دعوة بإزاي..

مش عايز منك، أو بمعنى أصح، ما تعوزش من نفسك، أكتر من انك تكون عايز..!

يعني ببساطة أكتر..عايزك تشوف، انت عايز ايه فعلا، انت ايه رغبتك..

ومالكش دعوة بالظروف الي حواليك..

مالكش دعوة لو الناس قالتلك ابقي قابلني، أو اتريقت عليك..

اديسون أساتذته قاله عليه غبي..

واتطرد من كل شغلانة اشتغلها ، كل مديرينه قاله عليه

Not productive !

غير منتج..مالوش لازمة..!

النهاردة..عايزك تجيب ورقة وقلم..وتقعد مع نفسك

وتكتب..

أنت، عايز ايه .

قانون الجذب

قانون الجذب

مقدمة عن قانون الجذب

July 27, 2011 — by فيصل عبد الواحد3

successz.jpg

قانون الجذب
قانون الجذب

قانون الجذب

 

هذه المقالة مقالة تمهيدية عن قانون الجذب، تابعونا لتعرفوا المزيد

الأول..يعني ايه قانون الجذب ؟

الأول..قانون الجذب مالوش علاقة بقانون الجاذبية الخاص بنيوتن، رغم ان الاتنين يتشابهوا في انهم قانونين من قوانين الكون..يعني مش معنى اني لو قولت انا لا اؤمن بالجاذبية، وطلعت فوق برج 20 دور ورميت نفسي من فوقه..مش هقع !

فمش معنى انك تقول "أنا لا اؤمن بقانون الجذب" ان حياتك مش هتتأثر بيه، سواء باللي انت عايزه، او باللي انت حتى مش عايزه..!

خلينا قبل ما نبدأ نتكلم عن قانون الجذب، نبدأ ناخده من منطلق اسلامي نوعا ما..، في حديث جميل جدا، حديث قدسي، بيقول:

"أنا عند ظن عبدي بي، إن خير فخير، وإن شر فشر"،

وحديث قدسي تاني، بيقول:

"لا تسبوا الدهر، فأنا الدهر.."

لو جينا نربط بين الحديثين..هنلاقي دي فكرة قانون الجذب..عشان كدة انا دايما بقول ان قانون الجذب اصلا موجود في شريعتنا الاسلامية، لكن ماحدش كان يتوقع انه ممكن يبقى بالبساطة دي، وبالقوة دي في نفس الوقت.

فقانون الجذب ببساطة، انك انت بتجذب ليك، كل الي بتفكر فيه، الأفكار الوقتي، التخيلات الوقتي الي بتسيطر عليك وأكتر مشاهد بتشوفها و بتحسها، هتلاقي طريق ما تظهر بيه في حياتك، بمعنى أبسط..

انت بتجذب ليك ، كل الي انت عايزه، وكمان الي انت مش عايزه.

يعني، لما انت بتفكر في فكرة سلبية مثلا..تشوف نفسك في منظر الضحية..او تحس نفسك ان كل الناس ظالماك وانك مظلوم من أقرب الناس ليك..ما تتوقعش انك هتلاقي غير ده، دايما هتلاقي نفسك بعيد عن الناس..!

كنت أعرف واحد بيشكيلي مرة بيقولي، أنا ليه كل ما أروح أي حتة لازم تحصلي مشكلة، ليه بتخانق كتير، انا ما بحبش الخناقات والله بس الناس الي بتستفزني..فلما سألته، انت ايه اكتر حاجة بتتخيلها لما بتقعد مع نفسك..،قالي بتخيل اني بضرب الناس وبعمل الحركات الي بشوفها في التليفزيون وبضرب 10 لواحدي وبدافع عن صحابي وهما بيتضربوا..!!

دايما الفكرة الي انت بتفكر فيها مش هتجيلك بنفس الشكل الي بتفكر فيه، لأ..

هتجيلك مضاعفة، مش هتجيلك بنفس الصورة الي انت متخيلها، يعني هتجيلك على الأقل، مضاعفة مرتين..وده مرتبط بحاجة اسمها قوة الجذب هنتكلم عنها مرة تانية.

ودي رغم انها حاجة خطيرة، بس برده حاجة جميلة جدا، عشان انت ممكن تستغلها لصالحك.

وحتى عشان كدة، في أي كورس للثقة بالنفس، المدربين دايما يبدأوا بحاجة اسمها الـ

Self-Image

أو انطباعك انت عن نفسك..بيطلبوا من كل المتدربين انهم "يتخيلوا" نفسهم دايماً في مظهر الشخص الواثق في نفسه، ويشوفوا نفسهم هيمشوا ازاي وهيتكلموا ازاي..

وجرب تسأل حد ثقته في نفسه ضعيفه – انت دايما شايف نفسك ازاي – او ايه اكتر حاجة بتحسها لما تقعد لواحدك..هتلاقيه دايما شايف نفسه ضحية الآخرين..المظلوم، الي الناس كلها بتيجي عليه وهو بيستحمل..ودايما يعمل الخير ويتردله الشر، ومش لاقي رد الفعل الي المفروض يلاقيه عشان هو طيب و بيعمل كل الخير..

عشان كده، أول خطوة في بناء الثقة في النفس..هي

Creating a new self-image

عشان ما نخرجش بره الموضوع..

عايزك الوقتي ما تحاولش تتخيل الا كل شيء انت بتحبه..شوف نفسك غني، شوف نفسك راكب العربية الي انت بتحبها، شوف نفسك مع الشخص الي انت بتحبه، شوف حد عزيز عليك وربنا شفاه بفضله من مرض حتى لو كل الدكاترة قالوا نسبة شفاءه صفر..!

خلي ثقتك بالله أعلى من أي حاجة تانية..

بس الاهم مش بس تتخيل، الأهم، تحس بالفرحة المصاحبة لتحقيق الهدف ده..تحس ان فعلا الي انت بتتخيله حصل..وتحس بالفرحة الي هتحصلك لما يحصل، كإنه حصل فعلاً.

حس بملمس الفلوس في ايدك، وانت شايف ورق ال100 كتير في ايدك وبتعده عشان تروح تشتري لابتوب جديد، شوف شكلك في مراية العربية الي انت بتحبها، وانت راكبها، وجمبك حد بتحبه..شوف نفسك وانت بتشوف درجات امتحاناتك وبتهيص مع اصحابك وتفرح، انك جيبت امتياز..

طب لما الحكاية سهلة أوي كدة..ماحنا ياما اتخيلنا حاجات، بس ماكنتش بتحصل..

على فكرة، لأ كانت بتحصل، بس مش كلها، كل حاجة كانت بتحصل منها أول جزء بسيط منها، وبعدين تختفي..ليه؟

ده الي هنعرفه ان شاء الله رب العالمين، في المقالة القادمة، بعنوان:

أخطاء تطبيق قانون الجذب

هل تريد متابعة شخصية مني للوصول لهدفك النهائي بإذن الله ؟
مجاناً
إذاً أكتب إيميلك بالأسفل و اضغط "أريد الاشتراك" لتصلك أول خطوة فوراً
! تم الاشتراك - رحلة ممتعة
ابحث عن رسالة في مجلد الرسائل الغير مهمة إذا لم تصلك بعد
Close